4
देबोरा नु बाराक
1 एहूद बेक्म नोले इस्राएलीपुकीमी लेंशा परमप्रभु यावे आ ङोंइती मार मरिम्शो बाक्मे, मेको पामे बाक्त। 2 मोपतीके परमप्रभु यावेमी मेको आन कली हासोरमी सासन पाइब कनानी आन पिप याबीन आ गुइमी गेवा बाक्त। मेको आ लडाइ पाइब आन ठेयब मुर सीसेरा माइश्शो बाक्माक्त। मेको हरोशेथ-हा-गोयीममी बाक्माक्त। यहोसु ११:२ 3 मिनु लेंशा इस्राएलीपुकीमी परमप्रभु यावे कली “वारच पाइय्यीकी” दे थोव़मे बाक्त। मारदे हना सीसेरा के ९ सहे फलाम के बग्गी बाक्तेक्म। मिनु इस्राएली आन कली २० बर्स सम्म शुश श्येत गेशा, दिप्शा वोइश्शो बाक्माक्त।
4 मेना लप्पीदोथ आ मीश, देबोरा इस्राएली आन कली निसाफ पाइब दुम्शो बाक्माक्त। मेको परमप्रभु यावे आ लोव़ पाइब यो बाक्माक्त। 5 मेको एफ्राइम ङा पहाडी रागी, रामाह नु बेथेल आ दातेमी बाक्शो देबोरा आ खजूर रवा आ पुंमी बाक्शो बाक्माक्त। मिनु इस्राएलीपुकी निसाफ पुंइथ मेक जाक्मा बाक्त। उत्पत्ती ३५:८ 6 मेकोमी अबीनोअम आ तौ बाराक कली नाप्ताली ङा केदेश सहर रे ब्रेत्थ सोइक्ता बाक्त। मिनु मेको कली परमप्रभु यावे, इस्राएली आन परमप्रभुम इ कली “गे लशा, नाप्ताली नु जबूलून आस थर ङा १० हजार मुर आन कली योव़शा, मेको आन कली ताबोर डांडामी पिश्शा पिवो। यहोसु २१:३२ 7 गो चहिं याबीन आ लडाइ पाइब आन कप्तान सीसेरा आ मुर नु आ बग्गीपुकी ग्रुंइशा, किशोन खोला आ नेक्था चाक्नुङ। मिनु इन गुइमी गेनुङ” दे मदा बाक्त। 8 मिनु बाराकमी देबोरा कली “गे गो नु लाइतीनी हना, गो लाइनुङ। गे गो नु मलाइतीनी हना, गो मलाइनुङ” दे लोव़ लेत्ता बाक्त। 9 मिनु देबोरामी “थमा पा, गो गे नु लाइनुङ। तन्न एको ठेयब गेय आ ततीक मान गे मताइनेवे। मारदे हना परमप्रभु यावेमी सीसेरा कली मीश मुर का आ गुइमी गेशो बाक्ब” देंमाक्त। मिनु देबोरा बोक्शा ङा मिन बाराक नु केदेश सहरमी लमाक्त। 10 बाराकमी जबूलून नु नाप्ताली आस थर ङा मुर आन कली केदेश सहरमी ब्रेत्ता बाक्त। मोपा १० हजार लडाइ पाइबपुकीमी मेको आ नोले खोदमे बाक्त। मिनु देबोरा मेको नु लमाक्त।
11 मिनु केनी ङा मुर, मोसा आ शिउ होबाब आ चच युइ बाक्मा बाक्त। केनी हेबेर चहिं केनी आन दाते रे ब्राशो बाक्माक्त। मोपा ब्राशा, केदेश सहर आ नेक्था एलोन-बे-सा-अनानीममी बाक्शो ठेयब रवा आ नेक्था जाक्दीश्शा, आ ताम्बु कीशा बाक्शो बाक्माक्त। न्यायाधीस १:१६; गन्ती १०:२९
