1 དུས་དེར། ས་གནས་རྒྱལ་པོ་ཧེ་རོ་དཱས་ཆོས་ཚོགས་ཀྱི་མི་ཁ་ཤས་ལ་གདུག་རྩུབ་བཀོལ་བ༌དང༌། 2 ཡོ་ཧ་ནན་གྱི་གཅེན་པོ་ཡ་ཀོབ་ཟེར་བ་ལ་རལ་གྲིས་བརྒྱབ་ནས་བསད་དོ།། 3 ཧེ་རོ་དཱས་ཡ་ཧུ་དཱ་པ་རྣམས་དོན་དེར་དགའ་བ་མཐོང་ནས་པེ་ཏྲོའང་བཟུང༌ཞིང་། དུས་དེ་ནི་སྐྱུར་མེད་བག་ལེབ་ཀྱི་ཉིན་མོ་དག་ཡིན། 4 དེ་ཡང་པེ་སག་གི་དུས་ཆེན་མཇུག་རྫོགས༌རྗེས། མི་རྣམས་ཀྱི་མིག་མདུན་ནས་ཁོང་ཉིད་ཁྲིམས་ལ་སྦྱོར་བའི་ཆེད༌དུ། ཧེ་རོ་དཱས་པེ་ཏྲོ་བཟུང་སྟེ་བཙོན་དུ་བཅུག༌ཅིང༌། དམག་མི་བཞི་རེ་ཅན་གྱི་དམག་ཁག་བཞི་ལ་སྲུང་དུ་བཅུག 5 དེ་བས་པེ་ཏྲོ་བཙོན་དུ་བཅུག་ནའང་ཆོས་ཚོགས་ཀྱིས་ཁོང་གི་དོན་དུ་དཀོན་མཆོག་ལ་གསོལ་བ་ཤུགས་དྲག་གིས་བཏབ༌བོ།།

6 དེ་ཡང་ཧེ་རོ་དཱས་པེ་ཏྲོ་ཁྲིམས་ལ་མ་སྦྱར་སྔོན་གྱི་ཉིན་དེའི་མཚན༌མོར། པེ་ཏྲོ་ནི་ལྕགས་ཐག་གཉིས་ཀྱིས་བཀྱིགས་པ་དང་དམག་མི་གཉིས་ཀྱི་བར་དུ་གཉིད་ལ་ཡུར༌ཅིང་། སྲུང་དམག་རྣམས་ཀྱིས་ཀྱང་སྒོའི་ཕྱི་རོལ་ཏུ་བསྲུངས་ཡོད༌པ་རེད། 7 གློ་བུར༌ཉིད་དུ་གཙོ་བོའི་ཕོ་ཉ་ཞིག་མངོན་སུམ་དུ་བྱུང་བ་དང་ཁང་པའི་ནང་དུ་འོད་འཚེར་བར་གྱུར་ཏོ།། དེ་ནས་ཕོ་ཉས་པེ་ཏྲོའི་གཞོགས་ནས་བསྒུལ་ཏེ་ཁོང་གཉིད་ལས་བསླངས་རྗེས་འདི་སྐད༌དུ། མྱུར་དུ་ཡར་ལོངས་ཤིག་ཅེས་གསུངས་པ་དང་ལྕགས་ཐག་རང་ཤུགས་ཀྱིས་ཁོང་གི་ལག་པ་ནས་གྲོལ་ཏོ།། 8 ཡང་ཕོ་ཉས་ཁོང་ལ་སྐེ་རགས་ཆོངས་ཤིག བསིལ་ལྷམ་གྱོན་ཞིག་ཅེས་གསུངས་པ་བཞིན་ཁོང་གིས་ཀྱང་དེ་ལྟར་བྱས། ཡང་ཕོ་ཉས་ཁྱོད་ཀྱིས་ཕྱི་གོས་གྱོན་ནས་ངའི་རྗེས་སུ་ཤོག་ཅིག་ཅེས་གསུངས་སོ།། 9 དེ་ནས་པེ་ཏྲོ་ཕྱི་རུ་བུད་དེ་ཁོང་གི་རྗེས་སུ་འབྲངས༌ནའང༌། ཕོ་ཉས་མཛད་པའི་དོན་དེ་བདེན་པ་ཡིན་པ་མ་ཤེས་པར་ཞལ་གཟིགས་མཐོང་བ་རེད་སྙམ། 