5
Moodw putunglo doin minam
1 Jisu nyipam vdwa kaatokula okv moodw putungbv chaato, hoka nw dootungto, 2 okv ninyigv lvbwlaksu vdwv ninyia dooyumto, okv bunua tamsar raptoku:
Jvjvbv mvngpu ngv
(Lk 6:20-23)
3 “Yvvbunudw yalu lo heema do vla chindunv; bunu mvngpuv,
Nyidomooku gv Karv ngv bunu gvngv!
4 Aij 61:2 “Yvvbunudw tinggw dunv, bunu mvngpuv;
Pwknvyarnv bunua maare!
5 Miri 7:11 “Yvvbunudw nyanyak dunv, bunu mvngpuv;
bunu Pwknvyarnv ogugo milv pvdw um naarwk sireku!
6 Aij 55:1,2 “Yvvbunudw Pwknvyarnv gv mvngnam a kaiyachokbv rinwng dunv bunu mvngpuv;
Pwknvyarnv bunua mvngnam mvnwngnga nyumchi more!
7 “Yvvbunudw kvvbi ajina aya mvngpa dunv bunu mvngpuv;
Pwknvyarnv bunua aya mvngpare!
8 Miri 24:3,4 “Haapok darwknv vdwv mvngpuv;
bunu Pwknvyarnvnyi kaapare!
9 “Yvvbunudw sarsopoyo gv lvgabv ridunv, bunu mvngpuv;
Pwknvyarnv bunua ninyigv umvuu bv minre!
10 1Pit 3:14 “Yvvbunudw Pwknvyarnv gv mvngnama rigv rila mvdwkmvku nama paadunv hv bunu mvngpuv;
Nyidomooku gv Karv ngv bunu gvngvku!
11 1Pit 4:14“Nonuno mvngpuv vdwlo nyi vdwv nonua nyarjikaula okv mvdwkmvku la okv nonuno gvlo mvvnamrunam a mvvlwk rulwk la mvrekudw, ogulvgavbolo nonuno ngoogv nyi bv rinam lvkwngbv. 12 2Kri 36:16Mvngpula okv sakpu yalaka, nonugv lvgabv kairungnv rijo lakmu kaanam go nyidomooku aotv vvpv jipvnv. Nonua richo dakcho yanv krim gv nyijwk vdwaka mvdwkmvku nyatoku.
Alu okv loung
(Mk 9:50; Lk 14:34-35)
13 2Kri 36:16; Nyim 7:52“Nonuno nyia opi mvnwng gv lvgabv alu jvbv ridunv. Vbvritola aluv vdwlo tinama nyemu kubolo, um lvkodv tidukubv mvnyu kuma. Hv anyung kaamanvgobv ridu kunv, vkvlvgabv um ora dukunv okv nyi vdwv um chaajap chariap mvdukunv.
14 Jn 8:12; 9:5 “Nonuno nyiamooku mvnwng gv lvgabv loung jvbv ridunv. Moodw putunglo pamtv mvnama vvsi nyuma dunv. 15 Mk 4:21; Lk 8:16; 11:33 Yvvka mvdurupuma vmv baanu gvrila bati akonv takmam madunv; vbvmabvya hv um ungka kolo vvdin gvrila naam gv nyi mvnwngnga loung ungka modunv. 16 1Pit 2:12 Hvkv aingbv nonuno nyi vdwgv kaagialo loung bv unglaka, vkvlvgabv nyi vdwv nonugv alvbv rinama kaapa gvrila, nyidomooku lo doonv nonugv Abunyi hartv reku.
Pvbv lvkwngbv tamsarnam
17 “Ngam Moses gv Pvbv ngala nyijwk vdwgv tamsar nama rila ria dubv aapvnvgo vla mvngma bvka. Ngo bunu gvnga ria dubv aama, vbvritola bunugv tamsar nama jvjvbv rilin modubv aapvnv. 18 Lk 16:17Mvngpa laka nyido ngvla kvdwv vdwlo nyemabv doobwng redw, Pvbv gv gaam akor chargoka rilaria nyumare—ogumvnwng gv nyeri loka nyemare.* ogumvnwng gv ngeri lo; Vmalo so gv tamsarnam dvdv ngv jvjvbv rilinre. 19 Vkvlvgabv so Pvbv gv gaam minam akin guka yvvdw tvvma gvrila ajin haka vbv rigv bolo hv Pwknvyarnv gv Karv lo miangyachok nvgobv rire. Kvvbi gaam gunvlo, yvvdw Pvbv gaama tvvgvrila ridula ajin haka vbv rimu bolo, hv Pwknvyarnv gv Karv lo kainvgobv rireku. 20 Ngo nonua mindunv, nonu Pvbv tamsarnv vdwa okv Parisis vdwa alvyala Pwknvyarnv gv mvnglwkbv ribolo Pwknvyarnv gv Karv lo aalare.
