1 Ago man Pailat ibol dugo, iŋsan yu tamol adi Jesus diŋaneg lubum nam dufuni a. 2 Yu tamol adi mel bukorkor igo dudurun anda yak ditiladeg, kabuŋan fo disisi idu dugo, yamel daran ak nam tinin dubuluwi a. 3 Agog Jesus siŋiren na diau dumul dugo, kukokan diganeg naon dufuteg dupeig dubol, “Per o, Juda sad kiŋ!” Iŋ ago dubol dugo iŋ naon dufuni se ya.

4 Ago gug Pailat fon naod na kuai te ilasag, ibol irupudai, “Ale, ŋai iŋsan saian ta lo muruan isini san ŋile man tia geig a. An niŋen o naom na kuai te ŋigane ilasa da.” 5 Jesus gumuran fo kam dudurun anda gubak mi ditilade yan disisi idug, yamel daran ak tinin fufo yen dugo, kuai te ilasa ya. Agog Pailat ibol, “Ale, tamol en nek ebo ya!”

6 Ago gug pris gurman adi iŋ tempel san titianek adi da Jesus dileg duwagiŋ go dubol, “Aigim fo abali mok abali!”

Gug Pailat ru naon irupidai, “Ŋai iŋ lo saian ta ŋile man tia geig a. Ago yak niŋen o aŋsem aŋane aup, aigim fo abali.”

7 Ago tag Juda adi igo dubol, “Maŋsama kubiaeŋ ta yen dan lo man, iŋ imat mok a. Man dugo, iŋ Anut Nanun mok ago ibol a.”

8 Pailat ru ago iloŋ go, ilon tubun mi irer se ya. 9 Ago tag Pailat iŋ fon Jesus ida ab lo diladug isumiani, “Oŋ sauta mok a? Oŋse fu ubol pe ŋaloŋ.” Gug Jesus ru naon ta irupei man tia ya. 10 Agog Pailat ibol, “Oŋ ata wo ŋai awag ta wabi na dak i? Uloŋ, ŋai dabai ag da ya. Ŋupaso wo ŋabol tap, ŋupaso wa. Tia, aigim fo ŋie bani ŋubali wo ŋabol tap, ŋubali wa. Oŋ ŋaisag fug ta uloŋ na yak i?”

11 Jesus ru naon igo ibol, “Anut dabai ipanog lo oŋ ka ŋai bilag ŋadu san. Tia dop, oŋ mel ta saian ak giniag san dabai ama tia ya. Fun amaiak niŋen o, tamol a ŋai oŋ tuo lo iginiag an, iŋsan aupasek oŋsa aupasek en iriŋani a.”

12 Pailat ru an ago iloŋ tag, irut irer saian geig go, Jesus ipasi wo dal an abaŋ yabi se ya. Gug Juda adi disasai duwagiŋ dugo dubol, “Oŋ tamol en pasip yau tap man, oŋ Kaisa turan tia geig a. Tamol ta iŋsen kiŋ ak ibol dan man, Kaisa naon dal ifou da.” 13 Pailat siseiŋ tubun mi ago iloŋ tag, iladug, Jesus kuai te iganeg ilasa. Iŋ ru tulek tamol*Jas san badim fo imasi a. Aben an yaŋan Pat Aten dubol da, Hibru ru lo Gabata dubol da. 14 Gamu man tumanek tubun san anaŋ kubunek nal idu wo da.

Ad titiŋaem mi dugo Pailat Juda adi igo ibol irupidai, “Ale, aŋanem kiŋ nek ebo ya!”

15 Gug Juda adi igo dubol duwagiŋ, “Ganep ideg yau! Ganep ideg yau! Aigim fo bali!”

Ago tag Pailat isumianai, “Aŋ ŋai aŋanem kiŋ aigim fo ŋibali wo abol di?”

Agog pris gurman adi ru naon igo dubol, “Maŋ kiŋ taida man tia geig a. Kaisa sen kisaek o lian mi a!” 16 Pailat ru ago iloŋ tag, Jesus aigim fo dubali wo ipidinai a.

17 Agog Pailat san yu gurman adi Jesus diŋaneg, iŋsinanen aigim isinig, dida Jerusalem dibiseig diaug, aen ate tan biŋaboŋ ta, yaŋan “kabuŋan kapen san aben” dubol dan ate dilasa. Hibru ru lo yaŋan Golgota dubol da. 18 Aben ante Jesus aigim fo dubali a. Nal an lo tamol uraru an dam iŋ Jesus ida sisem dubalai a. Uraru an giraŋen ananaem dubalai idu dugo, Jesus iŋ titiŋae mi dubali a.

