1 དེ་ནས་ཉིན་ལྔ་འགོར༌རྗེས། མཆོད་དཔོན་ཆེན་པོ་ཨ་ནན་ཡཱ་དང་རྒན་པོ་འགའ་ཤས་ཁྲིམས་རྩོད་པ་ཐུར་ཐོ་ལོ་དང་མཉམ་དུ་སླེབས་ཏེ། སྤྱི་དཔོན་གྱི་དྲུང་དུ་ཕོལ་ལོལ་གཏུག་བཤེར་བྱས་སོ།། 2 དེ་ནས་ཕོལ་ལོལ་བོས་ཡོང་བ་དང་ཐུར་ཐོ་ལོ་ན༌རེ། དཔོན་ཆེན་ཕེ་ལིག༌ལགས། ཁྱེད་ཀྱི་བཀའ་དྲིན་ལས་ངེད་རྣམས་ཀྱིས་ཡུན་རིང་ལ་ཞི་བདེའི་དཔལ་ལ་རོལ་བ༌དང༌། ཡུལ་འདིའི་ཞན་ཆ་ཡང་ཁྱེད་ཀྱི་མངོན་ཤེས་ཀྱིས་རྟོགས་ཏེ་ཡོ་བསྲང་བྱས༌པས། 3 ངེད་ཅག་གིས་ཀྱང་དུས་དང་རྣམ་པ་ཀུན་ཏུ་དོན་འདི་ཁས་ལེན་པ་དང་སེམས་གཏིང་ནས་ཁྱེད་ལ་བཀའ་དྲིན་ཞུའོ།། 4 འོན༌ཀྱང༌། ཁྱེད་ལ་ལྷག་ཏུ་སུན་སྣང་མི་བསྐྱེད་པའི༌ཕྱིར། ཁྱེད་ཀྱིས་ཐུགས་བག་ཕེབས་ངང་ངེད་ཅག་གི་ཚིག་འགའ་ལ་གསན་རོགས༌ཞུ། 5 མི་འདི་ནི་འགོས་ནད་ལྟ་བུ་ཞིག་ཡིན༌ཏེ། མི་འདིས་ས་གཞི་ཡོངས་སུ་སྡོད་པའི་ཡ་ཧུ་དཱ་པ་ཐམས་ཅད་ལ་ངན་སྐུལ་བྱས་ཤིང་ཟིང་ཆ་བཟོས་པ༌དང༌། ཁོ་ནི་ནཱ་ཙ་རེལ་གྱི་གྲུབ་མཐའི་འགོ་པའང༌ཡིན་ནོ།། 6 ཐ་ན་ཁོས་མཆོད་ཁང་ཡང་མི་གཙང་བར་བྱེད་འདོད་པས། སྔར་ངེད་ཅག་གིས་ཁོ་རང་བཟུང༌སྟེ། རང་གི་བཀའ་ཁྲིམས་བཞིན་ཐག་གིས་གཅོད་པར་བསམས༌མོད། 7 འོན་ཀྱང་སྟོང་དཔོན་ལི་སི་ཨ་སླེབས་ཏེ། བཙན་ཤེད་ཀྱིས་ཕོལ་ལོལ་ངེད་ཅག་གི་ལག་ནས་ཕྲོགས་ཤིང༌། ཁོ་རང་གཏུགས་པའི་མི་རྣམས་ལ་ཁྱེད་ཀྱི་དྲུང་དུ་སོང་ཞེས་བཀའ་བསྒོས་པ་དང་། 8 ཁྱེད་ཀྱིས་ཁོ་ལ་ཞིབ་ཏུ་འདྲི་གཅོད་མཛད༌ན། ངེད་ཅག་གིས་ཁོ་རང་གཏུགས་པའི་རྒྱུ་མཚན་ཐམས་ཅད་རྟོགས་ནུས་པ་ཡིན་ཞེས་གཏུགས། 9 ཡ་ཧུ་དཱ་པ་རྣམས་ཀྱིས་ཀྱང་དེ་དང་བསྟུན་ནས་དངོས་གནས་དེ་ལྟར་ཡིན་ཞེས་ཁོང་ཉིད་གཏུགས་སོ།།

