1 Filiseti nuiti ti ta-ɠɔɔʋɛbɛi pɛ gaalɛɛni ba Afɛke, Izelayɛle ná-kɔɔlaɠai ʋu ziɛ ungi ɠobaʋɛ, nii é Zizeleyɛle. 2 Filiseti ɠundiɠiiti ti maaɓuɠani ga ta-nu ungilagiti, ta ta-nu waagilagiti. Davide ta ná-kɔɔɠɔ nuiti ti ʋilɛni masagi Akise ʋolu, ti ɠɛni ʋoluzu ʋelei. 3 Filiseti ɠundiɠiiti ti ɠɛni ma: «Ɓɛni ka ga Eɓulu nui niiti?» Akise ti wooɠaaʋoteni, é ɠɛ ti ma: «Davide ʋe, Izelayɛle masagi Sayile ná-botiɠɛ nui, é folo mɔinmɔin, ta kona mɔinmɔin kɛa kòba, gè la dɛ sɔ kaani, nii nu a peelala su, é lɔɔzei paa yee ma, é zeeli za ma.»

4 Kɛlɛ Filiseti ɠundiɠiiti ti yiiɠaawanani Akise ma, ti ɠɛ ma: «Zunui nii ɠaaɠale ma, ʋɛ è seiɗai ná. É mina yei gi ʋolu kɔɔɠɔzuʋɛ, é mina ʋa ɠɛɛzu ga gi zili nui kɔɔɠɔ ziɛgi zu. Nii la ʋaazu maliɠii ɛnɛkɛsu, kɛni é gá-nuɓusɛi ta leʋe naa ʋɔ.» 5 Davide nii nɔ laade ti ɠɛni guyei loozu bɛ, ti ɗa kuai wo, ti ɗa ɠɛ ma:

6 Akise Davide lolini, é ɠɛ ma: «Gè ɠonaa Ɠɔoɠɔ GALAGI ma, nii é vulua, ga ɗa ga sɔle nu, nɛɛʋɛ bɛ̀ ga gè ɗa è ɠa kòba, ade ɗa lɔ, ade ɗa ɠula, ada kɔɔʋɛbɛi, mazɔlɔɔ kaipa è ʋaani kòba, gè la dɛ è-zɔ kaani, è yɛ ga su za zeelia. Kɛlɛ, è maayo ge la Filiseti ɠundiɠiiti bɛ. 7 Naa ɠa é ba, ɠale ma, è li, ziilɛigi ɠɛ è ʋɛ, nii a kɛ Filiseti ɠundiɠiiti wanama vaa mina ɠɛ.»

8 Davide ɠɛni Akise ma: «Lee ɠa gè kɛa mu, leeni ɠa è kaai bà, nɛ̀i gè ga ɗa-wotiɠɛ nui, é lɔɔzei pàa yee ma è ɠoba, é zeeli za ma, nii a kɛ gè mina li, gè ʋa kɔɔi ɠɔ màliɠii zili nuiti daalɔɠɔma?»

9 Akise Davide wooɠaaʋoteni, é ɠɛ ma: «Gè kwɛɛni ga è nɛɛʋɛ bɛ̀, eɠɛ GALA ná-geezuɠeela, kɛlɛ Filiseti ɠundiɠiiti ka ti ɠɛai mà: ‹É la ʋilɛsu gi ʋolu kɔɔɠɔzuʋɛ.› 10 Naa ɠa é ba, à wuzeɠe lina sobuzobu, ɗa-o, ɗa-ɠalamɔin ná-botiɠɛ nuiti-yo, niiti ti ʋilɛgai è ʋolu, à wuzeɠe sobui, woza zu a ɠɛɛna kala, wo ɗa li.»

11 Poluma voloi sobuzobui, Davide ta ná-kɔɔɠɔ nuiti ti wuzeɠeni fala, ti ɠale ma Filiseti nuiti ta-yooi zu. Filiseti nuiti ti liini Zizeleyɛle.