27
यहूदामी नेबुकदनेसर आ गेय पशो
1 यहूदा ङा पिप योसीयाह आ तौ सिदकीयाहम सासन पवा आ ङोंइती ङा बर्सम परमप्रभु यावेम आं कली लोव़ पाप्तु। २राजा २४:१७-१८ 2 परमप्रभु यावेमी मार लोव़ पाप्तु देंशा हना “कुशुल के डोरी नु थरपु ङा शी के जुवा का सेलो। मिनु मेको इ शुरम लाम्सो। येरमीया २८:१० 3 मिनु यहूदा ङा पिप सिदकीयाह आ बाक्तीके यरूसलेममी जाक्ब लोव़ कुरब आन कली एदोम, मोआब, अम्मोन, टायर नु सीदोन ङा पिप आन बाक्तीकेम मेको लोव़ सोइक्तीमी। येरमीया २५:२१-२२ 4 मेको आन होव़प आन कली एको लोव़ पा ‘मुर नेल्ल आन परमप्रभु यावे इस्राएली आन परमप्रभुम गेपुकीम इन होव़प आन कली 5 एको रागी, एको रागीम बाक्ब मुरपुकी, बस्तु भाव नु जन्तु नेल्ल आन कली आं ठेयब सक्ति नु आं बोलम सेल्शो नङ। मिनु गो सु कली गेचा दाक्नुङ, मेको कली गेनुङ। येरमीया १२:१७ 6 मुल गेपुकी नु इन रागी नेल्ल आं गेय पाइब बेबीलोन ङा पिप नेबुकदनेसर आ गुइम गेता। ब्वाकी ङा जन्तु आन कली यो सासन पाइब सेल्ता। येरमीया २५:९; यसैया ४५:१,८; इजीकीएल २६:७; दानीएल २:३८ 7 मेको आंम इन रागी आ रिम्शो दुम्ची मजाक्म सम्म रागी रागी नेल्ल ङा मुरपुकीम मेको आ तौ नु मेको आ चच आन गेय पचा माल्नीम। मेको नोले शुश रागी नु ठेयब पिपपुकीमी मेको कली आन वाइल सेल्नीम।
8 तन्न तेकोइ रागी तेकोइ राज्य नु पिपम बेबीलोन ङा पिप नेबुकदनेसर आ वाइल दुम्चा नु मेको आ जुवा आन शुरम वोइक्ने मबिस्साक्म हना, गो मेको रागी ङा मुर आन कली तरवार, अन्काल नु मुर बेक्तीक रोइम सजाइ गेनुङमी। गो मेको आन कली मसाइक्पदुमी सम्म मो पाइनुङ’ दे परमप्रभु यावेम देंत। 9 मोपतीके गेपुकी ‘बेबीलोन ङा पिप आ वाइल दुम्चा माल्नीनी’ देंब, इन नोले दुम्ब लोव़ पाइबपुकी, लिंक्यु कोव़बपुकी, ङोमु ङा लोव़ शेंबपुकी, टुना मुना नु मन्तर तन्तर पाइक्ब आन लोव़ मनेनीन। येरमीया १४:१३-१४ 10 मारदे हना मेकोपुकीमी इन कली देंशो नोले दुम्ब लोव़ जोल बाक्ब। मेको लोव़ पतीके इन रागी रे ङोन खेरचा पुंइसीनीनी। गो इन कली खेरनुङ। मिनु गेपुकी बेक्नीनी। 11 तन्न तेको रागी आ शुर बेबीलोन ङा पिप आ जुवा आगाम वोइक्बा, मेको आ वाइल दुम्बा, मेको रागी ङा मुर आन कली गो आन रागीमीन दोचा कोक्चा नु बाक्चा गेनुङमी” दे परमप्रभु यावेम देंत।
