6
यरूसलेम कली पुम्शो
1 परमप्रभु यावेमी “बेन्यामीन आ आलपुकी ब्रोंइशा बाक्चा कली यरूसलेम रे प्रोक्कीन। तेकोहा सहरमी तुराही ताप्पीन। बेथ-हक्केरेम तार चिन्ड कोंइशा वोतीन। मारदे हना उत्तर रे मरिम्शो पतीक नु खतम दुम्तीके यिशो बाक्ब। आमोस १:१; येरमीया १:१४ 2 सियोन सहर दारशो योव़तीके खोदेंशो बाक्ब। तन्न सियोन आ तमी क्याम्चा पुंइसीब। 3 गोठला आन हुल सुन्दा मेको नु लडाइ पचा कली जाक्नीम। मेकोपुकीमी आन ताम्बु आ एर ओंथ कीनीम। मिनु नेल्लेम मेको आन हुल योव़शा खतम सेल्नीम” देंशो बाक्ब। येरमीया ४:१७ 4 मिनु मेकोपुकीम “मेको नु लडाइ पचा कली ठीक दुमीन। बोक्कीन। गोपुकीम नाक्त उइक्थ दुम्मेनु, मेको कली लडाइ तोय। नाक्ती लाक्ना लाक्न बाक्ब। नाक्दो ङा वांकु लाइश्शो दुम्ना दुम्न बाक्ब। 5 बोक्कीन। गो नाक्दो मेको कली लडाइ तोय। मिनु मेको आ दरवार प्रेय्य” देंनीम। 6 मुर नेल्ल आन परमप्रभु यावेम “मेको आ रवापुकी क्योरशा तिमीन। मिनु यरूसलेम ङा गारो ङोइक्तीक सेलीन। मेको सहर कली सजाइ गेचा माल्ब। मेको सहर मरिम्शो पतीकेम ब्रीशो बाक्ब। 7 इनारम दोपा आ ब्वाक्कु बारपाइक्बा, मोपा मेकोमी आ परमप्रभु यावे आ अरेशो मटितीके बारपाइक्ब। मेको आ आगाम काइ मरिम्शो पतीक नु मारेइ मारेइ खतम पोक्तीक आ पर्बम लोव़ नेंसीब। मेको आ रोइ नु आ सेल्शो गार गेना हना यो आं ङोंइती बाक्नीम। 8 गे यरूसलेम, एको इ कली अरेशो मपाप्तीवी हना, गो इ कली तशा ग्रांग्रा दिशा प्रोंइनुङ। गो इ कली गोरशो नु मुर मबाक्शो सेल्नुङ” देंत।
9 मुर नेल्ल आन परमप्रभु यावेमी मार देंत, देंशा हना “गे अङगुर रिम्शो पा सिला पशो खोदेंशो पा इस्राएल ङा लीशो मुर आन कली सिला पने। अङगुर सेक्ब मुर खोदेंशो पा राशी ग्याइश्शा, फल सिला पने।
10 गो सु कली लोव़ पा हिंच कोंइदु? आं लोव़ सुम नेंबा? मेकोपुकीम नेंने मचाप्नीम। मेको आन नोफा सुशो बाक्नीम। परमप्रभु यावे आ लोव़ आ पर्बम गाइक्नीम। मेको नेंचा मदाक्नीम” देंत। येरमीया ४:४; प्रेरित ७:५१ 11 तन्न गो परमप्रभु यावे आ गाइक्तीकेम ब्रीशो बाक्नुङ। गो मेको हेरा तेक्ने मचाप्नुङ। मिनु मेकोमी “मेको लां मेर गाक्ब आल आन तार मोतो। बुक्शा बाक्शो ठिटा आन तार मोतो। मीश वोंइश निम्फा लाइक्चा पुंइसीनीस। खाल्पा नु खूशो लाइक्चा पुंइसीनीम। 12 मारदे हना गो आं गुइ मेको रागीम बाक्ब आन तार दिंनुङ, मेको आन खिं अर्को आन के दुम्नीम। आन रू नु आन मीश यो अरु आन के दुम्नीम” दे परमप्रभु यावेम देंत।
13 परमप्रभु यावेमी “नेल्ल क्येङा आइक्च मुर रे नेल्ल क्येङा ठेयब सम्म ठीक पा मचेम्शो क्येट तचा कली शिंम दुम्शो बाक्नीम। परमप्रभु यावे आ लोव़ पाइब रे चढ़ेब सम्म नेल्ल जोल पाइब दुम्शो बाक्नीम। येरमीया ८:१०-१२; इजीकीएल १३:१०-१६; १थिस्सलोनिकी ५:३ 14 मेकोपुकीमी आं मुर आन कली ममिम्थु, आन गार सापाइक्खु पशो बाक्नीम। मेकोपुकीमी थुं नाइक्तीक मबाक्त हना यो ‘नांइसीन, नांइसीन’ देंनीम। 15 मेकोपुकीमी मुने दोक्चा ङा गेय पाम्तेक्म। ग्रांग्रा दिशो गेय पाम्तेक्म। तन्न मेकोपुकी मुने मदोक्म। मुनेम लल जिचा देंशो मार, बाक्बा, दे मतुइक्तेम। मोपतीके साइक्चा पुंइसीशो आन दातेमी साइक्चा पुंइसीनीम। गो मेको आन कली सजाइ गेङानु, मेको खतम दुम्नीम” दे परमप्रभु यावेमी देंत। 