1 Eteai pɛ ge ɠɛni zii woo ɠilagi wosu, ti ɠɛni ɓɔɛzu ga woo ɠilagi. 2 Ti zeɠeni ga folo ɠulazu ʋelei, ti nɛmɛ wola ɠila kaani Sineyaal yooi zu, miná ɠa ti zeini ná. 3 Ti ɠɛni ɓɔɠɔ ma: «Ade li, ade ɓilikiiti doɠa, ade ti ɠala abui zu.» Ɓilikii ɠɛni ti ʋɛ ga pɛlɛ lo kɔtui, ti ɗa sei ga managi. 4 Ti ɠɛni ɓɔɠɔ ma mɔnɔ: «Ade li, de taai ta lo ɓɔɠɔ ʋɛ, ta pɛlɛ ɠaaɠoozagi nii nɔungi a zei geei ʋa. Ade ɓɔɠɔ lɔɠɔ ɠula, naa ɠa a kɛ ade mina vaza zooi ɠa ná pɛ.»

5 Ɠɔoɠɔ GALAGI yeini taai ʋɛtɛsu ta pɛlɛ ɠaaɠoozagi, nii nuiti ti ɠɛni tosu. 6 Ɠɔoɠɔ GALAGI ɠɛni ma: «Wɛlɛ, ta ga zii ɠilagi nɔ, woo ɠilagi nɔ ɠa é ti-la. Ni ta tɔɔzeina ɠani, ani nɔpɛ ge la mɔ pele ɓesaga ti luɠɔ naa ɠɛɛ vai zu, nii a ɠɛ ti ɠisu. 7 Ade yei, de li, de ti-laawooi zupu, naa ɠa a kɛ, ti mina ɓɔɠɔ laawooiti mɛni.»

8 Ɠɔoɠɔ GALAGI ti zuvazani, ti maaɠooza ná ʋa, ti li eteai zu ná pɛ. Ti looɠoni taai lo fai ʋa. 9 Naa ɠa é kɛai taai naa laasei pɛai ga Ɓaɓɛle,* Ɓaɓɛle: daaseigi nii ti maaɓuɠaai ʋa ta «faazupui.» mazɔlɔɔ miná ɠa Ɠɔoɠɔ GALAGI eteai kpein gooi zupuai ná. Ná ɠa Ɠɔoɠɔ GALAGI ti zuvazani ná, ti li eteai zu ná kpein.

10 Sɛme mavofodai ɠaa: Ziɛve golai leʋegai ma, é ɠɛ ga kona felegɔ, Sɛme ná-konagi ɠɛni ga ungila (100), é Aalepakesade zɔlɔɔni. 11 Aalepakesade zɔlɔɔga ʋoluma, Sɛme kona undɔɔlugɔ (500) ɠili kɛɛni. É doun zunui ta doun anzanui taɠiligaa zɔlɔɔni.

12 Aalepakesade ná-konagi ɠɛai ma ga puusaʋagɔ maazu lɔɔlugɔ (35), é Seela zɔlɔɔni. 13 Seela zɔlɔɔga ʋoluma, Aalepakesade kona unnaanigɔ kona saʋagɔ (403) ɠili kɛɛni. É doun zunui ta doun anzanui taɠiligaa zɔlɔɔni.

14 Seela ná-konagi ɠɛai ma ga puusaʋagɔ (30), é Eɓɛɛl zɔlɔɔni. 15 Eɓɛɛl zɔlɔɔga ʋoluma, Seela kona unnaanigɔ kona saʋagɔ (403) ɠili kɛɛni. É doun zunui ta doun anzanui taɠiligaa zɔlɔɔni.

16 Eɓɛɛl ná-konagi ɠɛai ma ga puusaʋagɔ maazu naanigɔ (34), é Peelɛge zɔlɔɔni. 17 Peelɛge zɔlɔɔga ʋoluma, Eɓɛɛl kona unnaanigɔ puusaʋagɔ (430) ɠili kɛɛni. É doun zunui ta doun anzanui taɠiligaa zɔlɔɔni.

18 Peelɛge ná-konagi ɠɛai ma ga puusaʋagɔ (30), é Leyu zɔlɔɔni. 19 Leyu zɔlɔɔga ʋoluma, Peelɛge kona unfelegɔ kona taaʋuugɔ (209) ɠili kɛɛni. É doun zunui ta doun anzanui taɠiligaa zɔlɔɔni.

20 Leyu ná-konagi ɠɛai ma ga puusaʋagɔ maazu felegɔ (32), é Seluge zɔlɔɔni. 21 Seluge zɔlɔɔga ʋoluma, Leyu kona unfelegɔ kona dɔfela (207) ɠili kɛɛni. É doun zunui ta doun anzanui taɠiligaa zɔlɔɔni.

22 Seluge ná-konagi ɠɛai ma ga puusaʋagɔ (30), é Naɠɔɔl zɔlɔɔni. 23 Naɠɔɔl zɔlɔɔga ʋoluma, Seluge kona unfelegɔ (200) ɠili kɛɛni. É doun zunui ta doun anzanui taɠiligaa zɔlɔɔni.

24 Naɠɔɔl ná-konagi ɠɛai ma ga puufelegɔ maazu taaʋuugɔ (29), é Teela zɔlɔɔni. 25 Teela zɔlɔɔga ʋoluma, Naɠɔɔl kona ungila puugɔ maazu taaʋuugɔ (119) ɠili kɛɛni. É doun zunui ta doun anzanui taɠiligaa zɔlɔɔni.

26 Teela ná-konagi ɠɛai ma ga puulɔfela (70), é Aɓalameni sɔlɔɔni ta Naɠɔɔl ta Ɠalan.

27 Teela mavofodai ɠaa: Teela Aɓalameni sɔlɔɔni ta Naɠɔɔl, ta Ɠalan. Ɠalan Lɔte zɔlɔɔni. 28 Ɠalan zaani kɛɛɠɛ Teela luɠɔ, sɔlɔɔ zooi zu, ʋɛ ná ga Uul, Kaledee yooi zu. 29 Aɓalame ta Naɠɔɔl ti anzaiti seini. Aɓalame anzai laaseigi ɠɛni ga Salayi. Naɠɔɔl anzai laaseigi ɠɛ ga Mileka. Mileka ta Yisekani ti-ɠɛɛ ɠɛni ga Ɠalan. 30 Salayi maaloni, doun la ɠɛni bɛ ɲɛgɛlɛin. 31 Teela ná-doun zunui Aɓalame zeɠeni, ta ná-doun loin Lɔte, Ɠalan ná-doun zunui, ta Salayi, ná-doin Aɓalame anzai. Ti ɠulani ʋɔɔma Uul ʋa Kaledee yooi zu, ti li Kanaan yooi zu ʋele. Ti zeelini Ɠalan, ti zei ná.

32 Teela zii ma voloi kpein ge ɠɛni ga kona unfelegɔ kona dɔɔlugɔ (205), naa ʋolu Teela zaani Ɠalan.