1 Baꞌ nat gook tanoolh pɨx ba ji bii na baꞌ moo bam aayaꞌ na bar piasta kaꞌ bhaan Paaskua taꞌm, gio jumai na miaꞌn oiꞌñ nam paiꞌ dhuuk jix basdak tu kuaꞌdaꞌ gu paan gakdhiꞌñchix kam, iampɨx jaꞌp tuꞌm na ariin tɨmkalh. Baꞌ janoꞌ gu ja gɇꞌgɇrkam tuk guiꞌ nam jaiꞌ ja palhbuiꞌñdhaꞌ gu Israel kam jaꞌtkam nam tu daandaꞌ buiñor gu Dios, gio baꞌ guiꞌ nam sap jix mat kaꞌ gu ñioꞌkiꞌñ gu Dios, tɨi moom gaꞌngaꞌ am nam jax jaꞌk duuji iatgidhai tu chiñiaꞌ nam muꞌaaꞌ gu Jesuus. Aaꞌndaꞌ gɨt am nam ba dagiaꞌ, 2 guꞌ ji na guꞌ sap cham jax jix bhaaiꞌ, na guꞌ kar piasta kaꞌ. Baꞌ jaꞌpni pɨx ka xi chɨꞌɨɨk jamɨt:

―Mooch chakui juandaꞌ na kar piasta kaꞌ, noꞌt ba buus baꞌ. Na guꞌ noꞌ chich xib daagɨk mi jaꞌp paiꞌ jax ba buim ja nɨiꞌñchudat gu jaꞌtkam, giilhim bhaiꞌ ji bhaakuꞌ am jich bui.

3 Baꞌ jaꞌxpɨx gu Jesuus jimɨɨk mummup ba tu kuaꞌ Betaania, na paiꞌ kio gu Simoon guiꞌ na tootolhidhat ka gakiidhat gu tukgaꞌn. Baꞌ moo miꞌp ba ai maaꞌn gu ubii uaꞌdat maaꞌn gu ɨlhiꞌch jix moik gu jodai jaꞌaachix kam, nam alabaastro kɨꞌn jix mat kaꞌ, na mi suuꞌntuꞌ gu osbhagaꞌn guiꞌ nam nardo kɨꞌn jix mat kaꞌ nax dhaꞌram namɨɨk, na joidham uub. Baꞌ nat jax kukpioꞌkak bhaiꞌ xi choiꞌ moꞌran gu Jesuus, pu bɨɨx ɨp moo nat bha toiꞌ. 4 Baꞌ jɨꞌkchi gu jaꞌtkam nam miꞌp tuꞌiiꞌ bhaiꞌ ji bhaak jamɨt, jup kaiꞌch am:

―¿Jax baꞌm aagɨt puiꞌ tu bua dhi ubii? Tɨɨꞌ nat bɨɨx xi dhoodak dhiꞌ na tuꞌx dhaꞌram namkɨt. 5 ¿Cham bhaiꞌ aa na tu chiñiaꞌ gɨt nam gaꞌraꞌ nam baꞌ ja makiaꞌ gɨt guiꞌ nam alh cham jir tu biaꞌ kam, nam attiiru cham biaꞌ nam tuꞌ kɨꞌn tu sabaꞌdaꞌ? Jaiñ na guꞌ jaꞌkbuiꞌ busaakdat gu tuumiñ na jax noꞌ ñich maaꞌn oidhaꞌ ba tu jua.

Baꞌ puiꞌ jɨꞌ xi kaiꞌchimɨk am bhaiꞌ ji ñiok jamɨt gu ubii, 6 guꞌ ji nat guꞌ jotmodaꞌ ja sooꞌmcholh gu Jesuus, jup ja tɨtda:

―Chaꞌpim tuꞌ kɨꞌn juandaꞌ dhiñ jaduuñ, na pim guꞌ cham maat nat jax kaiꞌñkam bhañ juulh dhiꞌ na pimɨt tuꞌ bhaan ba ji chu aꞌga. 7 Guꞌ matgam gu jaaduñ na pim ja aaꞌ, gammɨjɨ yaꞌ jam buip tuiꞌkaꞌ am ji, xi ja maakat japim dho nam alh kɨꞌn jup xiaꞌñdhidhaꞌ. Guꞌ aañ nañ bar boi chaꞌm kam 8 nat baꞌ bhaiꞌ bañ choiꞌ dhi ubii dhiꞌ na joidham uub, na baꞌ cham xijai kaꞌ, dai nam bañ yaaspaꞌ. 9 Tuꞌ sɨlhkam kɨꞌn jañ yaꞌ pu jam tɨɨdaꞌ, na paiꞌ dhuuk bhaiꞌ ji chum aꞌgaꞌ gux bhaiꞌm kaiꞌchdham ñiꞌook yaꞌ dhi oiꞌñgaꞌn, bɨɨx jup jum aꞌgidhaꞌ dhi ubii na baꞌ bhaan jix maatɨꞌ kaꞌ nat jix bhaiꞌ dhuu nat bhañ choiꞌ dhi osbhagaꞌn gu nardo na joidham uub.

