1 དེ་ནས་བདག་ལ་རིང་ཐུང་འཇལ་བྱེད་ཀྱི་དབྱུག་པ་ལྟ་བུའི་འདམ་རྩྭ་ཞིག་གནང་སྟེ་འདི་སྐད་དུ། ཡར་ལོངས་དང་། དཀོན་མཆོག་གི་མཆོད་ཁང་དང་། མཆོད་ཁྲི། མཆོད་ཁང་ནང་གི་བསྙེན་བཀུར་བྱེད་མཁན་ཐམས་ཅད་ལ་ཚད་ཐིག་ལོངས་དང་། 2 མཆོད་ཁང་ཕྱིའི་ར་སྐོར་ལ་ཚད་ཐིག་མི་ལེན་པར་བསྐྱུར་བར་བྱའོ།། འདི་ནི་ཕྱི་ཕྱོགས་པ་རྣམས་ལ་གནང་བ་ཡིན་པས། དེ་དག་གིས་ཟླ་བ་ཞེ་གཉིས་རིང་ལ་གྲོང་ཁྱེར་དམ་པ་ལ་རྡོག་བརྫིས་གཏོང་བར་འགྱུར། 3 ངས་རང་ཉིད་ཀྱི་དཔང་པོ་གཉིས་ལ་དབང་གནང་ཞིང་དེ་གཉིས་ཀྱིས་རྩིད་རས་གྱོན་ནས་ཉིན་ཆིག་སྟོང་ཉིས་བརྒྱ་དྲུག་ཅུའི་རིང་ལ་ལུང་སྟོན་པར་ངེས་ཞེས་གསུངས་སོ།། 4 ཁོང་གཉིས་ནི་སྐྱུ་རུ་རའི་ཤིང་གཉིས་དང་སྒྲོན་སྟེགས་གཉིས་ཡིན་ལ། ས་གཞིའི་བདག་པོའི་དྲུང་དུ་འགྲེངས་ནས་བཞུགས་ཡོད། 5 གལ་ཏེ། སུ་ཞིག་གིས་ཁོང་གཉིས་ལ་གནོད་འཚེ་བྱ་འདོད་ན། དེ་གཉིས་ཀྱི་ཞལ་ནས་མེ་ཐོན་ཏེ་དགྲ་བོ་རྣམས་བསྲེགས་ནས་མེད་པར་བཟོ་བ་དང་། དེ་གཉིས་ལ་གནོད་འཚེ་བྱ་འདོད་མཁན་སུ་ཡིན་ཡང་དེ་བཞིན་དུ་གསོད་དགོས་སོ།། 6 མི་དེ་གཉིས་ལ་ལུང་བསྟན་བརྗོད་པའི་ཉིན་དེ་དག་གི་རིང་ལ། ནམ་མཁར་བཀའ་གནང་སྟེ་ཆར་བ་འགོག་པའི་དབང་ཡོད་པ་དང་། ཆུ་ནི་ཁྲག་ཏུ་བསྒྱུར་བའི་དབང་དང་། རང་ཉིད་ཀྱི་འདོད་མོས་བཞིན་རྟག་ཏུ་ཆག་སྒོ་སྣ་ཚོགས་ཀྱིས་འཇིག་རྟེན་ལ་རྒོལ་བའི་དབང་ཡང་ཡོད་དོ།།

