1 मिनु येसुमी लेंशा कथापुकी सेल्‍शा, मुर आन कली शेंना शेंन 2 “स्‍वर्ग ङा राज्‍य ओदेंशो बाक्‍ब, पिप कामी आ तौ आ ग्‍युंबे पा भोज पचवा बाक्‍त। यूहन्‍ना ३:२९ 3 मिनु आ गेय पाइब आन कली निम्‍तो ताइब आन कली ब्रेत्‍थ सोइक्‍तीमी बाक्‍त। तन्‍न निम्‍तो ताइबपुकी लचा थुं मपामे बाक्‍त। 4 मिनु लेंशा अरु गेय पाइब आन कली ‘नेनीने, गो जचा थोव़की सेल्‍शा ठीक पाता। लो, जथ जाक्‍कीन, दे मतीन’ दे ब्रेत्‍थ सोइक्‍तीमी बाक्‍त। 5 तन्‍न ब्रेत्‍चा पुंइसीब नेल्‍लेमी ग्‍युंबे जथ लचा थुं मपथु, का आ रूमी गेय पथ लमाक्‍त, का ग्‍याप्‍तीक लेयतीक गेय पथ लमाक्‍त। 6 लीशोपुकीमी ब्रेत्‍थ जाक्‍ब आन कली शुक्‍शी पा ग्‍याइश्‍शा तुप्‍शा सदमे बाक्‍त। मत्ती २१:३५ 7 मिनु पिपमी मोदेंशो दुम्‍शो तुइश्‍शा चुरशा, आ सिपाही आन कली ‘लने, मुर साइक्‍ब आन कली साइश्‍शा, आन सहर गाउं क्रोइश्‍शा गेने’ दे सोइक्‍तीमी बाक्‍त। मत्ती २४:२ 8 मिनु आ गेय पाइब आन कली ‘आं तौ आ ग्‍युंबे भोज ठीक सेल्‍ता। ब्रेश्‍शोपुकी चहिं भोजम जाक्‍चा मशिरसीशो बाक्‍मा बाक्‍त। 9 मोपतीके मुल लां पित्‍थ लशा, सु सु आन कली थिन्‍नी, मेको आन कली चाक्‍कीने’ दे सोइक्‍तीमी बाक्‍त। मत्ती १३:४७ 10 मिनु मेकोपुकीमी लां पित्‍थ लशा, रिम्‍शो मरिम्‍शो दोदेंशो मुर थिदमे, मोदेंशो नेल्‍ल आन कली खुप्‍शा चाक्‍गमे बाक्‍त। मिनु ग्‍युंबे खिं पौनापुकीम ब्रीमाक्‍त। 11 मिनु पिपमी ‘आं पौना दोपा बाक्‍मा, दोशो जाक्‍मा’ दे कोव़थ जाक्‍मेनु, ग्‍युंबे भोज ङा वा मफेक्‍शो मुर का तवा बाक्‍त। प्रकाश १९:८ 12 मिनु ‘ए वारच, ग्‍युंबे भोज ङा वा मफेक्‍थु, दोपा एकेर ओव़ङे?’ देंमेनु, सिक्‍सी पा मारेइ देंने मचबा बाक्‍त। 13 मिनु पिपमी आ गेय पाइब आन कली ‘एको आ गुइ खोइल फ्रेंशा ग्रुंइशा, छिङछिङमी ताइक्‍तीने। मेकेर मुरपुकी आन ख्रुइ शेप्‍शा ङाक्‍नीम’ 14 ब्रेत्‍चा पुंइसीशो मुर शुश बाक्‍नीम, योव़शो चहिं का निक्‍शी ला बाक्‍नीम” दे येसुमी शेंताक्‍मी।