10 Baꞌ maadɨt gu mambhɨɨx daman gook gu noonbiꞌñ, guiꞌ na Juudas Iskariote tɨɨꞌkaꞌ, xi mɨɨ nat ja aaꞌñdham gu ja gɇꞌgɇrkam tuk guiꞌ nam jaiꞌ ja palhbuiꞌñdhaꞌ gu Israel kam jaꞌtkam nam tu daandaꞌ buiñor gu Dios, na baꞌ maaxik kɨɨsaꞌ nam boi bhɨichdhaꞌ gu Jesuus. 11 Baꞌ joidham jix bhaiꞌm ɨlh jamɨt na ba ja aagiꞌñ, jup tɨtda am nam muiꞌ namkidhaꞌ na mu ja baidhikaꞌ gu ja oꞌrosiiris tuk na paiꞌ sɨlh oirɨdaꞌ gu Jesuus. Baꞌ gu Juudas ba jim gaa na jax jaꞌk jix bhaiꞌ ji buusniaꞌ nam jix bhaiꞌ bhɨɨyaꞌ, nam baꞌ cham xijaichdhaꞌ nam daagɨi boi bhɨichdhaꞌ.

12 Baꞌ buimgidhak bɨɨpɨꞌ dɨr na baꞌ moo muiꞌ jim kɨɨsaꞌ jaꞌxpɨx na paiꞌ dhuuk kasnir bakaax tum jugiaꞌ, gio baꞌ gu jumai na miaꞌn oiꞌñ nam jix basdak tu kuaꞌdaꞌ gu paan gakdhiꞌñchix kam, baꞌ moop ba tɨkka am gu noonbiꞌñ gu Jesuus, jup tɨtda am:

―¿Paap jaꞌk jix aaꞌ nach jimɨi tu bhaidhaꞌ nach tu jugiaꞌ jaꞌxñi nat yaꞌ bam ai gu piasta bhaan Paaskua taꞌm?

13 Baꞌ gu Jesuus gook mɨjɨ xi ja joot bhammɨ gɇꞌ kiicham, jup ja tɨtda:

―Aañ jaꞌp tɨi kaiꞌchɨt na pim mu jimiaꞌ aapiꞌm gook bhammɨ gɇꞌ kiicham. Bhaiꞌ pim tɨgiaꞌ maaꞌn gu chioꞌñ nar tujuandam na mi jaꞌp ba tu baiꞌntuꞌndaꞌ maaꞌn gu baiꞌñdhakar taꞌm. Baꞌ aapiꞌm muiꞌ xi oidhaꞌ gatuuk dɨr, pɨx nɨidhidhaꞌ pim na mummu ji aayaꞌ kiicham. 14 Baꞌ aapiꞌm cham xiꞌɨrdat muiꞌ xi aayaꞌ, jaꞌp japim tɨɨdaꞌ gu miꞌ kiokam: “Aach jaꞌp jich chɨɨdak bhach joot gu Gɇꞌkam nap sap taiñbuidhaꞌ maaꞌn kap gum baꞌaak paiꞌ na tu bioꞌ, na sap yaꞌ tu jugiaꞌ ja bɨɨm gu noonbiꞌñ nat bam ai gu piasta bhaan Paaskua taꞌm.” 15 Baꞌ guiꞌ tu jam tɨɨꞌñchudaꞌ bhɨjɨ jaꞌp tɇꞌkob, na paiꞌ tɨ kɨɨꞌmpigix gio na gɇꞌx chu bhaiꞌ. Bhaiꞌ pim baꞌ tu bhaidhaꞌ nach tu jugiaꞌ jaꞌxñi.

16 Baꞌ muiꞌp ma jii mɨt gu gook gu noonbiꞌñ, bhammɨ mɨt ba ai gɇꞌ kiicham. Puiꞌ dho ji chu buus na jɨꞌk jax ja tɨtda gu Jesuus. Cham xijaich jamɨt, dai na mɨt xi chu bhaidhak gu koiꞌ nam tu jugiaꞌ. Jaꞌxpɨx baꞌ giop ka xi jii mɨt mummu nat paiꞌ dhɨr bha ja joot.