Haachihaak namgv lvkwnglo tamsarnam
21 Mog 20:13; Det 5:17 “Nonuno tvvdu krim nyi vdwa minto, ‘Gwngrw gwma bvka; yvvdw gwngrw gwrinv um hinching chingmure.’ 22 Vbvritola vjak ngo nonua mindunv: yvvdw ninyigv achiboru a haachi† no haahi bolo; Pota kvvbi lo doodu ogurinv kaamabv no haachila. dunv um hinching chingmure, yvvdw ninyigv achiborua ‘Noogv alvnamv ogu anyung kaama!’ Vla mindunv um kvba lo boolwkre, okv yvvdw ninyigv achiborua anyung kaamanv pvchanvno vla minv ngv vmv maatarbv guku uyumooku lo vngyare. 23 Vkvlvgabv no vdwlo noogv Pwknvyarnvnyi amin jise nga yugwnglo jitv rinyi hoka no achiboru gv nam rinying nama mvngpa bolo, 24 noogv amina hoka yugwng hoka kayupila baapubv noogv achiboru gvlo vngla alvbv sarsopoyo dukubv rimisipikula aakur lakula noogv amina Pwknvyarnvnyi jilaka.
25 “Nam akonv rinyingla kort lo kvba japdubv vnggv rinyi, no kort lo vngtv madvbv baapubv yalung nga japdarjapa minsu laka. No hoka aaku bolo hv nam jwngkadakanv gvlo jilwk reku, hv nam pulis lo laklwkre okv nam patwk tumlwk reku. 26 Ngo nonua mindunv, no hoka noogv aje nga dornyama dvdvlo doobwng reku.
Nyimv nyilo rimurnam lvkwng nga tamsarnam
27 Mog 20:14; Det 5:18“Nonuno tvvtoku, ‘Nyimv nyilo bv rimur minsu mabvkv’ vla minam a. 28 Vbvritola vjak ngo nonua mindunv: yvv akonv mvvga anga doogvkargv daloka vla kaabiu dunv hv ninyigv haapok lo ninyia lvkobv rimur roku. 29 Mt 18:9; Mk 9:47 Vkvlvgabv noogv nyikbik nyikkv naam kaamur moduboloka, um koolinla ora tvka! Hv alvyare noogv ayak aba gonv kaama namv, ayak mvnwngnga uyumooku bolo orlwk komam svnga. 30 Mt 18:8; Mk 9:43Noogv laak lakbik angv nam rimur gvdubolo, um palin gvrila ora tvka! Hv achialvbv alvyare noogv laak gunv kaama namv, ayak mvnwngnga uyumooku bolo vngmam svnga.
Burmi sinam gv lvkwng nga tamsarnam
(Mt 19:9; Mk 10:11-12; Lk 16:18)
31 Det 24:1-4; Mt 19:7; Mk 10:4 “Sika vbvka minto, ‘Yvv akonv atubogv nywng nga burbolo burdukunv vla mvnwngnga chimpa modubv siti go ninyia jirung laka.’ 32 Mt 19:9; Mk 1:11,12; Lk 16:18; 1Kor 7:10,11 Vbvritola vjak ngo nonua mindunv: nyi akonv ninyigv nywng nga nyilo rinying koma gvrila kvvbi rimur lokv burdunv, okv nywng ngv kvvbi nyilu go naakubolo nyilu naachonam angv ninyia rimur modukunv; okv yvv ho nyimv anga nywngbv naaya dunv hvvka rimurlo aata dunv.
