40
इस्राएली आन थुं बारपाइश्शो
1 इन परमप्रभुमी “आं मुर आन कली लेम्दीन, लेम्दीन। 2 यरूसलेम कली आ थुं बारपाइक्तीके लोव़ पने। आ श्येत नुप्त। आ मरिम्शो पशो क्याम्शो बाक्ब। मारदे हना परमप्रभु यावे रे पा आ मरिम्शो पशो आ पर्बम निक्शी खेयप सजाइ ताप्तु” देंत। होसे २:१६; येरमीया १६:१८
3 मिनु ब्रेप्ब मुर आ सेंदा कामी “मुर मबाक्तीकेमी परमप्रभु यावे आ लां सेलीन। गोरशो रागीमी इं परमप्रभु कली लां रिम्शो पा फुल्लु ग्रोक्शा थेलीने। लूका ३:४-६; यूहन्ना १:२३ 4 बेंसी नेल्ले ग्येत्थ पोक्चा पुंइसीनीम। डांडा नु पहाड फ्रेम्चा पुंइसीनीम। दिंम मदुम्शो बाक्तीके दिंम दुम्चा माल्ब। फुल्लु बाक्तीके रिम्शो दुम्चा माल्नीम। यसैया ४९:११ 5 मेना परमप्रभु यावे आ छेङछेङ ग्रूब। मेको मुर नेल्लेम ताइनीम। मारदे हना परमप्रभु यावेमी एको लोव़ देंशो बाक्ब” दे लोव़ पाप्तु।
6 मिनु लोव़ पाइब कामी आं कली “शेंदो” देंत। मिनु गो “मार शेंनुङा?” दे हिल्लो पाता। मिनु मेकोमी “मुर नेल्ले घांस खोदेंशो बाक्नीम। मेको आन दारस नेल्ल रू ङा फू खोदेंशो बाक्ब। भजन संग्रह ९०:५-६; याकूब १:१०-११ 7 घांस सोव़ब, मिनु आ फू हेम्ब। मारदे हना परमप्रभु यावेमी मेको आन कली मुइक्ब। मुर थमा पा घांस खोदेंशो बाक्नीम। 8 घांस सोव़ब, आ फू हेम्ब। तन्न आंइ परमप्रभु आ लोव़ गेना हना यो लीब” देंत। भजन संग्रह ११९:८५; लूका २१:३३ 9 “गे ठेयब डांडा ङोंइसीन। सियोन रिम्शो लोव़ कुरब बाक्ब। ठेयब सेंदा पा शेंदो। यरूसलेम रिम्शो लोव़ कुरब बाक्ब। महिंथु, ठेयब सेंदा पा शेंदो। यहूदा सहर ङा मुर आन कली ‘इन परमप्रभु एकेर बाक्ब’ देनो। 10 कोव़ङीन, परमप्रभु, परमप्रभु यावे सक्ति पाइश्शो दुम्शा जाक्ब। मिनु हुकुम पाइब। आ इनाम आ नु बाक्ब। आ गेतीके आ ङोंइती बाक्ब। यसैया ६२:११ 11 आ बगाल कली गोठलाम खोदेंशो पा योव़ब। मेकोमी आ पाठा पाठी आन कली मुप्शा कुरब। दूध तुंइब आन कली आन चाप्चा ङा पा गाक्पाइश्शा खुल्ब। यूहन्ना १०:११
परमप्रभु यावे आ पशो
12 सुमी ब्वाक्कु नेल्ल आ योलम पुक्गा? सुमी सरीङ बित्ताम थाप्ता? सुमी रागी ङा फुरक पुक्तीकेम पुक्गा? सुमी डांडा आन कली नाक्शा, पहाड आन कली नाक्तीक तारी वोदा? 13 परमप्रभु यावे आ सोक्त कली सुम शेंदा? आ कली अर्ती गेब सु बाक्बा? रोमी ११:३४; १कोरिन्थी २:१६ 14 सुम मेको कली मेको नेल्ल रुप्चा कली अर्ती गेवा? सुम मेको कली ठीक निसाफ पचा कली शेंदा? 15 रागी रागी ङा मुर नेल्ले चिरशो गर ङा लीशो ब्वाक्कु खोदेंशो नु नाक्तीकेम लीशो फुरक खोदेंशो बाक्नीम। टापु आन कली फुरक खोदेंशो पा बेरपाइक्ब। 16 लेबानोन ङा ब्वाकी ङा शी मी मुइक्चा कली मगारब। मेकेर ङा जन्तुपुकी चोशा चढ़ेचा कली मजाक्दीत्नीम। 17 रागी रागी ङा मुरपुकी मेको आ ङोंइती मारेइ मनम। मेको श्येत्थ नु मारेइ मबाक्शो बाक्नीम, दे मिम्ब।
