1 Nu ɲakai ta ɠɛni náʋɛ, daa ga Seeɓa, é ɠɛni ga Ɓɛnzamɛn nui, Ɓikeli ná-doun zunui. É puʋugi vɛɛni, é wooɠula, é ɠɛ ma: «Faa la ade yɔɠɔzu ada Davide, ade la ɓɔni faa nɔpɛ ma ada Izayi ná-doun zunui. Adɛi de ga Izelayɛle nuiti, ɛsɛ pɛ ge li ná-pɛlɛ wu!» 2 Izelayɛle nui zɔiti pɛ ti zeɠeni Davide ʋa, ti ʋilɛ Ɓikeli ná-doun zunui Seeɓa ʋolu. Kɛni Zuda nuiti nɔ ɠa ti yɛni ta-masagi ʋa, ti yɛni polu, ti zeɠe Zuludɛn ziɛlaʋɛ, eyɛsu ti zeeli Zeeluzalɛme.

3 Davide zeeliai ma masa pɛlɛi wu, é anza puugɔiti gaiziɛni, niiti ti la vuluni ga zɔiti kɛʋele, niiti é ti yɛni ga ti ɗa wɛlɛ koii ma. É ti ʋuuni pɛlɛ ɠila bu, ʋɛ ná makɛgai ga pagɔ. É ɠɛni ti ɓɛdɛma vaiti pɛ gaaɠulazu ba, kɛlɛ é la mɔ ɠɛni laani ti ɠoba pɛ. Naati ti yɛni pɛlɛ laaɠulugai wu eyɛsu ti zaa voloi zeeli, ti ta-eteai ziɛ eɠɛ poanzaiti.

4 Masagi ɠɛni Amasa ma: «Gè folo saʋagɔ vea è ya, è Zuda ɠɔɔʋɛbɛi pɛ toli bɛ̀, wo ʋa ʋɛ.» 5 Amasa masagi ná-devei laazeelini, kɛlɛ kui leʋeni, nii masagi toni.

6 Davide ɠɛni Aɓisayi ma: «Ɓikeli ná-doun zunui Seeɓa ɲɔuɗa, é leʋe Aɓesalɔme ʋa niina. Liina mu, é lo masa makɛ kɔɔʋɛbɛi luɠɔ, wo ʋilɛ polu, é mina lɔɔɠuzu zɔlɔɔ taa wolai ta zu, nii siɠigi ma, ʋɛ ade yee la zeelia ma ná.» 7 Aɓisayi liini ga Zoaɓe ná-kɔɔʋɛbɛi, ta Kelɛte nuiti, naa ʋɛɛ Peelɛte geleiti ba, ta kɔɔɠuluɓa ɠiteiti. Ti zeɠeni Zeeluzalɛme, ti li Ɓikeli ná-doun zunui Seeɓa zosuʋɛ.

8 Ti zeeliai ma kɔtu wolai ma, nii é Gaɓaɠɔn, ti Amasa ɠaani, é ɗa ʋa ga ti ʋɔ pelei. Zoaɓe saamaɠiligi ta ɠilini ná-seɠei maazu, boɠa zɔkpɔi ɠɛni ma laɠagi zu, giliai saamaɠiligi ʋa. Siɛgi zu Zoaɓe ɠɛni maaɓuɠazu la Amasa ʋa, boɠai looni. 9 Zoaɓe ɠɛni Amasa ma: «È ɠɛdɛgɛ, kɛ̀ɛloun?» É Amasa ɓɛlɛi zoni ga zeezai, é nɛɛnɛ ga daaʋɛ komagai. 10 Amasa la ɠɛni boɠa zɔkpɔi ɠaani ga pagɔ, nii é ɠɛni Zoaɓe ɠɔʋɛi ɠa. Naa zɛba é boɠai lɔ kogi zu, é koozu zɔɔlaiti pu zooi ma. Amasa zaani gaamanɔ, Zoaɓe la mɔ ɠɛni boɠai ʋuuni ba, ná ʋa ɠɛ fele. Naa ʋoluma Zoaɓe ta kɛɛɠɛloin Aɓisayi ti pele zoni, ti ʋilɛ Ɓikeli ná-doun zunui Seeɓa ɠaiziɛ vai ma.

