1 मिनु येसु ख्रीस्‍तमी आं कली एफिसस सहर ङा थमा सुइक्‍ब आन शेंब कली ब्रेक्‍पाइक्‍ती। एको आ ग्‍युरा गुइमी ७ ओटा सोरुल नु ७ ओटा सुन के दियारी आन दातेमी हिरब आ लोव़ बाक्‍ब। प्रेरित १८:१९ 2 मेकोमी “गो इन पशो गेय, इन फाल्‍शो श्‍येत नेल्‍ल तुइक्‍नुङ। मिनु गे मरिम्‍शो मुर आन कली फाल्‍ने मचाप्‍नीनी। मिनु गे सोइश्‍शो, आं लोव़ शेंब दुम्‍खु पाइब मुर आन कली नाक्‍शा, जोल्‍फे बाक्‍नीम, दे तुइक्‍नीनी। १यूहन्‍ना ४:१ 3 गे फाल्‍शा, आं कली थमा सुइक्‍तीनी। मोपा थमा सुइक्‍चा मदथु, आं पर्बम श्‍येत फाल्‍नीनी, दे गो तुइक्‍नुङ। १तिमोथी ५:१२ 4 तन्‍न गो इन कली लोव़ का पचा माल्‍नुङ। मार लोव़ पचा माल्‍नुङ देंशा हना, ङोंइती गे आं कली थमा पा दाक्‍ताक्‍नी। मुल चहिं ङोंइती ङा खोदेंशो पा दाक्‍चा प्रोंइतीनी। 5 इन ङोंइती ङा आं कली दाक्‍शो मिम्‍तीने। इन थुं आं गे लेत्‍तीने। मिनु इन ङोंइती ङा पशो गेय पने। गे मेको दाक्‍चा ङा गेय मपाइतीनी हना, गो इन बाक्‍तीके जाक्‍शा, इन दियारी आ बाक्‍तीके रे तिल्‍नुङ। 6 तन्‍न इन गेय का रिम्‍शो बाक्‍ब। गेपुकी निकोलाइटन आन शेंतीके ङा गेय ग्रांग्रा दीनीनी। गो यो ग्रांग्रा दीनुङ। भजन संग्रह १३९:२१ 7 परमप्रभु यावे आ सोक्‍तीमी थमा सुइक्‍ब मुर आन कली शेंशो लोव़ सु सुमी नेंने चाप्‍नीमी, मेकोमी नेन्‍मेक्‍ल। सु सुमी सैतान कली ग्रानीमी, मेको आन कली परमप्रभु यावे आ रूमी बाक्‍ब ब्रोंइतीक रवा आ फल ब्‍वचा गेनुङ” दे ब्रेक्‍पाइक्‍ती। प्रकाश २२:२; उत्‍पत्ती २:९

8 मिनु येसु ख्रीस्‍तमी आं कली स्‍मिरना सहर ङा थमा सुइक्‍ब आन शेंब कली ब्रेक्‍पाइक्‍ती। मेकोमी “गो नेल्‍ल क्‍येङा ङोंइती नु नेल्‍ल क्‍येङा नोले नङ। गो बेक्‍शा यो ब्रोंइती” देंत। प्रकाश १:११; प्रकाश १:१८ 9 मेकोमी “गो इन श्‍येत जशो तुइक्‍नुङ। गे थमा पा प्रुङग बाक्‍नीनी, दे गो तुइक्‍नुङ। तन्‍न गे इन थुंम शोंप पाइश्‍शो बाक्‍नीनी, दे यो तुइक्‍नुङ। मरिम्‍शो लोव़ पाइब सु सु नमी देंशा हना ‘यहूदी नकी’ देंखु पाइबपुकी सैतानमी शेंशो मुर नम। याकूब २:५; प्रकाश ३:९ 10 मिनु मुल इन कली श्‍येत दुम्‍चाप्‍तु। तन्‍न महिनीने। नेनीन, मुल दियाबलस सैतानमी गे का निक्‍शी इन कली थुं थाम्‍चा कली जेल्‍खानम चोक्‍पाइक्‍ब। गे १० नाक्‍त सम्‍म ला श्‍येत जाइनीनी। साइक्‍चाम्‍तेक्‍म हना यो, फाल्‍शा थमा सुइक्‍चा मप्रोनीन। मो पाइतीनी हना, गो इन कली गेना हना यो ब्रोंइशा बाक्‍तीक सिरपेच गेनुङ। मत्ती १०:१९,२८; प्रकाश ३:११; २तिमोथी ४:८ 11 परमप्रभु यावे आ सोक्‍तीमी थमा सुइक्‍ब मुर आन कली शेंशो लोव़ सु सुमी नेंने चाप्‍नीमी, मेकोमी नेन्‍मेक्‍ल। सु सुमी सैतान कली ग्रानीमी, मेको निक्‍शी खेयप बेक्‍चा ममाल्‍नीम। मिनु परमप्रभु यावेमी गेशो सजाइ यो मताइनीम” दे ब्रेक्‍पाइक्‍ती। प्रकाश २०:१४

