1 དེ་ཡང་བདག་གིས་སྐྱབས་མགོན་མཱ་ཤི་ཀ་མིག་ལྟོས་སུ་བཟུང་བ༌ལྟར། ཁྱོད་རྣམས་ཀྱིས་ཀྱང་ང་རང་མིག་ལྟོས་སུ་འཛིན་པར༌གྱིས། 2 ཁྱོད་རྣམས་ཀྱིས་དོན་ཀུན་གྱི་ཐད་ནས་ང་རང་དྲན༌ཞིང༌། བདག་གིས་ཁྱོད་ཅག་ལ་གནང་བའི་སྲོལ་རྒྱུན་རྣམས་ཀྱང་བརྟན་པོར་སྲུང་བའི༌ཕྱིར། ངས་ཁྱོད་ཅག་ལ་བསྔགས་བརྗོད༌བྱེད་པའོ།། 3 བདག་གིས་དོན་འདི་ཁྱོད་རྣམས་ལ་ཤེས་སུ་འཇུག་འདོད༌དེ། སྐྱབས་མགོན་མཱ་ཤི་ཀ་ནི་སྐྱེས་པ་རྣམས་ཀྱི་དབུ་ཡིན༌ཞིང༌། སྐྱེས་པ་ནི་སྐྱེས་མ་རྣམས་ཀྱི་མགོ་ཡིན༌ལ། དཀོན་མཆོག་ནི་སྐྱབས་མགོན་མཱ་ཤི་ཀའི་དབུ་ཡིན་ནོ།། 4 སྐྱེས་པ་རྣམས་ཀྱིས་གསོལ་བ་འདེབས་པའམ་ལུང་བསྟན་གནང་བའི་དུས༌སུ། རང་གི་མགོའི་སྐྲ་བཏུམས་པར་བྱེད༌ན། དེ་ནི་རང་གི་མགོ་ངོ་གནོང་བར་བྱེད༌པ་ཡིན། 5 སྐྱེས་མ་རྣམས་ཀྱིས་གསོལ་བ་འདེབས་པའམ་ལུང་བསྟན་གནང་བའི་དུས༌སུ། རང་གི་མགོའི་སྐྲ་མ་བཏུམས༌ན། དེ་ནི་རང་གི་མགོ་ངོ་གནོང་བར་བྱེད༌པ་ཡིན། ཅིའི་ཕྱིར་ཞེ་ན། དེ་ནི་སྐྲ་བཞར་བ་དང་མཚུངས་ * སྐྲ་བཞར་བ་དང་མཚུངས་ཞེས་པར་འགྲེལ་ཚུལ་དུ་མ་ཡོད༌ཀྱང༌། འདིར་སྐུ་ཚབ་པ་ཕོལ་ལོལ་གྱི་དུས་སུ་བུད་མེད་རྣམས་ཀྱིས་མགོའི་སྐྲ་མ་བཏུམས་པར་ཚོགས་རར་སོང་ན་སྨད་འཚོང་མ་ཡིན་པར་གོ༌སྟེ། རྒྱུ་མཚན་ནི་སྨད་འཚོང་མ་རྣམས་ཀྱིས་སྐྲ་བཞར་ནས་མགོ་རྗེན་ཡིན་པའི་ཕྱིར་ཡིན། པའི་ཕྱིར༌རོ།། 6 གལ༌ཏེ། སྐྱེས་མ་རྣམས་ཀྱིས་མགོའི་སྐྲ་བཏུམ་པར་མི་བྱེད༌ན། ཁོ་མོའི་སྐྲ་ནི་བཞར་འོས༌ཏེ། སྐྱེས་མ་རྣམས་ཀྱིས་སྐྲ་འབྲེག་པའམ་སྐྲ་བཞར་བ་ནི་ངོ་ཚ་ཞིག་ཏུ་འདོད་ན་མགོའི་སྐྲ་བཏུམ་དགོས་སོ།། 7 