1 དེ་ནས་ཕོལ་ལོལ་གྱིས་ཨིབ་རིའི་མི་རིགས་ཀྱི་སྐད་ཀྱིས་མི་ཚོགས་ལ་འདི་ལྟར་གསུངས་པ་སྟེ། ཕ་ཁུ་སྤུན་ཟླ༌རྣམ་པ། ངས་ད་ལྟ་ཁྱོད་རྣམས་ལ་དག་འབུད་བྱེད་པར་ཉོན་ཅིག་ཅེས་གསུངས་པ༌དང༌། 2 མི་རྣམས་ཀྱིས་ཁོང་གིས་ཨིབ་རིའི་མི་རིགས་ཀྱི་སྐད་སྨྲས་པ་ཐོས་ནས་སྔར་ལས་ཀྱང་གྲགས་འགུལ་མེད་པར་གྱུར་ཏོ།། ཡང་ཕོལ་ལོལ་གྱིས་འདི་སྐད༌དུ། 3 ང་རང་ཡང་ཡ་ཧུ་དཱའི་མི་རིགས་ཡིན་ཞིང་ཀི་ལིག་ཡཱ་ཡུལ་གྱི་ཐཱར་ཟི་རུ་སྐྱེས༌ལ། གྲོང་ཁྱེར་འདི་ནས་ནར་སོན་པ༌དང༌། གཱ་མ་ཨེལ་གྱི་ཞབས་དྲུང་ནས་བདག་ཅག་གི་ཕ་མེས་ཀྱི་བཀའ་ཁྲིམས་དམ་པོ་བཞིན་སྦྱངས༌པ་བྱས་ཤིང༌། ཁྱོད་རྣམས་ཀྱིས་དེ་རིང་ཅི་ལྟར་བྱེད་པ་བཞིན་ངས་ཀྱང་དཀོན་མཆོག་ལ་བརྩོན་སེམས་ཆེན་པོ་བཅངས་མྱོང༌བ་ཡིན། 4 ངས་ཀྱང་མཱ་ཤི་ཀའི་ཆོས་ཀྱི་ལམ་དེ་ལ་ཞུགས་པའི་མི་རྣམས་ལ་གནོད་འཚེ་བྱས་ཤིང་འཆི་ལམ་དུ་བརྫངས་པ༌དང༌། སྐྱེས་ཕོ་མོ་སུ་ཡིན་ཡང་བཙན་བཟུང་བྱས་ནས་བཙོན་དུའང་བཅུག་མྱོང༌། 5 བདག་གི་དོན་འདིར་མཆོད་དཔོན་ཆེན་པོ་དང་རྒན་པོ་ཐམས་ཅད་ཀྱིས་ཀྱང་བདེན་དཔང་བྱས་ཆོག༌ལ། ངས་ཁོང་རྣམས་ཀྱིས་དཱ་མེ་སེག་གི་སྤུན་ཟླ་རྣམས་ལ་བྲིས་པའི་འཕྲིན་ཡིག་ཁྱེར༌ཏེ། དེར་ཡོད་པའི་རྗེས་འབྲང་པ་རྣམས་བཙན་བཟུང་བྱས་ནས་ཉེས་ཆད་གཅོད་པ་དང་དེ་དག་ཡེ་རུ་སཱ་ལེམ་དུ་ཚུར་འཁྲིད་པའི་ཕྱིར་དཱ་མེ་སེག་ལ་ཆས་པ་དང༌། 6 ང་རང་དཱ་མེ་སེག་ཏུ་སླེབས་ལ་ཉེ་བའི་ལམ་དུ་ཉིན་གུང་ཙམ་ལ། གློ་བུར་ཉིད་ལ་ནམ་མཁའི་ཞིང་ཁམས་ནས་འོད་ཆེན་པོ་ཞིག་བདག་གི་ཕྱོགས་བཞིར་འཁྱུགས་ཤིང་འཚེར་བ་དང་། 7 ང་རང་སར་འགྱེལ་ཞིང་སྐད་སྒྲ་ཞིག་གྲགས་པ༌སྟེ། ཀྱེ། སོ༌ལོ། སོ་ལོ། ཁྱོད་ཀྱིས་བདག་ལ་གནོད་འཚེ་བྱེད་དོན་ཅི་ཡིན་ནམ་ཞེས་གསུངས་པ་ཐོས་ཤིང༌། 