12 मिनु येसु ख्रीस्‍तमी आं कली पेरगामोम सहर ङा थमा सुइक्‍ब आन शेंब कली ब्रेक्‍पाइक्‍ती। आ शोव़ रे निम्‍फा गे क्‍योरतीक पाइश्‍शो हेश्‍शो तरवार पाइश्‍शोमी 13 “इन बाक्‍तीक सहरम सैतान आ नित्‍तीके बाक्‍ब, दे गो तुइक्‍नुङ। गेपुकीमी ‘गो येसु ख्रीस्‍त आ मुर नकी’ दे आं कली थमा सुइक्‍चा मप्रोंइनी। मिनु इन सहरम सैतान आ नित्‍तीके बाक्‍मेनु, अन्‍टीपास माइश्‍शो आं कली मप्रोंइथु, थमा सुइक्‍ब नु आं लोव़ शेंब बाक्‍त। मिनु मुरुमी मेको कली सैतान आ बाक्‍तीकेमी बाक्‍शा, साइक्‍तेक्‍म हना यो, गे आं कली थमा सुइक्‍चा मप्रोंइनी। 14 तन्‍न गो इन कली लोव़ का पचा माल्‍नुङ। मार लोव़ पचा माल्‍नुङ देंशो हना, गे का निक्‍शीमी मरिम्‍शो गेय पाइतीनी। इन ग्रुम्‍तीके ङा का निक्‍शीमी बालाम माइश्‍शो मुर आ शेंशो थमा सुइक्‍नीमी। बालाममी मार शेंताक्‍व देंशा हना, ङोंइती बालाक माइश्‍शो पिप कली इस्राएल जात ङा वोंइश मुर आन कली खतम सेल्‍तु। दोपा खतम सेल्‍तु देंशा हना, चढ़ेशो थोव़क ब्‍वपाइक्‍तु। मिनु तेल्‍लेम पपाइक्‍तु। गन्‍ती ३१:१६; २पत्रुस २:१५; यहूदा :११ 15 मिनु गे इन ग्रुम्‍तीकेमी निकोलाइटन आन शेंशो लोव़ का निक्‍शीमी थमा सुइक्‍नीमी। 16 मोपतीके इन थुं गो आं गे लेत्‍तीन। मलेत्‍ताक्‍नी हना, गो इन ग्रुम्‍तीकेमी रीब पा जाक्‍नुङ। मिनु आं शोव़ ङा तरवारमी मेको नु लडाइ पाइनुङ। 17 परमप्रभु यावे आ सोक्‍तीमी थमा सुइक्‍ब मुर आन कली शेंशो लोव़ सु सुमी नेंने चाप्‍नीमी, मेकोमी नेन्‍मेक्‍ल। मिनु सु सुमी सैतान कली ग्रानीमी, मेको आन कली ख्रुइश्‍शा वोइश्‍शो मन्‍ना शोब्‍ले गेनुङ। मिनु गोमी मेको ग्राब आन कली बुश हीरा का का गेनुङ। मेको बुश हीरा तार हीरा ताइब आन नक नें ब्रेक्‍शो बाक्‍ब। मेको नें हीरा ताइबमी ला तुइक्‍नीम। अर्को मुरुमी चहिं मतुइक्‍नीम” दे ब्रेक्‍पाइक्‍ती। भजन संग्रह ७८:२४; यसैया ६२:२