19 Aria, Pailat ai lapan fo girek ta ago ibol igire, “Jesus Nasaret tamol, iŋ Juda sad kiŋ.” Girek an aigim gumuran fo dubali a. 20 Iŋ Hibru, Latin, Grik ru lo igire ya. Aben a Jesus ate dubali an man Jerusalem giraŋen na ya, an niŋen o Juda wei mi girek an dusuti se ya. 21 Man niŋen o Juda sad pris gurmadi Pailat igo durupei, “Oŋ Juda sad kiŋ ago ubol gire umoi. Tia, ‘tamol en iŋsen ŋai Juda sad kiŋ ibol’ ago mi gire.” 22 Gug Pailat ru naon igo ibol, “Mel ŋai ŋigire yan ŋai ŋigire ya. Nek ago mi yen a.”

23 Yu tamol Jesus aigim fo dubali la gug, tinin fufo iŋanen yamel kulos an digalai idug, anen anen duburoug malan iwoiwo didiri a. Kulos ta fidian mi, awan ta duwei na ya, 24 an niŋen o ago dubol, “Id en ta tisire na wa. Tia, en yen dop, id ate satu takok dop, ta iŋ isiŋani tap iŋane wa.” Yu tamol kulob a digane yan gubak mi ru girek lo yen amaiak nuŋon digane ilasa ya. Girek ago ibol,

25 Jesus tinan, iŋanen tein, Maria Klopas iwon, Maria Magdala san pein, pein iwoiwo yan iŋ Jesus san aigim fun na sumeik mi dutur a. 26 Aria, Jesus tinan ile, megeloum a iŋ o imat dan tinan da sisem dutur dugo yil tag, tinan irupei, “Nei, oŋane nanuk ule!” 27 Agog fon megeloum an irupei, “Ule, an oŋane tina.” Ago tag nek nal antem megeloum an tinan Maria iŋaneg ida sen nuab lo diaug, kaginan igane se ya.

28 Aria, Jesus iŋsan urat fidian iganeg itout an iloŋ go, Anut anen ru girek ta wagam yen an nuŋon ilasa wo igo ibol, “Ŋai you o ŋamat da.” 29 You kapen ta wain gigen aman da yak lo yen a. Ago tag mel ta beig san titaliŋ ago yak diŋaneg, wain gigen an lo disominig, ai ate dufoug, duwate isidag, Jesus awan lo diganeg, isupupi. 30 Iŋ an ituŋali gug igo ibol, “Itout a.” Ago ibol go gumuran imagor paon fo idu dugo ŋutun ibiseig ilasa ya.

31 Nal a Jesus imat o man, soubul dukubune san melmel digane se ya. Sabat nal idu wo sumeik dan iŋ nal tubun mok a. Ago tag Juda adi tamol utol an susanudi aigim fo dien san dumoi. Man niŋen o diaug, Pailat igo dusumiani, “Oŋ ubol pe yu tamol aenta dinaip, ŋied dubalsisinip, ririan dumat dop, susanudi ka dupasai idu wa.” 32 Iŋ awok ibol tag, diaug, tamol uraru Jesus giraŋen na dubalai an mi ŋied dubalsisinig dumat a. 33 Ago gug Jesus dile yak man, iŋ imat la yan niŋen o dumoig, ŋien ta dubalsisini na ya. 34 Gug yu tamol kisaek yu iŋaneg, yaug, isou isidag, Jesus giraŋen isowae dugo, you dar da sisem dudu kisaek oŋ a. 35 Talpein enti, iŋsan leil lo melmel e ilasa yen fidian niŋedi wo kuai te ibol ilasa yen, iŋsan ru an rumok geig a. Iŋ ru rumok mi iŋiŋeŋ da, ago dugo iŋ ru rumok ak mi iŋiŋeŋ dan iloŋ da. Ru e igire den, aŋ Jesus o ilom lo rumok san niŋen o igire da. 36 Mel e gamu ilasa den man wagam Anut girek lo ibol ak ago mi nuŋon igane ya. Ru an igo ya, “Iŋsan tatu ta kisaek dubalsini man tia ya.” 37 Agod ru taidam igo ya, “Tamol a yu nam disowae an leil dupani wa.”

38 Gurai idu dugo Josef, Arimatea panu san tamol an Pailat san na yaug, Jesus san sisanun iŋane wo isumiani. Josef dam iŋ Jesus ilon lo rumok a. Ak man Juda niŋedi wo irer an niŋen o ilon lo mi imianuk oŋ itor se ya. Pailat awok ibol tag, Josef imul yaug sisanun an iŋane ya. 39 Nikodemus, iŋ wagam tidom ta lo Jesus san na yau amaiak, gamu gureŋ mumalun uyanan ak isinig ipalu ya. An san muruan kitek 30 kilogrem igo woŋ a. 40 Juda sad kagin lo Jesus tinin gureŋ nam diamisig, yamel dam gureŋ diabig, ate sisanun dubuluwig, dufoug, disare wo disini diau a. 41 Aben a Jesus aigim fo dubali an, giraŋen na sasau aben ta sumeik yen da. An ate pat gubaran dukubuneg yen da, pat gubaran an gamugo tamol ta ate disare ya. 42 Nal an Juda adi sad tumanek tubun ak melmel dukubune san nal sumeik a. An niŋen o tamol uraru an Jesus sisanun aben ante digane ya, man dugo, mutou an sumeikan yen a.