1 Basa de Yesus kokolak seluk no sara pake lololek nae, 2 “Manetualain parenda-koasan naa, sama leo manek esa tao feta kabin soa-neu ana toun. 3 Neu raole rala feta ena, boe ma ana nadenu atan fo neu nafada basa hatahorir neni nokek kara nae, ‘Mai leo, te feta nae mulai ia ena.’ Tehuu hatahorir raa ta nau mai.

4 Boe ma atar raa lenggu fali de rafada manek. Manek namanene nala naa, boe ma nadenu ata laen nara nae, ‘Ei miu mafada basa hatahorir fo mai leo, huu sadia ala feta ena. Au tati sapi ena, ma dode-nasu malada-malada ena. Madenu sara mai raꞌa feta leo, huu basan neni sadiak ia ena.’ 5 Atar raa reu rafada talo naa. Tehuu hatahori neni nokek kara raa ta nau tao matak. Ketuk reni osi reu, ketuk reni mamana ue-osan reu, 6 ma ketuk humu rala manek atan nara fo tuni-ndeni sara losa mate.

7 Manek namanene nala naa, boe ma namanasa nalan seli. De Ana nadenu soldadun nara reu rakanisa basa hatahorir mana rakanisa ndia atan nara. Basa de soldadur raa hotu heni kota naa losa natetu no daer.

8 Boe ma manek naa nanggou ndia ata laen nara ma nafada nae, ‘Feta kabin neni sadiak ena, tehuu hatahorir fo au okek kara ena, ta randaa tungga au fetang. 9 Hatematak ia ei kalua meni dala ramer miu moke see a mesan, fo ei matonggo mia sara rai naa.’ 10 Boe ma atar raa reni dala ramer reu. Ara roo hatahori noꞌuk ka fo ratonggo sara ruma naa, de reni feta kabin reu. Hambu hatahori neulauk kara, ma hambu hatahori manggarauk mana mai tao rasofe mamana feta naa.

11 Basa de manek naa maso neni mamana feta neu, de mete ndule ndia fuin nara. Boe ma ana mete-nita fuik esa ta pake bua-loꞌa feta.* Hatahori malelak ketuk rae, manek ia sadia nala bua-loꞌa feta ena, fee hatahorir sudi ruma bee a mai. Tehuu hatahori kisek ia, ta nau pake bua-loꞌa naa. No dalak naa, ana nakadadaek manek naa no anan. 12 De manek natanen nae, ‘Tia-lai, ee! Tao hata de o maso ia mai ta pake bua-loꞌa feta?’ Tehuu hatahori naa panggananaa namanggonggoak kana. 13 Boe ma manek parenda atan nara nae, ‘Futu hatahori ia lima-ein nara fo pirun neni dea naa neu, mita fo ana buꞌi ma doidoso nai mamana makiuk naa.’✡ Mateos 8:12; 25:30; Lukas 13:28

14 Leo naak oo, Manetualain noke hatahori noꞌuk ka boe, tehuu Ana here nala kada hidak ka fo dadi neu Ndia hatahorin.”

15 Hatahori Farisir ramanene rala Yesus kokolak talo naa, boe ma ara rala harak fo rae ike ma rakasasaꞌek salak neu Yesus. 16 De ara radenu sira ana nunin nara sama-sama ro hatahori numa Herodes partei politik mai, fo reu rakaseseluk dedeꞌak ro Yesus. Ara rakadedemak kana rae, “Papa Meser! Ai bubuluk Papa dalen ndoos. Papa ta mana pepeko-lelekok ma ta mete matak. Papa soa fee nenorik laꞌe-neu Manetualain Dedeꞌa-kokolan no tetuk. 17 Hatematak ia ai nau matane dedeꞌak esa. Tungga ita anggama Yahudi hohoro-lalanen, ndondoon naa ita muste bae bea fee man-parenda Roma mane ina-huun, do taa?”

18 Tehuu Yesus bubuluk nae, ara rae ike Ndia naa ena fo Ndia kokolak laban man-parenda Roma. Boe ma Ana naselu nae, “Memak, ei hatahori mana dea-matak! Tao hata de ei mae ike Au menik dedeꞌak naa? 19 Matudu sudik doi lilo fulak esa fo hatahorir paken bae bea mai Au dei!” De ara ratudu doi lilo fulak esa neun.

20 Boe ma Ana natane sara nae, “Ia, see nggambar ia? Ma ia, see naden ia?”

21 Ara raselu rae, “Naa keser, man-parenda Roma mane ina-huun naa.”

Boe ma Yesus nafada sara nae, “Dadi mete ma talo naa, ei miu fee man-parenda hata fo man-parenda haak. Ma fee Manetualain hata fo Manetualain haak.”

22 Ara ramanene rala Ana naselu talo naa, boe ma basa sara heran bali-bali, huu Ana kokolak ndaa, na. Huu naa de ara ta bisa ike sana. Boe ma ara laꞌo elan leo.

