1 Tifan nalmi nak-tunum kusal kipyo! God ami weng kala kuka-daa-lom boko-lomda: Nali kipso bomdila, kipni kaalap keyilile, kipta nami man kep-nip ke-lokomup o, kalsa kaali, nulmi diim kulu bombe kemin, nuli kukup mafak kaata, taba-lomdu numi angtiil so, aket tem so, kii yam-mafak-dakamin uyo, alik kulaalup unu, kewa atin tambal-kup bom ale, God ami atul kaata-kup suun-bam, kukup tambal kaata, suunkup kutal-fuku-bomduwa yo, kala-somla ko.

2 Kanola tunum malo ma ita bakayin-bamdip: Yi, Pol nikil iyo bomdip unang tunum imi kukup mafak kukaayila-tal-une-bam ale, imi Yesus ami lak duu-laamin uyo ku-mafak-dakaayila tal-une-bam, kasen-fakayin-bam, imi bung mafek mafek kaa, dakaayila-tal-une-bam kanun-umbip o, kalbip. Yale, nikil nuli kaa ma kanoya-sulup disa. Kemin, kibi kanubip imi weng kaa, weng san-kaamin disa; ibi ti numi aket-kup kuyila bomdiwa yo. 3 Nali weng kala bolop-yim-bamdi fatom kukaayon o, kalalila, bakabi dinim; kamosinim nami weng kala bokoya-lomdi: Nuli kipni aket-kup yesu no, kali kaali, ti faneng kemin, taan-laamin aa, tambal tiin kawong ilin aa, uta ma taba-lomdu nuta kipni aket kukaayinbup uyo loluya, kulaa lukuuyokomu disa. 4 Taitus ata weng kulii-tal bokop-na weng saniya, Ibi fan tiltam God ami kukup kaata-kup kutal-fukubip o, kalalila, kipni fiyaap kaata duubi. Kemin, kukup mafak alik iyo suunkup tal numi diim aben-umbu. Lale, kaata taba aket uluum awak uyo ma kup-ninsu disa; nali ti fiyaap aalap dukum-kup duubi no.

5 Siin kawu, nuli din Provins Masedonia bokon kawu un-sulup kaptam-ali, Nuli ma tiin-ilom fanang daalup yo, kalokin. Lale, uyo ma kanumsup disa. Disa ukol ulmi kukup mafak ukol ulmi akal alik akal alik uta tal numi diim abe-bulula, nuli tunum kusnum iso weng aal dikimin uyo bom-bulule, aket dukum-kup fukun-bam 6 kemsup. Lale, God ali tunum aket uluum kuluuba ayo dap-talalulala tiltam balili-kala-yaamin God kemin, ali Taitus ayo dabaala tal numi diim abamnala kulu, God ayo numi aket uluum ke-yimbu namti, yam-talalulala aket balili-kala-sulup. 7 Kemin, Taitus ayo tal nulmi diim abase kaata-kup, God ali talaba numi aket tem uyo yam-talalulala kawu, balili-kala-sulup disa; ipta Taitus ami aket fukunin ayo talalu kuteliwa, ayo aket balili-kalba-kup ata weng kalawuuli, kulii-talaya, kawu God ata numi aket tem uyo dotu kutiiyila numi aket kaa, balili-kala, ke-sulup. Taitus ata numi bokoya-lom: Korin kasel ili, Kwin, kaaso mafak kebup kawi! kala-lomdip imi aket fukunin uyo, Asuk Pol kaa atam-ilomdup, ami aket dukum-kup ma kolupla, aso nikil aket fanang maakup ke ilum o! kalbip kayi! nakaya kemin, nali fiyaap duumin kaali, atin ti akal ma kebi ko!

