1 Efelayime zunui ta ɠɛni Lama, Sɔfe ɠoʋii ma, Efelayime ɠize yooi zu. Daaseigi ɠɛni ga Ɛlekana. É ɠɛni ga Yelɔɠame ná-doun zunui, kɛwola ɠɛni ga Tɔɠu ná-doun zunui Eliyu. Tɔɠu naa, kɛɛɠɛ ɠɛni ga Sufe. 2 Anza felegɔ ɠa Ɛlekana seini. Ma mɔungi laa ɠɛni ga Ane, felesiɛi laa ɠɛ ga Penina, dointi ti ɠɛni Penina ʋɛ, kɛlɛ ta la ɠɛni Ane ʋɛ.

3 Kona-o-kona Ɛlekana ɓena zeɠe ná-taazuʋɛ, é li Silo, é nɔkɔ Ɠɔoɠɔ GALAGI wu, Fai-Pɛ-Maliɠii. Eli ná-doun zunu felegɔiti, Ɠɔfeni ta Finease, naati ti ɠɛni ga Ɠɔoɠɔ GALAGI ná-zalaɠa ɠula nuiti Silo taazuʋɛ. 4 Zalaɠai ɠula laa ɠilagila, Ɛlekana ʋɛ, é ɓena ma zuai ta ɠaaɠwɛ Penina ta ná-dointi ba. 5 Kɛlɛ Ane nɔnɔi ɓena wɔɔlɔ ga seizu felegɔ, tɔɔzei Ane wola nɛɛni Ɛlekana ʋɛ, anɛɛ ni GALA ge la ɠɛni doun veeni naa ʋɛ. 6 Sinianzai Penina la ɠɛni looɠosu ga gaazu unfe seɠeai, mazɔlɔɔ Ɠɔoɠɔ GALAGI la ɠɛni doun veeni bɛ. 7 Kona-o-kona, naa nɔ ɠa ti ɠɛni daawu. Penina ɗa Ane yiiɓɔlɔ, tɛɛ laa ɠilagila Ɠɔoɠɔ GALAGI zei ʋɛlɛi wu.

Ti yɛni naazu konagi ta, Ane tɔɔzei ga é ɗa wɔlɔ, é ɗa ɠɛlɛ daami wo fai ʋa. 8 Sinigi Ɛlekana gaazaɠani, é ɠɛ ma: «Ane, lee vaa zu è wɔlɔzu, è ɗa ɠɛlɛ daamianigi ʋa? Toɠa ɠale, è ɓɔɠɔ maawɔinzu? Nà ɠila gè la vizɔni doun puugɔ ʋa è ʋɛ ɓaa?»

9 Ti daamii wogai ma, ti ɓɔɔle Silo, Ane wuzeɠeni, é li zalaɠa ɠulazu ʋelei, zalaɠa ɠula nui Eli ɠɛni zeini ná-kpɔkpɔgi ɠa, Ɠɔoɠɔ GALAGI zei ʋɛlɛi laaʋɛ. 10 Tɔɔzei ziiɓɔlɔa ɠɛni de koozu gola, é Ɠɔoɠɔ GALAGI maanɛɛnɛni, é ɗa wɔlɔ gola. 11 É minazeɠegi woni, é ɠɛ: «Ee, Ɠɔoɠɔ GALAGI, Fai-Pɛ-Maliɠii! Ni ɗa nà-kpɔlɔi ʋɛtɛna, è gàazumaawɔinɠa, ni è la yeemani mà, ni ɗa doun zunu veena bɛ̀, nà fe è ʋɛ, Ɠɔoɠɔ GALAGI, sii ma voloi pɛ su, kpeka la vɔɔɠua nɔundeɠai ta kpɛlɛi ʋa eyɛsu pɛ.»

12 Tɛi Ane lɛbini Ɠɔoɠɔ GALAGI valizu, Eli ɠɛni dakɔlɔgiti ɲiikpi pelei zumɔsu. 13 É ɠɛni naa lakɔlɔgiti kaazu, ti ɗa ɲiikpi, kɛlɛ nu la ɠɛni woo nɔpɛ mɛnisu, mazɔlɔɔ Ane ɠɛni GALA falizu yiimaʋɛ. Eli ɠisiɛni ga dɔɔi ɠa é Ane zogai. 14 Eli ɠɛni Ane ma: «Ɗa ɠulazu niima ɠɛʋelei zu yeelɛ? Li, è ɗa-lɔɔi ɠula ɠaazu ada ɠili pele.»