སྐྱེས་པ་རྣམས་ནི་དཀོན་མཆོག་གི་སྣང་བརྙན་དང་གཟི་བརྗིད་ཡིན༌པས། སྐྱེས་པ་རྣམས་ཀྱིས་མགོའི་སྐྲ་བཏུམ་པར་མི་འོས་སོ།། འོན༌ཀྱང༌། སྐྱེས་མ་རྣམས་ནི་སྐྱེས་པའི་གཟི་བརྗིད་ཡིན༌ཏེ། 8 ཐོག་མར་སྐྱེས་པ་ནི་སྐྱེས་མ་ལས་བྱུང་བ་མ་ཡིན༌པར། སྐྱེས་མ་ནི་སྐྱེས་པ་ལས་བྱུང་བ་ཡིན༌ལ། 9 སྐྱེས་པ་ནི་སྐྱེས་མའི་ཆེད་དུ་བཀོད་པ་མ་ཡིན༌པར། སྐྱེས་མ་ནི་སྐྱེས་པའི་ཆེད་དུ་བཀོད༌པ་ཡིན། 10 དེའི༌ཕྱིར། སྐྱེས་མ་དག་ནི་ཕོ་ཉའི་རྐྱེན༌གྱིས། ཁོ་མོ་རྣམས་ཀྱི་མགོ་ལ་དབང་ཆར་གཏོགས་པའི་རྟགས་ཤིག་བརྒྱན་ན་འོས༌སོ།།

11 འོན༌ཀྱང༌། གཙོ་བོའི་ཐུགས་བཀོད་ལྟར་ན་སྐྱེས་མ་ནི་སྐྱེས་པ་དང་འབྲེལ་བ་མེད་པ་མིན༌ལ། སྐྱེས་པའང་སྐྱེས་མ་དང་འབྲེལ་བ་མེད་པ་མིན་ནོ།། 12 ཅིའི་ཕྱིར་ཞེ་ན། སྐྱེས་མ་ནི་སྐྱེས་པ་ལས་བྱུང་བ༌དང༌། སྐྱེས་པ་ནི་བུད་མེད་ཀྱིས་བཙས་པ་ཡིན༌མོད། འོན་ཀྱང་དངོས་པོ་ཐམས་ཅད་ནི་དཀོན་མཆོག་ནས་བྱུང་བའི་ཕྱིར༌རོ།། 13 དེས་ན་ཁྱོད་ཅག་གིས་བརྟག་པར་བྱ༌སྟེ། སྐྱེས་མ་རྣམས་ཀྱིས་དཀོན་མཆོག་ལ་གསོལ་བ་འདེབས་པའི་དུས༌སུ། མགོའི་སྐྲ་མ་བཏུམས་ན་འོས༌སམ། 14 རང་གཤིས་ཀྱིས་ཀྱང་ཁྱོད་ཅག་ལ་བསྟན་པ་བཞིན། སྐྱེས་པ་རྣམས་ཀྱི་མགོའི་སྐྲ་རིང་ན་དེ་ནི་ཁོ་རྣམས་ཀྱི་ངོ་ཚ་མ་ཡིན་ནམ། 15 འོན༌ཀྱང༌། སྐྱེས་མ་རྣམས་ལ་སྐྲ་རིང་པོ་ཡོད༌ན། དེ་ནི་སྐྱེས་མ་རྣམས་ཀྱི་གཟི་བརྗིད་ཡིན༌ཏེ། སྐྲ་རིང་པོ་ནི་སྐྱེས་མ་རྣམས་ལ་མགོ་བཏུམ་བྱེད་དུ་གནང་བའི་ཕྱིར༌ཡིན། 16 གལ༌ཏེ། མི་ཞིག་གིས་འདིའི་སྐོར་ལ་རྩོད་པ་བྱེད་འདོད༌ན། ངེད་ཅག་ལ་ལུགས་སྲོལ་དེ་ལྟ་བུ་མེད༌ལ། དཀོན་མཆོག་གི་ཆོས་ཚོགས་དག་ལའང་ལུགས་སྲོལ་དེ་ལྟ་བུ་མེད༌དོ།།

