1 Jesús ja mesa discípulo cuana pamapa tueda ai cuana buetsuape putsu, uja atana huecuana:

2 —Micuaneda bahue beta tsine hue beju pascua tsine puji. Da tsine su ema emenajatiata, curusu su ema patatata huecuana puji.

3 Beju Jesús emimiani hora quitaita su sacerdote huaraji aida, jacuatsasiati ebuetsuaji, judío cuana sa tata edhi ehuidusuji cuana beju jadhitatitana. Sacerdote banime sa ete aida su jadhitatitana huecuana. 4 Dapia Jesús cuaja ina putsu, manuameme ya jaquisatitana huecuana. 5 Uja jaquisatitana huecuana:

—Be painatija Jesús pascua tsine su. Ahua daja ecuaneda ya su, cristiano cuana detse janimetipeitita cua.

6 Beju Jesús da Simón sa ete su Betania ejude su anina. Equene Jesús ja tueda lepraji su saisiametana. 7 Beju dapia ete su yani cama, piada epuna ja Jesús nariatana. Tueda epuna ja chujeneda saida puida emeji su dusutana. Jesús misha naja su yani cama, epuna ja tusa echua bia su puida d'uichatana. 8 Da su beju discípulo cuana duininipirutana, epuna ja daja yatani ba putsu. Uja atana huecuana:

—¿Ai puji ni da ye epuna ja daja ataitia? 9 Ahua ecuaneda ye chujeneda saida puida iru cua su, dueji chipilu cuana ecuaneseda ani cua puri cristiano cuana etia puji.

10 Beju Jesús ja id'abatana huecuana putsu, uja atana huecuana:

—¿Ai puji ni da micuaneda daja madhada emimiani ye epuna jepuiti? Tuahueda ema saida atana beju. 11 Puri cristiano cuana da micuana neje pamapa hora su yanita. Ema mu aimue micuana neje daja yani mahue. Quejucua tiempo chidi hue ema micuana neje yaniti. 12 Ye epuna ja ema bia su d'uichataitia puida ema papaji pu cua nime. 13 Ene putsu, yama micuana equisainia, quepia papu Diusu sa quisa saida cuana quisaquisa eputani su, ye eoyba ja ataitia di quisa eputa tu jiahue quita ataitia pamapa cristiano cuana ja pashanapata puji.

14 Da su beju Judas Iscariote da sacerdote huaraji aida cuana peje su putiana. Tueda Judas da Jesús sa discípulo puina. Tuna peje su putiana cuaja Jesús menajatiame ya equisa puji. 15 Beju uja atana Judas ja sacerdote aida cuana:

—¿Quejucua chipilu micuaneda ema tia cua, ahua Jesús micuana yama menajatia cua su?

Da su sacerdote cuana ja Judas quimisha tunca chipilu cuana tiatana. 16 Da hora jenetia beju Judas ja ai hora jia Jesús tu mehua epu id'uatana sacerdote cuana tipeida equisati puji, Jesús painata huecuana puji.

17 Beju pan levadura mahue tsine epupiruani su, discípulo cuana ja Jesús quisabatana:

—¿Quepia mique tsada ecuanaju ebaseta pascua tsine su ediadia puji?

18 Da su Jesús ja jeutsutana huecuana:

—Meputique ejude su. Dapia piada deja sa ete su meputique. Mequisatiquetueda uja: “Echua Puji ja mi uja equisametani: ‘Quema manu hora beju nariatiani. Mique ete su ema pascua tsine su ediadia quema discípulo cuana neje.’ ”

19 Da su cuaja Jesús ja cuatsasiatana nime, atana tse. Pascua tsine jana basetatana tse.

20 Beju dhidha su Jesús, mesa discípulo cuana neje tuna ediadia ete su putiana. Dapia misha naja su aniutetana huecuana. 21 Ediadiatani cama, Jesús ja uja atana huecuana:

—Ene putsu, yama micuana equisainia, piada ja micuaneda ema emenajatia deja madhada cuana peje su.

