16
कोराह, दाथान नु अबीराम
1 मिनु लेवी आ तौ कोहाथ, आ चच इच्हार, आ युइ कोराह, नु रूबेन आ थर ङा एलीआब आ तौ निक्शी दाथान नु अबीराम नु पेलेथ आ तौ ओन सल्ला पाम्तेक्म। प्रस्थान ६:१६,१८,२१; गन्ती २६:७-९; यहूदा १:११ 2 मिनु मेकोपुकीम सहे निक्शी ५० जना इस्राएली ब्रेत्ताक्म। मेकोपुकी ग्रुम्तीकेमी योव़चा पुंइसीशो ठेयब मुर बाक्तेक्म। मेको आन कली मुर नेल्लेमी तुइश्शो बाक्तेक्म। मेकोपुकीम मोसा कली दोस गेम्तेक्म। गन्ती १२:१-२ 3 मिनु मेकोपुकी बुक्शा, मोसा नु हारून आस कली “गे निक्शीमी थम मरिम्शो पाइतीसी। ग्रुम्तीक ङा मुर नेल्ले का का पा, ग्रांग्रा मदिशो बाक्नीम। मिनु परमप्रभु यावे मेको आन दातेमी बाक्ब। गे मारदे इस कली परमप्रभु यावे आ मुर आन क्येङा ठेयब सेल्सीनीसी?” देंतेक्म। 4 मिनु मोसा मेको लोव़ नेंशा, खुम्की पा बाप्त। गन्ती १४:५ 5 मिनु मेकोमी कोराह नु मेको आ मुर नेल्ल आन कली “दीसा सुनी परमप्रभु यावेमी सु मेको आ मुर बाक्बा, सु ग्रांग्रा मदिशो बाक्बा नु सु आ नेक्था जाक्दीत्चा गेबा, मेको तुइक्पाइक्ब। २तिमोथी २:१९ 6 कोराह, गे नु बाक्ब मुर नेल्लेमी थनौरो चाक्शा जाक्कीन। 7 मिनु गे दीसा मेकेर मी कुर पा परमप्रभु यावे आ ङोंइती धूप चोने। मिनु परमप्रभु यावेमी सु कली योव़बा, मेको ग्रांग्रा मदिशो बाक्ब। लेवीपुकी, गे थम मरिम्शो पाइतीनी” देंत। 8 मिनु मोसामी कोराह कली “गे लेवीपुकी नेनीन। 9 इस्राएली आन परमप्रभु यावेमी इन कली आ नेक्था जाक्चा गेशा, आ ताम्बु ङा गेय पचा कली मुर आन दाते रे योव़शो बाक्ब। गे ग्रुम्तीक आ ङोंइती राप्शा, मेको मुर आन गेय पचा, आइक्च मिम्नीनी? गन्ती ३:६-१३; गन्ती ४:४-२० 10 मेकोमी गे नु इ लोक्ब, लेवी नेल्ल आन कली आ नेक्था जाक्चा गेप्तु। मार, गेपुकीम चढ़ेब आन गेय यो माल्नीनी? 11 गे नु इ मुर नेल्ले परमप्रभु यावे कली दोस गेशा बुक्तीनी। हारून सु बाक्बा ङा? गे मेको कली गन गन पनी?” दे माइक्तीमी।
12 मिनु मोसामी एलीआब आ तौ दाथान नु अबीराम आस कली ब्रेत्थ सोइक्ताक्व। तन्न मेको निक्शीमी “गो मजाक्नस्कु। 13 गे आंइ कली दूध नु खुदो शुश बाक्शो रागी रे एको गोरशो रागीम साइक्थ चाक्शा यो, मार, इन कली मजाक्दीम्मे? मिनु गे आंइ कली हुकुम यो पचा माल्नीसी? 14 गे आंइ कली दूध नु खुदो शुश बाक्शो रागीम चाक्दीन्नी? रू नु अङगुर रू गेनी? मार, गे एको मुर आन मिक्च फेत्चा दाक्नीनी? गोपुकी थमा पा मजाक्नीकी” देंताक्स। प्रस्थान ३:८