11 Zoaɓe ná-kɔɔɠɔ nui gila ge ɠɛni loni Amasa ma ʋoomai ɠobaʋɛ, é ɗa ɠɛ ma: «Zɔiti kpein ti Zoaɓe ta Davide ʋɔ, naati ti ʋilɛ Zoaɓe ʋolu.» 12 Amasa maaɠɔkɔni ma ɲamai zu pele ɠɛzɛi zu. Kɔɔɠɔ nui naa kaai ma ga kɔɔʋɛbɛi pɛ ka ʋaazu, ti ɗa lo, é Amasa ma ʋoomai zeɠeni pelei zu, é da kpalagi ta zu, é seɠei ʋɛɛ ma. 13 Poomai zeɠeai ma pelei zu, kɔɔɠɔ nuiti pɛ ti leʋeni, ti ʋilɛ Zoaɓe ʋolu, Ɓikeli ná-doun zunui Seeɓa ɠaiziɛ vai ma.

14 Ti Izelayɛle yooi ná pɛ suɓizɛni, ti li ga Aɓɛle-Ɓɛte-Maaka ʋele. Ɓeel nuiti pɛ ti ɠaalɛɛni ba, ti ʋilɛ Zoaɓe ʋolu. 15 Zoaɓe ta ná-kɔɔʋɛbɛi ti zeelini Aɓɛle-Ɓɛte-Maaka taai ma, ti sei kɛlɛ su. Ti siɠigi loni taai laalɔɠɔma, é zeeli taai ma ziɠigi ɠɛɠala. Nuɓusɛi niiti ti ɠɛni Zoaɓe ʋolu, naati ti tɔɔzeini ga siɠigi wuɠula, nii a kɛ é ʋa ɠolo.

16 Anzanui ta ɠɛni ná, é ga ɠima nu, naa yɛni taazuʋɛ, é ɓain, é ɠɛ ma: «À woilo dɛɛ! À bo Zoaɓe ma, é soma é maaɓuɠa ʋɛ, nà pɔ gè ɓɔɛ pɔ.» 17 Zoaɓe maaɓuɠani, anzanui ɠɛ ma: «Ɗa ɠa è ga Zoaɓe?» É ɠɛ ma: «Eyei, nà ʋe.» Anzanui ɠɛ ma: «Woilo gòo ma, nɛ̀i gè ga ɗa-wotiɠɛ nui.» Zoaɓe ɠɛ ma: «Gòilogɛ.» 18 Anzanui ɠɛ ma: «Mɔungi ti ɠɛni ɠɛɛzu ma: ‹À li, wo gaazaɠa bo Aɓɛle, naama vai ɠa ɠaaɠula ba.› 19 Gá naama nuiti saama, niiti ti yiilɛiɗai, ta ti ga wooɠɛɠila nuiti Izelayɛle. Ɗa ma, ɗɔun, ɗa pɔ è taai naa ɠoloɠolo, nii é Izelayɛle ga taa ɓiin gola! Lee vaa zu è pɔ è Ɠɔoɠɔ GALAGI nɔnɔi ɠoloɠolo?»

20 Zoaɓe ɠɛni ma: «Naa li poun! Gè la ʋaani taa ɠoloɠolo faa ma, ɓaa gè ani nɔpɛ suɠoloɠolo. 21 Naama vaa laade. Kɛlɛ Efelayime ɠize yooi zu zunui ta ɠa ná, daa ga Seeɓa, Ɓikeli ná-doun zunui ʋe. Naa ɠa é wuzeɠeai masagi Davide laalɔɠɔma. À tɔ ɠila nɔ ve zèa, gè maaɠooza taai ʋa.» Anzanui ɠɛ Zoaɓe ma: «Naa zolooga! Gá nɔungi ʋili niina è ma siɠigi ʋolu ʋelei.»

22 Anzanui liini, é ɓɔɛ seiɲɔɠɔiti pɔ ga ɠimalai. Ti Ɓikeli ná-doun zunui Seeɓa nɔungi leʋeni ba, ti pili Zoaɓe ma. Zoaɓe puʋugi vɛɛni, ɛsɛ pɛ ge vaza, ti zeɠe siɠigi ma, ti ɠale ma ta-ʋɛlɛiti bu. Zoaɓe ɠaleni ma masagi ʋɔ bɛ Zeeluzalɛme.

23 Zoaɓe ɠɛni Izelayɛle ɠɔɔʋɛbɛiti pɛ unda. Yeɠɔyada ná-doun zunui Ɓenaya ɠa é ɠɛni Kelɛte nuiti ta Peelɛte nuiti unda. 24 Adɔlame ɠa é ɠɛni pɔlɔtɔ wotiiti unda. Ayilude ná-doun zunui Zɔzafate ɠɛni ga sɛʋɛ makɛ nui. 25 Seva ɠɛni ga sɛʋɛ ɠɛ nui, Sadɔke ta Aɓiataal ti ɠɛ ga zalaɠa ɠula nuiti. 26 Yayiil nui Iila ɠɛni ɓalaa ga zalaɠa ɠula nui Davide ʋɛ.