8 Nali utamiya, Nami kamasi sukon ma dola-lomdi titil tabin weng so, weng tem so, kiili kipni kuyilasii kaata, kipni aket tem uluum uyo kuyinbu kala, kalalila kemin, nakal ti aket uluum kaa kuluusii. Ya, kamala kala utamiya, Sukon kuuta taba-lomdu kibi aket uluum kuyasuu. Lale, bom bii ilinin tap kelin dinim o, kalbi kemin, nali sukon kaa kuyasii kaa, aket uluum ma kebi disa. 9 Nali kamala kalawaali fiyaap duubi. Yale, nali kipni aket uluum kuluu-silip kaami fiyaap kaa duubi disa. Siin kaali, nami weng kaata taba-lomdu ibi yam-mafak-daasuu daa; God ayo kipni aket uluum kaa kuyilala, ibi aket uluum ke-lomdip aket fal-siki-silip kaami fiyaap kaata duubi. 10 Kemin, unang tunum God ami aket fanang daa ban kebip kaami aket uluum dap-tiiyu kuuta, taba-lomdu unang tunum numi aket fal-sikiyu, God ami lak duulupla, alta numi fiyaap duu-bam talal-ila tabasa. Kemin, numi aket kaa, Nuli kanolup kaali, kwin, kaaso mafak kebup kawi! kala ifan o ye! kalokin dinim ke-lokomup. Ya, tawaal diim kaldaak-ami tunum imi kukup mafak kutal-fuku-bom aket uluum kaamin kaami kukup kaata tabamnula, unang tunum imi aket uyo fal-sikilin dinim ke-lomdip saaka-lom tiin kawong suunkup ilin dinim ke-lokomip kaali, kwin, kaaso mafak kebup kawi! kala ifan o ye! kalokomip. 11 Kemin, kipkal mafek mafek yak kipni diim abasuu kabak talalu utam-tamin! Kipni God ami aket fuku-bam ban kemin kaami aket uluum kaa kuyalala, kaata taba-lomdu kibi dong dakaayin-bulula, kukup tambal tambal kaata-kup kanum-solip kaali ti, aket uluum kuu tildak numi angtiil diim abu kala, kalalipla, ibi baan abiltap Pol ami bokoluwa, utama yi, Nuli ma ban kemin disa kelip yakak o, kalaliwa, kipni weng kaa nami alik daka-daa bokop-na-som ale, tunum ban kese ami weng mafak bakaan-bamdip, God ami atul suun-bam ke-bamdiwa, Pol ali numi fiyaap kaata duumak i! kalaliwa, mafek mafek mafak kalawuuli baan talalulup tambal-nuk o, kal-bomdipya, ibi tunum ban kese ayo titil-foko-lom lekbi dabak-mosip. Kemin, alik kipni kukup kaa kanu-bam talalsip kaa ti kukup tambal dukum kemin, nali itamila, Ibi dotu-lomdip ban dinim kelip kala, kalbi no.

12 Kulaa faneng, nali siin kawu kipni sukon ma dola kuyasii. Ya, nali tunum kaa ban kese aso, ami aptum kusal imi ban keyase iso, alep kiimi aket kaata fukun-somdila dolasii disa. Nami aket fukunbi kaali, dola kuyila ibi talalu utamiwa yi, God ayo Korin kasel iyo numi kukup uyo utamiwa yi, Pol ami aket-kup fukun-bomdip kanumsip o, keba kala, kalin o, kalalila, kabak-ata sukon ma kaali dola kuyasii no. 13 Kipni kukup kaa kanumsip kaata, taba-lomdu numi aket uluum uyo dak-daayu daak aba-lom balili-kup kalasuu ko.

Kanola numi aket tem kaa balili-kala-yaamin kaata-kup kemsup disa. Utamupla yi, Alik ipta taba-lom Taitus ami aket uyo dong dakaan-bilipla, ami aket kaa balili-kala, fiyaap duula tala kala kalaluwa, nokol ti fiyaap dukum-kup duu-bam kebup. 14 Siin kaa, nali kipni tong ayo Taitus ami diim kawu bakamsi Taitus ami din unse kaa, ibi itamala yi, Korin kasel kalawiimi kukup kaali, faneng Pol ami weng bokop-nase tap kaata, kutal-fukusip kala kalala, ayo tal bokop-naya kaata, nali fatom ma kuluulin disa kebi. Kemin, nali suunkup weng tifan kaata-kup bakaya-laabi kemin, kanola ipni tong kaa Taitus ami bokolasi kaakal ti tifaneng tiltam tabasu. 15 Taitus ayo din kipni itamala, kipni aket fukunin uyo, Yi! ali tal yim-bak-saan-bamda katiiyon o, kala talaba ema yo? kala-lomdip ibi ami atam suun-daa-lom, wulwaal tap-tap-ke-bam am kaa koliwa, bomda weng uyo alik kipni bakayin-balaya, weng kaa weng san-kaam-solip. Kemin, Taitus ali tal kipni kanonsip kaami aket kabak-ata fukun-bamdala, kipni olen-yilin aket kaali, tiltam dukuma talabu. 16 Kemin, kamala kuluwaa nali utamila, Weng kula dolni kalawuuli ibi dotu yikik-kutal-fukulokomip kala, kala-somdila, nali kipni fiyaap duubi no.