17 ད་ལྟ་བདག་གིས་ཁྱོད་རྣམས་ལ་ཁ་བསྒོ་གནང་བ་ནི་ཁྱོད་ཅག་ལ་བསྔགས་པ་མིན༌ཏེ། ཁྱོད་ཅག་མཉམ་དུ་འཚོགས་པ་ལ་དགེ་མཚན་ལས་གནོད་པ་ཡོད་དོ།། 18 བདག་གིས་གོ་ཐོས་ལྟར༌ན། ཁྱོད་རྣམས་ཀྱི་ཆོས་ཚོགས་མཉམ་དུ་འཚོགས་པའི་དུས་སུ་ནང་མཐུན་མེད་ཟེར། བདག་ཀྱང་དོན་དེར་ཅུང་ཙམ་ཡིད་ཆེས་པ་ཡིན། 19 ཁྱོད་ཅག་གི་ཁྲོད་དུ་ཚོད་བགམ་འཐེག་པའི་དད་ལྡན་རྣམས་གསལ་པོར་མངོན་པའི༌ཕྱིར། ཕྱོགས་ཁག་སྒྲིག་པའི་དོན་དེ་འབྱུང་ངེས༌པ་ཡིན། 20 དེ་ལྟར་ཡིན་པས། ཁྱོད་ཅག་མཉམ་དུ་འཚོགས་པའི་དུས༌སུ། ཁྱོད་ཅག་གིས་ཟ་བ་ནི་གཙོ་བོའི་རྗེས་དྲན་གྱི་ཞལ་ཟས་མིན། 21 ཅིའི་ཕྱིར་ཞེ་ན། ཁ་ཟས་བཟའ་བའི་དུས་སུ་མི་རྣམས་ཀྱིས་རང་གི་ཁ་ཟས་སྔོན་ལ་ཟ་བ༌དང༌། ཐ་ན་མི་ལ་ལ་ལྟོགས་ཤིང་ལ་ལ་ཆང་གིས་བཟི་བའི་ཕྱིར༌རོ།། 22 ཁྱོད་རྣམས་བཟའ་བཏུང་ལ་རོལ་ན་ཁྱོད་ཅག་ལ་ཁྱིམ་ཚང་མེད༌དམ། ཡང་ན་དཀོན་མཆོག་གི་ཆོས་ཚོགས་ལ་མཐོང་ཆུང་དང་དབུལ་པོ་རྣམས་ངོ་ཚ་བར་བྱེད་དམ། བདག་གིས་ཁྱོད་ཅག་ལ་ཅི་ལྟར་སྨྲའམ། བདག་གིས་ཁྱོད་ཅག་ལ་བསྟོད་བསྔགས་བྱེད་དམ་ཞེ༌ན། བསྟོད་བསྔགས་གཏན་ནས་མི་བྱེད༌དོ།།

23 དེ་ཡང་བདག་གིས་སྔོན་ཆད་ཁྱོད་ཅག་ལ་ཆོས་གསུངས་མྱོང་བ་དེ་ནི་གཙོ་བོ་ནས་ཐོབ་པ་ཡིན༌ཏེ། གཙོ་བོ་ཡེ་ཤུ་ལ་ངོ་ལོག་བྱེད་པའི་མཚན་མོ་དེར་ཁོང་གིས་ཕྱག་ཏུ་བག་ལེབ་བསྣམས༌ཤིང༌། 24 བཀའ་དྲིན་ཞུས་རྗེས་དུམ་བུར་བགོས་ཏེ་འདི་སྐད༌དུ། འདི་ནི་བདག་གི་ལུས་པོ་ཡིན་ཏེ་ཁྱོད་རྣམས་ཀྱི་ཆེད་དུ་སྦྱིན་པ༌ཡིན། ང་རང་རྗེས་སུ་དྲན་པའི་ཕྱིར་ཁྱོད་རྣམས་ཀྱིས་ཀྱང་འདི་ལྟར་བྱོས་ཤིག་ཅེས་གསུངས་སོ།། 25 