1 Baꞌ mɨkkat nat ba buus gu tanoolh na cham tum juanat, gu Mariiya Magdalena, gio gu jumai Mariiya guiꞌ nar dɨꞌɨɨꞌn gu Jakoobo, gio baꞌ gu jumai gu ubii guiꞌ na Salomee tɨɨꞌ, ba tu sabaꞌlh jamɨt guiꞌ na joidham uub nam sap mu juulhdhapuꞌ gu tukgaꞌn gu Jesuus mu na paiꞌ kaat, na sap baꞌ cham giilhim uub kaꞌ na bhaiꞌ ji dhɨbaaꞌ. 2 Baꞌ tumiiñku taꞌm jix kɨꞌnkob nat kiaꞌpɨx bhaiꞌ ba ji chon, muiꞌ ma jii mɨt mummu dɨꞌn kɨr, nam guꞌ jaꞌp jum aaꞌ na pui mu kaat gu Jesuus. 3 Baꞌ nam nammɨ gama jaꞌk ba jiimchuꞌ, jup kaiꞌchim am:

―¿Jarooch baꞌ umuaꞌñdhaꞌ na jaꞌk daasaꞌ gu jodai guiꞌ na kɨꞌn bha kuup? Nach guꞌ aach cham nakooꞌ nach jax dhui jaꞌk daasaꞌ.

4 Guꞌ ji na guꞌ na mɨt mu ba ai, miꞌ pɨx kupioꞌkix, jaꞌp gai dhɨr pɨx dhaa gu jodai gu gɇꞌ na kɨꞌn bha kuupich. 5 Baꞌ guiꞌ dai na mɨt jiimɨt pu baap bhɨjɨ dɨꞌn kɨr, baꞌ mɨjɨ pɨx ji chɨɨ mɨt na daa maaꞌn gu biapmaꞌ tɇb kutuun am jix chua, kɨɨꞌn dɨr daa miꞌ na paiꞌ kaatɨt gu Jesuus. Ku guꞌ cham tuꞌr maaꞌnkam ji, jaꞌpji gu nobiiꞌñ guch Gɨꞌkoraꞌ jix dhaam kam. Baꞌ giilhim jix chootoꞌn jamɨt, 6 guꞌ ji nat guꞌ jotmodaꞌ bha ñio, jup ja tɨtda:

―Chaꞌpim totdon kaꞌ. ¿Jesuus Nasareet kam aa pimɨt tɨi gio bhaiꞌp ba tɨɨgim, guiꞌ na mɨt bas takaab bhammɨ sissapa kuruus taꞌm? Ba jii ji bo, nat guꞌ giop ba dua. Cham tuꞌ ka muukix. Ka gor miꞌ xi chɨ tɨɨꞌ na paiꞌ kaatɨt na cham paiꞌ tu jaiꞌch. 7 Cham tuꞌ ji na pim jix buam jum aagɨt yɨjɨ ka tɨ nɨnɨiꞌñdhaꞌ dɨꞌn kɨr, jaꞌpji dai na pim ja aaꞌñdhapuꞌ gu noonbiꞌñ, puiꞌ na jax gu Peegro. Jaꞌp japim tɨɨdaꞌ nat giop ba dua gu Jesuus, mummu jaꞌk japim ba tɨgiaꞌ Galilea na ba oirɨdaꞌ, puiꞌ na jax ba jam tɨtda bɨɨpɨꞌ dɨr nam baꞌ moo daagɨi ba muꞌaaꞌ.

8 Baꞌ guiꞌ bubuakɨk pu jiboiꞌññor jamɨt giꞌbukidhat, na mɨt guꞌ giilhim jix chootoꞌn. Pu cham jaroiꞌ aagiꞌñ am na mɨt jax tɨ tɨɨ, nam guꞌ daix juraapgixchuꞌ.

9 Baꞌ jaꞌxpɨx cham mɨɨkim mu bam maax gu Jesuus buiñor gu Mariiya Magdalena, guiꞌ nat xijum gook maiꞌ joochxi gu cham kɨkɨɨꞌ iꞌiiꞌmdaꞌ bhaiꞌ dhɨr bhaan na kɨꞌn jix ñaanbiꞌ kat. 10 Miꞌ dhɨr baꞌ xi mɨɨ nat ja aaꞌñdham gu jaiꞌ guiꞌ nam puiꞌp tɨ jɨɨgiꞌñ buiñor gu Jesuus mu nam paiꞌ daraat suan nam jix buam jum aaꞌ nat sap muu. 11 Baꞌ mu ɇɇk tɨi ba ja aagiꞌñ nat giop ba dua. Tɨip ja tɨtda nat maaxik tɨɨ, pu cham jɨɨgiꞌñ am.

