1 Zakɔɓe ɠaazuwuzeɠeni, é wɛlɛ, é Ezawu ɠa, é ɗa ʋa, zunu unnaanigɔ (400) polu. É dointi gaaɠwɛɛni Leani zɔɠɔzu ta Lasɛle ta botiɠɛ anzanu felegɔiti. 2 É botiɠɛ anzanuiti ta ti-lointi toni ʋelelaʋɛ ti untuɠɔ, naa ʋolu Lea ta ná-dointi, gaaɓelasu ɠɛ ga Lasɛle ta Zozɛfe. 3 Tɔ ɓɔɠɔi leʋeni ti luɠɔ ʋelei, é nɔkɔni zooi ma ná zeizu ɠɛ lɔfela, eyɛsu é zeeli diɛ Ezawu ɠobaʋɛ. 4 Ezawu ɓizɛni, é daaɠomi, é velevele ga kɔgi, é nɛɛnɛ. Ti felegɔ ti tɔɔzeini ga wɔlɔa. 5 Naa ʋolu, Ezawu ɠaazuwuzeɠeni, é anzanuiti ka ta dointi, é ɠɛ ma: «Ɓɛni kanu ti è yeema loni munu?» Zakɔɓe gooɠaaʋoteni, é ɠɛ ma: «Dointi kana, niiti GALA ge ti veai ná-zaalai zu ɗa-wotiɠɛ nui ya.» 6 Botiɠɛ anzanuiti ti maaɓuɠani, tiya-o, ti-lointi-yo, ti nɔkɔ. 7 Lea ta ná-dointi ti maaɓuɠani ɓalaa, ti nɔkɔ. Naa ʋolu Zozɛfe ta Lasɛle ti maaɓuɠani, ti nɔkɔ.

8 Ezawu ɠɛni ma: «Leeni ɠa è kɛɛzu ga nuuma ʋɛbɛiti, gi ɠomigai ga tiye?» Zakɔɓe gooɠaaʋoteni, é ɠɛ ma: «Gè è zabaʋɛ, naa ɠa a kɛ, gè zaalai zɔlɔɔ màliɠii è ɠaazu.» 9 Ezawu ɠɛ ma: «Anii ʋooʋaʋɛ zèa, kɛ̀ɛloun, ɗɔnɔi kpein makɛ.» 10 Zakɔɓe gooɠaaʋoteni, é ɠɛ ma: «Ɓa-o, nà è maanɛɛnɛzu, ni gè zaalai zɔlɔɔgɛ è ɠaazu, nà-soloo ganii zo. Mazɔlɔɔ gwɛ̀lɛʋɛ è-ɠaazuʋɛ ʋa, eɠɛʋelei nu a wɛlɛ la GALA gaazuʋɛ ʋa, tama è yeezeiʋɛ bù ga pagɔ. 11 Deɠɛmu, nà-soloo ganii zo, nii feai è ʋɛ, tɔɔzei GALA ge zaalaiti daavegɛ bɛ̀, gè la ʋalani ani nɔpɛ ma.» É ɠilini Ezawu ma, eyɛsu naa yeezei bu.

12 Ezawu ɠɛ ma: «Ade liina, ade ʋilɛna pelei zu. Nà liizu è luɠɔ.» 13 Zakɔɓe gooɠaaʋoteni, é ɠɛ ma: «Màliɠii kwɛɛ ga doungoiti ta-vai ɓaaʋɛ, ta togani yiʋoiti ti ɲiimii ɓɔlezu. Ni nu a ɓɔina ti la, folo ɠila su ga ti ziɛ vai, togani ɓulugi kpein undaa ɠa ʋili. 14 Màliɠii lo ʋelela nɔ̀un tuɠɔ, nɛ̀i gè ga ná-botiɠɛ nui. Nɔ̀un nà, nà ʋilɛsu ti ʋolu, gi ɗa li vaa, é zoloo togani ɓulugi ná-siɛi ma, nii é kàkala, ta é zoloo doungoiti ta-ziɛi ma, eyɛsu gè zeeli màliɠii ʋɔ bɛ Seyiil.» 15 Ezawu ɠɛ ma: «Nà pɔ tɔun gè nà-nuɓusɛiti gilazuʋɛ yɛ è ʋa.» Zakɔɓe gooɠaaʋoteni, é ɠɛ ma: «Lee vaa zu naa a ɠɛ? Gè zaalai zɔlɔɔ nɔ màliɠii ɠaazu!»

16 Naama volo ná nɔ, Ezawu ɠaleni ma ga Seyiil ʋele. 17 Kɛlɛ Zakɔɓe liini Sukɔte, é pɛlɛi loni ɓɔɠɔ ʋɛ, é kotaiti to ná-togani ɓulugiti bɛ. Naa ɠa é ba, adaʋɛ ná laasei pɛai la ga Sukɔte (nii poluʋɛ ga «kotaiti»).

18 Zakɔɓe zeɠeai ma Padan-Alame, é zeelini ga pagɔ Sikɛme taazuʋɛ, Kanaan yooi zu. É zeini taa loaʋɛ. 19 Ʋɛ é ná-seɠe ɠotai loni ná, é naama you ɓuɠai ɠeyani Sikɛme kɛɛɠɛ Ɠamɔɔl ná-doun zunuiti ma, ga wali ɠae ungila (100). 20 Miná ɠa é zalaɠa ɠulazuʋɛ ɓɛtɛni ná, nii é daasei pɛɛni ga Ɛle-Ɛlɔɠee-Izelayɛle (nii poluʋɛ ga «GALA ka ga Izelayɛle ná-GALAGI»).