8 ངས་གཙོ་བོ་ལགས་ཁྱེད་རང་སུ་ཡིན་ནམ་ཞེས་ཞུས་པ༌ལ། ཁོང་གིས་འདི་སྐད༌དུ། བདག་ནི་ཁྱོད་ཀྱིས་གནོད་འཚེ་བྱེད་བཞིན་པའི་ནཱ་ཙ་རེལ་པ་ཡེ་ཤུ་ཡིན་ཞེས་གསུངས་སོ།། 9 ངའི་ལམ་གྲོགས་རྣམས་ཀྱིས་ཀྱང་འོད་དེ་མཐོང༌ནའང༌། བདག་ལ་བཀའ་གསུང་མཁན་གྱི་སྐད་དེའི་དོན་མ་ཤེས་སོ།། 10 དེ་ནས་ངས་གཙོ་བོ༌ལགས། ངས་ཅི་བྱ་འོས་སམ་ཞེས་ཞུས་པ༌ལ། ཡང་ཁོང་གིས་འདི་སྐད༌དུ། ཁྱོད་ཡར་ལངས་ནས་དཱ་མེ་སེག་ལ་སོང༌དང༌། དེ་རུ་ཁྱོད་ཀྱིས་ཅི་བྱ་དགོས་པ་ཐམས་ཅད་ཁྱོད་ལ་སྟོན་ངེས་ཡིན་ཞེས་གསུངས་སོ།། 11 འོད་ཆེན་པོ་དེའི་གཟི་མདངས་ཀྱི་རྐྱེན་གྱིས་ངའི་མིག་གིས་ཅི་ཡང་མཐོང་མ་ཐུབ༌པས། ལམ་གྲོགས་དག་གིས་ངའི་ལག་པར་འཇུས་ཏེ་ང་རང་དཱ་མེ་སེག་ལ་ཁྲིད་དོ།། 12 གནས་དེར་མིང་ལ་ཨ་ནན་ཡཱ་བྱ་བ་བཀའ་ཁྲིམས་ལྟར་དཀོན་མཆོག་ལ་དད་མོས་ཡོད་པ༌དང༌། ཁོ་རང་ནི་གནས་དེའི་ཡ་ཧུ་དཱ་པ་ཐམས་ཅད་ཀྱིས་བསྟོད་བསྔགས་བྱེད་པའི་མི་ཞིག་ཀྱང༌ཡིན། 13 དེ་ནས་ཁོ་རང་བདག་གི་གམ་དུ་ཡོང་སྟེ་ན༌རེ། སྤུན་ཟླ་སོ་ལོ༌ལགས། ཁྱོད་ཀྱི་མིག་གིས་མཐོང་ནུས་པར་གྱུར་ཅིག་ཅེས་གསུངས་པའི་དུས་དེ་ཉིད་ལ་ངས་ཀྱང་ཁོ་རང་མཐོང་བར་གྱུར་ཏོ།། 14 ཡང་ཨ་ནན་ཡཱ་ན༌རེ། བདག་ཅག་གི་མེས་པོའི་དཀོན་མཆོག་གིས་རང་ཉིད་ཀྱི་དགོངས་པ་རྟོགས་པ་དང་སྐྱེས་བུ་རྣམ་དག་དེ་ཉིད་ལ་མཇལ་བ་དང་ཁོང་གི་ཞལ་ནས་གསུངས་པའི་བཀའ་ཐོས་པའི་ཕྱིར་ཁྱོད་རང་བདམས་པར་མཛད། 15 རྒྱུ་མཚན་ནི་ཁྱོད་ཀྱིས་གང་ཞིག་མཐོང་ཐོས་སུ་གྱུར་པ་རྣམས་མི་ཐམས་ཅད་ལ་སྨྲས་ཏེ་ཁོང་ཉིད་ལ་བདེན་དཔང་བྱེད་ངེས་པའི་ཕྱིར༌རོ།། 16 ད་ལྟ་ཁྱོད་ཀྱིས་དུས་འགྱངས་བྱེད་དོན༌ཅི། ཡར་ལོངས༌དང༌། ཁྲུས་གསོལ་ལ་ཞུགས༌དང༌། སྐྱབས་མགོན་ཡེ་ཤུའི་མཚན་ལ་ཞུས་ནས་རང་གི་སྡིག་པ་འདག་པར་གྱིས་ཞེས་སྨྲས༌སོ།།