15 मिनु फरिसीपुकीमी “एको कली दोपा आंम आ लोव़ ख्राइक्‍पपाइश्‍शा दोस गेचा” दे लोव़सी पमुमा बाक्‍त। 16 मिनु आन शेंसीब नु हेरोद आ वारच आन कली येसु आ बाक्‍तीके ओं माइक्‍थ सोइक्‍तीमी बाक्‍त “हे शेंब, गे थमा पाइब ननी। मुर आन कुल मकोव़थु सुइ नु महिंथु, परमप्रभु यावे आ लोव़ थमा पा शेंनीनी, दे तुइक्‍नीक। यूहन्‍ना ३:२ 17 मिनु लोव़ का शेंदीकी, शेंब हजुर, मार लोव़ देंशा हना, सिजर सरकार कली तिरो थाप्‍चा माल्‍ब, दे मथाप्‍थु यो दुम्‍बा?” दे हिल्‍लो पखु पा, लोव़ ख्राइक्‍पपाइक्‍चा माल्‍तेक्‍म। 18 मिनु येसुमी मेको आन मरिम्‍शो मिम्‍शो तुइश्‍शा “ए कपटीपुकी, मारदे आं थुं थाम्‍नीनी? 19 तिरो थाप्‍तीके क्‍येट का कोंइदीनी” देंमेनु, देनार का कोंइताक्‍म। 20 मिनु “एको सु आ नेंमी ख्रोइश्‍शो बाक्‍मे?” देंमेनु 21 “सिजर आ नेंमी ख्रोइश्‍शो बाक्‍त, हजुर” देंतेक्‍म। मिनु येसुमी “लो मो हना, सिजर आ थोव़क सिजर कली गेने। परमप्रभु यावे आ थोव़क परमप्रभु यावे कली गेने” देंमेनु, रोमी १३:१,७ 22 मेकोपुकी छक लाक्‍शा, फ्रा फ्रु लेश्‍शा गाक्‍तेक्‍म।

23 मिनु सदुकीपुकी जाक्‍तेक्‍म। सदुकीपुकीमी बेक्‍शो रे मसेंसीब, दे शेंनीम। मिनु येसु आ बाक्‍तीके जाक्‍शा प्रेरित ४:२; प्रेरित २१:६-८ 24 “हे शेंब, मोसामी ब्रेक्‍शो लोव़मी ‘मुर कामी आल मथिथु बेक्‍त हना, आ लोक्‍बमी आ भोग्‍यु वोंइसीशा, आ दाग्‍यु आ पा ङा सन्‍तान मजाम्‍मल, तमी तौ थिवल’ दे ब्रेक्‍शो बाक्‍ब। ब्‍‍यवस्‍था २५:५-६ 25 खिं कामी ७ जना लोक्‍ब बाक्‍तेक्‍म। मिनु ङोंइती जरमेशोमी ग्‍युंबे पाप्‍तु। 26 मिनु आल मथिथु बेक्‍त। मिनु माइलामी आ भोग्‍यु वोंइसाक्‍व। मिनु मेको यो आल मथिथु बेक्‍त। मिनु साइलामी आ भोग्‍यु वोइश्‍शा, मेको यो आल मथिथु बेक्‍त। मोदेंशो पा ६ जनामीन आन भोग्‍यु वोइश्‍शा, आल मथिथु बेक्‍तेक्‍म। 27 मिनु नोले मेको मीश मुर यो बेक्‍त। 28 मुर बेक्‍शो रे सेंसीशा ब्रोंइमानु, मेको ७ जना वोंइश आन मीश दुम्‍शो मीश मुर तेको आ मीश दुम्‍बा?” दे हिल्‍लो पाम्‍तेक्‍म। 29 मिनु येसुमी “गे दूली मिम्‍नीनी। मारदे हना परमप्रभु यावे आ लोव़ मरुप्‍नीनी, परमप्रभु यावे आ सक्ति यो मतुइक्‍नीनी। 30 बेक्‍शो रे सेंसीशा ब्रोंइमानु, मुरुमी ग्‍युंबे मपाइनीम। स्‍वर्गम बाक्‍ब परमप्रभु यावे आ गेय पाइब खोदेंशो बाक्‍नीम। 