1 फाराओमी गाजा कली लडाइ तोचा क्‍येङा ङोंइती, पलिस्‍ती आन पर्बम परमप्रभु यावेम आ लोव़ पाइब येरमीया कली लोव़ पाप्‍तु। 2 परमप्रभु यावेमी मार लोव़ पाप्‍तु देंशा हना “कोव़ङीन उत्तर रे ब्‍वाक्‍कु बारशा यिशो बाक्‍ब। मेकोमी रागी नु मेकेर बाक्‍शो मारेइ मारेइ आन कली सुम्‍ब। सहरपुकी नु मेकेर बाक्‍शो नेल्‍ल आन कली ख्रुम्‍ब। मिनु मुर नेल्‍ल वाइ ब्रेत्‍नीम। मेको रागीम बाक्‍ब मुर नेल्‍ल ङाक्‍नीम। 3 प्रेक्‍शा दोरशा गाक्‍ब शारा आन खोइली आ रेयके नु जोरी सत्रु आन बग्‍गी आन रेयकेमी आफपुकीम आन आल आन कली वारच पाइक्‍चा कली मलेत्‍नीम। मेको आन गुइ तिक्‍ने मचाप्‍ब दुम्‍शा ग्‍युक्‍शो बाक्‍नीम। 4 मारदे हना पलिस्‍ती नेल्‍ल आन कली खतम पोक्‍शा साइक्‍तीक नाक्‍ती जाक्‍शो बाक्‍ब। टायर नु सीदोन आस कली वारच पाइक्‍ने चाप्‍ब नेल्‍ल बेक्‍नीम। मारदे हना परमप्रभु यावेम पलिस्‍ती आन कली साइक्‍चा चिक्‍शो बाक्‍ब। काफ्‍‍तोर ङा टापु आ शुंइचीम रे जाक्‍शो लीशो नेल्‍ल आन कली साइक्‍चा चिक्‍शो बाक्‍ब। आमोस १:६-७; सेफन्‍याह २:४; जकरिया ९:५; यूहन्‍ना १:२२; येरमीया १६:६; येरमीया ४८:३७;आमोस ९:७ 5 गाजाम रोंका पचा कली आ चां प्रेक्‍शो बाक्‍ब। अश्‍कलोन खतम दुम्‍शा, सिक्‍सी पाइब। गे लीशो अनाकीमपुकी गेना सम्‍म इन रां चेंइसीनीनी?” देंशो बाक्‍ब। 6 “परमप्रभु यावे आ तरवार, गे ग्रीचा गेना नाइक्‍नेवे? इन तरवार खोतम पिप्‍तीन। गे नाइश्‍शा सिक्‍सी पा बाक्‍कीन। 7 गे दोपा सिक्‍सी पा बाक्‍ने चाप्‍नीनी? मारदे हना परमप्रभु यावेमी मेको कली अरेशो बाक्‍ब। मेकोमी मेको कली अश्‍कलोन नु समुन्‍द्र आ शुंइच ङा रागी आन कली गेय पचा कली अरेशो बाक्‍ब?” देंत।