17 དེའི་རྗེས་སུ་ང་རང་ཡེ་རུ་སཱ་ལེམ་དུ་ཕྱིར་ལོག༌སྟེ། མཆོད་ཁང་ནས་གསོལ་བ་འདེབས་པའི་ཚེ༌ན། དྲན་པ་འཆལ་བར་གྱུར་ཅིང༌། 18 གཙོ་བོས་བདག་ལ་འདི་སྐད༌དུ། ཁྱོད་ཀྱིས་ང་རང་ལ་བདེན་དཔང་བྱེད་པའི་དོན་འདི་མི་དེ་རྣམས་ཀྱིས་དང་དུ་མི་ལེན༌པས། ཁྱོད་རང་མྱུར་དུ་ཡེ་རུ་སཱ་ལེམ་དང་འབྲལ་བར་གྱིས་ཞེས་གསུངས་པ་མཐོང་ལམ་དུ་མངོན་ནོ།། 19 དེ་ནས་ངས་འདི་ལྟར་ཞུས༌པ་སྟེ། ཀྱེ་གཙོ་བོ་ལགས། ངས་དེ་སྔར་ཁྱེད་ལ་དད་པའི་མི་རྣམས་ཆོས་ཁང་རེ་རེ་ནས་བཙོན་དུ་བཅུག་ཅིང་གཅར་རྡུང་བྱས་མྱོང་བ༌དང༌། 20 ཁྱེད་ལ་བདེན་དཔང་བྱེད་མཁན་སི་ཏེ་ཕཱན་གྱི་ཁྲག་བཞུར་བའི་དུས༌སུ། ང་རང་ཡང་གནས་དེར་ལངས་བསྡད་ཡོད་པ་དང་དགའ་སྤྲོ་སྐྱེས། ངས་ཁོ་རང་གསོད་མཁན་དག་གི་གྱོན་གོས་བདག་གཉེར་བྱས་པའང་མི་དེ་རྣམས་ཀྱིས་ཤེས་པ་ཡིན་ཞེས་ཞུས་པ༌ན། 21 ཡང་ཁོང་གིས་བདག་ལ་འདི་སྐད༌དུ་གསུངས་པ་སྟེ། ཁྱོད་རང་སོང༌དང༌། ངས་ཁྱོད་རང་རྒྱང་ཐག་རིང་བའི་ཕྱི་ཕྱོགས་པ་རྣམས་ཀྱི་གམ་དུ་མངག་པར་བྱའོ་ཞེས་པའོ་ཞེས་གསུངས་སོ།།

22 དེ་ནས་ཕོལ་ལོལ་གྱིས་དེ་སྐད་གསུངས་ནས་མཚམས་འདིར་སླེབས་ཤིང་མི་ཚོགས་ཀྱིས་གཏམ་དེར་མཉན་པ་དང་སྐད་ཆེན་པོ་བརྒྱབ་སྟེ་ན༌རེ། མི་འདི་ལྟ་བུ་ནི་འཇིག་རྟེན་འདིར་གསོན་མི་འོས་པས་སོད་ཅིག་ཅེས་སྨྲས༌ཤིང༌། 23 འུར་རྒྱག་བཞིན་རང་གི་ཕྱི་གོས་གཡུགས་པ་དང་ས་རྡུལ་བར་སྣང་ལ་གཏོར་ཏོ།། 24 