12 Baꞌx ioꞌm jaꞌxpɨx mummu jaꞌk jup bam maax gu Jesuus ja bui gook gu jaꞌtkam tugiꞌñ nam mu jaꞌp ka jiimchuꞌ bɨɨx boi. Dai na maakam tuꞌm, cham ob maatɨt tɨɨ mɨt. 13 Baꞌ guiꞌ tɨip xi boop jamɨt na mɨt ja aaꞌñdham gu jaiꞌ. Puiꞌ cham jup jɨɨgiꞌñ am.

14 Baꞌ mɨkkat mummu bam maax dho gi ji baꞌ gu Jesuus ja bui gu mambhɨɨx daman maaꞌn gu noonbiꞌñ, mu nam paiꞌ daraat ka tu kuaꞌ. Baꞌ pɨx am ja ñiokiꞌñ, tuꞌ sap ku baꞌ moo jaꞌp jix kaapak gu ja jujur nam baꞌ cham ja jɨɨgiꞌñ nam tɨi ja aagiꞌñ guiꞌ na mɨt bɨɨpɨꞌ dɨr tɨɨ nat giop ba dua. 15 Miꞌ dhɨr baꞌp ja tɨtda:

―Baꞌ xib dɨr tuꞌ na jax chuiꞌkaꞌ, naiꞌ pim xi jimiaꞌ jiñ jaaduñ na jɨꞌx oiꞌñgaꞌn na pim tu ja aꞌgiꞌñpuꞌ jiñ aꞌmkam dappaam na jɨꞌk jaꞌtkam gux bhaiꞌm kaiꞌchdham ñiꞌook. 16 Baꞌ guiꞌ nam jɨꞌk tɨ jɨɨꞌñdhai bam bopkonaꞌ, dai nam ba jimiaꞌ jix dhaam jaꞌk. Guꞌ baꞌ guiꞌ nam jɨꞌk cham tɨ jɨɨgiꞌñdhaꞌ, pɨx am tɨꞌñchukaꞌ am nam gammɨjɨm tulhiiñaꞌ. 17 Gam guiꞌ nam tuꞌ sɨlhkam tɨ jɨɨgiꞌñdhaꞌ aañ jiñ bui, ja makiaꞌ iñ gux Dhuuduꞌ kam jix Uañ Iiꞌmdaꞌ nam baꞌ kɨꞌn maiꞌ ja jootsaꞌ jiñ aꞌmkam gu cham kɨkɨɨꞌ iꞌiiꞌmdaꞌ ja aꞌm dɨr gu jaꞌtkam, gio baꞌ nam kɨꞌn tu aꞌgadaꞌ jaiꞌ gu ñiꞌook na baꞌ bhaan jix maatɨꞌ kaꞌ nañ aañ ja aꞌm tɨ nɨidhidhaꞌ. 18 Gio baꞌ na cham jɨꞌxkat iaꞌñdhaꞌ noꞌt tuꞌ koꞌ ba kɨi maadɨt. Piam noꞌt jax dhuuk juu gu paꞌch, cham tuꞌ maimtudaꞌ. Gio baꞌ nam ja duduadhiꞌñdhaꞌ gux kakoꞌkkam, dai nam bhaiꞌ pɨx xi ja daꞌngɨdaꞌ, pu duduardaꞌ am.

19 Baꞌ daipuꞌ na jax puiꞌ jɨꞌ xi chu ja aꞌgidhimɨk gu Jesuus, pu jiix dhaam jaꞌk, baꞌ bhammɨ ji dhaibu kɨɨꞌn dɨr sonpan gu Dios. 20 Baꞌ gu noonbiꞌñ naiꞌp ji jii mɨt na mɨt tu ja aꞌgidham gu jaꞌtkam gux bhaiꞌm kaiꞌchdham ñiꞌook na jax baꞌ ba tum aꞌgichuꞌ sia gu xib. Jix bhaiꞌ dho tu buimɨk am gu tuꞌ nax bhaiꞌr jum duukam, na guꞌ guch Xoiꞌkam pɨx jup tu duiñchuꞌ na jax ba ja tɨtda bɨɨpɨꞌ dɨr nat baꞌ moo ba jii jix dhaam jaꞌk.