དེ་ནས་ཁོང་གིས་ཞལ་ཟས་བཞེས་ཚར་རྗེས་སྔར་བཞིན་ཕོར་བ་ཕྱག་ཏུ་བསྣམས་ཏེ་འདི་སྐད༌དུ། ཕོར་བ་འདི་ནི་བདག་གི་ཁྲག་གིས་བཞག་པའི་ཞལ་ཆད་གསར་པ་ཡིན༌ལ། ཁྱོད་རྣམས་ཀྱིས་འཐུང་ཐེངས་རེ་རེར་ང་རང་རྗེས་སུ་དྲན་པའི་ཕྱིར་འདི་ལྟར་བྱོས་ཤིག་ཅེས་གསུངས༌པའོ།། 26 དེ་ནི་གཙོ་བོ་ཡེ་ཤུ་ཁོང་ཉིད་ཕེབས་ཡོང་བའི་བར༌དུ། ཁྱོད་ཅག་གིས་བག་ལེབ་འདི་ཉིད་ཟ་ཞིང་ཕོར་བ་འདི་ལས་འཐུང་ཐེངས་རེ༌རེར་གཙོ་བོ་སྐུ་གྲོངས་པའི་གནས་ཚུལ་དེ་གསལ་པོར་སྟོན་པའི་ཕྱིར༌རོ།།

27 དེའི༌ཕྱིར། མི་སུས་ཀྱང་ལུགས་དང་མི་མཐུན་པར་གཙོ་བོའི་བག་ལེབ་ཟ་ཞིང་ཕོར་བ་ལས་འཐུང་བ་ཡིན༌ན། མི་དེ་གཙོ་བོའི་སྐུ་ལུས་དང་སྐུ་ཁྲག་གཉིས་ཀྱི་དོན་དང་འགལ༌བའོ།། 28 མི་སུས་ཀྱང་རང་ལ་བརྟགས་རྗེས་བག་ལེབ་དེ་ཟ་ཞིང་ཕོར་བ་དེ་ལས་འཐུང་འོས་པ་ཡིན། 29 ཅིའི་ཕྱིར་ཞེ་ན། གཙོ་བོའི་སྐུ་ལུས་ཡིན་པ་མ་རྟོགས༌པར། བག་ལེབ་ཟ་ཞིང་ཕོར་བ་ལས་འཐུངས་ན་རང་ལ་ཉེས་ཆད་འཕོག་པའི་ཕྱིར༌ཡིན། 30 དེ་བས་ཁྱོད་ཅག་གི་ཁྲོད་དུ་ལུས་སྟོབས་ཞན་པ་དང་ནད༌པ། ཚེ་ལས་འདས་པའང་མང་ངོ་།། 31 བདག་ཅག་གིས་སྔོན་དུ་རང་ལ་བརྟགས་ན་ཉེས་ཆད་འཕོག་པར་མི་འགྱུར་རོ།། 32 འོན༌ཀྱང༌། བདག་ཅག་ལ་ཁྲིམས་ཐག་གཅོད་པའི་དུས༌སུ། གཙོ་བོས་འཇིག་རྟེན་པ་དང་བདག་ཅག་ལ་མཉམ་དུ་ཉེས་ཆད་མི་གཅོད་པའི་ཕྱིར། ཁོང་གིས་བདག་ཅག་ལ་ཆད་པ་གནང་ངོ་།།

33 བདག་གི་སྤུན་ཟླ༌རྣམས། ཁྱོད་ཅག་མཉམ་དུ་འཚོགས་ནས་གཙོ་བོའི་རྗེས་དྲན་གྱི་ཞལ་ཟས་ལ་རོལ་བའི་དུས༌སུ། ཕན་ཚུན་ལའང་སྒུག་དགོས་སོ།། 34 གལ༌ཏེ། མི་ལ་ལ་བཀྲེས་ཤིང་ལྟོགས་པ་ཡིན༌ན། ཁྱོད་ཅག་མཉམ་དུ་འཚོགས་ནས་དཀོན་མཆོག་གི་ཉེས་ཆད་མི་འཕོག་པའི༌ཕྱིར། རང་ཁྱིམ་དུ་སྔོན་ལ་ཁ་ཟས་བཟའ་རུང༌། དོན་གཞན་དག་ནི་ང་རང་ཁྱོད་ཅག་གི་གམ་དུ་ཡོང་བའི་དུས་སུ་བཀོད་སྒྲིག༌བྱའོ།།