7 ཁོང་གཉིས་ཀྱིས་བདེན་དཔང་བྱས་ཚར་བའི་རྗེས་སུ། ཞབས་མེད་པའི་དོང་ནས་ཡར་འོངས་པའི་གཅན་གཟན་གྱིས་ཁོང་གཉིས་ལ་འཐབ་ཅིང་། གཅན་གཟན་གྱིས་རྒྱལ་ཁ་བླངས་ཏེ་ཁོང་གཉིས་གསོད་པར་འགྱུར་རོ།། 8 དེ་གཉིས་ཀྱི་བེམ་པོ་ནི་གྲོང་ཁྱེར་ཆེན་པོའི་སྲང་ལམ་དུ་བསྐྱུར་བ་དང་། གྲོང་ཁྱེར་དེ་ལ་དོན་གྱི་སྙིང་པོ་ལྟར་ན་སཱ་དོམ་མམ། ཡང་ན་ཨེ་ཅིབ་ཅེས་འབོད་ཅིང་། དེ་ནི་ཁོང་གཉིས་ཀྱི་གཙོ་བོ་དེ་ཉིད་ཤིང་རྒྱ་གྲམ་གྱི་སྟེང་དུ་བརྡབས་སའི་གནས་ཡིན་ནོ།། 9 དེ་ནས་མི་སྡེ་སོ་སོ་དང་། ཚོ་པ་སོ་སོ། སྐད་རིགས་སོ་སོ། མི་རིགས་སོ་སོ་བཅས་ལས། མི་སྐོར་ཞིག་གིས་ཉིན་གསུམ་དང་ཕྱེད་ཀའི་རིང་ལ། ཁོང་གཉིས་ཀྱི་བེམ་པོ་ལ་བལྟས་ནས་བེམ་པོ་དུར་ལ་སྦ་རུ་མི་འཇུག 10 ཁོང་གཉིས་ཀྱི་ཕྱིར་ས་སྟེང་གི་མི་རྣམས་དགའ་ཞིང་སྤྲོ་བར་འགྱུར་བ་དང་ཕན་ཚུན་ལ་ལེགས་སྐྱེས་འབུལ་བར་འགྱུར་རོ།། རྒྱུ་མཚན་ནི་སྔར་ལུང་སྟོན་པ་དེ་གཉིས་ཀྱིས་ས་སྟེང་གི་མི་རྣམས་ལ་མནར་གཅོད་བཏང་བའི་ཕྱིར་རོ།།

11 དེ་ནས་ཉིན་གསུམ་དང་ཕྱེད་ཀ་འགོར་རྗེས། དཀོན་མཆོག་ལས་བྱུང་བའི་ཚེ་སྲོག་གི་དབུགས་ནི་ཁོང་གཉིས་ཀྱི་བེམ་པོའི་ནང་དུ་ཞུགས་པ་དང་ཁོང་གཉིས་ཡར་འགྲེངས་པ་ལ། མཐོང་མཁན་རྣམས་འཇིགས་སྐྲག་ཆེན་པོ་སྐྱེས་སོ།། 12 ནམ་མཁའི་ཞིང་ཁམས་ནས་སྐད་ཆེན་པོ་ཞིག་གྲགས་པ་ཁོང་གཉིས་ཀྱིས་ཐོས་ཤིང་། སྐད་དེས་ཁོང་གཉིས་ལ་འདི་སྐད་དུ། འདིར་ཡར་ཤོག་ཅིག་ཅེས་གསུངས་པ་ལ། ཁོང་གཉིས་སྤྲིན་གྱི་ནང་ནམ་མཁའི་ཞིང་ཁམས་སུ་ཕེབས་པ་དང་། ཁོང་གཉིས་ཀྱི་དགྲ་བོ་དག་གིས་ཀྱང་དོན་དེ་མཐོང་ངོ་།།

13 དུས་དེ་ཉིད་ལ། ས་འགུལ་ཆེན་པོ་བྱུང་སྟེ་གྲོང་ཁྱེར་གྱི་བཅུ་ཆའི་གཅིག་བརྡིབས་པར་གྱུར་པ་དང་མི་བདུན་སྟོང་ཤི་བས། མི་གཞན་ཐམས་ཅད་འཇིགས་ཏེ་ནམ་མཁའི་ཞིང་ཁམས་ཀྱི་དཀོན་མཆོག་ལ་བསྔགས་བརྗོད་བྱས་སོ།།