12 मिनु गो मेको लोव़ यहूदा ङा पिप सिदकीयाह कली देंती। मेको कली “बेबीलोन ङा पिप आ जुवा इन शुरम वोतीन। मिनु मेको नु मेको आ मुर आन वाइल दुमीन। मिनु गे ब्रोंइनीनी। 13 परमप्रभु यावेम बेबीलोन ङा पिप आ वाइल मदुम्ब, रागी ङा मुर आन कली गे तरवार, अन्काल नु मुर बेक्तीक रोइम बेक्चा माल्नीनी। मारदे गे नु इन मुर बेक्चा दाक्नीनी? 14 गेपुकीम ‘बेबीलोन ङा पिप आ वाइल दुम्चा ममाल्नीनी देंब जोल पा परमप्रभु यावे आ लोव़ पाइब आन लोव़ मनेनीन। मारदे हना मेकोपुकीमी इन कली जोल पना पन बाक्नीम’ देंनीनी। येरमीया १४:१४ 15 परमप्रभु यावेम ‘गो मेको आन कली मसोइक्तुमी। तन्न मेकोपुकीम आं नेंम जोल पा लोव़ पाइनीम। मेको आन लोव़ नेंतीनी हना, गो इन कली एको रागी रे खेरनन्नी। मिनु गे बेक्नीनी। गेपुकी नु इन कली जोल पा लोव़ पाइब मो दुम्नीनी’ देंती” देंत।
16 मिनु गो चढ़ेब नु मेको मुर नेल्ल आन कली “परमप्रभु यावेमी ‘गेपुकी इन कली जोल पा आं लोव़ पाइब आन लोव़ मनेनीन। मेकोपुकीमी परमप्रभु यावे आ खिं ङा ग्योंब नु बोसपुकी रीब पा बेबीलोन रे चाक्सीब’ देंनीम। मेकोपुकीमी इन कली जोल पा नोले दुम्ब लोव़ पाइनीम। येरमीया २८:३; २इतिहास ३६:१० 17 मेको आन लोव़ मनेनीन। बेबीलोन ङा पिप आ वाइल दुमीने। मिनु गेपुकी ब्रोंइनीनी। मारदे गेपुकीम एको सहर कली मुर मबाक्तीके दुम्पाइक्नीनी? 18 मेकोपुकी थमा पा परमप्रभु यावे आ लोव़ पाइब बाक्तेक्म हना नु मेकोपुकी नु परमप्रभु यावे आ लोव़ बाक्त हना, परमप्रभु यावे आ खिंम बाक्शो, यहूदा ङा पिप आ खिंम बाक्शो नु यरूसलेममी बाक्शो मार मार बेबीलोन मलदमेक्ल, दे मुर नेल्ल आन परमप्रभु यावे कली पुन्मेक्ल। 19 मारदे हना मुर नेल्ल आन परमप्रभु यावेमी थाम, कांसा के ठेयब चिक्तीके बोस, मेको आ कांसा के नित्तीके नु सहरम लीशो बोस आन पर्बम लोव़ पाप्तु। १राजा ७:१५-३९; २राजा २५:१३-१७ 20 मेको बेबीलोन ङा पिप नेबुकदनेसरमी यहूदा ङा पिप येहो-याकीम आ तौ येकोन्याह माइश्शो येकोन्याह नु यहूदा नु यरूसलेम ङा ठेयब मुर नेल्ल आन कली यरूसलेम रे ग्याइश्शा लदमेनु, मेको बोस मलद। येहो-याकीम आ नें २राजा २४:६ योयाकीन बाक्ब। तन्न येरमीया किताबम २२:२४ आ नें कोन्याह बाक्ब। मिनु येरमीया २४:१ येकोन्याह यो देंनीम। 21 मिनु मुर नेल्ल आन परमप्रभु यावे, इस्राएली आन परमप्रभुमी ‘आं खिंमी लीशो बोसपुकी, यहूदा ङा पिप आ दरवारमी वोइश्शो बोसपुकी नु यरूसलेममी प्रोंइशो ग्योंबपुकी बाक्नीम। 22 मेको नेल्ल आन कली बेबीलोनम चाक्दीत्नीम। मिनु गो मेको आन पर्बम मकोव़ङु सम्म मेको मेकेर बाक्चा माल्नीम’ देंशो बाक्ब। मिनु ‘गो मेको आन कली लेंशा लेश्शा चाक्नुङमी। मिनु लेंशा आन बाक्तीकेमी वोइक्नुङमी’ दे परमप्रभु यावेमी देंत” दे माइक्ती। एज्रा १:१,११