1 Ɗa seɠe ʋɛlɛ ɲadegai ɓɛtɛ ga tanda puugɔ, ga geze ʋagɔi kpaliai, ta geze ɓiinii, ta ma ɓɔigi, ta ma ɓɔi sɔsɔgi. Ɗa suʋu ga seeluɓɛinti ma votoi. 2 Tanda ɠilagi zakpai ɠa ɠɛ ga mɛtɛlɛ puugɔ maazu naanigɔ (14), kogi ɠɛ ga mɛtɛlɛ felegɔ. Kɔɠɔgi ɠa ɠɛ ga ani ɠila nɔ tandaiti kpein faa zu. 3 Tanda lɔɔlugɔiti ta zei ɓɔɠɔ la, zɔ lɔɔlugɔiti ɓalaa ta zei ɓɔɠɔ la. 4 Ɗa galu ɓiiniiti giliɠili tandai ma ɓɔsu mɔungi laamaʋɛ. Ɗa kɛ ɠana nɔ ga tandai ma ɓɔsu velesiɛi laamaʋɛ. 5 Ɗa galu ʋuulɔɔlugɔ (50) ɠiliɠili tandai ma ɓɔsu mɔungi laamaʋɛ ʋa, è galu ʋuulɔɔlugɔ (50) ɠiliɠili tandai ma ɓɔsu velesiɛi laamaʋɛ ʋa. Naama ɠaluiti ta zoloo ɓɔɠɔ ma ga felefele. 6 Ɗa zanu kala puulɔɔlugɔ (50) ɓɛtɛ, è tandai ma ɓɔsuiti giliɠili ɓɔɠɔ ʋa ga tiye. Seɠe ʋɛlɛ ɲadegai ɠa ɠɛ ga ani ɠila kpe nɔ.

7 Ɗa boli leɠa landa puugɔ maazu ɠila (11) kpɛtɛ, ti ʋɛɛ seɠe ʋɛlɛ ɲadegai ɠɔma. 8 Tanda ɠilagi zakpai ɠa ɠɛ ga mɛtɛlɛ puugɔ maazu lɔɔlugɔ (15), kogi ɠɛ ga mɛtɛlɛ felegɔ. Kɔɠɔgi ɠa ɠɛ ga ani ɠila nɔ tanda puugɔ maazu ɠilagiti (11) bɛ. 9 Ɗa tanda lɔɔlugɔiti giliɠili ɓɔɠɔ ʋa, ta è zɔ lɔzitaiti giliɠili ɓɔɠɔ ʋa. Ɗa tandai lɔzitasiɛi ʋɛɛ su fele seɠe ʋɛlɛi laaʋɛ. 10 Ɗa galu ʋuulɔɔlugɔ (50) ɠiliɠili tandai ma ɓɔsu mɔungi laamaʋɛ, ɗa galu ʋuulɔɔlugɔ (50) ɓalaa giliɠili tandai ma ɓɔsu velesiɛi laamaʋɛ. 11 Ɗa kɔlu ɓɔi kala puulɔɔlugɔ (50) ɓɛtɛ, è kalagiti dɔ galuiti unsu. Ɗa tanda ma ɓɔsuiti sei ɓɔɠɔ la ɠana, ti ɠɛ ga ani ɠila nɔ. 12 Seɠe ʋɛlɛi ma landaiti ta ʋaazu ʋooʋazu ma ga ta tukpɛ, naa ɠa yei, é ʋu ga seɠe ʋɛlɛ ɲadegai ʋolu ʋelei. 13 Mɛtɛlɛ ɠaaɠwɛsui é yɛsu kakamaʋɛ gilazu ʋelei, ta mɛtɛlɛ ɠaaɠwɛsui é yɛsu zɔɔla ʋelei, niiti ti yɛsu ʋolu seɠe ʋɛlɛi zakpai ma, naati ka ti yeizu seɠe ʋɛlɛ ɲadegai ɠakama felegɔiti, ti ʋɛɛ ma. 14 Ɗa baala sinɛ ɠɔlɔiti kpɛtɛ ga pɛɛmazeɠei, toai ga ma ɓɔigi, seɠe ʋɛlɛi vaa zu, è nuni ɠɔlɔiti ma ʋɛɛmazeɠei ʋɛɛ maazu.

