3
मण्डलीदा च्याबा म्हिगदे
1 चु सत्य ताम हिन्ना। खालै म्हिसे मण्डलीदा च्याबा गे लबारी म्हाइबा चा ज्यबा ताम हिन्ना। चु चा थेला सेमसे लबारी म्हाइबा ज्यबा गे हिन्ना। 2 थेतबासेलमा मण्डलीदा च्याबा म्हि चा खालैसे दोष उन्बारी आखम्बा, म्रिङ गिक जे मुबा, ह्राङसे ह्राङदान तहरी थान्बा, जम्मासेन मान लबा, डोन्बोदा मान लबादेन ज्यना लसी लोप्बारी खम्बा ततोःमुला। 3 ओच्छे झि आइरक थुङ्सी ङ्य्होइसी भ्रबादेन छेबा बङ्बा लबा आहिन, तर जम्मानदेन छ्याम ढिक्बा, सोजो, टाङगाला लिच्छा आभ्रबादेन, 4 थेसे ह्राङला दिम परिवारदा ज्यना लसी च्यातोःला। ओच्छे थेला कोलागदेसे कुल्बा ताम ङ्यान्सी थेदा मान लतोःला। 5 चुदे खालै म्हिसे ह्राङला दिमला म्हिगदेदा तहरी थान्बारी आखम्नी भिसम थेसे खाह्रङ् लसी परमेश्वरला मण्डलीदा च्याबारी खम्ला? 6 मण्डलीदा च्याबा म्हि चा भर्खर प्रभुदा विश्वास लबा छार म्हि तबारी आत। आहिन्सम थेसे ह्राङसे ह्राङदान घ्रेन स्होसी घमण्ड लसी भ्रला। ओच्छे शैतानसे याङ्बा सजायरी थेएनोन परब तला। 7 थे ख्रीष्टदा विश्वास आलबा म्हिगदेला ओन्छाङरीनोन ज्यबा म्हि ततोःला, आहिन भिसम जम्मासेन थेला तामगन लसी भ्रला ओच्छे शैतानना यारी परब तला।* तीत १:६-९
8 थेह्रङ् लसीन मण्डलीरी ह्रो लबा म्हिगदेएनोन जम्मासेन मान लबा म्हि ततोःला, ओच्छे ले न्ही मुबा ह्रङ् लसी ताम पाङ्बारी आत, झि आइरक थुङ्सी ङ्य्होइबादेन टाङगाला लोभ लबारी आत, 9 बरु थेनीगदेसे ह्राङला सेमसे म्हन्बा अन्छार ठीक गे लसी सत्य विश्वासदा जोगब लसी थान्तोःला। 10 ङाच्छा थेनीगदे ठीक मुला कि आरे भिसी मण्डलीसे च्यागै। ओच्छे तिगै दोष आरेसम थेनीगदेसे मण्डलीरी ह्रो लगै।
11 थेह्रङ् लसीन मण्डलीरी ह्रो लबा म्हिला म्रिङम्हेमेगदेएनोन† “मण्डलीरी ह्रो लबा म्हिगदेला म्रिङम्हेमेगदे” भिबा चा मण्डलीरी ह्रो लबा म्रिङम्हेमे अथवा मण्डलीरी ह्रो लबा म्हिला म्रिङदा पाङ्बा हिन्ना। स्य्हान्दोग्याम मान याङ्बादेन खालैला तामगन आलबा ततोःला। ओच्छे ह्राङसे ह्राङदान तहरी थान्खम्बादेन जम्मान तामरी म्हिगदेसे विश्वास लखम्बा ततोःला।
12 मण्डलीरी ह्रो लबा म्हिलाएनोन म्रिङ गिक जे ततोःला ओच्छे थेसेनोन ह्राङला कोलागदेदेन दिम परिवारदा ज्यना लसी च्याखम्तोःला। 13 तिग्दा भिसम मण्डलीरी ह्रो लबागदेसे ज्यना लसी गे लजी भिसम थेनीगदेसे मान याङ्ला। ओच्छे थेनीगदेसे ख्रीष्ट येशूदा लबा विश्वासला बारेरीनोन स्य्हान्दोगदेदा पाङ्बारी आँट याङ्ला।
य्हाङसे विश्वास लबा तामगदे गाते घ्रेन मुला
14 ए मुबा ग्लारी योनान खबा सेम मुला, तसैनोन ङाइ एदा चु चिठी भ्रिबान मुला। 15 तिग्दा भिसम तिगै लसी ङा खबारी घइजी भिसम चु चिठीग्यामसेन परमेश्वरला दिम य्हाङला छोन्बो परमेश्वरला मण्डलीरी खाह्रङ् लसी गे लतोःला भिबा ताम एसे था याङ्ला। तिग्दा भिसम परमेश्वरला मण्डली चा सत्य तामला भर ताबा थामदेन जग हिन्ना। 16 य्हाङदा था मुला कि य्हाङसे लबा विश्वास म्हिसे था आयाङ्बा घ्रेन मुला,
“य्हाङसे येशूदा म्हि ल्हुइरी म्राङ्जी,
थे परमेश्वरदा सेम निबा मुला भिसी परमेश्वरला आत्मासे उन्जी।
ओच्छे थेदा स्वर्गदूतगदेसेनोन म्राङ्जी।
थेला बारेरी य्हुल्सा य्हुल्सारी थेःजी,
थेदा जम्बुलिङरी विश्वास लजी,
ओच्छे थे घ्रेन य्हालदेन शक्तिरी तोर फेप्जी।”