Milv nama tamsarnam
33 Leb 19:12; Num 30:2; Det 23:21 “Nonuno krim gv svbv minam haka tvvnyato, ‘Noogv milv nama topu mabvka, vbvritola noogv ridubv vla Ahtu gvlo milv nama rito laka.’ 34 Jem 5:12; Aij 66:1; Mt 23:22 Vbvritola ngo vjak nonua mindunv: vdwlo nonu milvnam go minredw, ogugo mintak nvyoka. Nyidomooku a mintak nvyoka, tv Pwknvyarnv gv dogingngv; 35 Aij 66:1; Miri 4:2 sichingmooku haka mintak nvyoka si ninyigv lvpa gv lvnu kongv, Jerusalem haka mintak mabvka so si kainv Dvbv gv pamtv ngv. 36 Noogv dumpo haka mintakla milv yoka, ogulvgavbolo no dwmw sogo nyika yapung yakia dubv mvnyu mare. 37 ‘Vkv vmalo maakv’ vse nga minda tvka-um lvvbo yadubv noogv minammv Alvmanv Angv gvlokv aadunv.
Mvrwkrirwk sinam gv lvkwng nga tamsarnam
(Lk 6:29-30)
38 Mog 21:24; Leb 24:20; Det 19:21 “Okv nonuno tvvpado svbv minam a, ‘Nyik kvlwk v nyik ngurv go, okv hijung kvlwk v hijung ngurv go.’ 39 Vbvritola ngo vjak nonua mindunv: nonua rimur nvnga mvrwkrirwk siyoka. Nyi gonv nam moobik tanga svbiak bolo, ninyia noogv moochi tangaka svbiak dvmu laka. 40 Okv nyi gonv noogv jvkoklaklwk ka dvrit laila kort lo nam kvba mintv bolo, ninyia noogv jvkoklaklwk haka jitam yalaka. 41 Okv sipai akonv nam yikungyira nga lvtw akin go gvji labvkv vla minbolo, no lvtw anyigo gvji laka. 42 Vdwlo nam nyi gunv ogugo kooridw, ninyia jirung laka; vdwlo nyi gonv nam ogugo narlabvkv vrinyi, um no ninyia narrwk silaka.
Nyirunv vdwa pakto laka
(Lk 6:27-28,32-36)
43 “Nonuno tvvpa nyado svbv minam a, ‘Ajin a paklaka, nyiru nvnga kaanwng mabv rilaka.’ 44 Vbvritola vjak ngo nonua mindunv: nam nyirunv vdwa paklaka okv nam mvdwkmvkunv vdwgv lvgabv kumlaka 45 vbv rigvrikula nonuno nyidomooku lo doonv nonugv Pwknvyarnv Abu gv umvuu bv ridu kubv. Nw tarwkbaknv nyi majeka okv tarwkbaknv nyi jeka ninyigv doonyi a bunu gvlo nyika jimudu. Okv alvbv rinv haka okv alvmabv rinv jeka doochar a sarlu jimudu. 46 Nonuno nonua paknv nga pakmwng bolo, ogulvgabv Pwknvyarnv nam aya nga jidubv? Lampu naaria nvngvka um risu gvrila! 47 Okv nonu noogv ajin vdwa gaam raamwng bolo, um no alvnvgo ripv mvngsu duai? Mvngjwng manv vdwvka um rinyadu! 48 Leb 19:2; Det 1:13No rilakriku runglaka—noogv Abu nyido tolo doonv gv rilak rikunam aingbv!
5:4 Aij 61:2
5:5 Miri 7:11
5:6 Aij 55:1,2
5:8 Miri 24:3,4
5:10 1Pit 3:14
5:11 1Pit 4:14
5:12 2Kri 36:16
5:13 2Kri 36:16; Nyim 7:52
5:14 Jn 8:12; 9:5
5:15 Mk 4:21; Lk 8:16; 11:33
5:16 1Pit 2:12
5:18 Lk 16:17
*5:18 ogumvnwng gv ngeri lo; Vmalo so gv tamsarnam dvdv ngv jvjvbv rilinre.
5:21 Mog 20:13; Det 5:17
†5:22 no haahi bolo; Pota kvvbi lo doodu ogurinv kaamabv no haachila.
5:27 Mog 20:14; Det 5:18
5:29 Mt 18:9; Mk 9:47
5:30 Mt 18:8; Mk 9:43
5:31 Det 24:1-4; Mt 19:7; Mk 10:4
5:32 Mt 19:9; Mk 1:11,12; Lk 16:18; 1Kor 7:10,11
5:33 Leb 19:12; Num 30:2; Det 23:21
5:34 Jem 5:12; Aij 66:1; Mt 23:22
5:35 Aij 66:1; Miri 4:2
5:38 Mog 21:24; Leb 24:20; Det 19:21
5:48 Leb 19:2; Det 1:13