1 تّمُي قَمَ عَ لِدٍ،

عَلَتَلَ شَ بَنشِ تِشِ فٍيَ نَشَن قَرِ،

نَ قَمَ نّ تِدٍ فٍيَ بِرِن شُن مَ.

عَ عِتٍمَ نّ تٍنتٍنيِ بِرِن بّ،

حَمَيٍ لُمَ نّ سِفَ رَ مّننِ.

2 سِ فبٍفبٍ عٍ شُن تِمَ نّ نَا رَ، عٍ عَ قَلَ،

«وٌن شَ سِفَ عَلَتَلَ شَ فٍيَ قَرِ،

يَشُبَ مَرِفِ عَلَ شَ بَنشِ.

عَ وٌن شَرَنمَ نّ عَ شَ سّرِيّ رَ،

عَلَكٌ وٌن شَ وٌن حّرّ عَ شَ كِرَ شْن مَ.»

سّرِيّ قَتَنمَ سِيٌنِ نَن نَ،

عَلَتَلَ شَ مَسٍنيِ كٍلِمَ دَرِ سَلَمُ نَن كُي.

3 عَ قِندِ مَ نّ كِيتِسَ رَ سِ فبٍفبٍ تَفِ،

عَ قَ سِ سّنبّمَيٍ شَ فٍرٍ رَحْندٍ دُنِحَ بِرِن كُي.

عٍ عٍ شَ سَنتِدّفّمَيٍ شَبُمَ سَرِ شَ كٍرِيٍ نَن نَ،

عٍ عٍ شَ وْرْتّيٍ يَءِلَن تَنبّيٍ رَ.

سِ يٌ مُ عَ شَ سَنتِدّفّمَ عِتٍمَ سِ فبّتّ شِلِ مَ سْنْن.

نَ وَشَتِ، مِشِيٍ مُ فٍرٍ مْولِ يٌ مَتِنكَنمَ.

4 عٍ تِمَ عٍ شَ وّنِ سَنسِ نَن سّيتِ مَ،

عٍ دْشْ عٍ شَ شْرّ بِلِ نِينِ بُن مَ.

مِشِ يٌ مُ قَمَ عٍ بْحّ رَ مِنِدٍ،

بَرِ مَ عَلَتَلَ سّنبّمَ بَرَ وْيّن.

5 سِ بِرِن نْمَ حّرّدٍ عٍ شَ عَلَيٍ وَشْن كِ نّ،

كْنْ وٌن تَن وٌن حّرّ مَ عَلَتَلَ نَن وَشْن كِ عَبَدَن.

6 عَلَتَلَ نَشَ عَ مَسٍن،

«لْشْي ندٍ قَمَ، ﭑ لَنيُرُتْييٍ مَلَنمَ نّ.

ﭑ مِشِيٍ شُنلَنمَ نّ، ﭑ نَشٍيٍ رَيٍنسٍنشِ تْورّ كُي.

7 ﭑ لَنيُرُتْييٍ قِندِ مَ نّ مِشِ كِسِشِ دْنشْييٍ رَ،

ﭑ مِشِ رَيٍنسٍنشِيٍ قِندِ مَ نّ سِ سّنبّمَ رَ.

عَلَتَلَ نَن تِمَ عٍ شُن مَ سِيٌنِ فٍيَ قَرِ عَبَدَن.

8 عِ تَن سِيٌنِ، نَشَن عَ حْشْ سَمَ حَمَ شْن مَ،

نَشَن قِندِشِ تَا مَكَنتَ شِ رَ،

نْي قِسَمَنتٍ فبِلٍنمَ عِ تَن نَن مَ،

مَنفّيَ قَ لُ دَرِ سَلَمُ يِ رَ.»

9 وٌ قَ فبٍلٍفبٍلٍمَ مُنقٍ رَ؟

مَنفّ مُ نَ وٌ شْنيِ سْنْن؟

وٌ رَ سِمَ بَرَ قَشَ؟

نَ بَرَ عَ نِيَ وٌ شَ تْورْ عَلْ فِنّ نَشَن نَ دِتِنيِ رَ؟

10 سِيٌنِكَيٍ، وٌ قُرِيٍ شَ وٌ مَتٌلِن عَلْ قُرِ فِنّ،

بَرِ مَ عٍ وٌ رَ مِنِمَ نّ تَا كُي، وٌ قَ شِ بُرُنيِ.

عٍ وٌ شَنِنمَ بَبِلْن كٌنيِيَ كُي،

كْنْ مّننِ وٌ قَمَ نّ قُلُندٍ.

عَلَتَلَ وٌ بَمَ نّ وٌ يَشُييٍ بّلّشّ عِ.

11 كْنْ يَكْسِ سِ فبٍفبٍ تِشِ وٌ شِلِ مَ،

عَ قَلَقٍ رَ، «سِيٌنِ شَ يَافِ وٌن يَ شْرِ!»

12 نٍيٍ مُ عَلَتَلَ شَ مَحْشُنيِ كٌلٌنشِ،

عٍ مُ عَ شَ وَلِ قَهَامُشِ.

عَلَتَلَ بَرَ عٍ مَلَن لٌنيِ مَ مَالٍ بْنبْمَ دّننَشّ.

13 سِيٌنِكَيٍ، وٌ كٍلِ وٌ شَ عٍ بْنبْ.

ﭑ وٌ سّنبّ فبٌمَ نّ عَلْ تُورَ،

نَشَن قٍرِيٍ يَءِلَنشِ وُرٍ رَ، نَشَن تٌرٍ قِندِشِ وُرٍ فبٍيلِ رَ.

نَ كُي وٌ حَمَنّ وُيَشِ بُتُشُنمَ نّ،

وٌ عٍ شَ نَاقُلِ قِندِ مَ ﭑ تَن دُنِحَ مَرِفِ عَلَتَلَ نَن فبٍ رَ.

14 يَكْسِ وٌ شَ وٌ قَتٍيٍ مَبْو سُننُنيِ مَ،

بَرِ مَ عٍ نَ وٌن مَ تَا سُشُقٍ،

عٍ نَ عِسِرَيِلَ حَمَ شَ مَنفّ بْنبْقٍ عَ يَتَفِ مَ وُرِ رَ.