17 Baꞌ ji chukgɨk miꞌ ba ai gu Jesuus ja bɨɨm gu mambhɨɨx daman gook gu noonbiꞌñ. 18 Miꞌ baꞌ bhaiꞌ ji chu juu mɨt. Baꞌ nam miꞌ daraat ka tu kuaꞌ, jup ja tɨtda:

―Tuꞌ sɨlhkam kɨꞌn jañ yaꞌ pu jam tɨɨdaꞌ, maadɨt aapiꞌm na pim yaꞌp tuꞌiiꞌ, maaxik jiñ kɨɨsaꞌ ja bui gu gɇꞌgɇrkam jum aaꞌndam nam boiñ bhɨichdhaꞌ.

19 Baꞌ guiꞌ gampaiꞌ ji dhuu mɨt, baꞌ pɨx bhaiꞌ ji chɨkka mɨt jɨꞌmaꞌn, jup tɨtda am:

―¿Aañiꞌ aa chi?

Gio gu jumai:

―¿Kaꞌ aañiꞌ aa chi?

20 Baꞌp ja tɨtda gu Jesuus:

―Maaꞌn pɨx ji guꞌ aapiꞌm mambhɨɨx daman gook na pim yaꞌp tuꞌiiꞌ, nach jɨꞌk maap ya tɨ sɨssɨ dhi jooxiaꞌ taꞌm nañ jax chuꞌm kaꞌm tu kuaꞌ aañ. 21 Jir am kat na pu cham jaiꞌch kaꞌ gɨt gu jaroiꞌ na maaxik jiñ kɨɨsaꞌ nam boiñ bhɨichdhaꞌ. Tɨix joiꞌgɨꞌñ iñ, na guꞌ giilhim jum tulhiiñaꞌ maaxik xiñ kɨɨsai. Ku baꞌ guꞌ dhiꞌ miꞌ pɨx puiꞌ ba jimdaꞌ ji, na bhaan pɨx jum kuugalhdhaꞌ na jax jum kaiꞌch mi uꞌuan taꞌm gu ñioꞌkiꞌñ gu Dios, na puꞌñi jaꞌk jiñ dhoodaꞌ am aañ nat bhañ joot.

22 Baꞌ miꞌ puiꞌ nam tu kuaꞌ, nat jax dhaa ɨp gio gu Jesuus jaiꞌ gu paan, xi chu taxchaabgidhak jix dhaam jaꞌk taꞌtak xi jaisaidhat pɨx muiꞌ ji ja maa gu noonbiꞌñ, jup ja tɨtda:

―Dhiꞌñi pim pup muiꞌ xi jugiaꞌ, na guꞌ dhiꞌr jiñ chuukuꞌ.

23 Gio baꞌ maaꞌn miꞌ dhɨr jaꞌp bhaiꞌp ji bhɨi gu alhiꞌch jaꞌaa na mi suuꞌntuꞌ gu biiñ guiꞌ na uubas kɨꞌn jup duñiix, baꞌ mu jaꞌk xi ja maakak xi ja chia nam iꞌyaꞌ. Baꞌ guiꞌ bhaiꞌp xi ii mɨt jɨꞌmaꞌn kaam. 24 Na mɨt xi iꞌchuk baꞌp ja tɨtda:

―Dhiꞌ na pimɨt tu ii, dhiꞌr jiñ ɨꞌɨɨr na kɨꞌn xib dɨr maakam aagix kaꞌ na jax jaꞌk jix aaꞌ guñ Gɨꞌkoraꞌ nam miꞌ puiꞌ jiimdaꞌ gu jaꞌtkam, na guꞌ ka mɨlhiaꞌ guñ ɨꞌɨɨr na baꞌ tu namkix kaꞌ gu ja uaꞌtulhdharaꞌ, na baꞌx bhaiꞌ tu ja jimiaꞌ. 25 Tuꞌ sɨlhkam kɨꞌn jañ yaꞌ pu jam tɨɨdaꞌ, daipuꞌ dhi maaꞌn kaam nañ xi ioꞌji dhi uubas baraaꞌ gu xib, nañ guꞌ moo bar boi chaꞌm kam. Janoꞌ baꞌ na paiꞌ dhuuk ba tum kuugalhdhaꞌ nañ baꞌ giop ba iꞌyaꞌ jix dhaam jaꞌk, ku guꞌ gux uañ ji, cham tuꞌ dhiꞌ pu chuꞌm.

