1 ཡང་ཁོང་གིས་སྐད་ཆེན་པོ་རྒྱག་བཞིན་འདི་སྐད་དུ། གྲོང་ཁྱེར་འདི་ལ་ཉེས་ཆད་གཅོད་མཁན་ཁྱོད་རྣམས་ཀྱིས། རེ་རེས་ལག་ཏུ་སྲོག་གཅོད་བྱེད་ཀྱི་མཚོན་ཆ་བཟུང་ནས་ཉེ་སར་ཤོག་ཅིག་ཅེས་གསུངས་པ་ངས་ཐོས་ཤིང་། 2 གློ་བུར་ཉིད་དུ། བྱང་ཕྱོགས་ཀྱི་སྒོ་གོང་མ་ནས་མི་དྲུག་འོངས་པ་དང་རེ་རེའི་ལག་ཏུ་སྲོག་གཅོད་བྱེད་ཀྱི་མཚོན་ཆ་བཟུང་ཡོད། ཁོ་ཚོའི་ཁྲོད་དུ་གཅིག་གིས་སོ་རས་སྲབ་བུ་གྱོན་པ་དང་། རྐེད་པར་སྣག་བུམ་བཏགས་ཡོད་ལ། ཁོ་ཚོ་ནང་དུ་འོངས་ནས་ལི་ཡི་མཆོད་ཁྲིའི་མདུན་དུ་ལངས་བསྡད་དོ། ། 3 ཡེས་ར་ཨེལ་གྱི་དཀོན་མཆོག་གི་གཟི་བརྗིད་ནི་ཀེ་རུབ་ཀྱི་གོང་དུ་མཆིས་ཀྱང་། ད་ལྟ་གནས་དེ་ནས་མཆོད་ཁང་གི་སྒོ་ཐེམ་དུ་བསྣུར་བ་དང་། ཡ་ཝཱེས་སོ་རས་སྲབ་བུ་གྱོན་པ་དང་རྐེད་པར་སྣག་བུམ་བཏགས་པའི་མི་དེ་བོས་ནས། 4 མི་དེ་ལ་འདི་སྐད་དུ། ཁྱོད་རང་ཡེ་རུ་སཱ་ལེམ་གྱི་གྲོང་ཁྱེར་ཡོངས་སུ་ཕྱིན་ཏེ། གྲོང་ཁྱེར་ནང་གི་ཞེན་ལོག་གི་ལས་སྤྱད་པའི་ཕྱིར་དབུགས་རིང་གཏོང་བ་དང་ཡིད་སྐྱོ་བའི་མི་ཡི་དཔྲལ་བར་ཀུར་རྟགས་ཤིག་རྒྱོབ་ཅིག་ཅེས་གསུངས་པ་དང་། 5 ཡང་ཁོང་གིས་མི་ལྷག་མ་རྣམས་ལ་འདི་སྐད་དུ། ཁྱོད་རྣམས་མི་དེའི་རྗེས་སུ་འབྲངས་ནས་གྲོང་ཁྱེར་ཡོངས་སུ་སོང་སྟེ་དམར་གསོད་གྱིས་ཤིག ཁྱོད་ཚོས་མིག་གིས་ལྟ་སྐྱོང་མ་བྱེད། སྙིང་རྗེ་ཡང་མ་བསྒོམ་ལ། 6 ཁྱོད་ཚོས་ངའི་གནས་དམ་པ་ནས་འགོ་བརྩམས་ཏེ། རྒན་པ་དང་ན་གཞོན། ན་ཆུང་མ། ཕྲུ་གུ། བུད་མེད་བཅས་ཐམས་ཅད་དམར་གསོད་གྱིས་ཤིག ཡིན་ཡང་དཔྲལ་བར་རྟགས་ཡོད་པ་རྣམས་ལ་གནོད་མ་བསྐྱལ་ཞིག་ཅེས་གསུངས་པ་ངས་ཐོས་ཤིང་། དེ་ནས་ཁོ་ཚོས་མཆོད་ཁང་མདུན་གྱི་རྒན་པོ་རྣམས་ནས་བཟུང་དམར་གསོད་བྱེད་པའི་འགོ་བརྩམས་སོ། ། 7 ཡང་ཁོང་གིས་དེ་དག་ལ་འདི་སྐད་དུ། ཁྱོད་ཅག་གིས་མཆོད་ཁང་འདི་བཙོག་པར་བཟོས་ཤིག་དང་། ཁྱམས་རའི་ནང་དུ་བསད་པའི་མི་ཡིས་འགེང་བར་གྱིས་ཤིག ད་ནི་ཁྱོད་རྣམས་ཕྱི་རུ་སོང་ཞིག་ཅེས་གསུངས་པས། དེ་ཚོ་ཕྱི་རུ་སོང་ནས་གྲོང་ཁྱེར་ནང་དུ་དམར་གསོད་བྱས་སོ། །

8 དེ་ཚོས་དམར་གསོད་བྱེད་དུས་ང་གཅིག་པུ་ལུས་པ་དང་། དེ་ནས་ངས་ཁ་སར་གཏད་ནས། ཀྱེ་གཙོ་བོ་ཡ་ཝཱེ་ལགས། ཁྱེད་ཀྱི་ཁྲོ་གཏུམ་ཆེན་པོ་དེ་ཡེ་རུ་སཱ་ལེམ་གྱི་སྟེང་དུ་བླུགས་ཏེ་ཡེས་ར་ཨེལ་གྱི་མི་ལྷག་ལུས་ཐམས་ཅད་མེད་པར་མཛད་དམ་ཞེས་འོ་དོད་བོས་པ་ན། 9 ཁོང་གིས་ང་ལ་འདི་སྐད་དུ། ཡེས་ར་ཨེལ་དང་ཡ་ཧུ་དཱའི་ཁྱིམ་རྒྱུད་གཉིས་ཀྱི་ཉེས་པ་ཤིན་ཏུ་ཚབས་ཆེ་སྟེ། ཡུལ་ཁམས་སུ་ཁྲག་གིས་བཀང་ཞིང་གྲོང་ཁྱེར་ནང་དུ་ལོག་སྤྱོད་ཀྱིས་བཀང་བའོ། །གང་ལ་ཞེ་ན། དེ་རྣམས་ན་རེ། དཀོན་མཆོག་ཡ་ཝཱེ་ཡུལ་འདི་དང་བྲལ་ཟིན་ཏེ་ཁོང་གིས་ངེད་རྣམས་མི་མཐོང་ངོ་ཞེས་ཟེར་རོ། ། 10 དེ་བས། ངས་མིག་གིས་ལྟ་སྐྱོང་མི་བྱེད་ལ་སྙིང་རྗེ་ཡང་མི་བསྒོམ་ཏེ། ངས་ཁོ་ཚོས་སྤྱད་པའི་དོན་བཞིན་དུ་ཁོ་ཚོའི་སྟེང་དུ་ལན་འཇལ་ལོ་ཞེས་གསུངས། 11 དེ་ནས་ལུས་ལ་སོ་རས་སྲབ་བུ་གྱོན་པ་དང་རྐེད་པར་སྣག་བུམ་བཏགས་པའི་མི་དེས་འདི་ལྟར། ངས་ཁྱེད་ཀྱིས་ང་ལ་གནང་བའི་བཀའ་བཞིན་དུ་བསྒྲུབས་པ་ཡིན་ཞེས་ལན་ཞུས་སོ། །