16 मिनु परमप्रभु यावेम मार, देंत देंशा हना “लां ब्रातीकेम राप्शा कोव़ङीन। माइत लां आ पर्बम हिल्लो पने। मेको रिम्शो लां ते बाक्बा, दे हिल्लो पने। मिनु मेको लांमीन गाक्कीन। मिनु इन थुं नाइक्चा ताइनीनी। तन्न मेकोपुकीम ‘गो मेक मगाक्नीकी’ देंनीम। मत्ती ११:२९ 17 गो इन कली खाल पाइबपुकी योव़तामी। मिनु गो इन कली ‘तुराही ताप्शो नोफा दाइश्शा नेनीन’ देंती। तन्न मेकोपुकीम ‘गो मनेंनीकी’ देंतेक्म। 18 मोपतीके गे रागी रागी ङा मुर नेनीन। बुक्तीक ङा मुर नेल्लेमी मेको आन कली मार, दुम्बा, दे तुइक्तीन। 19 रागी नेल्ल नेनीन। गो एको मुर आन कली ठेयब श्येत चाक्नुङ। मेको श्येत आन पशो आ पा ङा बाक्ब। मारदे हना मेकोपुकीमी आं पचा देंशो लोव़ मपामे। मिनु आं शेंशो लोव़ काइ मटीम। यसैया १:२ 20 गो शेबा रे चाक्शो धूप ममाल्नुङ। ङोन रागी रे चाक्शो बिक्च यो ममाल्नुङ। गो इन चोशा चढ़ेशो मब्राइनुङ। गो इन क्योरशा चढ़ेशोम मग्येरनुङ” देंत। भजन संग्रह ४०:७; यसैया १:११-१५ 21 मोपतीके परमप्रभु यावेम मार, देंत देंशा हना “कोव़ङीन, गो एको मुर आन ङोंइती दाइल पाइक्तीके थोव़क वोइक्नुङ। मिनु आम आफ, आलपुकी कालेम नु आन नेक्था ङा मुर नु आन वारच कालेम खतम दुम्नीम” देंत।
22 परमप्रभु यावेमी “कोव़ङीन, उत्तर ङा रागी रे हुल का मुर जाक्नीम। रागी आ सुर रे ठेयब रागी ङा मुर बारशा जाक्नीम। येरमीया ५:१५; ब्यवस्था २८:४९ 23 मेकोपुकी लिब्रा नु तरवार शेशा ठीक दुम्शो बाक्नीम। मेकोपुकी मरिम्शो पाइब नु काइ शिशी मपाइब बाक्नीम। आन रेयके समुन्द्र ग्रीशो खोदेंशो बाक्ब। मेकोपुकी शारा ङोइश्शा सियोन आ तमी, इ कली लडाइ तोचा कली ठीक दुम्शो बाक्नीम” देंत। येरमीया ५०:४२
24 गोपुकीम मेको आन पर्बम मारेइ मारेइ लोव़ नेंतक। मिनु आंइ गुइ खोइली योक्त। गो शुश हिंतक। गो सुत्केरी रोइ पशो मीश मुर खोदेंशो दुम्तक। 25 “रू मेर मलने। लां मेर मगाक्कीन। मारदे हना इन जोरी सत्रु आन गुइमी तरवार बाक्ब। मिनु एर ओंथ नेल्ल शुश हिंतीक बाक्ब” देंशो नेंतक। येरमीया २०:३
26 मिनु “आं श्येत जाइब मुरपुकी अरन्डी फेक्सीन। मिनु इन पिया तारी पुलु फुंइसीन। का ला बाक्शो आल बेक्शो आ पर्बम खोदेंशो पा रोंका पने। मारदे हना आंइ कली साइक्ब याम काम जाक्ब” देंत। येरमीया ४:८; आमोस ८:१०
27 परमप्रभु यावेमी “गो इ कली आं मुर आन पशो नाक्ब नु रिम्शो सेल्ब सेल्तन। मोपा गे मेको आन पशो तुइश्शा, मार, पाइनीमी, दे नाक्ने चाप्नेवे। 28 मेको नेल्ल आन थुं खकटा बाक्शा, काइ मटीब बाक्नीम। मेकोपुकी जोल पा सांकछी बाक्ब नु गाक्नीमी। मेकोपुकी कांसा नु फलाम खोदेंशो खकटा बाक्नीम। मेको नेल्ल मरिम्शो बाक्नीम। इजीकीएल २२:१८ 29 मुरुमी यपाइक्चा कली भाटी कीना कीन मी ठेयब सेल्नीम। तन्न यपाइक्तीक गेय मोशा दुम्त। मारदे हना परमप्रभु यावे आ अरेशो मटीब आन कली तिल्शो बाक्नीम। 30 तन्न मेको आन कली मरिम्शो तिल्शो चांदी, दे नें वोइक्नीम। मारदे हना परमप्रभु यावेम मेको आन कली तिल्शो बाक्त” देंत। १राजा ९:७