དེ་ནས་སྟོང་དཔོན་གྱིས་ཁོང་ཉིད་དམག་སྒར་གྱི་ནང་ལ་འཁྲིད་དུ་བཅུག་པ༌དང༌། མི་ཚོགས་ཀྱིས་ཁོང་ཉིད་ལ་དེ་ལྟར་འུར་རྒྱག་པའི་དོན་ཅི་ཡིན་པ་ཤེས་པའི༌ཕྱིར། རྟ་ལྕག་གིས་གཞུས་ཏེ་ནན་འདྲི་བྱེད་པའི་བཀའ་བསྒོས་སོ།། 25 དེ་ནས་ཕོལ་ལོལ་ཁོང་ཉིད་རྒྱུན་བུས་བཀྱིགས་མ་ཐག་རང་ཉིད་ཀྱི་གམ་དུ་ལངས་སྡོད་པའི་བརྒྱ་དཔོན་ལ་འདི་སྐད༌དུ། ཁྱོད་ཅག་གིས་བཅའ་ཁྲིམས་ལྟར་རོ་མཱ་པ་ཞིག་ལ་ཉེས་ཆད་མ་བཅད་ནའང་གཅར་རྡུང་བྱས་ཆོག་གམ་ཞེས་གསུངས་པ༌ལ། 26 བརྒྱ་དཔོན་གྱིས་གཏམ་དེ་ཐོས་པ་དང་སྟོང་དཔོན་གྱི་དྲུང་དུ་སོང་སྟེ་ན༌རེ། མི་འདི་ནི་རོ་མཱ་པ་ཞིག་ཡིན་པས་ཁྱེད་ཀྱིས་ཅི་བྱེད་འདོད་དམ་ཞེས་སྨྲས་སོ།། 27 དེ་ནས་སྟོང་དཔོན་ཕོལ་ལོལ་གྱི་དྲུང་དུ་སོང་སྟེ་ན་རེ། ཁྱོད་ནི་རོ་མཱ་པ་ཞིག་ཡིན་མིན་བདག་ལ་ཤོད་ཅིག་ཅེས་དྲིས་པ༌དང༌། ཁོང་གིས་ཡིན་ཞེས་གསུངས་སོ།། 28 ཡང་སྟོང་དཔོན་ན༌རེ། བདག་ནི་དངུལ་གྱི་རྫོངས་པ་མང་པོ་བཏང་ནས་རོ་མཱ་རྒྱལ་ཁབ་ཀྱི་རྒྱལ་ཁོངས་སུ་ཞུགས་པ་ཞིག་ཡིན་ཞེས་སྨྲས་པ༌ན། ཕོལ་ལོལ་གྱིས་ང་རང་ནི་སྐྱེས་དུས་ནས་རོ་མཱ་པ་ཞིག་ཡིན་ཞེས་གསུངས་སོ།། 29 དེ་མ་ཐག་ཕོལ་ལོལ་ལ་འདྲི་གཅོད་བྱེད་པའི་དམག་མི་རྣམས་ཁོང་དང་རྒྱང་བཀྱེད༌པ་རེད། སྟོང་དཔོན་གྱིས་ཀྱང་ཕོལ་ལོལ་ནི་རོ་མཱ་པ་ཞིག་ཡིན་པ་ཤེས་པ་དང་ཐག་པས་བཀྱིགས་པའི་རྐྱེན་གྱིས་འཇིགས་པར་གྱུར༌ཏོ།།

30 དེའི་ཕྱི༌ཉིན། སྟོང་དཔོན་གྱིས་ཡ་ཧུ་དཱ་པ་རྣམས་ཀྱིས་ཕོལ་ལོལ་གཏུག་བཤེར་བྱེད་པའི་རྒྱུ་རྐྱེན་གང་ཡིན་པ་ངེས་པར་ཤེས་ཕྱིར། ཁོང་ཉིད་བཙོན་ལས་ཕྱིར་ཁྲིད༌ཅིང༌། མཆོད་དཔོན་ཆེན་པོ་རྣམས་དང་དཔོན་རིགས་ཚོགས་པའི་ཚོགས་མི་ཐམས་ཅད་ལྷན་དུ་འདུ་དགོས་པའི་བཀའ་བསྒོས་པ༌དང༌། ཕོལ་ལོལ་ཡང་དེ་རྣམས་ཀྱི་མདུན་དུ་ཁྲིད་དེ་ཡར་བསླངས་པའོ།།