18 मिनु परमप्रभु यावे आ तौमी आं कली थिआटीरा सहर ङा थमा सुइक्‍ब आन शेंब कली ब्रेक्‍पाइक्‍ती। एको आ मिक्‍च हुरुर पा ब्रशो मी खोदेंशो तांइसीशो नु आ खोइली याप्‍पाइश्‍शो टल्‍केशो कांसा खोदेंशो तांइसीशो आ लोव़ बाक्‍ब। प्रेरित १६:१४; प्रकाश १:१४-१५ 19 मेकोमी “गो इन पशो गेय तुइक्‍नुङ। इन आं कली दाक्‍शो, इन थमा सुइश्‍शो, इन थमा सुइक्‍ब आन कली पशो गेय नु इन श्‍येत फाल्‍शो तुइक्‍नुङ। गे ङोंइती क्‍येङा शुश गेय पाइनीनी। 20 तन्‍न इन कली लोव़ का पचा माल्‍नुङ। मार लोव़ पचा माल्‍नुङ देंशा हना, गे इजेबेल माइश्‍शो मीश मुर कली इन ग्रुम्‍तीकेमी बाक्‍चा गेतीनी। इजेबेलमी ‘गो परमप्रभु यावेमी तुइक्‍पाइश्‍शो लोव़ पाइब नङ’ देंखु पा, आं गेय पाइब आन कली मरिम्‍शो पचा शेंताक्‍मी। मार मरिम्‍शो पचा शेंताक्‍मी देंशा हना, तेल्‍लेम पचा नु मूर्ति कली चढ़ेशो थोव़क जचा ब्‍वचा दुम्‍ब, दे शेंताक्‍मी। २राजा ९:२२ 21 गोमी मेको कली ‘इ थुं आं गे लेत्‍तो। इ तेल्‍लेम पचा ताइक्‍तो’ दे रिम्‍ताक्‍ङ। मेकोमी आ थुं गो आं गे लेत्‍चा नु आ तेल्‍लेम पचा ताइक्‍ने मबीस। 22 मिनु गो मेको कली रोइ पपाइक्‍नुङ। मिनु मेको नु तेल्‍लेम पाइब आन तेल्‍लेम पचा प्रोंइशा, गो आं गे लेत्‍ने मबिस्‍साक्‍म हना, मेको आन कली यो ठेयब श्‍येत गेनुङमी। 23 आ आल आन कली मुर साइक्‍ब रोइम साइक्‍नुङमी। मेको आन श्‍येत जशा, बेक्‍शो तशा ‘गोम पाप्‍तु’ दे थमा सुइक्‍ब नेल्‍लेमी तुइक्‍नीमी। मिनु थमा सुइक्‍ब आन ग्रुम्‍तीके ङा मुर नेल्‍लेमी ‘येसु ख्रीस्‍तमी मुर आन थुं नु आन पशो तुइक्‍ब। मिनु नोले दोपा पामे, मोपा गेब’ दे तुइक्‍नीम। भजन संग्रह ७:१०; येरमीया १७:१० 24 तन्‍न थिआटीरा ङा थमा सुइक्‍ब आन ग्रुम्‍तीकेमी इजेबेल आ शेंशो मपाइबपुकी यो बाक्‍नीम। मेकोपुकीमी इजेबेल आ शेंसीब बुदी सैतान आ ठेयब गेय यो मतुइक्‍नीम। मिनु आं कली रिम्‍शो पा थमा सुइक्‍ब आन कली अर्को श्‍येत मगेनुङ। 25 गे इन तुइश्‍शो गो मजाक्‍ङा सम्‍म पना पन बाक्‍कीन। प्रकाश ३:११ 26 सु सुमी सैतान कली ग्रानीमी, मेकोमी बेक्‍ची ना सम्‍म आं गेय पाइनीमी, गो मेको आन कली रागी रागी ङा मुर आन कली सासन पतीके सक्ति गेनुङ। 27 मिनु मेकोपुकीमी खप के ग्‍योंब आन कली फलाम के कोक्‍केमी चोंइटा चोंइटा पशो बुद पा रागी ङा मुर आन कली सासन पाइनीम। गो यो मोदेंशो सक्ति आं आफ रे तशो नङ। भजन संग्रह २:८-९ 28 मिनु गोमी मेको सैतान कली ग्राब आन कली सुनी ङा सुक्‍कुर सोरुल गेनुङ। 29 परमप्रभु यावे आ सोक्‍तीमी थमा सुइक्‍ब मुर आन कली शेंशो लोव़ सु सुमी नेंने चाप्‍नीमी, मेकोमी नेन्‍मेक्‍ल” दे ब्रेक्‍पाइक्‍ती।