Jonnyi
NYIKRWKAATAMNAM
Mintamchonam
Jonnyi nyikrwkaatam namgo Jisu kristonyi vdwlo bunugv Ahtu bv vla mvngjwngla rinam lvga lo kristan nyi vdwa mvdwkmvkula riyilo hokaching lvktoku. Lvknv soogv dinchikochi nammv purinv vdwa mvngtin modubv okv mintvmiru dubv vla, okv hinchingchingla okv mvdwkmvku la riyilo mvngjwng lo vngdwng bv doodudakdubv vla lvkto.
Holvgavbolo kitap soogv takloyangv nyikrwkaatamnam okv nyikrw gv vdwnv kaaringnam gaam am oogv alu lo kristan vdwgv lokv tvvchinto, vbvritola kvvbi mvnwng vdwgv lvgabv chinchi kaalin lamanam gobv rito. Mirimimpak lo gamlv gv lvkobv minam aingbv so kitap soogv gamlv nga angu angusinv lamtv lokv mindwmiying dvdvla nyikrw vdwgv lokv mindu. Kitap gv lvkwngbv tvvchin dubv minbwk jirilo mvngnam vv aku akusibv minjvka, soogv gamlv gv koolv jvngv si pvbwngvrwng sidunv: Ahtu Kristo gv lokv, Pwknvyarnv anyung jvngaku ninyigv ogumvnwng nyimak dvdv nga okv Uyudvbv aka mintak sila rigumriya nyami riku, okv vdwlo ninyigv ogumvnwng nga rigumriya la rinam am ringam rikudw ho ninyigv mvngjwngnv nyi vdwa anwnv sichingmooku okv nyidomooku nga bunua boktalwkji kunam am amin bv jireku.
Arwng lokv darlinnam
Mintamchonam (1:1-8)
Nyikrw kaatukake okv gvrja kanw lo siti lvknam (1:9-3:22)
Tibungnam siti lo siel Kanw vdwv (4:1-8:1)
Tapu minam kanw (8:2-11:19)
Sichingpanv okv achiamin anyi (12:1-13:18)
Angu angusinv nyikrw (14:1-15:8)
Pwknvyarnv gv haachi chigvnvnv talu pwkkanw (16:1-21)
Bebilon gv yakkunam, okv svnwngsvmin gv rigum yakunam, nyijwk mvvnvrunv, okv Uyudvbv (17:1-20:10)
Jwngkadakadw gv ataranya ngv (20:11-15)
Anwnv nyidomooku, anwnv sichingmooku, anwnv Jerusalem (21:1-22:5)
Anyunganya (22:6-21)
1
1 Soogv kitap si Jisu Kristo gv kaatamnam am lvgap pvvto. Pwknvyarnv baapu alvbv ogugo rilinvnglin tvvdunv vdw sum kaatam nvvdu kubv vla ninyigv pakbu am ninyigv soogv nyikrwkaatamnam sum jitoku. Kristo ninyigv nyidogindung nga vngmunam lokv svkvnv ogu ogua ninyigv pakbu Jonnyi chimuto, 2 okv Jon ninyigv kaanam dvdv nga ogumvnwng nga minji toku. Soogv mimpa jila rinam si Pwknvyarnv gv lokv okv Jisu Kristo ninyigv jvjv nga kaatam kunam lokv jinam doin gv lvkwng ngv. 3 Yvvdw soogv kitap sum puridunv vv mvngpuv, okv yvvdw soogv nyijwk doin gamchar sum tvvgap dunv okv ogugo soogv kitap ara so lvkpvdw tvvnv vdwgv lvgabv vv mvngpuv! ogulvgavbolo so mvnwng si rikunam lvgabv dwv nvchi duku.
Gvrja kanw nga kumrwksinam
4 Mog 3:14; Nyikrw 4:5Asia gv mooku lo gvrja kanw am Jon lokv lvknam:
Pwknvyarnv, yvvla, yvvyila, okv yvvla aatv dukunv, okv ninyigv dvbvdootumnvnv adarai gv Dow kanw gv lokv, 5 Aij 55:4; Miri 89:27 okv Jisu Kristo jwkjwkvrwk bv minjiriji kunv, sinam lokv atuake bv turkur kunv okv yvvdw nyiamooku gv dvbv dvdv ngaka rigvdogv kujinv gv lokv ayanamv okv sarsopoyonamv nonu gvbvka.