15 Ane gooɠaaʋoteni, é ɠɛ ma: «Ɓa-o, màliɠii, dɔɔ lɛi é ʋa ɠɛ bà, gè la dɔɔ ɓɔleni, ɓaa gaazulati gani nɔpɛ. Kɛlɛ zìi ɠa é ɓɔlɔzu kòozu. Nà ʋɛ ga gè nà-ziiɓɔlɔi lɛ ga Ɠɔoɠɔ GALAGI. 16 Mina pɛ̀tɛ ga anzanu ɲakai, ziiɓɔlɔ lateʋegai ɠa é kɛa gè lɛbiga nà-GALA falii zu.»

17 Eli gooɠaaʋoteni, é ɠɛ ma: «Ni naa ʋe, li, ziilɛigi ɠɛ è ʋɛ, Izelayɛle ná-GALAGI è wooɠaaʋote, nii è falia ma, é naa ve è ya!»

18 Ane Eli wooɠaaʋoteni, é ɠɛ ma: «Ɗa-nuɓɔɠɔlai zoo é yɛ bà.» Naa woga ʋoluma Ane ʋɛ, é liini, é daamii wo, gaazuʋɛ zei ga pagɔ. 19 Poluma zobui, kpidiɓidigi, Ɛlekana ta ná-pɛlɛyeɠei pɛ ti liini, ti nɔkɔ Ɠɔoɠɔ GALAGI wu, naa ʋoluma, ti ɠaleni ma, ti li ta-laazu Lama.

Ɛlekana ɓɛdɛni anzai Ane ma, Ɠɔoɠɔ GALAGI ge naa maawɔinɠaani. 20 Ane kogi zeɠeni naama ɠonagi nɔ laawu, é zunu loun zɔlɔɔ, é ɠɛ ma: «Doin nii laa ɠa ga Samiyɛle, mazɔlɔɔ gè faliʋɛ Ɠɔoɠɔ GALAGI ma.»

21 Naa ʋoluma, Ɛlekana ta ná-pɛlɛyeɠei pɛ ti ɠɛni liizu mɔnɔ Silo, ga ti naama zalaɠai ɠula, nii ta ɗa kula kona-o-kona, Ɠɔoɠɔ GALAGI ʋɛ, ta é ná-minazeɠegi laazeeli, nii é kɛɛni. 22 Kɛlɛ Ane la ɠɛni ʋilɛni ti ʋolu naama ziɛi zu, é ɠɛni sinigi ma: «Nà naa maaɓɔunsu, eyɛsu doin laaɠula ɲiimii ʋa, naazu nà lii la niina Silo, gè fe Ɠɔoɠɔ GALAGI ʋɛ, nii a kɛ doin tɛi ge yɛ Ɠɔoɠɔ GALAGI ya, sii ma voloi pɛ su.»

23 Sinigi Ɛlekana ɠɛni ma: «Kɛ eɠɛʋelei è devea la, naa maaɓɔun eyɛsu è doin laaɠula ɲiimii ʋa. Ɠɔoɠɔ GALAGI ge kɛ, nii é minazeɠea la, naa laazeeli.» Ane yɛni ná, é ɗa ɲiimii ve doungoi ya, eyɛsu naa laaɠula ɲiimii ʋa.

24 Doin laaɠulaai ma ɲiimii ʋa, dee Ane seɠeni, é lii la Silo, anɛɛ ni doungoi lɔiɗa ɠɛni de dɛ. É kona saʋagɔ nikɛ zinɛi zeɠeni, é ʋɛɛ ɓulu vukɔi kilo ʋuusaʋagɔ (30) ʋa, ta kɔlɔ woole ɠila daavegai ga dɔɔi. 25 Ti nikɛi ʋaani, ti kula ga zalaɠai, naa ʋoluma, ti liini ga doungoi Eli ʋɔ. 26 Ane ɠɛni ma: «Ee, màliɠii, è-ɠi ka naa zu nɛi ɓaa, ga anzanui ta ʋaani, é ɗa Ɠɔoɠɔ GALAGI vali è ɠobaʋɛ? GALA ka kàazu, eɠɛʋelei è vulua la ga ɠite, gaamazu nà ɠɛni de. 27 Wɛlɛ, doin nii ɠa gè ɠɛni falizu GALA ma. Tama Ɠɔoɠɔ GALAGI fea zèa. 28 Nà ɓalaagi, nà pɔ ga gè kaliva Ɠɔoɠɔ GALAGI ma, toɠa ga nɔnɔ sii ma voloi pɛ su.» Ti nɔkɔni ná Ɠɔoɠɔ GALAGI wu.