8
पाठामी नोले ङा छाप प्राक्शो
1 मिनु पाठामी ७ ओटा छाप रे नेल्ल क्येङा नोले ङा छाप प्राक्गानु, आधा घन्टा सम्म स्वर्गमी सिक्सी पा काइ रेयके मपाम। हबकुक २:२० 2 मिनु नोले गो ७ जना परमप्रभु यावे आ स्वर्ग ङा गेय पाइबपुकी परमप्रभु यावे आ ङोंइती राप्शो तातामी। मिनु मेकोपुकीमी तुराही का का ताक्तेक्म। मत्ती २४:३१
3 मिनु अर्को परमप्रभु यावे आ गेय पाइब का जाक्शा, चढ़ेतीक आ नेक्था राप्त। मेकोमी सुन के थनौरो कुरशो ताता। मिनु मेकोमी शुश धूप ताक्तु। मार पचा कली ताक्तु देंशा हना, थमा सुइक्ब आन परमप्रभु यावे कली मान पशो नु पुंइशो लोव़ सुन के चढ़ेतीकेमी ब्वाइक्चा कली ताक्तु। 4 मिनु परमप्रभु यावे कली मान पा पुंइशो लोव़ नु मेको धूप आ कुन परमप्रभु यावे आ स्वर्ग ङा गेय पाइब आ गुइ ङा थनौरो रे परमप्रभु यावे आ ङोंइती लत। 5 मिनु नोले मेको परमप्रभु यावे आ स्वर्ग ङा गेय पाइबमी धूप चढ़ेतीके ङा मी लाइश्शा, मेको थनौरोमी कुर पाप्तु। मिनु रागीमी ताइक्ताक्व। मिनु रागीमी बुंबु पाप्तु, शुश रेयके पाप्तु। चिला पा ख्रिनु कुत। इजीकीएल १०:२
ङोंइती ङा ४ ओटा तुराही
6 मिनु मेको ७ ओटा तुराही शेयब परमप्रभु यावे आ स्वर्ग ङा गेय पाइबपुकीमी तुराही ताप्चा चिक्ताक्म। 7 मिनु ङोंइती ङा तुराही शेयब परमप्रभु यावे आ स्वर्ग ङा गेय पाइबमी ताप्तु। मोपा तबानु, सरीङ रे रागी तारी हुश ब्वांइसीशो मुप्स नु मी यित। मिनु रागी के भाग सां ङा भाग का, रवा आन भाग सां ङा भाग का नु घांस नेल्ल दुप्शा नेक्तु। प्रस्थान ९:२३-२६
8 मिनु लीशो ६ जना परमप्रभु यावे आ स्वर्ग ङा गेय पाइब कामी तुराही ताप्तु। मोपा तबानु, ठेयब मी ब्रशो डांडा खोदेंशो समुन्द्रमी ताइश्शो ताता। प्रस्थान ७:२०-२१ 9 मिनु समुन्द्र के भाग सां ङा भाग का हुश दुम्त। मेकेर बाक्ब जन्तु नु ङांइपुकी भाग सां ङा भाग का बेक्तेक्म। मिनु जाजपुकी भाग सां ङा भाग का खतम दुम्तेक्म।
10 मिनु लीशो ५ जना परमप्रभु यावे आ स्वर्ग ङा गेय पाइब कामी तुराही ताप्तु। मिनु सरीङ रे मी ब्रशो रांको खोदेंशो ठेयब सोरुल खोला इनार नु ब्वाक्कु बुक्तीके ङा भाग सां ङा भाग का तार दोक्त। यसैया १४:१२ 11 मेको सोरुल आ नें कशो बाक्त। तेकेर मेको सोरुल दोक्मे, मेकेर ङा ब्वाक्कु कशो दुम्त। मिनु शुश मुरपुकी मेको कशो दुम्शो ब्वाक्कु तूशा बेक्तेक्म।
12 मिनु लीशो ४ जना परमप्रभु यावे आ स्वर्ग ङा गेय पाइब ङा कामी तुराही ताप्तु। मिनु नां तास्ला नु सोरुल आन भाग सां ङा भाग का खतम दुम्तेक्म। मोपा छेङछेङ ङा भाग सां ङा भाग का छिङछिङ दुम्त। नाक्त ङा भाग सां ङा भाग का यो छिङछिङ दुम्त। मिनु नाक्दो ङा भाग सां ङा भाग का यो छिङछिङ दुम्त। प्रकाश ६:१२; प्रस्थान १०:२१
13 मिनु नोले ककाकुली का सरीङमी बेरशो ताता। मेकोमी ठेयब सेंदामी “मुल परमप्रभु यावे आ स्वर्ग ङा गेय पाइब सांमी तुराही ताप्चा लीतेक्म। मेको आन ताप्शो रेयकेमी रागी ङा मुर आन कली थम हिंचा ङा दुम्चाप्तु। आबी आबी आबी, तुराही ग्रीशोमी रागी ङा मुरपुकी शुश श्येत जाइनीम” दे ग्रीशो नेंता।