31 बेक्‍शो रे सेंशा ब्रोंइचा देंशो मार बाक्‍ब देंशा हना, 32 परमप्रभु यावेमी ‘गो अब्राहाम आ परमप्रभु यावे, इसहाक आ परमप्रभु यावे, याकूब आ परमप्रभु यावे नङ’ दे ब्रेक्‍शो बाक्‍ब। मेको लोव़ मपढेनी? परमप्रभु यावे बेक्‍शो मुर आन परमप्रभु यावे ममाइ। ब्रोंइशो आन परमप्रभु यावे बाक्‍ब” दे माइक्‍तीमी। प्रस्‍थान ३:६ 33 मिनु मेकेर देल्‍शोपुकीमी येसु आ लोव़ नेंशा छक लाक्‍तेक्‍म।

34 मिनु फरिसीपुकीमी “सदुकी आन कली लेन्‍ने मचाप्‍चा ङा लोव़ पाइमी बाक्‍त” देंशो नेंशा, खुम्‍सीशा जाक्‍तेक्‍म। 35 आन दाते ङा आरेशो लोव़ जोक्‍ब तुइक्‍ब कामी येसु कली 36 “हे शेंब, परमप्रभु यावे आ अरेशो लोव़ ङा तेको नेल्‍ल क्‍येङा तुइक्‍चा माल्‍शो बाक्‍बा?” दे आ थुं थाम्‍चा कली हिल्‍लो पाप्‍तु। 37 मिनु येसुमी “ ‘गेपुकी परमप्रभु यावे, इन परमप्रभु कली इन थुं नेल्‍लेमी, इन सोक्‍त नेल्‍लेमी नु इन बोल नेल्‍लेमी दाक्‍चा माल्‍नीनी’ ब्‍‍यवस्‍था ६:५ 38 मेको नेल्‍ल क्‍येङा ठेयब नु तुइक्‍चा माल्‍शो अरेशो लोव़ बाक्‍ब। 39 मिनु आ नोले ङा लोव़ ‘आंम इ कली दाक्‍शो खोदेंशो पा, इ नेक्‍था बाक्‍ब कली यो दाक्‍तो’ देंशो बाक्‍ब। लेवी १९:१८ 40 एको अरेशो लोव़ निक्‍शीमी परमप्रभु यावे आ अरेशो लोव़ नु आ लोव़ पाइब आन लोव़ नेल्‍ल खाप्‍शो बाक्‍ब” दे येसुमी माइक्‍तीमी। रोमी १३:९-१०

41 काबु फरिसीपुकी खुम्‍समानु, येसुमी मेको आन कली 42 “ख्रीस्‍त आ पर्बम मार मिम्‍नीनी? मेको सु आ तौ सुइक्‍नीनी?” दे हिल्‍लो पाप्‍तु। मिनु “दाऊद आ तौ” देंतेक्‍म। यसैया ११:१; यूहन्‍ना ७:४२ 43 मिनु येसुमी “मो हना मारदे परमप्रभु यावे आ सोक्‍त रे पा दाऊदमी मेको कली प्रभु देंबा? 44 ‘परमप्रभु यावेमी आं प्रभु कली “इ जोरी सत्रु आन कली इ खोइल आगाम मवोदुमी सम्‍म आं ग्‍युरा गे बाक्‍को” देंशा’ ब्रेक्‍शो बाक्‍ब। भजन संग्रह ११०:१; मत्ती २६:६४ 45 दाऊदमी मेको कली ‘प्रभु’ देंब। मिनु दोपा आ तौ दुम्‍मे?” दे माइक्‍तीमी। 46 मिनु सुइमी लोव़ का यो लेन्‍ने मचबेम। में ङा मेरे हिंशा, लोव़ हिल्‍लो पचा यो प्रोंइतेक्‍म।