1 शुश क्‍येट शोंप क्‍येङा मान पाइश्‍शो रिम्‍शो बाक्‍ब। सुन चांदी क्‍येङा दाक्‍चा पुंइसीचा रिम्‍शो बाक्‍ब। उपदेसक ७:१ 2 क्‍येट थीब नु प्रुङग मुर के गारतीक का बाक्‍ब। मेको मार बाक्‍ब देंशा हना, परमप्रभु यावेमी मेको निम्‍फा आस कली सेल्‍तु। हितोपदेस २९:१३ 3 निप्‍स पाइश्‍शो मुर श्‍येत जाक्‍चा चिक्‍शो तशा, ख्रुंइसी‍नीम। तन्‍न मारेइ मजोक्‍ब मुरुमी मारेइ मतुइक्‍थु श्‍येत जाइनीम। हितोपदेस २७:१२ 4 ब्रेम्‍शो थुं पाइश्‍शो नु परमप्रभु यावे कली मान पा हिंब मुर आन इनाम शोंप, मान ततीक नु ब्रोंइतीक बाक्‍ब। हितोपदेस १५:३३ 5 दूली पाइब आन लांम चू नु ग्‍याइल बाक्‍नीम। होस पाइबपुकी मेको आन क्‍येङा ङोन बाक्‍नीम। 6 इ तौ कली गारचा ङा पा रिम्‍शो शेंदो। मेकोमी खाल्‍पा दुम्‍चा सम्‍म मेको लां मप्रोंइब। हितोपदेस २०:११ 7 क्‍येट थीबमी प्रुङग कली अधिकार पाइब। जेर ताक्‍ब मुर जेर गेब आ वाइल बाक्‍ब। 8 मुरुमी ठीक मपतीके शोक्‍तेक्‍म हना, ठेयब श्‍येत खुप्‍नीम। मिनु आ गाइक्‍तीके आ कोक्‍के जिक्‍ब। अय्‍युब ४:८ 9 हाइश्‍शो मुरुमी आसीक ताइब। मारदे हना मेकोमी आ जचा थोव़क प्रुङग नु योक्‍ब। हितोपदेस १९:१७ 10 शुक्‍शी पाइब कली खेरो। मिनु जिचा खेचा नुप्‍ब। जिचा नु तुम्‍मुचा तेक्‍सीब। हितोपदेस २६:२० 11 सु रिम्‍शो थुं नु ठीक लोव़ पचा दाक्‍नीमी, मेको पिप आ वारच दुम्‍नीम। कलस्‍सी ४:६; भजन संग्रह १०१:६ 12 परमप्रभु यावेमी तुइक्‍‍ब मुर आन कली कोव़ब। तन्‍न हेंथे पाइब आन थमा सुइक्‍चा मपुंइसीब लोव़ थुम्‍पाइक्‍ब। 13 अल्‍सेमी “लाङगामी गुप्‍स का बाक्‍ब। गो लाङगा लती हना, आं कली साइक्‍ब” देंब। हितोपदेस २६:१३ 14 हेंथे गाक्‍ब मीश मुर आ लोव़ ठेयब खाल्‍टा खोदेंशो बाक्‍ब। परमप्रभु यावे आ गाइश्‍शो ताइबपुकी मेको खाल्‍टाम बिक्‍‍नीम। हितोपदेस ५:३ 15 वोंइश आल आन थुंमी मरिम्‍शो पतीक यो बाक्‍ब। तन्‍न शेंशा इच्‍का तुप्‍शोनु, आ मरिम्‍शो पतीके प्रोंइब। हितोपदेस १३:२४; हितोपदेस २३:१३-१४; हितोपदेस २९:१७ 16 आंम कली शोंप पाइश्‍‍शो सेल्‍चा कली प्रुङग आ थोव़क लाइक्‍चा नु क्‍येट थीब कली कोसेली गेचा, मेको निम्‍फा प्रुङग दुम्‍तीक गेय बाक्‍ब।

17 इ नोफा दाइश्‍शा जोक्‍ब तुइक्‍ब दुम्‍शा, आं लोव़ नेनो। मिनु आं लोव़ इ थुंम वोतो! हितोपदेस २४:२३ 18 मारदे हना मेको लोव़ इ थुंमी वोइक्‍तीवी हना, इ कली रिम्‍शो दुम्‍ब। मिनु गे मेको गेना हना यो शेंने चाप्‍नेवे। 19 गे परमप्रभु यावे कली थमा सुतो, दे मुलाक्‍ती गो इ कली एको लोव़ शेंताक्‍ङ। 20 गो इ कली ३० ओटा देंतीके, अर्ती नु जोक्‍‍तीक लोव़ मब्रेक्‍तु ङा? 21 मारदे ब्रेक्‍ताक्‍ङ देंशा हना, इ कली मार ठीक बाक्‍बा नु मार थमा बाक्‍बा, दे कोंइचा कली ब्रेक्‍ताक्‍ङ। मोपा गे इ कली सोइक्‍ब आन कली थमा लोव़ लेन्‍ने चाप्‍नेवे। 22 प्रुङग आन के मारेइ मबाक्‍ब, दे मेको आन के मारेइ मरोइक्‍तो। मिनु श्‍येत जाइब कली ठीक निसाफ पावो। प्रस्‍थान २३:६ 23 मारदे हना परमप्रभु यावेमी मेको आन कली वारच पाइब। मेकोमी मेको रोइक्‍ब आन ब्रोंइतीक रोइक्‍ब। 24 गाइक्‍ब मुर नु वारच मदुमो। मिनु शुश चुरब नु मगाक्‍को। हितोपदेस १५:१८ 25 मेको नु गाक्‍ते हना, मोदेंशोन दुम्‍शा, ग्‍याइक्‍चा पुंइसीनेवे। 26 मुर आन जेर आ पर्बम कसम जशा जमानी मबाक्‍को। हितोपदेस ६:१ 27 मारदे हना गे थाप्‍ने मचाप्‍तीवी हना, इ ब्राख्‍ये यो रोइक्‍चा पुंइसीनेवे। 28 इ किकी पिपीमी वोइश्‍शो सांद ङा फुल्‍लु गेनायो मयाक्‍तो। हितोपदेस २३:१०; ब्‍यवस्‍था २७:१७ 29 जोक्‍ब गेय पाइब आन कली तनी? मेकोपुकी पिप आन कली गेय पाइब दुम्‍नीम। मेकोपुकीमी आइक्‍च मुर आन कली गेय मपाइनीम।