26 Miꞌ dhɨr baꞌ maaꞌn xi laalagɨk tɨi ma jii mɨt bhammɨ jaꞌk oidhaꞌ taꞌm, nam paiꞌ Oliibus kɨꞌn jix chu mat kaꞌ. 27 Guꞌ ji na guꞌ na mɨt baas ba ji bhɨi, jup ja tɨtda gu Jesuus:

―Yaꞌ moo mam ai nam kuugalhdhaꞌ na jax tu uaꞌñix mi uꞌuan taꞌm nap jum kaiꞌch: “Muꞌaaꞌ am gu bipiaꞌdam, baꞌ gu kakasnir jum jɨꞌdɨlhkadai pɨx chaꞌtak boopoyaꞌ am jɨꞌmaꞌn.” Baꞌ dhiꞌ na puiꞌ jɨꞌ tu uaꞌñix, aapiꞌm jam aagɨt puiꞌ jaꞌk jum kaiꞌch, na pim pu jiboiꞌñgiaꞌ xib dhi tukaaꞌ nam bañ dhagiaꞌ guiꞌ nam bha ja jootsaꞌ gu gɇꞌgɇrkam jum aaꞌndam. Na guꞌ cham tuꞌ dai nam jiñ kuupaꞌ pɨx, guꞌ jaꞌpji nam pu tu chiñiaꞌ nam jiñ muꞌaaꞌ. 28 Ku baꞌ guꞌ aañ gatuuk yaaꞌ ji nañ jax ba oirɨdaꞌ. Kagɨt nañ bɨɨpɨꞌ mu ba oirɨdaꞌ Galilea na pim baꞌ aapiꞌm mup ba aayaꞌ.

29 Baꞌp kaiꞌch gu Peegro:

―Aañ dho gi chakui jimɨiññolhiaꞌ ji, sia mɨt dhi jaiꞌ jiboiꞌññor. Cham jax bua sia ku mɨt jum bɨndak jiñ dhaa.

30 Baꞌp tɨtda gu Jesuus:

―Tuꞌ sɨlhkam kɨꞌn jañ yaꞌ pum tɨɨdaꞌ na gookim ka jiiñkiaꞌ gu takaaruiꞌ xib dhi tukaaꞌ, aap baikim puiꞌ ba tɨꞌyaꞌ nap cham jiñ kaichuꞌ.

31 Guꞌ ji na guꞌ xi kɨɨk gu Peegro, jup kaiꞌch:

―Aañ dho gi pu tɨꞌyaꞌ ji nañ jum kaichuꞌ, cham jax bua sia mɨt jum bɨndak jiñ mua.

Baꞌ bɨɨx puiꞌp ji chɨi mɨt gu jaiꞌ noonbiꞌñ.

32 Baꞌ miꞌ pɨx ji ai mɨt na paiꞌ Getsamanii tɨ tɨɨꞌ, baꞌp ja tɨtda ɨp gio gu Jesuus:

―Yaꞌni pim ka darkaꞌ. Aañ bhaꞌñi ka tu aꞌgaraꞌ jix dhaam jaꞌk buiñor guñ Gɨꞌkoraꞌ.

33 Baꞌ baasɨꞌn iam xi jimɨɨk baik pɨx xi ja baidhak gu noonbiꞌñ, dai gu Peegro, gio gu Jakoobo, gio baꞌ gu Juan. Baꞌ gampaiꞌ jim duu nam bhaiꞌ xi ñɨiꞌñ, panaas kux buam jum aaꞌ, 34 baꞌp ja tɨtda:

―Aañ moo cham puiꞌ ka tu tatdaꞌ ji, bax chaat iñ nam miaꞌn ba jiim guiꞌ nam boiñ bhɨichdhaꞌ. Aañ jaꞌp ɨlhiiꞌñ na pim yaꞌ pɨx kañ ñɨɨrdaꞌ ɨp aapiꞌm, dai na pim moo cham kooksodaꞌ, tɨ nɨiꞌñdhaꞌ pim.

35 Baꞌx ioꞌm baasɨꞌn iam xi jimɨɨk mi jaꞌp oꞌlhiaꞌn kɨꞌn xi kɨkbuk xi dhumartɨk, dɨɨrap na xi chu siisap gu maꞌooꞌn. Baꞌ muiꞌ ji chu aꞌga jix dhaam jaꞌk buiñor guch Gɨꞌkoraꞌ, na tɨkkaꞌn noꞌ sap jix bhaaiꞌ na palhbuidhaꞌ nam baꞌ cham boi bhɨichdhaꞌ, 36 jup kaiꞌch:

―Aapiꞌñ Gɨꞌkoraꞌ nap jix dhaam jup tuꞌiiꞌ, nap bɨxchuꞌx bhaaiꞌ nap pu tu duñiaꞌ, xiñ palhbuiꞌñ nam cham boiñ bhɨichdhaꞌ, na guꞌ dhiꞌ jaꞌp ji buusan na jax gu tuꞌ na giilhim jix xibuꞌ nañ tu iꞌyaꞌ. Piam jap xiñ guguuxdhaꞌ nañ baꞌ cham jax jiñ aaꞌndaꞌ noꞌp guꞌx aaꞌ nam kuugalhdhaꞌ nap aap jax ɨlhiiꞌñ. Ku guꞌ aañ cham tuꞌ ji nañ moo cham aagɨt jup kaiꞌch.