10 དེ་ནས་སྤྱི་དཔོན་ཕེ་ལིག་གིས་ཕོལ་ལོལ་ལ་གཏམ་སྨྲ་རུང་བའི་བརྡ་བསྟན་པ༌ན། ཁོང་ན་རེ། ངས་ཁྱེད་རང་ནི་ལོ་མང་པོར་མི་རིགས་འདིའི་ཁྲིམས་དཔོན་ཡིན་པ་ཤེས༌པས། དགའ་སྤྲོའི་ངང་ནས་རང་ཉིད་ལ་དག་འབུད་བྱེད་པའོ།། 11 ཁྱེད་ཀྱིས་རྩད་གཅོད་བྱས་ན་རྟོགས་ནུས༌ཏེ། ང་རང་ཡེ་རུ་སཱ་ལེམ་ལ་མཇལ་དུ་སོང་བ་དང་ད་ལྟའི་བར་དུ་ཉིན་བཅུ་གཉིས་ལས་མ་འགོར༌ལ། 12 ངས་མཆོད་ཁང་དང་ཆོས༌ཁང༌། ཡང་ན་གྲོང་ཁྱེར་བཅས་ནས་མི་གཞན་དང་རྩོད་གླེང་མ་བྱས་ཤིང་ཟིང་ཆ་བཟོས་མ་མྱོང་ལ་ཁོ་རྣམས་ཀྱིས་ཀྱང་མ་མཐོང༌བ་ཡིན་ནོ།། 13 ད་ལྟ་ང་རང་ཁྱེད་ལ་གཏུགས་པའི་དོན་དེར་ཁོ་རྣམས་ཀྱིས་ཀྱང་བདེན་དཔང་བྱེད་མི་ནུས་སོ།། 14 འོན་ཀྱང་ངས་ཁྱེད་ལ་དོན་ཞིག་ཁས་ལེན་པར་བྱེད༌དེ། ཁོ་རྣམས་ཀྱིས་མཱ་ཤི་ཀའི་ཆོས་ཀྱི་ལམ་དེ་ལོག་ལྟ་ཡིན་ཟེར༌ཡང༌། ངས་ཆོས་དེ་བཞིན་དུ་ངེད་ཅག་གི་ཕ་མེས་ཀྱི་དཀོན་མཆོག་ལ་བསྙེན་བཀུར་བྱེད༌ཅིང༌། བཀའ་ཁྲིམས་དང་ལུང་སྟོན་པའི་མདོ་ལས་བཀོད་ཡོད་པ་ཐམས་ཅད་ལའང་མཐུན་པར་དད་པ་བྱེད་དོ།། 15 གཞན༌ཡང༌། ཡ་ཧུ་དཱ་པ་འདི་རྣམས་དང་འདྲ་བར་ངས་དཀོན་མཆོག་ལ་རེ་སྨོན་བྱེད༌དེ། མི་རྣམ་དག་དང་མི་ངན་པ་གང་ཡིན་ཡང་གཤིན་པོ་རྣམས་སླར་གསོན་པར་འགྱུར་ངེས༌ཡིན་ནོ།། 16 དེའི༌ཕྱིར། ངས་དུས་རྟག་ཏུ་དཀོན་མཆོག་དང་མི་གཞན་དག་གི་མདུན་དུ་བསམ་པ་རྣམ་དག་འཆང་བར་བརྩོན༌ཞིང་། 17 ལོ་འགའི་རྗེས༌སུ། ངས་རང་གི་མི་རིགས་ལ་རོགས་སྐྱོར་བྱེད་པའི་ཞལ་འདེབས་འབུལ་བ་དང༌། དཀོན་མཆོག་ལ་མཆོད་པ་འབུལ་ཆེད་ཡེ་རུ་སཱ་ལེམ་དུ་སོང་བ༌དང༌། 18 མཆོད་པ་འབུལ་བཞིན་པའི་སྒང༌ལ། ངས་མཆོད་ཁང་ནས་ཆོས་ཀྱི་གཙང་སྦྲའི་ཆོ་ག་བསྒྲུབས་ཟིན་པ་དེ་ཨེ་ཞི་ཡཱ་ཡུལ་ནས་ཡོང་བའི་ཡ་ཧུ་དཱ་པ་འགའ་ཞིག་གིས་མཐོང༌ཡང༌། གནས་དེར་མི་མང་པོ་མ་འདུས་ཤིང་འུར་ཡང་མ་བརྒྱབ་བོ།། 19 གལ་ཏེ་ཁོ་རྣམས་ལ་ང་རང་གཏུག་རྒྱུའི་དོན་ཞིག་ཡོད༌ན། ཁྱེད་ཀྱི་དྲུང་དུ་ཡོང་ནས་གཏུག་འོས༌ཤིང༌། 20 ཡང་ན་ང་རང་དཔོན་རིགས་ཚོགས་པའི་ཚོགས་མི་རྣམས་ཀྱི་མདུན་དུ་སྡོད་པའི་སྐབས༌སུ། མི་འདི་རྣམས་ཀྱིས་བདག་ལ་ཉེས་སྐྱོན་གང་ཞིག་ཡོད་པ་རྙེད་ན་ཁོ་ཚོ་རང་གིས་གསལ་བཤད་བྱས་ཆོག 