15 मिनु मोसा शुश गाइश्शा, परमप्रभु यावे कली “मेको आन चढ़ेशो मताक्कीन। गो मेको आन गधा का यो मताक्गु। गो मेको आन कली मरिम्शो यो मपङ” देंत। 16 मिनु मोसामी कोराह कली “गे नु इ मुरपुकी नु हारून यो दीसा परमप्रभु यावे आ ङोंइती जाक्कीन। 17 गे नेल्लेमी आंम आंम थनौरो चाक्शा, मेकेर धूप कुर पने। मिनु गे का का पा आंम थनौरो परमप्रभु यावे आ ङोंइती चाक्कीन। गे नु हारूनम यो इस थनौरो चाक्कीस। मेको सहे निक्शी ५० ओटा थनौरो बाक्नीम” देंत। 18 मिनु मेको का का पा आन थनौरोम मी कुर पा धूप वोइक्तेक्म। मिनु मेकोपुकी मोसा नु हारून ग्रुम्तीक ताम्बु आ ओव़तीकेमी राप्तेक्म। 19 मिनु कोराहमी ग्रुम्तीक ङा मुर नेल्ल आन कली मोसा नु हारून आस पर्बम गन गन पचा, दे ग्रुम्तीक ताम्बु आ ओव़तीकेमी पुक्तीमी। मेना परमप्रभु यावे आ छेङछेङ मेको नेल्ल आन ङोंइती ग्रूत। गन्ती १६:१०
20 मिनु परमप्रभु यावेमी मोसा नु हारून आस कली 21 “गे निक्शी मेको मुर आन रे दिलीस। मिनु गो याम कामी एको नेल्ल आन कली रोवल चिवल पोक्नुङमी” देंत। उत्पत्ती १९:१४ 22 मिनु मोसा नु हारूनमी खुम्की पा “परमप्रभु मुर नेल्ल आन कली ब्रोंइचा गेब परमप्रभु, मुर कामी पाप पतीके गे मुर नेल्ल नु गाइक्नीनी?” देंताक्स। अय्युब १०:१२; अय्युब १२:१०; २सामुएल २४:१७; गन्ती २७:१६
23 मिनु परमप्रभु यावेमी मोसा कली 24 “एको मुर आन कली ‘कोराह, दाथान नु अबीराम आन बाक्तीक रे दिलीन’ दे माइक्मी” देंत। 25 मिनु मोसा बोक्शा दाथान नु अबीराम आस बाक्तीक लत। मिनु इस्राएली आन खाल्पापुकी यो लाम्तेक्म। 26 मिनु मेकोम नेल्ल मुर आन कली “मेको मरिम्शो मुर आन ताम्बु रे दिल्शा बाक्कीन। मेको आन के मारेइ मथिने। मो मपाइतीनी हना, मेको आन पापमी पतीके गेपुकी यो साइक्चा पुंइसीनीनी” दे माइक्तीमी। 27 मोपतीके मेकोपुकी कोराह, दाथान नु अबीराम आन ताम्बु रे दिल्तेक्म। मिनु दाथान नु अबीराम आस ताम्बु रे ग्रूशा, मेको आस ताम्बु आ ओव़तीकेम आस मीश नु आस आलपुकी नु राप्ताक्स। 28 मिनु मोसामी मेको नेल्ल आन कली “परमप्रभु यावेमी आं कली एको गेय पचा कली सोइश्शो बाक्ब, दे गे तुइक्नीनी। एको गेय नेल्ल गो आंमा पशो मनङ। 29 मेको मुरपुकी अरु मुरपुकी खोदेंशो पा बेक्तेक्म हना, गो परमप्रभु यावे आ सोइश्शो मनङ। 30 तन्न परमप्रभु यावेमी नक गेय का पा, रागीम आ शोव़ पाक्शा, दाक्तु हना, एको आन मारेइ मारेइ सुन्दा सेसीन बेक्शो मुर आन बाक्तीके दोक्तेक्म हना, एकोपुकीमी परमप्रभु यावे आ लोव़ लाक्शो बाक्मा बाक्त, दे गेपुकीमी तुइक्नीनी” देंत।
31 मिनु मेको लोव़ पने थुमा नोले मेको आन बाक्शो रागी ब्रोल्त। ब्यवस्था ११:६ 32 मिनु रागीम आ शोव़ पाक्शा, मेको नु मेको आस खिं ङा मुर नेल्ल, कोराह आ खिं ङा मुर नेल्ले नु मेको आन मारेइ मारेइ नेल्ल दाक्तु। 33 मिनु मेकोपुकी नु आन मारेइ मारेइ सेसीन बेक्शो मुर आन बाक्तीके लाम्तेक्म। मिनु रागीम मेको आन तार आ शोव़ ख्रेप्ताक्व। मिनु मेकोपुकी ग्रुम्तीक ङा मुर आन दाते रे जाम्तेक्म। 34 मिनु आन नेक्था बाक्ब इस्राएली नेल्लेमी मेको आन वाइ ब्रेश्शो नेंशा “गोपुकी इं कली यो मुल रागीम दाक्ब” देंना देंन प्रोक्तेक्म। 