37 Baꞌ jaꞌxpɨx nat jaꞌk gɨi miꞌ nat paiꞌ xi ja chianɨk nam ka darkaꞌ gu baik gu noonbiꞌñ, miꞌ pɨx kookos am nat ba ja tɨɨ. Baꞌp tɨtda gu Jesuus gu Peegro:

―Simoon, ¿moo jaꞌp jix kooxim ap aa? Tɨ nɨiꞌñdhaꞌ ap. Moo pich chi moo janoꞌ koi na ñich jax jii. ¿Kaꞌp ji siamri jɨꞌx xi chɨ nɨidhimɨk aa? 38 Guꞌ pim ji tɨ nɨiꞌñdhaꞌ ji, gio na pim tu aꞌgadaꞌ jix dhaam jaꞌk buiñor guñ Gɨꞌkoraꞌ na baꞌ cham jam maiꞌchiaꞌ gu jaꞌook. Puiꞌ dho pɨx tɨi xi chu tatdaꞌ jia na pim nakgaꞌ gɨt na pim jum tulhiiñaꞌ na jax aañ, guꞌ ji na pim guꞌ cham nakooꞌ.

39 Baꞌ dai nat xi ja ñiññichdhak gio mu jaꞌk jup ji dhuu nat tu aꞌgam jix dhaam jaꞌk, jir maaꞌn na jax kaiꞌchim nat jax jaꞌk tu aꞌga bɨɨpɨꞌ dɨr. 40 Baꞌ jaꞌxpɨx nat gio jaꞌk jup gɨi, kookos am nat giop ba ja tɨɨ, pu cham ñiok am na tɨi xi chu ja aꞌgiꞌñ, nam guꞌ giilhim jix kookxik. 41 Baꞌ na bar baikim nat xi chu aꞌgarak jix dhaam jaꞌk nat gio miꞌp ba ai, maaꞌn nam jax kookos nat ba ja tɨɨ, baꞌp ja tɨtda:

―¿Kux baꞌ moo jaꞌp jix kookxik japim aa? Gi nañ jup jam tɨtda na pim tɨ nɨiꞌñdhaꞌ nañ jɨꞌx ka tu daan. Xib na guꞌ cham kam aaꞌ na pim tɨ nɨiꞌñdhaꞌ, nat guꞌ bam ai na paiꞌ dhuuk tu daaxix na aañ nat bhañ joot guñ Gɨꞌkoraꞌ boi bañ bhɨichdhaꞌ am guiꞌ nam cham tuꞌ kaꞌm tɨ nɨiꞌñ. 42 Mummuni dhɨr bhaiꞌ ba jimchuꞌ muiꞌ ja bɨɨm guiꞌ nañ jaroiꞌ jam aagiꞌñ bɨɨpɨꞌ na maaxik jiñ kɨɨsaꞌ. Maik gor jach muiꞌ xi ñamkiaꞌ.

43 Baꞌ na puiꞌ jɨꞌ ka ja tɨtda gu Jesuus gu noonbiꞌñ, miꞌ ba ai ji guꞌ gu Juudas, guiꞌ na maadɨt jir diꞌ gu mambhɨɨx daman gook gu noonbiꞌñ, ja bɨɨm muiꞌ gu jaꞌtkam kukxir ji chu uaꞌdat am, jaiꞌ gu uꞌuux jix kaapak, na mɨt bha ja joot gu ja gɇꞌgɇrkam tuk guiꞌ nam jaiꞌ ja palhbuiꞌñdhaꞌ gu Israel kam jaꞌtkam nam tu daandaꞌ buiñor gu Dios, gio guiꞌ nam sap jix mat kaꞌ gu ñioꞌkiꞌñ gu Dios, gio baꞌ guiꞌ nam jir ja gɇꞌgɇrkam tuk kaꞌ gu Israel kam jaꞌtkam. 44 Baꞌ gu Juudas bɨɨpɨꞌ dɨr xi ja aaꞌñdhak nam baas dɨr ka jiim na jax jaꞌk duñiaꞌ nam baꞌ ba machiaꞌ na jax chuꞌm jir diꞌ kaꞌ, jup ja tɨtda:

―Guiꞌ nañ jaroiꞌ miꞌ xi ñioꞌkdhaꞌ, dhiꞌr diꞌ kaꞌ. Baꞌ aapiꞌm jotmodaꞌ miꞌ pu dagiaꞌ, jix bhaiꞌ pim buuprai pu bhɨikaꞌ.

