2
Tooma nuiti
1 Maanɔɠɔ ɠa naati tuɠɔ, niiti ti telebotala vai ɠɛʋele ɓɛtɛzu,
ti ɗa ɠisiɛ faa ɲɔi zu, ta ɠɛna laani kpidii!
Geelaa a laona, ti ʋilɛ kɛɛ vai ʋolu,
siɛgi zu ma zobogi ti ʋɛ la.
2 Ti ɗa ɠaazuɠula kpalagiti ba, ti ɗa ti zeɠe,
ta pɛlɛiti, ti ɗa ti zeɠe.
Ti ɗa loo nuiti ma, ti ɗa ta-ʋɛlɛ wu zɔɔlaiti seɠe,
ti ɗa ta-yooiti kula ti ya.
3 Naa ɠa é ba, Ɠɔoɠɔ GALAGI wooi ɠaa:
«Nà maanɔɠɔi ɠɛʋele ɓɛtɛzu niima nu ziiti daalɔɠɔma,
wo la zooga wo ʋa ɠɔgi ɠula bu,
wa ɠɛna ziaa, kɛni wo wɔungi ʋilɛ,
mazɔlɔɔ yeeɠɛɠalai é ʋaazu toɠa ga nimiza ziɛgi.»
4 Naama volo ná, ta wo laalɔ guyei zu,
ti ɗa maawɔin wuyei loo wo ma ga:
«Giya ɠa gi ɠoloɠologai mɛtu!
Gá-nuɓusɛiti ti ʋalaga ta-yooiti ma!
Zɔiti ta gi ɓɛɛzu gá-ɓalagaʋɛti,
ti ɗa ti ɠaaɠwɛ ɓɔɠɔ ʋa!
Leeni vaa zu ti loozu gi ma?»
5 Tama, wo tanɔpɛ ge la mɔ nɔnɔ zɔlɔɔga zooi zu,
nii Ɠɔoɠɔ GALAGI ná-nuɓusɛiti ti gaaɠwɛɛzu.
Zɔiti ti GALA goo wo nui wooi zakpesu
6 Ta zɛɛ ɓɔɛi wosu, ti ɗa ɠɛ ma:
«À mina zɛɛ ɓɔɛi wo fuun.
Nu mina zɛɛ ɓɔɛi wo ga naama zii, ga:
Ɓaaɠulama vai la zeɠea ma!
7 Anɛɛ naa ʋe, leeni ɠa é wosu Zakɔɓe ná-nuɓusɛiti saama?
Ɠɔoɠɔ GALAGI yiiɠaawana fala ɓaa?
Ná-faa ɠɛʋele ɠa nɛi ɓaa?»
GALA ge ɠɛ ma: «Dàawooiti ti la zolooni ga pagɔ,
naama nui ʋɛ, nii é telebodai ɠɛɛzu ɓaa?
8 Kɛlɛ wogi mɔnɔ, wo nà-nuɓusɛiti kɛɛni ga wo zili nuiti.
Wa seɠe wolai ɠulazu seɠewuzeɠeiti maazu,
naati kɔba ti leʋesu wo ɠoba ziilɛigi zu, ti ɗa zeɠe kɔɔmaʋɛ.
9 Wa nà-nuɓusɛiti ti-anzaiti kpɛɛzu ti zaama,
wo ti ɠula ti yiima ʋɛlɛiti bu,
lɛbiya ʋoganii gè feai ti ya,
wa naa ɠulazu ti ya, ti la sɔlɔɔga pɛ.
10 À wuzeɠe! À liina!
Mazɔlɔɔ niima yooi la ga dooɠo bosu,
tɔɔzei ná-kɔzɔi maaʋele ma, toɠa ʋaazu ɠoloɠolosu ga gola.
11 Nui ta a ʋaana, é ɗa kpizɛ ɲakai wo,
é ɗa zɛɛ ɓɔɛiti bo, ga:
‹Nà bosu wo ma,
wa ʋaazu dɔɔi zɔlɔɔsu ta gaazulati ganiiti.›
Zɛɛ ɓɔɛ wo nui naa ɠa soloogai niima nuɓusɛiti ma!»
GALA ka Izelayɛle nu vului mɔtaiti gaalɛ ba
12 «Nà ʋaazu wo pɛ wo ɠaalɛɛzu ba, Zakɔɓe mavofodaiti,
nà ʋaazu wo ɠaalɛɛzu ba, Izelayɛle nu vului mɔtaiti,
nà wo ɠaalɛ ba, eɠɛ baalagiti ti sasa ɠilagi zu,
eɠɛ baala kpulugiti ti laamiizu ada ɠila.
Nu ɠa ɠɛ bɛbɛ wolai zɔngɔ wooi mɛnisu.»
13 Zɔi é pelei ɠulazu, naa ɠa lo ti luɠɔ.
Ta pelei ɠula, ti ɠaaɓa,
ti leʋe siɠidaʋɛ, ti ɠula ga naa ʋelei.
Ta-masagi ɠa lo ti luɠɔ,
Ɠɔoɠɔ GALAGI ɠa a ɠɛ ti untuɠɔ.