12 मिनु सीसेरामी अबीनोअम आ तौ बाराक ताबोर डांडामी लशो बाक्ब देंशो नेना बाक्त। 13 मिनु सीसेरामी आ ९ सहे फलाम के बग्गी नु आ लडाइ पाइब आन कली हरोशेथ-हा-गोयीम रे किशोन खोलाम खुप्ता बाक्त।
14 मिनु देबोरामी बाराक कली “बोक्को, मुलाक्त परमप्रभु यावेमी सीसेरा कली इ गुइमी गेशो बाक्ब। परमप्रभु यावे इ ङोंइती मगाक्बा ङा?” देंमाक्त। मोपतीके बाराक नु आ १० हजार लडाइ पाइब ताबोर डांडा रे ब्रुम्मा बाक्त। 15 मिनु परमप्रभु यावेमी सीसेरा नु आ बग्गी नेल्ले, आ लडाइ पाइब नेल्ल बाराक नु ब्रुपदा बाक्त। सीसेरा चहिं आ बग्गी रे तोइश्शा प्रोक्माक्त। न्यायाधीस ५:२०; उत्पत्ती ३५:५; प्रस्थान २३:२७; ब्यवस्था २:२५; यहोसु २:९-११ 16 मिनु बाराकमी बग्गीपुकी नु लडाइ पाइब आन कली हरोशेथ-हा-गोयीम सम्म खेदा पा, सीसेरा आ लडाइ पाइब नेल्ल आन कली तरवारमी क्योरशा सदा बाक्त। का यो ब्रोंइचा मतामे बाक्त। 17 सीसेरा चहिं खोइलीमी प्रोक्ना प्रोक्न, केनी हेबेर आ मीश याएल आ ताम्बुमी जाक्माक्त। मारदे हना हासोर ङा पिप याबीन नु केनी हेबेर ङा मुरपुकी लडाइ मपथु, वारच दुम्शो बाक्मा बाक्त। 18 मिनु याएल सीसेरा कली ग्रुम्चा, दे लाङगा ग्रूमाक्त। मिनु मेकोमी “हजुर ओव़ङीन। महिनीन” देंमाक्त। मिनु सीसेरा ताम्बु आगा ओव़माक्त। मिनु याएलमी मेको कली ख्रुइश्शा, वाम सुमा बाक्त। 19 सीसेरामी याएल कली “आं कली ब्वाक्क तूचा गेन। गो साप्पा तूतू दाक्ती” देंमाक्त। मिनु मेकोमी दूध वोइश्शो बोस का ग्रुंइशा, मेको कली तूचा गेवा बाक्त। मिनु मेको कली वा फेक्ता बाक्त। 20 मिनु सीसेरामी मेको कली “ताम्बु आ लाप्चोमी राप्शा बाक्को, सुइ जाक्शा ‘एकेर सुइ मुर जाक्मा?’ दे हिल्लो पाम्तेक्म हना, मजाक्म देनो” देंमाक्त। 21 तन्न हेबेर आ मीश याएलमी थात्ला का नु ताम्बु ङा किला का लाइश्शा, निन्द्रा पशो सीसेरा आ नेक्था लमाक्त। मिनु याएलमी सीसेरा आ पियामी खप सम्म ग्रुक्चा ङा पा किला थोक्ता बाक्त। मिनु शुश दशा, निन्द्रा पा बाक्शो, सीसेरा बेक्माक्त। 22 मिनु बाराक सीसेरा कली खेदा पा मेक जाक्माक्त। मिनु याएलमी मेको कली ग्रुम्शा “ओव़ङीन, गो इन माल्शो मुर इन कली कोंइनुङ” देंमाक्त। मिनु बाराक मेको नु ताम्बु आगा ओव़माक्त। मिनु सीसेरा आ पियामी किला ग्रुक्शा बेक्शो तवा बाक्त। 23 मेको नाक्ती परमप्रभुमी कनान ङा पिप याबीन कली इस्राएलीपुकी नु ब्रुपदा बाक्त। 24 मिनु इस्राएलीपुकीमी कनानी पिप याबीन कली शुश श्येत गेशा, मसदमे सम्म श्येत गेमे बाक्त।