1 དད་ལྡན་དམ་པ་རྣམས་ལ་འབུལ་བའི་ཞབས་ཏོག་སྒྲུབ་པའི་སྐོར་ནས་བདག་གིས་ཁྱོད་ཅག་ལ་འཕྲིན་ཡིག་འབྲི་དགོས་དོན་མེད་དོ།། 2 ཅིའི་ཕྱིར་ཞེ་ན། ཁྱོད་རྣམས་ཀྱི་བསྒྲུབ་པར་དགའ་བའི་སེམས་ནི་བདག་གིས་ཤེས་ཏེ། ཨ་ཀ་ཡཱ་ཡུལ་གྱི་མི་རྣམས་ཀྱིས་གྲ་སྒྲིག་བྱས་ནས་ལོ་གཅིག་འགོར་ཟིན་ཞེས་སྨྲས་ནས། རྒྱུན་དུ་མ་ཀེ་དོན་ཡཱ་ཡུལ་གྱི་མི་རྣམས་ཀྱི་མདུན་ནས་ཁྱོད་ཅག་ལ་བསྔགས་བརྗོད་བྱེད༌ཅིང༌། ཁྱོད་ཅག་གི་བརྩོན་སེམས་ཀྱིས་མི་མང་པོར་སེམས་འགུལ་ཐེབས་སུ་བཅུག་པའི་ཕྱིར༌རོ།། 3 འོན༌ཀྱང༌། ངེད་ཅག་གིས་དོན་འདིའི་ཆ་ནས་ཁྱོད་རྣམས་ལ་བསྔགས་བརྗོད་བྱས་པའི་གཏམ་དེ་སྟོང་བར་མི་འགྱུར༌བར། བདག་གིས་སྨྲས་པ་བཞིན་ཁྱོད་རྣམས་ཀྱིས་གྲ་སྒྲིག་ལེགས་པོ་བྱེད་པའི༌ཕྱིར། བདག་གིས་སྤུན་ཟླ་འདི་དག་མངགས༌པ་ཡིན། 4 གལ༌ཏེ། མ་ཀེ་དོན་ཡཱ་ཡུལ་གྱི་མི་འགའ་ཤས་བདག་དང་མཉམ་དུ་ཡོང༌སྟེ། ཁྱོད་ཅག་གིས་གྲ་སྒྲིག་བྱས་མེད་པ་མཐོང༌ན། ངེད་ཅག་གིས་ཡིད་ཆེས་བརྟན་པོ་བྱས་པ་དེ་ནི་ངོ་གནོང་བར་འགྱུར་བ༌དང༌། ཁྱོད་རྣམས་ངོ་གནོང་བ་ནི་དེ་བས་ཀྱང་སྨོས་མ་དགོས་སོ།། 5 དེའི༌ཕྱིར། བདག་གིས་སྤུན་ཟླ་དེ་རྣམས་ཐོག་མར་ཁྱོད་ཅག་གི་གམ་དུ་སོང༌སྟེ། སྔོན་ཆད་ཁས་བླངས་པའི་ཞལ་འདེབས་གྲ་སྒྲིག་ལེགས་པོ་བྱེད་པར་ཞུ་བ་མི་བྱེད་ཐབས་མེད་རེད་བསམས༌ཤིང༌། དེ་ནས་ཁྱོད་ཅག་གིས་ཕུལ་བའི་ཞལ་འདེབས་ནི་དགའ་མོས་ཡིན་པ་ལས་འུ་ཐུག་གིས་མིན་པ་མཚོན་ནུས༌སོ།།

