1 ཡང་བདག་གིས་ཕོ་ཉ་ཞིག་ནམ་མཁའི་ཞིང་ཁམས་ནས་མར་ཕེབས་པ་མཐོང་ཞིང་། ཁོང་གི་ཕྱག་ཏུ་ཞབས་མེད་པའི་དོང་གི་ལྡེ་མིག་དང་ལྕགས་ཐག་ཆེན་པོ་ཞིག་བཟུང་ཡོད་དོ།། 2 ཁོང་གིས་འབྲུག་སྟེ་གནའ་བོའི་སྦྲུལ་དང་མིང་གཞན་ལ་བདུད་དང་སཱ་ཏན་ཞེས་ཟེར་བ་དེ་བཟུང་ནས་ལོ་ངོ་ཆིག་སྟོང་ལ་བཀྱིགས་ཤིང་། 3 རྒྱལ་ཁབ་རྣམས་སླར་ཡང་མི་བསླུ་བའི་ཕྱིར། ཞབས་མེད་པའི་དོང་ནང་དུ་གཡུགས་ཏེ། ལོ་ངོ་ཆིག་སྟོང་ལོང་བའི་བར་དུ་དོང་ཁ་བཅད་ཅིང་རྟགས་ཐམ་བརྒྱབས་སོ།། དེའི་རྗེས་སུ། བདུད་དེ་གནས་སྐབས་སུ་གློད་བཀྲོལ་གཏོང་དགོས་པ་ཡིན་ནོ།།

4 ཡང་བདག་གིས་བཞུགས་ཁྲི་འགའ་ཡོད་པ་མཐོང་ཞིང་། ཁྲིའི་སྟེང་དུ་བཞུགས་མཁན་རྣམས་ལ་ལེགས་ཉེས་ཀྱི་ཁྲིམས་ཐག་གཅོད་པའི་དབང་ཐང་གནང་ཡོད་དོ།། ཡང་བདག་གིས་སྐྱབས་མགོན་ཡེ་ཤུར་བདེན་དཔང་བྱས་པའི་རྐྱེན་དང་། དཀོན་མཆོག་གི་བཀའ་ཡི་ཆེད་དུ་མགོ་བོ་བཅད་པ་རྣམས་ཀྱི་རྣམ་ཤེས་དང་། གཅན་གཟན་དང་གཅན་གཟན་གྱི་གཟུགས་བརྙན་ལ་ཕྱག་འཚལ་མ་མྱོང་བ་དང༌། དཔྲལ་བ་དང་ལག་པའི་སྟེང་དུ་རྟགས་བརྒྱབ་མེད་པ་རྣམས་ཀྱི་རྣམ་ཤེས་ནི་མཐོང་ངོ་༎ དེ་དག་ཐམས་ཅད་སླར་གསོན་ཞིང་སྐྱབས་མགོན་མཱ་ཤི་ཀ་དང་ལྷན་དུ་ལོ་ངོ་ཆིག་སྟོང་གི་རིང་ལ་རྒྱལ་སྲིད་བསྐྱངས་པ་ཡིན། 5 འདི་ནི་སླར་གསོན་ཐེངས་དང་པོ་ཡིན་ལ། ལོ་ངོ་ཆིག་སྟོང་ལོང་བའི་བར་དུ། གཞན་རྣམས་ད་དུང་སླར་གསོན་པར་མ་གྱུར་ཏོ།། 6 སླར་གསོན་ཐེངས་དང་པོའི་ནང་སྐལ་བ་ལྡན་པ་རྣམས་ནི་བདེ་ཞིང་དམ་པ་ཡིན། དེ་རྣམས་ཀྱི་སྟེང་དུ་འཆི་བ་ཐེངས་གཉིས་པར་དབང་ཐང་མེད་ལ། འོན་ཀྱང་དེ་རྣམས་ནི་དཀོན་མཆོག་དང་སྐྱབས་མགོན་མཱ་ཤི་ཀའི་མཆོད་དཔོན་བྱེད་པར་མ་ཟད། སྐྱབས་མགོན་མཱ་ཤི་ཀ་དང་ལྷན་དུ་ལོ་ངོ་ཆིག་སྟོང་རིང་ལ་རྒྱལ་སྲིད་བསྐྱང་བར་འགྱུར་རོ།།