45 Puiꞌ dhom duu. Na mɨt jax miꞌ ai, pɨx jix bhaiꞌ kaiꞌchim gu Juudas, jup tɨtda gu Jesuus:

―Aach bha jaꞌk ɨp jiñ jaduuñ.

Gio baꞌ nat miꞌ xi ñioꞌki. 46 Baꞌ guiꞌ jotmodaꞌ miꞌ pu daa mɨt, buuprak gamaiꞌ pu bhɨich jamɨt.

47 Baꞌ maaꞌn gu maaꞌnkam tugiꞌñ gu Jesuus, nat jax baabuk gu kuxiiruꞌn bhaiꞌ tɨi soñiich maadɨt guiꞌ na mɨt mu ja joot gu ja gɇꞌgɇrkam tuk guiꞌ nam jaiꞌ ja palhbuiꞌñdhaꞌ gu Israel kam jaꞌtkam nam tu daandaꞌ buiñor gu Dios. Guꞌ ji nat guꞌ cham ai, nat guꞌ jaꞌp xi ñɨɨra, dai naakaꞌn pɨx ai palhɨɨp. 48 Baꞌp ja tɨtda gu Jesuus guiꞌ na mɨt ba daa:

―¿Jax ku pim baꞌ bɨxchuꞌ kukxir tu uaꞌdat bha jaꞌk jiim gam uꞌux jix kaapak? ¿Tuꞌ ɨxkum jiñ ɨlhiiꞌñ japim aa? 49 ¿Jax ku pimɨt baꞌ cham mummu puñ dhaa gɇꞌ chiop nañ moo miꞌ pu oirɨt tu jam aꞌgiꞌñdhaꞌ nabap tanoolh? Kaꞌ baꞌ na guꞌ dhiꞌ na bhaan pɨx jum kuugalhdhaꞌ na jax jum kaiꞌch mi uꞌuan taꞌm gu ñioꞌkiꞌñ gu Dios.

50 Baꞌ dɨɨlh miꞌ xi buak jamɨt gu Jesuus gu noonbiꞌñ pu jiboiꞌññor.

51 Baꞌ nam nammɨ gama jaꞌk ba uaꞌ buuplhixim gu Jesuus, gatuuk dɨr muiꞌ ka jimchuꞌ maaꞌn gu biapmaꞌ dai tɇb kutuun ji chɨiꞌchgɨt. Baꞌ oꞌbhaiꞌñdhak tɨi daa mɨt, 52 guꞌ ji na mɨt guꞌ cham bhaiꞌ daa, kutuunaran pɨx daa mɨt. Jum jupnak pu jimɨiññor jix dhaapkat.

53 Baꞌ mummu ba aich jamɨt gu Jesuus na paiꞌ kiokaꞌ guiꞌ nax ioꞌm jir ja gɇꞌkam tuk kaꞌ guiꞌ nam jaiꞌ ja palhbuiꞌñdhaꞌ gu Israel kam jaꞌtkam nam tu daandaꞌ buiñor gu Dios. Baꞌ bɨɨx maap bam jumaap jamɨt gu jaiꞌ guiꞌ nam cham pɨk jir ja gɇꞌgɇrkam tuk kaꞌ, gio baꞌ guiꞌ nam jir ja gɇꞌgɇrkam tuk kaꞌ gu Israel kam jaꞌtkam, gio baꞌ guiꞌ nam sap jix mat kaꞌ gu ñioꞌkiꞌñ gu Dios. 54 Baꞌ gu Peegro gatuuk miꞌp ba ai, na guꞌ gatuuk dɨr pɨx muiꞌ ji jim jix chooꞌnnɨt. Miꞌ dhɨr jaꞌp dɨɨrap pɨx ji dhaibu miꞌ na paiꞌ mɨim gu tai, nam paiꞌ tu naadat juukaꞌ gu oꞌrosiiris.

