8
Syõshtaga kësbangyo obl̈ë wl̈eniyo, tjl̈õkwo obl̈ë wl̈eniyo
1 L̇l̇ëye l̈ër shäng bomi kong l̈i eni. Shji syõshtaga kësbangyo sök kjl̈ara. E öötong sirkeno sök kjok dogo, Sbö orkwo kël̈ëkong, shtoyo tjwl̈õ ara anmoyõ l̈ishko, 2 ga parkë shäng Sbö u jong eshko l̈i roshko. U l̈i shäryaga Tjl̈apgarë, shäryaga norë l̇l̇ëme.
3 Syõshtagaga këskësyo uunkong iara beno l̈öng l̇l̇ëbo twe Sbö kong, öng sho suya ba kong bakoe. E kjĩshko ga woydara ga l̇l̇ëbo twe Jesúsdë Sbö kong bakoe. 4 Kjok ëre kjing goshko ga syõshtagaga tjok, ga parkë l̈öng l̇l̇ëbo twë Sbö kong, tak pjang kjok l̇l̇gwekkl̈o go sorë l̈i eni. E kjĩshko ga Jesús sök kjok ëre kjing go obi kjwe ga e ber syõshtaga l̇l̇ëme. 5 Syõshtagaga l̈i parkë l̈öng Sbö u jong kjok ëre kjing go l̈i roshko. E so ba u jong kjok dogo l̈i kjoyo, gueniyo äär eni l̇l̇ëm, e ba jyãgl̈o erä. E kjĩshko ga Sbö u shäryak öng kwota go l̈i shärye Moisésdë shäng kjwl̈ëshko ga Sbö tjl̈ẽ ba kong ga «Shäryos yõtso. L̇l̇ëbo jyãgl̈o pinor bop kong dl̈up go sorë ga shäryos eni»* Éxodo 25.40. l̈e. 6 Gueniyo pak twara Jesús kong l̈i, e tjwl̈õ ara, pak shärye syõshtagagarë l̈i kjinmo. E parkë syõshtaga, tjl̈õkwo twara Sbörë tjagl̈ën, beno ĩyado wl̈o l̈i kjĩshko. Ga tjl̈õkwo ëre tjwl̈õ ara, tjl̈õkwo twara bäm go l̈i kjinmo.
7 Tjl̈õkwo twara Sbörë bäm go l̈i, l̇l̇ëbo uunkong shäryara pjl̈ú kjwe ga tjl̈õkwo woyde obl̈ë l̇l̇ëme. 8 Gueniyo ĩna Sbörë ga nopga l̈i pjl̈ú l̇l̇ëme. Tjl̈ẽ ga
«Tjl̈apga tjl̈ẽ ga
“Dbar tjwe kjwara ga
Israel tjëyoga kong,
Judá tjëyoga kong,
tjl̈õkwo twër kjrina obi tjagl̈ën.
9 Dënashko ga ba tjl̈apgaga,
e orkwo sharor wl̈eni,
ga shiror tek Egipto kjokyo dwayo.
Eshko ga tjl̈õkwo tworor ba kong, beno ĩyado wl̈o,
gueniyo kol̈ara l̈ok l̇l̇ëme.
E kjĩshko ga tja opkjono ba shwoy dwayo.
E kjĩshko ga tjl̈õkwo twër tjagl̈ën l̈i,
e ber tjl̈õkwo tworor ba kong dënashko l̈i dik l̇l̇ëme” l̈e.
Tjl̈apga tjl̈ẽ obi ga
10 “Tjl̈õkwo tworor, beno ĩyado wl̈o bäm go l̈i, e pjir.
E irgo ga tjl̈õkwo twër Israel tjëyoga kong, ber ĩyado wl̈o l̈i eni.
Bor kjok l̇l̇gwekkl̈o l̈i tër ber pjang ba wotjl̈ĩk l̈i go,
tër ber pjang ba pjl̈ugwo go bakoe.
Tja ber ba Sbö,
ga epga ber bor nopga bakoe.
11 Eshko ga tja miyde nopga uunkongdë,
nopga tjwl̈õ chira äär jong nopga tjwl̈õ ara go.
E kjĩshko ga ëye obl̈ë ping bor tjl̈õkwo go ame,
ëye ba kjl̈ara ichë bor miydë ame bakoe.
12 Eshko ga owa pjang ba go l̈i l̈ön ber dret,
ga owa l̈i woyoshrër ame” l̈e.»† Jeremías 31.31-34.
13 Tjl̈õkwo ëre kowara tjagl̈ën kuzong ga miydëy e go ga tjl̈õkwo bäm go l̈i iara beno tjwl̈õ ame. Ga l̇l̇ëye këguë, tjwl̈õ l̇l̇ëm ga wop ä ga jeno pjire.