22 Da su ebia su jatacuamadhatitana huecuana. Piada piada ja Jesús quisabatana uja:

—Echua Puji, ¿yama jia? ¿Ahua yama?

23 Da su Jesús ja jeutsutana huecuana:

—Ema neje tupupai dhepe su ediadiani ja ema emenajatiata. 24 Beju ema sufri epu, cuaja Diusu sa quirica su derejiji yani batame. ¡Aba quitaita, ema menajatiaji epu deja! Ebia su saida quita tuseda puji bataji epu mahue puji puina.

25 Da su Judas ja di Jesús quisabatana:

—Echua Puji, ¿ahua yama?

Jesús ja tueda jeutsutana:

—Ehe, miada.

26 Tuneda beju ediadiatani cama, Jesús ja pan jemitsua putsu, diusulupai Diusu atana. Pan ped'uped'ua putsu, discípulo cuana herereatiatana. Uja atana huecuana:

—Mediaque. Ye pan da quema equita pu cua nime.

27 Daja huecha vinoji emeji jemitsua putsu, diusulupai Diusu atana. Vinoji emeji berereatiatana huecuana. Uja atana huecuana:

—Pamapa su meid'ique ye emeji jenetia. 28 Ye vino da quema ami pu cua nime. Quema ami ed'uichati putsu, Diusu ja cristiano cuana mesa jamitsuti eichacua etiata. Dueji cristiano cuana eperdonatayu, quema ami ed'uichati putsu. 29 Yama micuana equisainia, aimue ema eid'iicha mahue, quema Tata Diusu ecuatsasiati su micuana neje eid'i teje.

30 Da su beju diadiape putsu, Disusu sa puji satsutana huecuana. Satsupe putsu, Olivo murucu su putitana huecuana. 31 Dapia cuinati putsu, Jesús ja uja atana huecuana:

—Pamapa micuaneda ema mehua ejusianetia ye dhidha su. Daja micuaneda ya, cuaja Diusu sa quirica su epuani batame. Beju uja epuani: “Yama huisha quinaji emanuame su, huisha cuana eberebereatita.” 32 Ema biame, beju eid'eyu. Id'eyu putsu, ema micuana equene Galilea yahua su eputi dapia micuana emitsu puji.

33 Da su Pedro ja Jesús uja atana:

—Echua Puji, pia cuana ja mi ejusianetiata biame, aimue mi yama mu daja ya mahue.

34 Da su Jesús ja tueda jeutsutana:

—Pedro, ene putsu, mi yama yainia, ye dhidha su quitaita da quimisha nuati mida uja emimi: “Mue yama Jesús shanapa.” Huaripa deja queji mahue su, daja mida epu quimisha nuati.

35 Da su Pedro ja uja jubida atana Jesús:

—Mi neje quema manu taji biame, aimue mi yama ejusianetia mahue.

Beju pamapa pia discípulo cuana di daja putana.

36 Da su beju Jesús da mesa discípulo cuana neje cuinatiana Getsemaní banime et jude su. Dapia cuinati putsu, Jesús ja discípulo cuana uja atana:

—Meaniuteque upia. Yama Diusu emitsuti chuadera.

37 Jesús ja Pedro, Jacobo, Juan cuana bahui tu neje dusutana. Pia cuana mu dapia hue anititana. Chuadera cuinati putsu, beju Jesús ebia su jatacuamadhapirutiana.

38 Da su mesa quimisha discípulo cuana uja atana:

—Ebia su ema etajiatiani. Emanu nime ema ebatiani. Meanique upia. Ema neje meid'enique. Be metahuiji.

39 Da su Jesús chuadera pad'i puderatiana. Dapia beju d'epesa putsu, Diusu mitsupirutana. Uja Diusu bajatana:

—Quema Tata, miqueda puji mu pamapa ai cuana atasaida. D'eji su aque ema curusu su sufrimiento epusiu jenetia. Daja biame, mique tsada bahui papu. Ba quema tsada mu papu.