10 དེ་ནས་ཁོང་གཉིས་སྲུང་དམག་རིམ་པ་དང་པོ་དང་གཉིས་པ་བརྒལ་ནས་གྲོང་ཁྱེར་དུ་འགྲོ་བའི་ལྕགས་སྒོར་སླེབས་པ་དང་སྒོ་ཆེན་དེ་ཡང་རང་ཤུགས་ཀྱིས་ཕྱེས༌ཤིང༌། ཁོང་གཉིས་ཕྱི་རོལ་ཏུ་བུད་དེ་སྲང་ལམ་ཞིག་ཏུ་འགྲོ་བ་ན་ཕོ་ཉ་དེ་ཁོང་དང་བྲལ་ནས་སོང་ངོ་།། 11 དེ་ནས་པེ་ཏྲོ་གོ་རྟོགས་སད་དེ་ན་རེ། ད་ལྟ་ངས་གཙོ་བོས་རང་གི་ཕོ་ཉ་མངགས་ཏེ་ཧེ་རོ་དཱའི་དབང་ཤེད་དང་ཡ་ཧུ་དཱ་པ་རྣམས་ཀྱི་རེ་དོན་ཐམས་ཅད་ལས་ང་རང་བསྐྱབས་པ་དངོས་གནས་ཤེས་ཞེས་གསུངས་སོ།། 12 དེ་ནས་ཁོང་གིས་དོན་དེ་ཤེས་ནས་མཱར་ཀུ་ཞེས་ཀྱང་འབོད་པའི་ཡོ་ཧ་ནན་གྱི་ཡུམ༌སྟེ། མིར་ཡམ་ཟེར་བ་དེའི་ཁྱིམ་དུ་སོང་བ་དང་གནས་དེར་མི་མང་པོ་འཛོམས་ཤིང་གསོལ་བ་འདེབས་ཀྱིན་འདུག 13 པེ་ཏྲོས་ཁྱིམ་དེའི་རྒྱལ་སྒོ་བརྡུངས་པ་ན་རའོ་དཱ་ཟེར་བའི་གཡོག་མོ་ཞིག་ཡོང་ནས་སུ་ཡིན་པར་བརྟགས་སོ།། 14 ཁོ་མོས་པེ་ཏྲོའི་སྐད་ཡིན་པ་ཤེས་ཏེ་ཤིན་ཏུ་དགའ་བར་གྱུར་ནས་སྒོ་འབྱེད་ཁོམ་ཡང་མ་བྱུང་བར་ཁྱིམ་ནང་དུ་བརྒྱུགས༌ནས། པེ་ཏྲོ་སྒོ་ཁར་སླེབས་འདུག་ཅེས་སྨྲས་པ༌ལ། 15 དེ་རྣམས་ཀྱིས་ཁྱོད་རང་སྨྱོས་པ་རེད་ཅེས་སྨྲས༌ནའང༌། གཡོག་མོས་དངོས་གནས་ཁོང་རེད་ཅེས་ནན་གྱིས་བརྗོད་པ༌དང༌། དེ་དག་གིས་ཁོང་གི་ཕོ་ཉ་ཡིན་པར་ངེས་ཞེས་སྨྲས་སོ།། 16 པེ་ཏྲོས་མུ་མཐུད་དུ་སྒོ་བརྡུངས་པ་ན་ཁོ་རྣམས་ཀྱིས་སྒོ་ཕྱེས་ཤིང་པེ་ཏྲོ་མཐོང་བ་དང་ངོ་མཚར་བར་གྱུར་ཏོ།། 17 དེ་ནས་པེ་ཏྲོས་ཁོ་རྣམས་ལ་ཅི་ཡང་མི་སྨྲ་བའི་ལག་བརྡ་བྱས༌ཏེ། གཙོ་བོས་ཁོང་ཉིད་ཇི་ལྟར་བཙོན་ཁང་ལས་ཕྱི་རུ་ཁྲིད་ཚུལ་སྨྲས༌ཤིང༌། ཡང་ཁྱོད་རྣམས་ཀྱིས་དོན་འདི་ཡ་ཀོབ་ * ཡ་ཀོབ་བྱ་བ་ནི་སྐྱབས་མགོན་ཡེ་ཤུའི་གཅུང་པོ༌སྟེ། ཡེ་རུ་སཱ་ལེམ་གྱི་ཡེ་ཤུའི་ཆོས་ཚོགས་ཀྱི་ཆོས་དཔོན་ཞིག༌ཡིན། དང་སྤུན་ཟླ་རྣམས་ལ་ཤོད་ཅིག་ཅེས་གསུངས་པ་དང་སྒོའི་ཕྱི་རུ་བུད་དེ་ཡུལ་གཞན་དུ་སོང༌ངོ༌།།