15 Ɗa kpɛdɛgiti kpɛtɛ seɠe ʋɛlɛ ɲadegai ʋɛ ga akasia wulu zɛʋɛiti, ti lɔɔɓadɔ seɠe ʋɛlɛi zuzo fai zu. 16 Kpɛdɛgi zɔligɔi ɠa ɠɛ ga mɛtɛlɛ lɔɔlugɔ, kogi ɠɛ ga mɛtɛlɛ ɠaaɠwɛsui. 17 Kpɛdɛgi ɠilagilagi pɛ kpadɔzuʋɛ ɠaa ɠa zoba ma wulu zɛʋɛ felegɔi ʋa. Zekana ɗa kɛ la seɠe ʋɛlɛ ɲadegai ma ɓɛdɛgiti kpein ba. 18 Ɗa kpɛdɛ ʋuufelegɔ (20) ɓɛtɛ seɠe ʋɛlɛ ɲadegai ʋɛ, ti ɠɛɛzu nu yeezazu ʋelei. 19 Ɗa dabu ʋuunaanigɔiti (40) kpɛtɛ ga walii, ti ʋa la kpɛdɛ ʋuufelegɔiti (20) gilagilagi wu, kpadɔzu felegɔiti bɛ. 20 Ɗa kpɛdɛ ʋuufelegɔ (20) ɓɛtɛ ɓalaa seɠe ʋɛlɛ ɲadegai ʋɛ, nu ɠɔʋɛzu ʋelei. 21 Ɗa dabu ʋuunaanigɔiti (40) kpɛtɛ ɓalaa ga walii, ti ʋa la kpɛdɛ ʋuufelegɔiti (20) gilagilagi wu, kpadɔzu felegɔiti bɛ. 22 Ɗa kpɛdɛ dɔzita ɓɛtɛ seɠe ʋɛlɛ ɲadegai ɓogaʋɛ, folo liizu ʋelei. 23 Ɗa kpɛdɛ felegɔ ɓɛtɛ seɠe ʋɛlɛ ɲadegai ma zoko felegɔiti bɛ, ti kpogaʋɛ. 24 Ta ɠili kpɛdɛgi zɔiti ba, é zo buuʋɛ, é zeeli bala mɔungi ma ungaʋɛ. Ʋele ɠana a ɠɛ la ga ti felegɔ, ti ʋilɛgai soko felegɔiti su. 25 Kpɛdɛ dɔsaʋa ɠa naazu, é ɠɛɛzu seɠe ʋɛlɛ ɲadegai ɓogaʋɛ, é ʋɛɛ ta-labu puugɔ maazu lɔzitaiti (16) ba, ti ɓɛtɛai ga walii, kpɛdɛ gila dabu felegɔ.

26 Ɗa gulu zɔkpɔ lɔɔlugɔ ɓɛtɛ kpɛdɛgiti bɛ ga akasia wului, ti ɓesa seɠe ʋɛlɛ ɲadegai ɠakamaʋɛ ɠilagi, 27 ta gulu zɔkpɔ lɔɔlugɔ seɠe ʋɛlɛ ɲadegai ɠakamaʋɛ zɔɔla ʋelei ma ɓɛdɛgiti bɛ, ta gulu zɔkpɔ lɔɔlugɔ seɠe ʋɛlɛ ɲadegai ɓogaʋɛ ma ɓɛdɛgiti bɛ, folo liizu ʋelei. 28 Zaamazu wulu zɔkpɔi ɠa kpɛdɛgiti maaleʋe, é zo kwɛgi ma, é li zɔɔla ʋelei. 29 Ɗa zanugi ziɛ kpɛdɛgiti ma. Ɗa ta-ʋalaiti kpɛtɛ ga zanugi, ga gulu zɔkpɔiti ti lɔ ti zu. Ɗa zanugi ziɛ naama wulu zɔkpɔiti ma. 30 Ɗa seɠe ʋɛlɛ ɲadegai lo, eɠɛʋelei ma ɠazaʋigi lɛɛni la ga ɗe gizei ma.

31 Ɗa seɠe zuɠooza golai ɓɛtɛ ga geze ɓiinii, ta ma ɓɔigi, ta ma ɓɔi sɔsɔgi, ta geze ʋagɔi kpaliai. Ɗa suʋu ga seeluɓɛinti ma votoi. 32 Toɠa zɛlɛ ga zanu kalagiti ti tɔkpala naanigɔiti ba, ti ɓɛtɛai ga akasia wului, zanugi ziaai ti ma, ti ɓadɔai dabu naanigɔiti ma, niiti ti ɓɛtɛai ga walii. 33 Ɗa seɠe zuɠooza golai zɛlɛ kalagiti buuʋɛ. Seɠe zuɠooza golai ɠoozu ʋelei, miná ɠa ɗa zeele woo ɠesui lɛ ná. Seɠe zuɠooza golai ɠa ɠɛ wo ʋɛ ga ada ɲadegai ta ada ɲadega wolai ti yeeɠaaɠwɛɛzuʋɛ. 34 Ɗa zeele woo ɠesui laaɠulu, ada ɲadega wolai ʋɔ bɛ. 35 Ɗa taɓalii ʋilɛ seɠe zuɠooza golai ɠakalaʋɛ, seɠe ʋɛlɛ ɲadegai wu, lɛkpɛmaʋɛ nu ɠɔʋɛzuʋɛ. Fitina zei anii ɠɛ taɓalii letemaʋɛ, lɛkpɛmaʋɛ nu yeezazuʋɛ.

36 Ɗa seɠe zuɠooza golai taɠili kpɛtɛ seɠe ʋɛlɛi laaʋɛ ga geze ɓiinii, ta ma ɓɔigi, ta ma ɓɔi sɔsɔgi, ta geze ʋagɔi kpaliai, é ɠɛ ga seɠe zuʋuai. 37 Toɠa zɛlɛ ga zanu kalagiti ti tɔkpala lɔɔlugɔiti ba, ti ɓɛtɛai ga akasia wului, zanugi ziaai ti ma. Ɗa kɔlu ɓɔigi ɠaawun, é ɠɛ ti ʋɛ ga ta-labu lɔɔlugɔiti.