1 स्‍वर्ग ङा राज्‍य ओदेंशो बाक्‍ब, खिं का ङा होव़प सुनी कना बोक्‍शा, आ अङगुर रूमी गेय पाइब आन कली ब्रेत्‍थ लमाक्‍त। 2 काबु ङा गाल्‍च देनार का गेनन्‍नी, दे गारपाइश्‍शा, अङगुर रूमी सोइक्‍तीमी बाक्‍त। 3 मिनु सुनी ९ बजे गे बजार लशा ङा मिन, गेय मथिप्‍ब मुर आन कली तशा, 4 मेको आन कली ‘गे यो लशा, आं अङगुर रूमी गेय पने। इन गेय पशो ङा गाल्‍च गारपा गेनन्‍नी’ दे सोइक्‍तीमी बाक्‍त। 5 मिनु मोपान १२ बजे नु ३ बजे यो अरु आन कली ब्रेश्‍शा, गेय पथ सोइक्‍तीमी बाक्‍त। 6 मिनु क्‍यारश चोक्‍ची सम्‍म यो गेय मथिप्‍ब आन कली तशा ‘गे सुनी रे मार गुइ फ्रेंशा बाक्‍नी’ दे हिल्‍लो पवा बाक्‍त। 7 मिनु मेकोपुकीमी ‘सुइमी गेय मगेमे। मिनु गो मार पाइनीकी?’ देंमानु ‘गे यो लशा, आं अङगुर रूमी गेय पने’ दे माइक्‍मी बाक्‍त।

8 मिनु नां रिक्‍शा गेय प्रोन्‍मे नोले, होव़पमी आ क्‍येट योक्‍ब मुर कली ‘गेय पाइब आन कली ब्रेश्‍शा, आन गाल्‍च योक्‍शा गेमी। नेल्‍ल क्‍येङा नोले जाक्‍शो आन कली ङोंइती योक्‍शा गेमी’ देंमाक्‍त। 9 मिनु क्‍यारश चोक्‍ची ना जाक्‍शो आन कली ङोंइती ब्रेश्‍शा, काबु ङा गाल्‍च देनार का का गेमी बाक्‍त। 10 मिनु सुनी कना रे गेय पाइबपुकीमी जाक्‍शा ‘एको आन क्‍येङा शुश ताइनीकी’ दे मिम्‍तमे बाक्‍त। तन्‍न नेल्‍लेमी देनार का का ला तामे बाक्‍त। 11 मिनु ताक्‍शा, मेको आन थुं मनुथु, होव़प कली 12 ‘नेल्‍ल क्‍येङा नोले जाक्‍बपुकीमी इच्‍का ला गेय पाम्‍तेक्‍म। गोपुकी सुनी रे गेय पा नांम दुप्‍शा चोशा श्‍येत पा गेय पाइतक। तन्‍न आंइ कली उइक्‍थ उइक्‍थ गाल्‍च गे‍तीनी’ दे गाइश्‍शा देंमा बाक्‍त। 13 मिनु होव़पमी मो देंब का कली ‘आं वारच, इ कली मार मरिम्‍शो पङा? काबु ङा गाल्‍च देनार का कली बिस्‍से ममाइ ङा? 14 देनार का ताक्‍शा लावो। नोले जाक्‍ब कली यो इ कली गेशो खोदेंशो पा गेचा दाक्‍ताक्‍ङ। 15 आंम आं के बाक्‍शो आं दाक्‍शो पा योक्‍चा मताइनुङा ङा? अरु आन कली शिशी पशो तशा, इ कुप्‍फीम मी ब्रवे?’ दे मदा बाक्‍त। रोमी ९:१६,२१ 16 मोदेंशो पान, नोले दुम्‍बपुकी ङोंइती दुम्‍नीम, ङोंइती दुम्‍बपुकी नोले दुम्‍नीम” दे शेंताक्‍मी।

