GALA Sɛʋɛi Ɛgezɔde 20

GALA ná-tɔ puugɔiti

(Tɔ Sɛʋɛi Velesiɛi 5:6-21)

1 GALA ge niima wooiti kpein boni, é ɠɛ ma: 2 Nà ga Ɠɔoɠɔ GALAGI, ɗa-ƓALAGI, nii é è ɠulani Ezipete yooi ʋa, duɔla ʋɛlɛi wu.

3 Gala kiligaa ti mina ɠɛ è ʋɛ nɔ̀un polu.

4 Mina ani maaniini saɠa ɓɔɠɔ ʋɛ ɲɛgɛlɛin, ta ani nɔpɛ baaɠulaba, niiti ti geeɠɔlɔgi zu, ɓaa niiti ti zooi ma, ɓaa niiti ti ziɛiti bu zooi wu. 5 Mina nɔkɔ ti wu ɲɛgɛlɛin, mina ti lɛbi ɲɛgɛlɛin, mazɔlɔɔ nà, Ɠɔoɠɔ GALAGI, ɗa-ƓALAGI, nà ga GALAGI toloai, nii a ɗa ɠɛɛɠɛiti ta-vaa ɲɔi ʋotokula ti-lointi ma, eyɛsu é zeeli yamanii zaʋasiɛi ta naanisiɛi ma, niiti ti màayoseɠezu ʋɛ. 6 Kɛlɛ nà ɗa wooɠɛɠiladai ɠɛ, eyɛsu é zeeli yamani waagilasiɛi (1 000) ma, naati bɛ, niiti ti nɛ̀ɛzu ʋɛ, ta ti nà-deveiti sosu.

7 Mina Ɠɔoɠɔ GALAGI, ɗa-ƓALAGI laaseigi wo fuun ɲɛgɛlɛin, mazɔlɔɔ Ɠɔoɠɔ GALAGI ɠa naama nui leve ga sɔba nu, nii é daaseigi wosu fuun.

8 Ɠizɛ dooɠo foloi zu, è maaɲɛ. 9 Ɗa botii ɠɛ folo lɔzitai zu, è ɗa-wotii kpein kɛ. 10 Kɛlɛ folo lɔfelasiɛi ɠa ga Ɠɔoɠɔ GALAGI, ɗa-ƓALAGI, ná-dooɠo foloi. Mina boti nɔpɛ kɛ ma, ɗa-o, è-loun zunuiti-yo, è-loun anzanuiti-yo, ɗa-wotiɠɛ zunuiti-yo, ɗa-wotiɠɛ anzanuiti-yo, ɗa-logania-o, ta wɛɛinti niiti ti zeini è ɠɔɠɔma. 11 Mazɔlɔɔ folo lɔzita laawu Ɠɔoɠɔ GALAGI geeɠɔlɔgi ɓɛtɛni, ta zooi, ta kpoloɗɛi, ta ti zu aniiti kpein, é looɠoni foloi lɔfelasiɛi ma. Naa ɠa é ba, Ɠɔoɠɔ GALAGI tuya looni dooɠo foloi ma, é makɛ ɓɔɠɔ ʋɛ.

12 È-ɠɛɛ lɛbi ta è-lee, naa ɠa a kɛ è-zii ma voloiti suɠooza, naama yooi zu nii Ɠɔoɠɔ GALAGI, ɗa-ƓALAGI feezu è ʋɛ.

13 Mina nu ʋaa ɲɛgɛlɛin.

14 Mina wɛɛnziɛ bo ɲɛgɛlɛin.

15 Mina unma wo ɲɛgɛlɛin.

16 Mina zɛɛ zeele woo wo ɲɛgɛlɛin è-zeiɲɔɠɔi laalɔɠɔma.

17 Mina ɠaazuɠula ɲɛgɛlɛin è-zeiɲɔɠɔi ná-pɛlɛi ʋa. Mina ɠaazuɠula ɲɛgɛlɛin è-zeiɲɔɠɔi anzai ʋa, ɓaa ná-botiɠɛ zunui, ɓaa ná-botiɠɛ anzanui, ɓaa ná-nikɛi, ɓaa ná-soovalegi, ɓaa ani nɔpɛ é ga è-zeiɲɔɠɔi nɔnɔ.

Moize, GALA daa vaa wo nui

(Tɔ Sɛʋɛi Velesiɛi 5:23-33)

18 Nuɓusɛiti kpein ti tona kpunɛ tugiti mɛnini, ti mainmainti kaa, ti puʋugi wooi mɛni, ti gizei ɠa abuzogi ba. Nuɓusɛiti ti naati kaai ma, ti zasuɓalini, ti lo ɠoozama. 19 Ti ɠɛni Moize ma: «Ɗa ɓɔɠɔi è ɗa ɓɔɛ gi ʋɔ, gá woilo ma, kɛlɛ GALA ge mina ɓɔɛ gi ʋɔ, gá ʋa za.» 20 Moize ɠɛni nuɓusɛiti ma: «À mina lua, mazɔlɔɔ GALA paaʋɛ ga é wo ʋoluɠula, naa ɠa a kɛ, wo lua ba, wo mina koto ɠɛ.» 21 Nuɓusɛiti ti ɠɛni loni ɠoozama. Kɛlɛ Moize maaɓuɠani tonaɓiingi ʋa, ʋɛ GALA ge ɠɛni ná.

Tɔgi é lo zalaɠa ɠulazuʋɛ ʋa

22 Ɠɔoɠɔ GALAGI ɠɛni Moize ma: Ʋele ɠa ɗa ɓɔɛ la Izelayɛle nuiti pɔ: Wo pɛtɛgɛ ga zɛ̀gɛ geeɠɔlɔgi zu, gè ɓɔɛ wo ʋɔ. 23 À mina galagaa ɓɛtɛ ɓɔɠɔ ʋɛ ga walii ɓaa zanugiti, wo ʋa ti ʋokɔɠɔ mà. À mina naa ta ɠɛ ɓɔɠɔ ʋɛ ɲɛgɛlɛin. 24 Wa zalaɠa ɠulazuʋɛ lo bɛ̀ ga pɔlɔi, nii wa gala zalaɠaiti ta ziilɛi zalaɠaiti kula maazu, ga wa-ʋaalagiti ta wa-nikɛiti. Ʋɛ nɔpɛ gè ɠulazu ná kɛlɛma, nà ʋa wo ʋɔ bɛ, ga gè tuya loo wo ʋɛ. 25 Ni wa zalaɠa ɠulazuʋɛ lona bɛ̀ ga kɔtui, à mina to ga kɔtu zaɠaai, mazɔlɔɔ wa wa-zɔɔlaiti pɛɛna kɔtui ʋa, wa kɔzɔ. 26 À mina nà-zalaɠa ɠulazuʋɛ lo, wo ʋa nu lɛɛzuʋɛ ɓɛtɛ ba, nu a ɠɛna lɛa ga, kabei mina ɠula kɛlɛma.