1 ངས་ཉི་མའི་འོག་ཏུ་སྡུག་བསྔལ་ཞིག་མཐོང་བ་དང་། དེ་ནི་མི་ལ་ལྗིད་པོ་ཡིན་ཏེ། 2 དཀོན་མཆོག་གིས་མི་ལ་ཁོའི་འདོད་པ་བཞིན་དུ་རྒྱུ་ནོར་ལོངས་སྤྱོད་དང་ཐོབ་གོ་ས་གནང་ཡང་། ཁོ་ལ་ལོངས་སུ་སྤྱོད་པའི་དབང་ཐང་མ་གནང་བས། མི་ཆ་མེད་ཀྱིས་དེ་ལོངས་སུ་སྤྱོད་པ་སྟེ། འདི་ཡང་སྟོང་པ་ཡིན་པ་དང་སེམས་སྡུག་པའི་རྐྱེན་ངན་ཞིག་གོ ། 3 ཇི་སྟེ་མི་ཞིག་ལ་བུ་བརྒྱ་སྐྱེས་ནས་ཚེ་ཐག་ཤིན་ཏུ་རིང་ཡང་། ཁོའི་སེམས་སུ་ད་དུང་ཡིད་མ་ཚིམ་པ་དང་། དེའི་བེམ་པོ་ཡང་དུར་ལ་འཇུག་པར་མ་གྱུར་ན། མངལ་དུ་ཤི་བའི་བུ་ནི་ཁོ་ལས་ལྷག་པ་ཡིན་ཞེས་ངས་སྨྲའོ། ། 4 ཅིའི་ཕྱིར་ཞེ་ན། མངལ་ལས་བྱུང་བ་དེ་ནི་ཕན་ཐོགས་མེད་པར་ཐོན་པ་དང་མུན་པའི་ནང་དུ་འགྲོ་བས། དེའི་མིང་ནི་མུན་པའི་ནང་དུ་ནུབ་པར་གྱུར། 5 དེས་ཉི་མ་མཐོང་མ་མྱོང་ལ་ཅི་ཡང་མ་ཤེས་པས། མི་དེ་ལས་འདི་ལ་ངལ་གསོ་ཡོད། 6 དེར་མ་ཟད། གལ་ཏེ་མི་དེ་ནི་ལོ་ངོ་ཉིས་སྟོང་ལ་གསོན་པོར་གནས་ཀྱང་བདེ་སྐྱིད་ལ་རོལ་མ་ཐུབ་ན། མཐར་ཚང་མ་གནས་གཅིག་ཏུ་འགྲོ་བ་མ་ཡིན་ནམ། 7 མིའི་དཀའ་ལས་ཐམས་ཅད་རང་གི་ལྟོ་བཅུད་ཀྱི་དོན་དུ་ཡིན་པ་ལས་ཡིད་ཚིམ་པ་མེད་དོ། ། 8 དེ་ཅིའི་ཕྱིར་ཞེ་ན། མཁས་པ་ལ་བླུན་པོ་ལས་ལྷག་པའི་དགེ་མཚན་ཅི་ཡོད་དམ། སྡུག་བསྔལ་ཅན་གྱིས་མི་རྣམས་ཀྱི་མདུན་དུ་ཅི་ལྟར་བྱེད་པ་ཤེས་ཀྱང་དེར་ཕན་ཐོགས་ཅི་ཡོད། 9 སེམས་སུ་དྲན་པ་ལས་མིག་གིས་མཐོང་བ་ལེགས། འདི་ཡང་སྟོང་པ་ཡིན་པ་དང་རླུང་ལ་ཞགས་པ་འཕེན་པ་ཙམ་མོ། ། 10 སྔར་ཡོད་པ་ལ་སྔ་མོ་ནས་མིང་བཏགས་ཡོད་དེ། མི་ཡིས་རང་ནི་ཅི་འདྲ་ཡིན་པ་དང་། རང་ལས་སྟོབས་ཆེ་བ་དང་འགྲན་མི་ནུས་པ་རྟོགས་ཡོད། 11 གཏམ་མང་ན་སྙིང་པོ་མེད་པ་དེ་ལས་མང་བས། དེ་དག་མི་ལ་ཕན་ཐོགས་ཅི་ཡོད་དམ། 12 སྟོང་ཟད་དུ་བཏང་བའི་གྲིབ་མ་ལྟ་བུའི་མི་ཚེ་ནི་རང་ལ་ཕན་ཐོགས་ཅི་ཡོད་པ་སུ་ཡིས་རྟོགས། རྗེས་སུ་ཉི་མའི་འོག་ཏུ་ཅི་འབྱུང་བར་འགྱུར་བ་སུས་འཆད་ནུས་སམ།