18 मिनु गे परमप्रभु कली सु नु थाप्नीनी? मिनु सु आं नेक्था वोइक्ने चाप्नीनी। यसैया ४६:५; प्रस्थान २०:४; प्रेरित १७:२९ 19 मूर्ति का? मूर्ति चेम्बमी मूर्ति कली यपाइक्ब। सुन चेम्बमी मेको सुनम ख्रुम्ब। मेको कली चांदी के साङली सेल्ब। 20 का निक्शीमी कोसेली गेचा कली बोल्यो, मराक्चा ङा शी योव़नीम। शी के गेय पाइब जोक्ब मुर का माल्ब। मिनु मेकोमी महिक्सीचा ङा पा मूर्ति सेल्पाइक्ब।
21 गेपुकी मतुइक्तीनी, मनेंनी? ङोंइती रे इन कली मशेंदमे? रागी सेल्चा रे गे मरुप्नी? 22 एको रागी नेल्ल आन तार बाक्ब, मेकोन बाक्ब। रागीम बाक्बपुकी माले खोदेंशो बाक्नीम। मेकोमी सरीङ कली वा खोदेंशो पा प्राक्ब। मिनु मेको मुर आन कली ताम्बु खोदेंशो दुम्ब। 23 मेकोमी सासन पाइब आन कली शोर गाक्शो सेल्ब। हुकुम पाइब जाम्शा लाइनीम।
24 मेकोपुकी का निक्शी ला शोक्सीशो बाक्नीम। का निक्शी ला ख्रुम्सीशो बाक्नीम। शाक्श थोक्ची ना दुम्मेनु, मेको आन तार मुइक्ब। मिनु मेको बेक्नीमी। मिनु फश गिवारमी पराल खोदेंशो पा योल्ब। 25 आं कली सु नु थाप्नीनी। मिनु गो नु उइक्थ सु बाक्बा?” दे का ला बाक्शो परमप्रभुम देंत। 26 गेपुकी ग्येत्थ कोव़ङीन। मेको आन कली सुम सेला? मेकोमी शुश राप्पाइश्शा, मेको आन कली हिक्ब। मेको आन नें थिशा, ब्रेप्ब। मारदे हना मेको आ ठेयब सक्तिम पतीके का यो मजाम्नीम। भजन संग्रह १४७:४; उत्पत्ती १:१४-१८
27 गे मारदे ए याकूब, देंनीनी? इस्राएलीपुकी “मारदे आं लां परमप्रभु यावे, आं परमप्रभु आ ङोंइती ख्रुइश्शो बाक्ब देंनीनी?। मारदे आं कली पशो दूली निसाफ मतुइक्ब” देंनीनी? 28 मिनु “मार, गे मतुइक्तीनी, मनेंनी? परमप्रभु यावे गेना हना यो बाक्ब परमप्रभु बाक्ब। मेको रागी रागी कली सेल्ब बाक्ब। मेको मथाइब नु मदाइब। आ तुइक्तीके नेल्ल क्येङा ठेयब बाक्ब। 29 मेकोमी दाइब आन कली बोल गेब। मचाप्ब आन कली सक्ति गेब। 30 ठिटापुकी यो दशा थाइनीम। मिनु मचाप्थु गोल्नीम। 31 तन्न परमप्रभु यावे आ लां कोव़बपुकी नक सक्ति ताइनीम। ककाकुली खोदेंशो पा आन फ्रां प्राक्शा बेरशा ग्येत्थ लाइनीम। मेकोपुकी दोरशा, मदाइनीम। गाक्शा यो मथाइनीम” देंत। भजन संग्रह १०३:५