6 དོན་ནི་འདི་ཡིན་ཏེ། ས་བོན་ཉུང་ངུ་བཏབ་ན་ལོ་ཏོག་ཉུང་ངུ་བསྡུ༌ཞིང༌། ས་བོན་མང་པོ་བཏབ་ན་ལོ་ཏོག་མང་པོ་བསྡུ་ཞེས་པའོ།། 7 ཡིད་སེམས་དགའ་མོས་ངང་ནས་ཞལ་འདེབས་ཕུལ་བ་ལ་དཀོན་མཆོག་ཐུགས་དགྱེས་པ་ཡིན༌པས། མི་སོ་སོས་རང་སེམས་ནས་ཐག་གིས་བཅད་པ་ལྟར་འབུལ་དགོས་པ༌ལས། སེམས་སྡུག་གམ་ཨུ་ཚུགས་ཀྱི་ངང་ནས་འབུལ་མི་འོས་པ་ཡིན། 8 དཀོན་མཆོག་གིས་ཐུགས་རྗེ་སྣ་ཚོགས་ཁྱོད་རྣམས་ལ་མང་དུ་གནང༌ནུས་ཏེ། རྟག་ཏུ་དོན་གང་ཅིའི་ཐད་ནས་ཁྱོད་རྣམས་ལ་མི་འདང་ས་མེད་ཅིང་དོན་བཟང་མང་དུ་བསྒྲུབ་ཐུབ་པའི་ཕྱིར་རོ།། 9 དེ་ལ་གསུང་རབ་ཀྱི་མདོ་ལས་ཇི་སྐད༌དུ།

10 ཞིང་འདེབས་མཁན་ལ་ས་བོན་དང་མི་ལ་བག་ལེབ་གནང་མཁན་གྱིས་ཁྱོད་རྣམས་ལ་གདབ་བྱའི་ས་བོན་སྦྱོར་ཞིང་སྤེལ་ཏེ། ཁྱོད་རྣམས་ཀྱི་དྲང་བདེན་གྱི་འབྲས་བུའང་འཕེལ་བར་མཛད་ངེས༌སོ།། 11 ཁྱོད་ཅག་གིས་ཀྱང་སྦྱིན་པ་མང་པོ་གཏོང་བའི་ཕྱིར། ཁྱོད་རྣམས་དོན་གང་ཅིའི་ཐད་ནས་ཕུན་སུམ་ཚོགས་པར་མཛད༌པར་འགྱུར་ཞིང༌། དེ་ནས་ངེད་ཅག་བརྒྱུད་ནས་དཀོན་མཆོག་ལ་བཀའ་དྲིན་ཞུ་བའི་སེམས་འབྱུང་ངོ་།། 12 ཅིའི་ཕྱིར་ཞེ་ན། འབུལ་བའི་ཞབས་ཏོག་འདི་བསྒྲུབས༌ན། དད་ལྡན་དམ་པ་རྣམས་ཀྱི་དགོས་མཁོ་བསྐངས་པར་མ༌ཟད། མི་མང་པོས་ལྷག་ཏུ་དཀོན་མཆོག་ལ་བཀའ་དྲིན་ཞུ་བའི་ཕྱིར༌རོ།། 13 ཁོ་རྣམས་ལ་འབུལ་བའི་ཞབས་ཏོག་གི་ཆ་ནས་བདེན་དཔང་ཐོབ༌ཅིང༌། ཁྱོད་ཅག་གིས་སྐྱབས་མགོན་མཱ་ཤི་ཀའི་འཕྲིན་བཟང་ཁས་ལེན་པ༌དང༌། དེ་ལ་བསྟུན༌པ། ཁོ་རྣམས་དང་མི་གཞན་དག་ལ་ཞལ་འདེབས་མང་པོ་ཕུལ་བའང་ཁོ་རྣམས་ཀྱིས་ཤེས་པར་འགྱུར༌བས། དཀོན་མཆོག་ལ་བསྟོད་བསྔགས་བརྗོད་པར༌འགྱུར་ལ། 14 དཀོན་མཆོག་གི་བླ་ན་མེད་པའི་ཐུགས་རྗེ་དེ་ཁྱོད་ཅག་གི་སེམས་ནང་དུ་མངོན་པར་གྱུར༌པས། ཁོ་རྣམས་ཀྱིས་ཁྱོད་ཅག་ཤིན་ཏུ་དྲན༌ཏེ། ཁྱོད་ཅག་གི་ཆེད་དུ་གསོལ་བ་འདེབས་པར་ངེས། 15 དཀོན་མཆོག་ལ་བརྗོད་ཀྱིས་མི་ལང་བའི་གནང་སྦྱིན་ཡོད་པས་ཁོང་ལ་ཐུགས་རྗེ༌ཆེ་ཞུའོ།།