14 ཆག་སྒོ་གཉིས་པ་མཇུག་རྫོགས་པ་ཡིན། ལྟོས་དང་། ཆག་སྒོ་གསུམ་པ་མྱུར་དུ་འབྱུང་བར་འགྱུར་རོ།།

15 དེ་ནས་ཕོ་ཉ་བདུན་པས་དུང་བུས་པ་ལ། ནམ་མཁའི་ཞིང་ཁམས་སུ་སྐད་ཆེན་པོ་དག་གྲགས་ཏེ་འདི་སྐད་དུ། འཇིག་རྟེན་གྱི་རྒྱལ་སྲིད་ནི་བདག་ཅག་གི་གཙོ་བོ་དང་ཁོང་གི་མཱ་ཤི་ཀའི་རྒྱལ་སྲིད་དུ་གྱུར་ཅིང་། ཁོང་ནི་ཇི་སྲིད་བར་དུ་རྒྱལ་པོར་བཞུགས་པར་འགྱུར་ཞེས་གསུངས་སོ།། 16 དེ་ནས་དཀོན་མཆོག་གི་དྲུང་དུ་རང་རང་གི་ཁྲིར་བཞུགས་པའི་རྒན་པོ་ཉེར་བཞིས་ཁོང་ལ་ཕྱག་བཙལ་ནས་འདི་ལྟར་བསྟོད་བསྔགས་བརྗོད་པ་སྟེ། 17 ད་ལྟ་བཞུགས་ཤིང་སྔར་མཆིས་པའི་ཀུན་དབང་གཙོ་བོ་དཀོན་མཆོག་ལགས། ཁྱེད་ཀྱིས་ཉིད་ཀྱི་དབང་ཐང་ཆེན་པོ་བཞེས་ནས་རྒྱལ་པོར་བཞུགས་པས། ངེད་ཅག་གིས་ཁྱེད་ལ་བཀའ་དྲིན་ཞུའོ།། 18 ཕྱི་ཕྱོགས་པ་རྣམས་ཁོང་ཁྲོ་ལངས་པ་དང་། ཁྱེད་ཀྱི་ཐུགས་ཁྲོ་འཕོག་པའི་དུས་ཀྱང་སླེབས། གཤིན་པོ་རྣམས་ལ་ལེགས་ཉེས་ཀྱི་ཁྲིམས་ཐག་གཅོད་པའི་དུས་ཀྱང་སླེབས། ཁྱེད་ཀྱི་ཞབས་ཕྱི་ལུང་སྟོན་པ་དང་། དད་ལྡན་དམ་པ། ཁྱེད་ཀྱི་མཚན་ལ་གུས་ཤིང་འཇིགས་མཁན་བཅས་མཆོག་དམན་ཀུན་ལ་བྱ་དགའ་གནང་བའི་དུས་ཀྱང་སླེབས། ཁྱེད་ཀྱིས་འཇིག་རྟེན་ལ་གཏོར་བརླག་བྱེད་མཁན་ཐམས་ཅད་མེད་པར་བཟོ་བའི་དུས་ཀྱང་སླེབས་ཞེས་པའོ།།

19 སྐབས་དེར། དཀོན་མཆོག་གི་ནམ་མཁའི་ཞིང་ཁམས་ཀྱི་མཆོད་ཁང་གི་སྒོ་ཕྱེས་ཤིང་། ཁོང་གི་མཆོད་ཁང་ནང་དུ་ཁོང་ཉིད་ཀྱི་ཞལ་ཆད་ཀྱི་ཤུར་སྒམ་མངོན་ནོ།། དེ་ནས་གློག་དམར་འཁྱུག་པ་དང་། ལྡིར་སྒྲ་སྒྲོག་པ། འབྲུག་སྒྲ་གྲགས་པ། ས་འགུལ་བྱུང་བ། སེར་བ་དྲག་པོ་འབབ་པ་བཅས་བྱུང་ངོ་།།