23 Numa naa oo, hambu hatahorir ruma partei Saduki mai boe. Hatahorir maruma partei Saduki mai ia fee nenorik rae, hatahori mates ta nasoda fali numa mamaten mai. Faik naa ara oo, sangga dalak fo rae ike Yesus boe. Huu naa de ara mai rakaseseluk dedeꞌak roon rae,✡ Nedenuk kara Tutuin 23:8 24 “Papa Meser! Baꞌi Musa surak ela fee ita dala-hadak ia ena nae, mete ma touk esa mate laꞌo ela saon, tehuu anak taa, na, touk naa fadin muste sao nala ina falu naa, mita fo ana fee tititi-nonosik soa-neu kaꞌan mana matek naa ena.✡ Tui Seluk laꞌe-neu Dala Masodak 25:5 25 Memak lele uluk baꞌi Musa fee nenorik talo naa, tehuu hatematak ia, ai nau matane talo ia: hambu touk hitu kaꞌa-fadik kara. Uluk sao, tehuu maten ma ta laꞌo ela anak. Boe ma fadin mana tunggan, sao nasafali ina falu naa. 26 Ta dook ka, ana oo mate boe, ma anak taa. Leo naak oo no fadik katelun boe; ana sao nala ina falu naa, tehuu ana oo mate boe, ma ta laꞌo ela anak. Talo naa nakandoo losa fadi muri anak oo, maten boe. 27 Basa boe ma ina falu naa maten.

28 Dadi hatematak ia, ai nau matane talo ia: inak naa sao nita no touk hitu ena. Neu ko neu dae-bafok fai mateꞌen, Manetualain nasoda falik hatahori mates sara, inak naa dadi neu see saon, ou?”

29 Boe ma Yesus naselu nae, “Mete ma ei matane talo naa, na, ei sala moꞌok ia ena! Ei ta malela Manetualain Susuran isin. Ma ei oo ta bubuluk Ndia koasan ta neni babanggak boe! 30 Ndoon talo ia. Neu Manetualain nasoda falik hatahori mates sara, ta hambu dedeꞌa sasaok soa-neu sara ena, sama leo Ndia atan nara marai nusa tetuk do inggu temak. 31 Ma Au oo nau kokolak laꞌe-neu hatahori mates bisa nasoda fali numa mamaten mai, do taa boe. Nai baꞌi Musa susuran hambu tutuik naꞌu ai ana neni hotuk, tehuu ta kade sana. Numa tutuik naa mai, ita bubuluk tae, hatahori mates bisa nasoda fali numa mamaten mai. Numa naa Manetualain nafada baꞌi Musa nae,

Ita bubuluk tae, neu Manetualain kokolak talo naa, baꞌir raa mate dook ka ena. Tehuu Manetualain nafada nakandoo nae, Ndia bei dadi neu sira Lamatuan. Huu naa de ita bubuluk tae, sira samanen nara bei rasoda rakandoo, leo mae ara mate dook ka ena. Dadi leo mae hatahori mate, tehuu ana nasoda fali numa mamaten mai. Kada hatahori masodak ndia mana nakaluku-nakatele neu Manetualain, ta hatahori mates, hetu?!”✡ Kalua numa Masir mai 3:6

33 Hatahori Sadukir raa ramanene rala Yesus fee nenorik talo naa, boe ma ara ta bisa bala hata-hata bali. Tehuu hatahori noꞌuk kara raa heran bali-bali, de kokolak rae, “Awii! Hatahori ia nenorin ta neni babanggak, ee!”

34 Neu hatahori Farisir ramanene rala rae, Yesus bala nala hatahori Saduki raa ena, boe ma ara rakabua rame-rame fo rae rakaseseluk dedeꞌak roon. 35 Sira mana malela anggaman esa nae ike sudik Yesus nae, 36 “Papa Meser! Au nau atane talo ia: ita hohoro-lalanen, ma anggama parendan, noꞌun seli. Numa basa parendar fo maruma baꞌi Musa mai naa, bee ndia nenenin lenak?”

37 Boe ma Yesus naselu nae, “Parenda fo nenenin lenak nai Manetualain Susura Malalaon naa nae talo ia:

38 Parenda naa, nenenin lena basan, ma ta neni babanggak! 39 Ma hambu parenda kaduan nae leo ia:

40 Parenda kaduak kara ia, ndia huuk numa baꞌi Musa hohoro-lalanen ma Manetualain mana toꞌu dedeꞌan nara nenorin lalaꞌen. Ta bisa dadi, hatahori tungga parenda laen nara, mete ma ana ta tungga nakahuluk parenda moꞌo kaduak kara iar.”✡ Lukas 10:25-28

41 Faik naa, hatahori Farisir bei rakabua numa naa, boe ma Yesus natane nasafali sara nae, 42 “Manetualain helu-bartaa numa lele uluk mai ena nae nadenu Karistus mai fo tao nasoi-nasoda Ndia hatahorin nara. Tungga ei duduꞌam, Karistus naa, see tititi-nonosin?”

Boe ma ara raselu rae, “Ndia naa, mane Dauk tititi-nonosin.”

43 Yesus kokolak seluk nae, “Mete ma talo naa, na, hata de Manetualain Dula-dale Malalaon nafada mane Dauk fo noke Karistus naa, ‘Lamatuak’? Sama leo Dauk surak ena nae,

45 Numa susurak naa mai, ita bisa bubuluk tae, mane Dauk mesa kana noke Karistus naa, ‘Lamatuak’. Dadi mete ma hatahori rae Karistus naa, kada mane Dauk tititi-nonosin, naa bei ta dai! Ndia oo dadi neu mane Dauk Lamatuan boe!”

46 Ara ramanene rala Yesus kokolan talo naa, boe ma hatahori Farisir raa kada ramanggonggoak kana, ma ta hambu hatahori esa bisa naselu Yesus boe na. Huu naa de mulai numa faik naa mai oo, ara ramataꞌu ratatane boe, ma ta rambarani rae ike sudik Yesus bali.