18 དེ་ནས་ནམ་ལངས་པ་དང་སྲུང་དམག་རྣམས་ཀྱིས་པེ་ཏྲོ་གང་དུ་ཕྱིན་པ་མ་ཤེས་པས་ཟང་ཟིང་ལང་ལོང་དུ་གྱུར་ཏོ།། 19 ཧེ་རོ་དཱས་ཀྱང་ཁོང་བཙལ་ཀྱང་མ་རྙེད་པས་སྲུང་དམག་ལ་འདྲི་རྩད་བྱས་ཤིང་དེ་རྣམས་གསོད་དགོས་པའི་བཀའ་ཕབ། དེའི་རྗེས༌སུ། ཧེ་རོ་དཱ་ཁོ་རང་ཡང་ཡ་ཧུ་དཱའི་ཡུལ་དང་བྲལ་ནས་མར་ཀེ་སར་ཡཱ་རུ་སོང་སྟེ་གནས་བཅས༌སོ།།

20 ཐཱར་དང་ཚི་ཏུན་པ་རྣམས་ལ་ཧེ་རོ་དཱ་ཤིན་ཏུ་ཁྲོས་པར་གྱུར༌ཅིང་། གྲོང་ཁྱེར་དེ་དག་གི་འབྲུ་རིགས་ནི་ས་གནས་རྒྱལ་པོ་ཧེ་རོ་དཱའི་ཡུལ་ནས་ཐོབ་པ་ཡིན༌པས། མི་དེ་རྣམས་འདུས་ནས་རྒྱལ་པོའི་ནང་བློན་པཱ་ལོས་ཐོ་ལ་བློ་བཅོལ་ཞིང་རྒྱལ་པོའི་དྲུང་དུ་སོང་ནས་བློ་གཅིག་སེམས་གཅིག་གིས་འདུམ་འགྲིག་བྱེད་པའི་ཞུ་བ་ཞུས་སོ།། 21 དེ་ཡང་ཧེ་རོ་དཱས་ཐག་གིས་བཅད་པའི་ཉིན་མོར་རྒྱལ་པོའི་གོས་ཆེན་མནབས་ནས་ཁྲི་ལ་བཞུགས་ཏེ་མི་རྣམས་ལ་གཏམ་སྨྲས་པ༌དང༌། 22 མི་རྣམས་ཀྱིས་སྐད་གསང་མཐོན་པོས་འདི་ནི་ལྷའི་གསུང་སྐད་ཡིན་པ་ལས་མིའི་སྐད་མིན་ཞེས་བརྗོད་དོ།། 23 ཧེ་རོ་དཱས་དཀོན་མཆོག་ལ་བསྟོད་པ་མ་ཕུལ༌བས། དེ་མ་ཐག་གཙོ་བོའི་ཕོ་ཉ་ཞིག་གིས་ཁོ་ལ་ཉེས་ཆད་བཅད་པ༌དང༌། ཁོ་རང་འབུ་སྲིན་གྱིས་ཟོས་ནས་ཤི་བར་གྱུར་ཏོ།། 24 འོན་ཀྱང་དཀོན་མཆོག་གི་བཀའ་རིམ་བཞིན་དར་ཞིང་རྒྱས༌པ་རེད། 25 པཱར་ན་པཱ་དང་སོ་ལོ་གཉིས་ཀྱིས་མངག་བཅོལ་ལྟར་རོགས་སྐྱོར་གྱི་ལས་འགན་བསྒྲུབས་རྗེས། ཡེ་རུ་སཱ་ལེམ་ནས་མཱར་ཀུ་ཞེས་ཀྱང་འབོད་པའི་ཡོ་ཧ་ནན་ཁྲིད་ནས་ཕྱིར་ལོག༌གོ།