55 Baꞌ gu gɇꞌgɇrkam tɨim tɨ tɨkkaꞌn am nam jax jaꞌk duuji iattulhdhai tu chiñiaꞌ nam muꞌaaꞌ gu Jesuus, guꞌ ji nam guꞌ cham jɨꞌxkat nɨiꞌñ na mu paiꞌ giilhim tu buim, ni nam paiꞌ dhuuk puiꞌ tɇ kɇɇ. Miꞌ dho guꞌ pu cham bhaaiꞌ nam jax tɨꞌyaꞌ. 56 Baꞌ jaiꞌ dhɨt tɨi xi iattulhiꞌñ am, guꞌ ji nam guꞌ puiꞌ pɨx cham jup ja jɨɨgiꞌñ, na guꞌ maaꞌn maakam jup kaiꞌchdhaꞌ, gio gu jumai maakam ɨp. Miꞌ puiꞌ cham ka nokiaꞌ, miꞌ dhɨr jumai bhaiꞌ tɨip ji chu aꞌgaꞌ. 57 Jaiꞌ guꞌngukɨt tɨi xi iattulhiꞌñ am, jup kaiꞌch am:

58 ―Dho guꞌ aach miꞌ paiꞌ puiꞌ kai ji nap kaiꞌch: “Alh jañ moo ka iaraꞌ dhi gɇꞌ chiop jaꞌtkam jup ja duiñ, baik tanoolh kɨꞌn jañ baꞌ gio jumai yaꞌp kɨɨsaꞌ, dhiꞌ baꞌ Dios bap jir duñiiꞌñ kaꞌ, cham tuꞌ tuꞌ jaꞌtkam.”

59 Ni gu puiꞌ kum cham maaꞌn ñiꞌook jup bua, sia kum panaas tɨi sɨlhkam kam xi kaiꞌch.

60 Baꞌ gux ioꞌm ja gɇꞌkam tuk guiꞌ nam jaiꞌ ja palhbuiꞌñdhaꞌ gu Israel kam jaꞌtkam nam tu daandaꞌ buiñor gu Dios, xi kɨkbuk xi ja sooꞌmchulhdhak nam sap cham ñiokdaꞌ, baꞌ ba tɨkka gu Jesuus, jup tɨtda:

―¿Jax jap ɨlhdhat ja kɇɇ dhi jaaduñ? ¿Jir sɨlhkam aa nam jax kaiꞌch, kaꞌm ji iat aa? Eap xi chu aꞌga nach xim kɇɇkaꞌ.

61 Guꞌ ji na guꞌ cham ñiok gu Jesuus, miꞌ pɨx pu daa. Baꞌ giop xi chɨkka jix bhaiꞌ pɨx, jup tɨtda:

―¿Jir sɨlhkam aa nap saak aap jir diꞌ guch Xoiꞌkam, nap saak jir Maraaꞌn gu Dios gux ioꞌm Gɇꞌkam?

62 Miꞌ dho gi baꞌ bhaiꞌ ji ñio ji gu Jesuus, jup kaiꞌch:

―Aañiꞌ dhor diꞌ. Kani na pim bañ chɨgiaꞌ nañ bhɨjɨmmɨni dhɨr bhaiꞌ ji buusniaꞌ tɨbaaꞌñ chɨr gatuuk nañ bhammɨx dhaam xi dhaakat sonpan gu Dios kɨɨꞌn dɨr.

63 Baꞌ gux ioꞌm ja gɇꞌkam tuk guiꞌ nam jaiꞌ ja palhbuiꞌñdhaꞌ gu Israel kam jaꞌtkam nam tu daandaꞌ buiñor gu Dios, ais saassa gu jannulhiꞌñ na sap baꞌ bhaan jix maatɨꞌ kaꞌ na cham jir am puiꞌ nat jax tɨi gu Jesuus, jup kaiꞌch baꞌ:

―¡Dho jaña! ¿Jarooch baꞌp ka nɨɨra nax bhaiꞌ tu aaꞌndaꞌ? Tɨɨꞌ nat dɨɨlh yaꞌ maaxik bam kɨi. 64 ¿Jax japimɨt gi ɨlhdhat kai? ¿Cham aa pim ɨlhiiꞌñ na giilhim jir uaꞌtulhdharaꞌ gu puiꞌ nat jax tɨi, na moo jaꞌxbuiꞌ gɇꞌkam jup xim taat na jax gu Dios?

Baꞌ bɨɨx bhaiꞌ ji bhaak jamɨt nam jɨꞌk miꞌp tuꞌiiꞌ, puiꞌ ji chɨi mɨt na sap puiꞌ pɨx bax bhaaiꞌ nam tu chiñiaꞌ nam muꞌaaꞌ.

65 Baꞌ bhaiꞌ ji dhaa mɨt puiꞌ xi chɨꞌɨɨk. Jaiꞌ mɨt bhaiꞌ ji xixbuidhimɨ, jaiꞌ na mɨt bhaiꞌ xi bulhdhak gu jannulh buupuiran bhaiꞌ xi gɨb, gio baꞌ nam xi chɨkka, jup tɨtda am:

―¿Jaroo bham gɨɨꞌ? Eap xich aagiꞌñ.

