1 Na Polote Sailasiko ba꞉gala Timotiko, ale la꞉ Tesalonaika sose tawakaluba꞉tamo ba꞉moe leta bepoemema꞉. Ba꞉ hibila, la꞉ hibima꞉ midipa꞉te aeno Nabiwi Godoko ba꞉gala Kodawa Ya꞉su Kelisoko ipuwalo bemedenamata. 2 Wadiyala Nabiwi Godoko ba꞉gala Kodawa Ya꞉su Kelisoko iba꞉te ibino malemale komo ba꞉gala hete komo la꞉tamo nikalama꞉mena꞉ta.

3 Aeno hibima꞉ midipi ekaka꞉la꞉, wadiyala hiliyonomo tetelo ale la꞉ mabuma꞉ Godotamo kalakala tabo ba꞉wadiya꞉paa꞉latelenakoma꞉. Iyo, ale ba꞉ba ka꞉na kewagelenama꞉ ba꞉moe ba꞉ hido komola, mabu la꞉eno hibima꞉ midi komote ba apepehona, la꞉ ipuwalo etapa꞉te etapi malemalelo demalagidolenama ba꞉be komote atumu koma꞉ neda꞉na. 4 Ba꞉be mabuma꞉ ale komo Godokono sose tawakaluba꞉tamo da꞉nikulinakoma꞉, ibi ipuwalo la꞉ ba awagaminale la꞉eno hidohido ododili komoma꞉ ga꞉lanakoma꞉. Iyo, hibima꞉ midiha꞉pa꞉te la꞉tamo koko temeteme dikalamena la꞉ huiyatiya ba꞉be menemene ipuwalo Godoko hibima꞉ midi mabuma꞉ kodakodalo da꞉la꞉mota꞉hanama, ale ba꞉be komoma꞉ komo hibima꞉ midipi konomamo ba꞉bema꞉ kiyalamenakoma꞉.

5 Ba꞉ hibila, la꞉le temeteme uwate tetelo kodakodalo da꞉la꞉mota꞉hanama, ba꞉be komote ba꞉moe komo behawakalimina, Godote hopo habanapino kuba ododili komokomo danagilamelelamemene ebete ba꞉be komo tuputupunomolo ba꞉ma ka꞉na kododima꞉ne, ebete la꞉eno temeteme uwate mabuma꞉ la꞉ ebeno hidohido ga꞉limapi gugudima꞉ ba ka꞉lami, modobo tabo ba꞉bo kogoema꞉ne la꞉le ebeno Ko Gawadubu habamo kona꞉pa꞉la꞉hama꞉. 6 Iyo, Godoko ba꞉ tuputupu komokomo kapiya ododilidawala, ba꞉bema꞉ puya꞉te ba꞉ma tetelo temeteme la꞉tamo dikalamena ebete iba꞉tamo kuba huiya kikalamema꞉ne, 7 huiyatiya ebete la꞉godone ba꞉gala agodone aeno temeteme komo hiliyonomo gobogobamo ba miya꞉te a kapimilo ba꞉bo kogelebadia꞉mema꞉ne.

Ba꞉ hibila, ba꞉ba tetelo aeno Kodawa Ya꞉suti ebeno helonomo nopopa꞉go Hunu Habane hawakala da꞉pemene, 8 puya꞉te ebeno Hido Tabamo papamila꞉haheno ba꞉gala Godoko ubiha꞉ma꞉ deda꞉hana, ebete ba꞉bi tawakaluba꞉tamo helonomo powagoeno koa꞉mo huiya ba꞉bo kopikalamema꞉ne. 9 Ba꞉bene ba꞉bi kuba ododilipino temeteme komote itana itana tetelo bitanamene, iyo, Kodawate ibi ebeno holoholo hapuni ba꞉gala ebeno helonomo a꞉la꞉mina alone tama꞉mo ba꞉ dito koelamema꞉ne iba꞉te ibino kuba huiya ipuwalo konemedehonama꞉. 10 Huiyatiya kalakala konomola, Kodawate ebeno Ko Hegelalo da꞉pemene, ba꞉ba tetelo puya꞉te ebeno tawakalubima꞉ deda꞉hana ba꞉bi hibima꞉ midipi hiliyonomate ebe hunamo ba adipate ebe mabuma꞉ konomamo kohanohanohoma꞉na꞉! Ba꞉bema꞉ numa꞉la꞉, la꞉le ba꞉bi tawakalubino konomo kapiyuimi ipuwalo atumu kopola꞉nama꞉nemata, mabu ale la꞉tamo ebeno Hido Tabo da꞉polamagimima꞉ la꞉ ba꞉be tabo hibima꞉ a꞉midimata.

11 Ba꞉bema꞉ ale ba꞉be komo ba emalagidolo komo hiliyonomo tetelo la꞉ mabuma꞉ aeno Godotamo ba꞉ma ka꞉na toetoehonakoma꞉, ebete kebe hido emede komoma꞉ la꞉ da꞉ka꞉lami, wadiyala ebete ba꞉be emede ipuwalo la꞉ ebeno hidohido ga꞉limapi gugudima꞉ na꞉midila꞉mena꞉ta, ba꞉gala wadiyala ebete ebeno helo la꞉tamo nikalama꞉mena꞉ta, la꞉le la꞉eno tepo ipuwoeno hidohido ubi komone ba꞉gala la꞉eno hibima꞉ midi ipuwane tuputupu ododili komo ba uluhukulatele ba꞉bi komo hidamo kupula꞉lema꞉. 12 Ba꞉be mabuma꞉ puya꞉te la꞉eno hidohido emede komokomo dulamemena꞉, iba꞉te aeno Kodawa Ya꞉suku awagaminalo ebeno mahilo hunamo ba adipate, ba꞉be hido awagaha komote Ya꞉sugodone la꞉tamo atumu kakapuluhukuma꞉ne, ba꞉bema꞉ wadiyala ba꞉moe hido komote aeno Godo ba꞉gala Kodawa Ya꞉su Kelisoko ibino malemale ipuwado ba꞉ ba꞉ba ka꞉na nuluhukamene.