1 मिनु नोले सरीङ गे कोव़ता। मिनु मेकेर लाप्‍चो का रोक्‍शा वोइश्‍शो ताता। मिनु ङोंइती आं नेंशो तुराही ताप्‍शो खोदेंशो ठेयब सेंदा लेंशा नेंता। मेको सेंदामी “एक कुवो। नोले मार दुम्‍‍बा, गो इ कली कोंइनन” दे माइक्‍ती। प्रकाश १:१० 2 मिनु गो परमप्रभु यावे आ सोक्‍तीमी ब्रीती। स्‍वर्गमी ठेयब नित्‍तीके वोइश्‍शो ताता। मेको ठेयब नित्‍तीकेमी का निश्‍शो ताता। भजन संग्रह ४७:९; यसैया ६:१; इजीकीएल १:२६-२८ 3 मेको ठेयब नित्‍तीके बुश नु लल टल्‍केशो हीरा खोदेंशो तांइसाक्‍व। मेको ठेयब नित्‍तीके आ एर ओंथ वाक्‍श दाप्‍शो ताता। मेको वाक्‍श गिग हीरा खोदेंशो तांइसाक्‍व। 4 मिनु ठेयब नित्‍तीके आ एर ओंथ २४ ओटा आइक्‍च नित्‍तीकपुकी बाक्‍तेक्‍म। मेको नित्‍तीकपुकीमी बुश वा फेक्‍शो नु आन पियामी सुन के सिरपेच गुप्‍शो २४ जना शेंब खाल्‍पा निश्‍शो बाक्‍तेक्‍म। प्रस्‍थान १९:१६; प्रकाश १:४ 5 मिनु मेको नित्‍तीक रे चिला दाप्‍शो तांइसाक्‍व। मिनु बुंबु पशो रेयके नु सेंदापुकी नेंसाक्‍व। मिनु ठेयब नित्‍तीक आ ङोंइती ७ ओटा ब्रशो तोव़शी बाक्‍तेक्‍म। मेको ७ ओटा तोव़शी चहिं परमप्रभु यावे आ ७ ठाउंम बाक्‍शो सोक्‍त बाक्‍तेक्‍म। प्रस्‍थान १९:१६ 6 मिनु नित्‍तीक आ ङोंइती समुन्‍द्र खोदेंशो दिंम का बाक्‍त। मेको दिंम सिसा खोदेंब टल्‍केशो तांइसाक्‍व। मिनु मेको ठेयब नित्‍तीके आ एर ओंथ आन रां नेल्‍ले शुश मिक्‍च पाइश्‍शो ४ ओटा सेस जन्‍तु बाक्‍तेक्‍म। इजीकीएल १:५,१०,२२ 7 मेको सेस जन्‍तुपुकी दोदेंब तांइसाक्‍म देंशा हना, ङोंइती ङा जन्‍तु गुप्‍स खोदेंशो तांइसाक्‍व, अर्को सेस जन्‍तु बोहोर खोदेंशो तांइसाक्‍व। नोले ङा सेस जन्‍तु आ कुल मुर के खोदेंशो तांइसाक्‍व। मिनु नेल्‍ल क्‍येङा नोले ङा सेस जन्‍तु बेरशो ककाकुली खोदेंशो तांइसाक्‍व। इजीकीएल १०:१४ 8 मिनु मेको सेस जन्‍तु ६, ६ ओटा फ्रां पाइश्‍शो बाक्‍तेक्‍मे। मेको आन फ्रां नेल्‍ल नु आन रां नेल्‍लेमी मिक्‍च पाइश्‍शो बाक्‍तेक्‍म। मिनु मेकोपुकी नाक्‍दो नाक्‍त परमप्रभु यावे कली कुम्‍सो पना पन बाक्‍बाक्‍तेक्‍म। मार कुम्‍सो पाइबाक्‍तेक्‍म देंशा हना, “परमप्रभु यावे, गे का ला परमप्रभु ननी। गे नेल्‍ल सक्ति पाइश्‍शो बाक्‍नीनी। गे ङोंइती बाक्‍शो बाक्‍तीनी। मुल यो बाक्‍नीनी। मिनु नोले यो जाक्‍नीनी” दे कुम्‍सो पना पन बाक्‍बाक्‍तेक्‍म। यसैया ६:२-३; प्रस्‍थान ३:१४ 9 मोपा मेको ४ ओटा सेस जन्‍तुम गेना हना यो ब्रोंइशा बाक्‍ब ठेयब नित्‍तीकेमी निप्‍ब कली “गे छेङछेङ, मान ताइब नु रिम्‍शो पाइब बाक्‍नीनी” देंमानु, 10 मेको २४ जना शेंब खाल्‍पामी मेको ठेयब नित्‍तीकेमी निप्‍ब आ ङोंइती आन पोक्‍च थेक्‍शा सेउ पाम्‍तेक्‍म। मिनु गेना हना यो ब्रोंइशा बाक्‍ब कली मान पाम्‍तेक्‍म। मिनु मेकोपुकीमी आन सिरपेच पुइश्‍शा, मेको ठेयब नित्‍तीकेमी निप्‍ब आ ङोंइती वोइश्‍शा 11 “गे प्रभु, आंइ परमप्रभु यावे ननी। गे सक्ति पाइश्‍शा, छेङछेङम बाक्‍शा, मान ताइब बाक्‍नीनी। मारदे हना गे मारेइ मारेइ सेल्‍तीनी, मोपा इन दाक्‍शा सेल्‍शो मुल सम्‍म बाक्‍ब” दे कुम्‍सो पना पन बाक्‍तेक्‍म।