40 Da su beju quimisha discípulo cuana peje su jasiapati putsu, etahuitasa huecuana batana. Uja Pedro atana:

—¿A da aimue micuaneseda tucheda anitia mahue ema neje piada hora chidi dhucuana eid'eni puji. 41 Beju meid'enique. Diusu memitsuniaque Ishahua ja micuana epirubata mahue puji. Ene putsu, micuaneda jucha aja mahue yainia biame, daja micuaneda yainia, nimetucheda mahue putsu.

42 Beju neicha Jesús chuadera pad'i putiana Diusu emitsu puji. Uja atana Diusu:

—Tata, ahua aimue miada ema ye sufrimiento jenetia d'eji su aja mahue su, beju saipie hue. Mique tsada bahui papu. Quema mu mahue.

43 Da su beju neicha quimisha discípulo cuana peje su jasiapati putsu, etahuitasa huecuana batana. Tahui mecuana sa a taji mahue putsu, beju tahuitana huecuana. 44 Da su Jesús ja neicha ichajusiatana huecuana Diusu emitsu puji. Quimisha nuati puji Diusu mitsutana. Cuaja equene su Diusu mitsutana. Cuaja equene su Diusu mitsutana nime, daja huecha atana quimisha nuati puji. 45 Beju daja mitsupe putsu, neicha jasiapatibana quimisha discípulo cuana peje su. Uja atana huecuana:

—¿Ahua micuana etahuisa tsuhu? Beju mejanahuasaque hue. Beju tupu saida, juchaji deja cuana sa eme su ema emenajatiata hora cuinaitia putsu. 46 Menetianaque. Meputija. Mechamaque, ema menajatiaji epu deja beju epusiu.

47 Jesús da discípulo cuana neje daja epuani cama, Judas tu peje su cuinana. Tu neje jucuada deja cuana espadaji aida, judío cuana sa tata edhi ehuidusuji cuana ja beitutana huecuana Jesús painata huecuana puji. 48 Tuneda cuinatiji mahue su, Judas ja uja bahuequisatana huecuana:

—Quebata yama ebudhi, tueda da Jesús. Tueda meinaque.

49 Da su Judas ja Jesús naria putsu, “Ebuetsuaji”, yainia je, budhitana. 50 Da su Jesús ja tueda uja atana:

—Eshanapa, ai ya puji mi pueitia, aque hue.

Da su beju deja cuana ja Jesús inatana edusu puji.

51 Da hora su piada Jesús sa discípulo ja espada neje pia deja sa eid'aja siquijusiatana. Tueda deja da sacerdote aida sa emebajaji puina. 52 Da su Jesús ja tueda discípulo uja atana:

—Biuyuque mique espada. Quebata da espada neje eicheti su, tueda da espada neje emanu. 53 Bahue puque, ahua yama quema Tata baja cua su, tuahueda siete tunca ejaitiana mil ángel cuana quema beituta cua ema pabianetiata huecuana puji. 54 Beju aimue daja yama ebaja mahue. Jiahue ema risijiji mecuana sa dusu taji, cuaja Diusu sa quirica su derejiji yani batame.

55 Da su Jesús ja tu inaja puetana deja cuana uja quisabatana:

—¿Ai puji ni da micuaneda pueitia espadaji, aquiriji metse cama? ¿Ai ema tsi puji bata? Pamapa tsine ema templo su aniana cristiano cuana ebuetsua puji. Aimue micuaneda ema inana mahue. 56 Beju daja epuani, cuaja Diusu sa profeta chenu cuana ja deretaidha batame Diusu sa quirica su.

Da su beju discípulo cuana pamapa jududupetana. Jesús tu mehua jusianetiatana huecuana.

57 Da su beju Jesús dusutana huecuana sacerdote cuana sa echua puji aida butse su, Caifás banime. Dapia jacuatsasiati ebuetsuaji, judío cuana sa tata edhi edhuidusuji cuana di netitaina. 58 Beju Pedro ja uqueda uqueda tije atana Jesús ete taraca etsequeini teje. Taraca su nubi putsu, Pedro aniuteana piada piada huaraji aida sa soldado cuana naja su, cuaja Jesús yata huecuana eba puji.