Miꞌ dhɨr baꞌ gu oꞌrosiiris jaiꞌ bhaiꞌp ji gɨbiimɨ mɨt buibsaran.

66 Baꞌ gu Peegro na miꞌ ka daa cham joiñat, bhɨjɨ dɨr jaꞌp tɨmnɨk tɇꞌkob miꞌ ba ai maaꞌn gu tɨyaa na miꞌr tujuandam kaꞌ. 67 Baꞌ miꞌ pɨx ji chɨɨ gu Peegro na miꞌ daakat ka juukaꞌ taikob, baꞌ bhaiꞌ xi ñɨidhimɨk jup tɨtda:

―¿Aap aa maadɨt jir diꞌ nap kaichuꞌ gu Jesuus Nasareet kam?

68 Guꞌ ji na guꞌ gu Peegro cham tu aaꞌ, dai nap kaiꞌch:

―Cham. Aañ dɨɨlh ji nañ jup oilhim jiñ jaduuñ. Pu ni nañ jix maat gu jaroiꞌ nap aagɨt jup kaiꞌch.

Baꞌ miꞌ dhɨr jimɨɨk gama jaꞌk jup ba kɨɨk kiꞌñgob. Baꞌ mi kɨɨkat jix buam jum aaꞌ, baꞌ moo maaꞌnnim ba jiiñ gu takaaruiꞌ. 69 Baꞌ gu tɨyaa muiꞌ xi ñɨidhimɨk ɨp gio, jup ja tɨtda guiꞌ nam miꞌp tuꞌiiꞌ:

―Guꞌñi dho bak maadɨt jir diꞌ na kaichuꞌ gu Jesuus.

70 Guꞌ ji na guꞌ gu Peegro jir maaꞌn na jax kaiꞌch. Baꞌ jaꞌxpɨx bhaiꞌp ji chɨkka mɨt guiꞌ nam jɨꞌk miꞌp tuꞌiiꞌ, jup tɨtda am:

―¿Jaꞌp aa moor sɨlhkam nap cham tuꞌ maadɨt jir diꞌ guiꞌ nam kaichuꞌ gu Jesuus Nasareet kam? Chi moo tɨi kaichuꞌ ap ji, guꞌ ji nap guꞌ cham tu aagam. Jax dhui na pim guꞌr miaꞌn jum oiꞌdhagɨm. ¿Kaꞌ cham aa aap jir Galilea kam? Tɨɨꞌ nap baꞌ moo jaꞌp puiꞌ tu ñiok nam jax tu ñiok gu mu kam.

71 Guꞌ ji na guꞌ xi kɨɨk gu Peegro, dai nat bhaiꞌ pɨx ji bhaam nam tɨix bhaiꞌ pɨx xi chɨkka. Bɨɨx aixim ja tɨtda na jax ɨlhiiꞌñ, jup kaiꞌch noꞌ guꞌ sap cham jir puiꞌ na jax kaiꞌch, ku gammɨjɨ pu doodaꞌ ku gi gu Dios na jax ɨlhiiꞌñdhaꞌ. Jaꞌpni moo kaiꞌch:

―Noꞌ guꞌ cham jir puiꞌ ku gi nañ jax jam tɨtda, ku puñ dhoodaꞌ ku gi gu Dios na jax ɨlhiiꞌñdhaꞌ, nañ guꞌ aañ tɨi ba jam aagiꞌñ nañ dɨɨlh jup oilhim. Gio pu cham jup nɨiꞌñ iñ na jax chuꞌm tɨ nɨiꞌñ gu jaroiꞌ na pim mɨjɨ paiꞌ aaꞌ. ¿Jax japim baꞌ duukat puiꞌ jaꞌk ɨlhiiꞌñ nañ aañ kaichuꞌ?

72 Baꞌ daipuꞌ xi ja tɨɨdak gio mi jaꞌp gampaiꞌp jim duu. Baꞌ giop ba jiiñ gu takaaruiꞌ, bar gookim nat giop ba jiiñ. Baꞌ bhaiꞌ pup tɨꞌñcho gu Peegro na bak pɨn puꞌñi tɨtda gu Jesuus bɨɨpɨꞌ dɨr: “Gookim ka jiiñkiaꞌ gu takaaruiꞌ nap aap baikim puiꞌ ba tɨꞌyaꞌ nap cham jiñ kaichuꞌ.” Baꞌ bhaiꞌ ji susua, nat guꞌ giilhim bhaiꞌx buam ji chu tatdat na puiꞌ xim aaꞌ.