Hv ngonua pakdu, okv vkvgv erinlwkjila sijikunam lokv ngonu rimur vdwlokv linpv kunv 6 Mog 19:6; Nyikrw 5:10 okv karv gv nyibu gobv mvla kula ninyigv Pwknvyarnv okv Abu gv kudungkua nga ngonua rimu duku. Yunglit vla jwkrwv dvbvsingtam bv Jisu Kristo gvbv riyilaka! Amen.
7 Dan 7:13; Mt 24:30; Mk 13:26; Lk 21:27; 1Tes 4:17; Jek 12:10; Jn 19:34,37 Kaatoka, Hv doomwk tolo gvngv aareku! Nyi dvdv ngv ninyia nyik daadw lokv kaapa reku, ninyia nvki nvngvka kaapareku. Siching soogv nyi mvnwng ngv ninyigv lvgabv kapreku. Vkvlvgabv vbvching rirungre!
8 Nyikrw 22:13; Mog 3:14 Pwknvyarnv Kairungnv Ahtu, yvvla, yvvyila, okv yvvla aatvv dukunv ngv hv mindu, “Ngo atuake ngv okv ataranya ngv.”
Kristo gv nyikrwgo
9 Ngo nonugv achiboru, Jon, okv Jisu gvlo riminggvnv gobv rikunam lvgabv ninyigv Karv gvbv rikunv vdwgvlo hindarkaso aanam am nonugv lvkobv ngo chitamrvnam mingvkunv. Ngo Jisu gv kaatam nam jvjvnv okv Pwknvyarnv gv gamchar am japgo jinam lvga lo nga Patmos gv bokpin golo vvpvtoku. 10 Ahtu gv alu lo ngam Dowv rigvdakgvto, okv ngo ngoogv kokwng peelvbv, adu duutvrungbv dunam vlvgo tvvpato, hv tapu minam gv adu aingbv duto. 11 Ho vlv ngv vbv minto, “No ogugo kaadudw lvkgap pvvtoka, okv ho kitap am pamtv kanw gv gvrja: Epesias, Smairna, Pergamum, Tiatira, Sardis, Philadelphia, okv Laodisia lo jilwk tvlaka.”
12 Ngo ngam mindunv yvvbvri vla kaakur kunamv, vbvrikunamv ngo ain mvdurupum tungpvnvnv kanwgo kaato, 13 Dan 7:13; 10:5 okv bunugv aralo nyi jvbv rinvgo kaato, okv vkvgv vji v lvchu lo soochi nvgo okv ain hokpo go ninyigv haakwnglo gvnv go. 14 Dan 7:9; 10:6 Ninyigv dvmwv hultanu vmalo moodw tapam jvbv pungputojito, okv ninyigv nyikv vmv aingbv hungto; 15 Eje 1:24; 43:2 Ninyigv lvpa ngv pitol am lvngka posok dubv pyaklapnam aingbv unglit toku, okv ninyigv vlv ngv isi dvngdo gv adudunam aingto. 16 Hv ninyigv lakbik peelvlo takar pwkkanwgo bvngto, okv ninyigv gaam lokv tagotaksak bv riukse ripujenv go lintoku. Ninyigv nyukmuv doonyi gv alu lopo lo ungnam aingbv ungto. 17 Aij 44:6; 48:12; Nyikrw 2:8; 22:13 Vdwlo ngo ninyia kaabvdw, ngo ninyigv lvchu kampwk lo sikunv nyi aingbv gipv toku. Hv ninyigv lakbik langv ngoogv aolo lakpv tvla minto, “Busu yoka!” Ngo atuake okv ataranya ngv. 18 Ngo turnv akinnv! Ngo sitoku, vbvritola vjak ngo dvbvsingtambv turbv duku. Sinam okv sinv vdwgv mooku gv aolo ngo rigvdogv ladu kunv. 19 Vbvrikunamv, ogugo no kaapvdw, vjak ogugo ritvdonvdw, okv kokwng lo ogugo ritvdonvdw soogv baanyi am lvkgap pvvla ritoka. 20 Noogv ngam lakbik peelvlo takar Pwkkanwgo bvngdubv kaanamv; okv ain mvdurupum tungpvnvnv kanwgo bvngdubv kaanam si arwngjvnv gobv ridu: takar pwkkanw mindunam si gvrja kanw gv nyidogindung vdwa mindunv, okv mvdurupum tungpvnvnv kanwgo mindunam si gvrja kanw am mindunv.