7 ལོ་ངོ་ཆིག་སྟོང་ལོངས་པའི་དུས་སུ། བདུད་སཱ་ཏན་བཙོན་ལས་གཏོང་ངེས་ཞིང་། 8 ཁོ་རང་ཕྱིར་ཐོན་ནས་ས་གཞིའི་ཕྱོགས་བཞིར་གནས་པའི་རྒྱལ་ཁབ་རྣམས་ཏེ། གཱོག་དང་མ་གཱོག་ཟེར་བ་བསླུས་ནས་འཐབ་འཁྲུག་རྒྱག་ཕྱིར་དེ་རྣམས་བསྡུ་བར་འགྱུར་ཞིང་། དེ་དག་གི་མི་གྲངས་ནི་མཚོ་འགྲམ་གྱི་བྱེ་མ་ལྟར་མང་ངོ་།། 9 དེ་རྣམས་ཡར་ཐོན་ཞིང་ས་གཞི་ཡོངས་ལ་ཁྱབ་སྟེ། དད་ལྡན་དམ་པ་རྣམས་ཀྱི་སྒར་དང་གཅེས་སུ་འཛིན་པའི་གྲོང་ཁྱེར་དེ་བསྐོར་བ་ལ། ནམ་མཁའ་ནས་མེ་ཆར་བབས་ཏེ། དེ་རྣམས་རྩ་བ་ནས་བསྲེག་པར་གྱུར་ཏོ།། 10 དེ་རྣམས་བསླུ་མཁན་བདུད་ནི་གཅན་གཟན་དང་ལུང་སྟོན་པ་རྫུས་མ་ཡོད་སའི་གནས་ཏེ། མུ་ཟི་འབར་བའི་མེ་མཚོའི་ནང་དུ་གཡུགས་ཤིང་། དེ་དག་གིས་ཉིན་མཚན་མེད་པར་ནམ་ཡང་མནར་གཅོད་མྱང་བར་འགྱུར་རོ།།

11 ཡང་བདག་གིས་མདོག་དཀར་པོ་ཅན་གྱི་བཞུགས་ཁྲི་ཆེན་པོ་ཞིག་དང་ཁྲིའི་སྟེང་དུ་བཞུགས་མཁན་ཡང་མཐོང་ཞིང་། གནམ་ས་གཉིས་ཁོང་གི་མདུན་ནས་བྲོས་ཤིང་རང་གི་གནས་མ་རྙེད་དོ།། 12 ཡང་བདག་གིས་གཤིན་པོ་རྣམས་མཐོང་ཞིང་། མཆོག་དམན་སུ་ཡིན་ཡང་ཐམས་ཅད་བཞུགས་ཁྲིའི་མདུན་དུ་ཡར་ལངས་ནས་བསྡད་ཡོད་ལ། གླེགས་བམ་དག་གི་ཁ་ཕྱེས་པར་མ་ཟད། ཡང་གླེགས་བམ་གཞན་ཞིག་གི་ཁ་ཕྱེས་ཤིང་། དེ་ནི་ཚེ་སྲོག་གི་གླེགས་བམ་ཡིན། གཤིན་པོ་ཐམས་ཅད་ལ་གླེགས་བམ་དེ་དག་གི་ནང་དུ་ཅི་ཞིག་བཀོད་ཡོད་པ་གཞིར་བཟུང་སྟེ། དེ་རྣམས་ཀྱིས་ཅི་བྱས་བཞིན་ལེགས་ཉེས་ཀྱི་ཁྲིམས་ཐག་བཅད་པའོ།། 13 དེའི་ཕྱིར། རྒྱ་མཚོས་མཚོ་ནང་གི་གཤིན་པོ་རྣམས་ཕྱིར་སྤྲད་པ་དང་། འཆི་བ་དང་གཤིན་པོའི་གནས་ཀྱིས་ཀྱང་དེའི་གཤིན་པོ་རྣམས་ཕྱིར་སྤྲད་ཅིང་། དེ་དག་ལ་རང་རང་གིས་ཅི་བྱས་བཞིན་ལེགས་ཉེས་ཀྱི་ཁྲིམས་ཐག་བཅད་པ་ཡིན། 14 དེ་ནས་འཆི་བ་དང་གཤིན་པོའི་གནས་དེ་ཡང་མེ་མཚོའི་ནང་དུ་གཡུགས་ཏེ། མེ་མཚོ་དེ་ནི་འཆི་བ་ཐེངས་གཉིས་པ་ཡིན། 15 སུ་དག་གི་མིང་དེ་ཚེ་སྲོག་གི་གླེགས་བམ་ནང་དུ་བཀོད་མེད་པ་ཡིན་ན། མི་དེ་དག་མེ་མཚོའི་ནང་དུ་གཡུགས་པའོ།།