1 Amɔn nuiti ta-masagi Naɠase ʋaani ga ná-kɔɔʋɛbɛi, é Yaɓeese taai zei kɛlɛ su, nii é Galaade yooi zu. Yaɓeese nuiti ti ɠɛni Naɠase ma: «Ade minazeɠe bo yɔɠɔzu, gá ɠolo è ʋɛ.»

2 Kɛlɛ Naɠase ti wooɠaaʋoteni, ga: «Ni wa pɔ ade minazeɠe bo yɔɠɔzu, kɛni wo va bu, gè wo yeezazu ʋele ɠaazuɠɛzɛgiti kula su, wo ɠilagilagi pɛ, gè unfegi ʋu Izelayɛle nuiti pɛ gaazu ga naa.»

3 Yaɓeese ɠɛwolaiti ti ɠɛni Naɠase ma: «Dɔɔɠɔ ɠila ku ve gi ʋɛ, gi keelaiti teʋe Izelayɛle yooi zu ná pɛ. Ni nu nɔpɛ ge la zɔlɔɔni, nii a kpɔba ve gi ʋɛ, gá ɓɔɠɔ ve è ya naazu.»

4 Keelaiti ti zeelini Giɓea, Sayile ná-taazuʋɛ, ti naama vai pɛ bo taazuʋɛ nui pɛ ma. Bɛbɛi pɛ ge wɔlɔni. 5 Naa zolooni nɔ Sayile ɗa zeɠe kpalagaʋɛ ga ná-nikɛiti. É gaazaɠagi woni, é ɠɛ ma: «Lee ɠa kɛai ga nuɓusɛiti ti wɔlɔzu?» Ti Yaɓeese nuiti daawooi laazeelini ma.

6 Naama wooiti mɛnigai ma Sayile ʋɛ, GALA Zɛnvui yeini ma, ziiɠaawanani ga gola. 7 Sayile nikɛ felegɔ zoni, é ti ʋaa, é suɓulukpulu, é fe keelaiti zea, é ti leʋe Izelayɛle yooi zu ná pɛ, é vali ti ma ga: «Nu nɔpɛ é la kɛɛni, é ʋa li kɔɔɠɔzuʋɛ Sayile ta Samiyɛle ʋolu, zekana ma nui ná-nikɛiti ta ɓulukpulu da.» GALA maaɲɛigi yeini Izelayɛle nuiti pɛ ma, ti lua gola, ti ɠulani, ti ɗa li ná, eɠɛ nu ɠila nɔ. 8 Sayile ti ɠaaluni Ɓeezɛke. Izelayɛle wolodamai zɔiti ti ɠɛni ga nu waaunsaʋagɔ (300 000), Zuda wolodamaiti ti ɠɛ ga nu waaʋuusaʋagɔ (30 000).

9 Ti ɠɛni Yaɓeese ɠeelaiti ma: «À li, wo ɠɛ Yaɓeese nuiti ma, Galaade yooi zu: ‹Lina, wa unmɔɔgi zɔlɔɔ, siɛgi zu foloi gaalɔsu da.› » Keelaiti ti liini, ti naama wooi wo Yaɓeese nuiti ma, é ɠɛni ga koozunɛɛ wola ti ʋɛ. 10 Ti ɠɛni Amɔn nuiti ma: «Lina gá ɓɔɠɔ ve wo ya, nii nɔpɛ wo pɔ, wo naa ɠɛ ga giye.»

11 Poluma voloi, Sayile ná-kɔɔʋɛbɛi ɠaaɠwɛɛni su ga saʋagɔ. Ti lɔɔni Amɔn nuiti ta-ɠɔɔlaɠai zu ga gosui, ti yɛni naati paazu, eyɛsu folo gaalɔgai. Zɔiti ti la ɠɛni zaani, naati ti vazani ga gilagila, ti tanɔpɛ ti la ɠɛni ʋolu fele.

12 Izelayɛle nuiti ti ɠɛni Samiyɛle ma: «Ɓɛni ka ti ɠɛni ɠɛɛzu ma: ‹Sayile la masadai ɠɛa gi unda?› À ti ve gi ya, gi ti ʋaa.»

13 Kɛlɛ Sayile ɠɛni ti ma: «À mina nu nɔpɛ paa za ɠɛɠala foloi, mazɔlɔɔ Ɠɔoɠɔ GALAGI fɔnifaamai vea ade ʋɛ za, Izelayɛle nuiti.»

14 Samiyɛle ɠɛni Izelayɛle nuiti ma: «À ʋa, ade li Gilegale, ade laa la Sayile ná-masadai maazu, ade maaɓakpa.» 15 Bɛbɛi pɛ ge ɠaalɛɛni ba Gilegale. Ti bo Ɠɔoɠɔ GALAGI ɠaazu, ti maaɓakpa, ga Sayile ɠa ga masagi. Ti ziilɛi zalaɠaiti kulani Ɠɔoɠɔ GALAGI ʋɛ. Sayile ta Izelayɛle nuiti pɛ ti wola ɠoozunɛɛni.