21 གལ་ཏེ་ཉེས་སྐྱོན་ཡོད་པའི་དབང་དུ་བཏང༌ནའང༌། སྔར་ནས་ང་རང་ཁོ་རྣམས་ཀྱི་ཁྲོད་དུ་ཡར་ལངས་ཏེ་སྐད་ཆེན༌པོས། དེ་རིང་གི་དུས་འདིར་ཁྱོད་རྣམས་ཀྱི་མདུན་ནས་ངས་འདྲི་གཅོད་མྱོང་བ་ནི། གཤིན་པོ་རྣམས་སླར་གསོན་པར་འགྱུར་བའི་དོན་དེའི་གནས་ལུགས་ཀྱི་ཕྱིར་རོ་ཞེས་སྨྲས་པའི་གཏམ་དེ་ཁོ་ན་ཡིན་ཞེས་གསུངས༌སོ།།

22 དེ་ནས་ཕེ་ལིག་ནི་མཱ་ཤི་ཀའི་ཆོས་ཀྱི་ལམ་དེ་ལ་ཆ་རྒྱུས་གསལ་པོ་ཡོད་ནའང་ཁོ་ན༌རེ། སྟོང་དཔོན་ལི་སི་ཨ་འདིར་ཕེབས༌ཚེ། ངས་ཁྱོད་རྣམས་ཀྱི་དོན་འདིར་ཁྲིམས་ཐག་གཅོད་ངེས་ཡིན་ཞེས་སྨྲས་རྗེས་གྲོལ་བ༌དང༌། 23 བརྒྱ་དཔོན་ལ་ཕོལ་ལོལ་སྲུང་སྐྱོབ་བྱེད་པ་དང་རང་དབང་ཅུང་ཙམ་ཡོད་པར་བྱེད་པ་དང༌། ཁོང་གི་གྲོགས་རྣམས་ཀྱང་ཁོང་ལ་ཞབས་ཏོག་བསྒྲུབ་ཏུ་ཡོང་ཆོག་པའི་བཀའ་བསྒོས༌པ་རེད། 24 དེ་ནས་ཉིན་འགའ་འགོར༌རྗེས། ཕེ་ལིག་དང་ཁོའི་ཡ་ཧུ་དཱ་པའི་ཆུང་མ་དྲུ་སིལ་ལཱ་གཉིས་མཉམ་དུ་ཕེབས་ཤིང་ཕོལ་ལོལ་བོས༌ཏེ། ཁོང་གིས་མཱ་ཤི་ཀ་ཡེ་ཤུ་ལ་དད་པ་བྱེད་པའི་སྐོར་གྱི་ཆོས་གསུངས་པ་ལ་མཉན། 25 ཕོལ་ལོལ་གྱིས་དྲང་བདེན་གྱི་ལས་དང་རང་ཚོད་ཟིན་དགོས༌ཚུལ། མ་འོངས་པར་ཁྲིམས་ཐག་གཅོད་པའི་སྐོར་བཅས་ཀྱི་ཆོས་གསུངས་པ༌ན། ཕེ་ལིག་དོན་དེ་དག་ལ་འཇིགས་ཏེ་ན༌རེ། ཁྱེད་རང་གནས་སྐབས་སུ་ཕྱིར་ལོག༌དང༌། བདག་ལ་ཁོམ་ལོང་བྱུང་ན་ཁྱེད་ཉིད་ཡང་བསྐྱར་འབོད་པར་བྱའོ་ཞེས་སྨྲས་སོ།། 26 ཡང་དུས་དེ་ལ་ཕེ་ལིག་གིས་ཕོལ་ལོལ་ལས་ལྐོག་རྔན་ལེན་པར་རེ་བ་བཅངས་པས་ཐེངས་མང་པོར་ཁོང་ཉིད་བོས་ནས་གླེང་མོལ་བྱས་སོ།། 27 དེ་ནས་ལོ་གཉིས་འགོར༌རྗེས། ཕོར་ཀེའུ་ཨོ་ཕེ་ཏི་ཞེས་པ་ཕེ་ལིག་གི་ཚབ་ལ་སྤྱི་དཔོན་དུ་བསྐོས། འོན་ཀྱང་ཕེ་ལིག་གིས་ཡ་ཧུ་དཱ་པ་རྣམས་ཀྱི་ངོ་སོ་ལེན་པའི་ཕྱིར་ཕོལ་ལོལ་མ་བཏང་བར་བཙོན་དུ་བཞག༌གོ།