35 मिनु परमप्रभु यावे रे मी ग्रूशा, मेको सहे निक्शी ५० जना धूप चोइब आन कली दाक्तु। लेवी १०:१-२; भजन संग्रह १०६:१७-१८ 36 मिनु परमप्रभु यावेमी मोसा कली 37 “चढ़ेब हारून आ तौ एलाजर कली थनौरोपुकी ब्रशो मी रे ग्रुंइचा कली नु मी आ फिलीङगो शुश ङोन लाइश्शा फ्रचा कली अरेवो। गन्ती ३:४; प्रस्थान ६:२५ 38 मारदे हना मेको पाप पाइबपुकी बेक्तीके आन थनौरोपुकी ग्रांग्रा मदिशो बाक्नीम। मेको थनौरो तुप्शा, चढ़ेतीके गिल्तीक पाता सेल्चा माल्ब। मारदे हना मेको मुर आन थनौरो परमप्रभु यावे आ ङोंइती चढ़ेतीके ग्रांग्रा मदिशो दुम्तेक्म। मिनु मेको इस्राएली आन कली मिम्तीक चिन्ड दुम्चा माल्नीम” देंत। 39 मिनु चढ़ेब एलाजरमी मेको बेक्शो मुरपुकीम धूप चोशो तांबा के थनौरो गुप्तु। मिनु मेको कली तुप्शा चढ़ेतीक गिल्चा कली पाता सेल्तु। 40 मेको इस्राएली आन कली मिम्तीके बाक्ब। मार मिम्तीके बाक्ब देंशा हना, हारून आ मुर ङा लाक्शा, अरु मुरपुकी परमप्रभु यावे आ ङोंइती धूप चोचा कली आ नेक्था लने मचाप्नीम। मिनु कोराह नु आ मुरपुकी खोदेंशो पा साइक्चा मपुंइसीनीम, दे मिम्पाइक्तीक बाक्ब। मिनु परमप्रभु यावे मोसा रे पा एलाजर कली दोदेंशो पा लोव़ पवा, मोदेंशो पा पाप्तु। गन्ती ३:१०
41 मिनु आ दीसा सुनी इस्राएली नेल्लेमी मोसा नु हारून आस पर्बम गन गन पा “गे निक्शीमी परमप्रभु यावे आ मुर आन कली साइक्तीसी” देंतेक्म। प्रस्थान १७:३ 42 मिनु मुरपुकीम मोसा नु हारून आस कली गन गन पा बुक्शा, ग्रुम्तीक ताम्बु गे कोव़ङमेनु, गोस्सुमी मेको ताम्बु कली सुम्शो ताम्तेक्म। मिनु परमप्रभु यावे आ छेङछेङ ग्रूत। 43 मेना मोसा नु हारून ग्रुम्तीक ताम्बु आ ङोंइती लाम्ताक्स। 44 मिनु परमप्रभु यावेमी मोसा कली 45 “गे मेको मुर आन दाते रे दिलीस। गो मेको आन कली याम कामी रोवल चिवल पोक्नुङमी” देंत। मिनु मेको खुम्की बाप्ताक्से। 46 मिनु मोसामी हारून कली “मेको थनौरो लाइश्शा, मेको चढ़ेतीक ङा मी कुर पा धूप चोवो। मिनु रीब पा मेको मुर आन दातेमी लाइश्शा, मेको आन पाप क्याम्तीक गेय पावो। मारदे हना परमप्रभु यावे गाइक्ताक्व। मिनु मुर बेक्तीक रोइ बोक्चा गोप्तु” देंत। लेवी १६:१२,१३,१७; गन्ती १:५३ 47 मिनु मोसामी देंशो खोदेंशो पा हारून थनौरो लाइश्शा मुर आन दातेमी दोरशा लत। मेना मुर आन दातेमी मुर साइक्ब रोइ जाक्ने थुम्शो बाक्त। मिनु मेकोमी धूप चोशा मुर आन पर्बम पाप क्याम्तीक गेय पाप्तु। 48 मिनु हारून बेक्शो नु सेस मुर आन दातेमी राप्त। मिनु मेको मुर बेक्तीक रोइ देक्त। 49 कोराह बेक्तीकेम बेक्शो प्रोंइशा, मेको मुर बेक्तीक रोइम बेक्शो मुर १४ हजार ७ सहे बाक्तेक्म। 50 मिनु मेको मुर बेक्तीक रोइ देक्म नोले हारून मोसा आ बाक्तीक, ग्रुम्तीक ताम्बु आ ओव़तीकेम लेत्त।