17 मिनु येसु यरूसलेम ङा लां खोइश्‍शा गाक्‍मेनु, आ शेंसीब १२ जना आन कली सुइ मबाक्‍तीकेम लाइश्‍शा 18 “मुल यरूसलेम लाइनय। मिनु रागीम जरमेशो ठेयब चढ़ेब नु सास्‍त्री आन गुइमी जिम्‍मा गेचा पुंइसीब। मिनु मेकोपुकीमी दोस गेशा, साइक्‍चा ङा सजाइ गेनीम। यूहन्‍ना २:१३; मत्ती १६:२१; मत्ती १७:२२-२३ 19 शुक्‍शी पा युक्‍शा, शीम केप्‍शा कांटी थोक्‍शा, क्‍याइश्‍शा साइक्‍थ अर्को जात ङा मुर आन गुइमी गेनीम। बेक्‍शो आ नित्‍थ नाक्‍त बेक्‍शो रे सेंसीब” दे माइक्‍तीमी।

20 मिनु काबु जब्‍दी तौ आस ममामी आ तौ आस कली चाक्‍शा, येसु कली सेउ पाप्‍तु। मत्ती १०:२ 21 मिनु येसुमी “मार पुंइनेवे?” देंमेनु “हे शेंब, गे इन राज्‍यम आं तौ आस कली का इन ग्‍युरा, का इन पेरा गे बाक्‍चा गेचा कली मुल हुकुम दुम्‍ल” दे पुंइतु। मत्ती १९:२८ 22 मिनु येसुमी आ तौ आस गे हिरशा “इस पुंइशो मार बाक्‍मे, दे मरुप्‍नीसी। गोमी तूचशो कचौरा तूने चाप्‍नीसी?” देंमेनु “चाप्‍नस्‍कु” देंताक्‍स। मत्ती २६:३९ 23 मिनु येसुमी “थमा आं कचौराम तूनीसी। तन्‍न आं ग्‍युरा पेरा गे बाक्‍चा गेचा आं गुइमी ममाइ। आं आफोमी योव़शो आन कली बाक्‍ब” दे माइक्‍तीम्‍सी। प्रेरित १२:२; प्रकाश १:९

24 मिनु शेंसीब १० जनामी मेको आस कली मो देंशो नेंशा “एको निक्‍शी दोदेंशो बाक्‍सा, है” दे आन थुं मनुम। लूका २२:२४-२७ 25 मिनु येसुमी नेल्‍ल आन कली खुप्‍शा “अर्को रागी कली हुकुम पाइबपुकीमी मुर आन कली दिप्‍शा वोइश्‍शा, हुकुम पाइनीम, दे तुइक्‍नीनी। 26 गेपुकी इन दातेमी मोदेंशो पचा मदुम्‍ब। इन दातेमी ठेयब दुम्‍चा माल्‍बम नेल्‍ल आन गेय पाइब दुम्‍चा माल्‍ब। मत्ती २३:११; १कोरिन्‍थी ९:१९ 27 इन दातेमी नेल्‍ल क्‍येङा ङोंइती दुम्‍चा माल्‍बम नेल्‍ल आन वाइल दुम्‍चा माल्‍ब। मर्कूस ९:३५ 28 रागीम जरमेशो मान पपांइसीचा कली जाक्‍शो ममाइ। तन्‍न गेय पथ नु शुश मुर आन कली प्रोंइचा कली आ गिंम सोइक्‍थ जाक्‍शो बाक्‍ब” दे माइक्‍तीमी। फिलिप्‍पी २:७; १पत्रुस १:१८-१९

29 मिनु काबु यरीको सहर रे गाक्‍मानु, शुश मुरुमी येसु आ नोले खोइक्‍तेक्‍म। 30 मिनु लांमी बाक्‍शा, मिक्‍च मताइब निक्‍शीमी येसु एको लां पित देंशो नेंशा “हे प्रभु, दाऊद आ तौ, गो आंस कली शिशी पांइस्‍की” दे वाइ ब्रेत्‍ताक्‍स। 31 येसु नु काथा गाक्‍बपुकीमी “रेयके मपसे” दे हुइक्‍तमेनु, ङोंइती क्‍येङा वाइ ब्रेश्‍शा “प्रभु, दाऊद आ तौ, गो आंस कली शिशी पांइस्‍की” दे ब्रेत्‍ताक्‍स। 32 मिनु येसु ख्रा दिक्‍शा, मेको आस कली ब्रेश्‍शा “इस कली मार पङा, मार पुंइसी?” देंमेनु 33 “प्रभु, आंस कली मिक्‍च ताइब सेलीने” दे पुंइताक्‍स। 34 मिनु येसुमी मेको आस कली शिशी पा आस मिक्‍च थिवानु, मिक्‍च ताइब दुम्‍शा, येसु आ नोले खोइक्‍ताक्‍स।