59 Da su pamapa tueda huaraji aida cuana ja Jesús tuaquisaja atana tu emanuame puji. Bid'umimi neje tuaquisaja atana huecuana tu manu neje, ematseta puji. 60 Beju jucuada jatuaquisatiji cuana ja bid'umimi neje Jesús tuaquisatana biame, aimue teje atana huecuana tu ematseta puji. 61 Uja putana jatuaquisatiji bid'umimi puji cuana:

—Ye Jesús da uja puana: “Yama ye Diusu sa templo jusiaute cua. Quimisha tsine jenetia yama neicha netianameyu cua.”

Beju daja tueda jatua quisatiji bid'umimi puji cuana ja atana.

62 Da su sacerdote sa echua puji aida netiana putsu, Jesús uja quisabatana:

—¿Jucuaja su ni miada ye jatuaquisatiji cuana aimue ejeutsuinia mahue?

63 Beju Jesús ja mue jeutsuja a. Da su sacerdote aida ja uja Jesús atana:

—Diusu sa ebani su yama mi ecuatsasiainia, butsepi ecuanaju quisaque. ¿A da mida Diusu sa Ebacua?

64 Da su Jesús ja jeutsutana.

—Ehe, ema da. Diusu aida, tucheda eni sa bai eni bene yani micuaneda ema eba. Buepa su judu duju su ema epusiu micuaneda eba.

65 Daja id'aba putsu, sacerdote aida ja mesa ebia jud'uji d'iud'iujatana, ebia su duinini putsu. Uja atana pia cuana:

—Beju ye deja ja Diusu madhabataitia mesa mimi neje. ¿Ai puji ni ecuaneda pia jatuaquisatiji cuana chacu cua. Micuaneda quitaita beju id'abaitia tusa mimi madhada cuana. 66 Beju ¿cuaja micuaneseda piba? ¿Tueda juchaji ahua mahue?

Da su jeutsutana huecuana uja:

—Tueda da juchaji. Pamanu beju.

67 Da su Jesús ebu su0 equedi neje quid'uatana huecuana. Ichetana huecuana. 68 Pia cuana ja Jesús tuarisi putsu, ebu su ichepirutana huecuana. Daja iche putsu, uja atana huecuana:

—Ahua ene mida Diusu sa Jabeituti Deja su, quisaque ecuanaju aiya mida ebu su ichetaitia.

69 Beju daja Jesús yatani huecuana cama, Pedro etseque su anina. Piada sacerdote aida sa emebajaji epuneje ja nariatana. Tuahueda Pedro uja atana:

—Mida di tueda Galilea yahua jenetia deja Jesús neje puniunetina.

70 Da su Pedro ja uja jeutsutana:

—Bue mahu ema ai jepuiti mida emimiani.

71 Da su beju Pedro taraca etibeini su epuhu cama, pia emebajaji epuneje ja batana. Uja atana epuneje ja dapia netitana cuana:

—¡Mechamaque jichu deja! Tueda di tueda Nazaret ejude jenetia deja Jesús neje puniunetina.

72 Beju neicha Pedro ja uja atana:

—Mue yama shanapa tueda deja.

73 Da su dapia enetita cuana ja Pedro nariatana. Tu chama putsu, uja atana huecuana:

—Ene putsu, mida da tueda deja sa ebuqueji. Ecuanaju eshanapainia mique mimi jepuiti. Galilea cuana sa mimi nime mique mimi.

74 Da su Pedro Diusu bahue pupiruana. Uja jeutsutana huecuana:

—Beju yama micuana quisaitia aimue yama tueda deja shanapa. Diusu ja ema pamatseta, ahua ema bid'umimi epuani su.

Da hora quitaita su Pedro mimipeitia su beju huaripa deja queiana. 75 Da su Pedro japibatiana Jesús sa uja mimi cuana su: “Huaripa deja queiji mahue su, mida, ‘Mue yama Jesús shanapa’, epu quimisha nuati.” Da su Pedro taraca jenetia tipeida cuinana putsu, jubida pana.