5
Masagi ɠa zɔlɔɔ Ɓɛteleyɛme
1 Ɗa ʋe, Ɓɛteleyɛme Efelata,
ɗɛi è ga taa goi Zuda laa wolaiti saama,
è ʋɔ bɛ ɠa nu ɠulazu ná bɛ̀,
zɔi a zei Izelayɛle nuɓusɛiti unda,
nii ná-fai lɔɔzeizuʋɛ ɠulaai wɔlɔwɔlɔi ma ziɛgi zu,
yeeɠɛɠalaiti ti leʋegai kaite.
2 Naa ɠa é ba, Ɠɔoɠɔ GALAGI ɠa dɛ a ɠaazuzeɠe ná-nuɓusɛiti ba,
eyɛsu naama yeei zeeli, yeei anzanui naa,
nii maanɛai é doin zɔlɔɔ, naa sɔlɔɔ.
Kɛɛɠɛleai mɔtaiti ti yɛsu duɔlai zu,
naati ti ʋa ʋolu, ti ʋu Izelayɛle nui zɔiti ma.
3 Tɔun ka zei ga pagɔ,
é lo ná-baala kpulugiti tuɠɔ ga Ɠɔoɠɔ GALAGI ná-zobogi,
ga Ɠɔoɠɔ GALAGI maaɲiagi, nii é ga ná-GALAGI.
Ná-nuɓusɛiti ta zɛnvui wo ziilɛigi zu,
mazɔlɔɔ ɛsɛ pɛ ka bɔɔlɔ adaʋɛ pɛ,
eyɛsu zou ɓela ga ná pɛ.
4 Naa ɠa ɠɛ ga ziilɛigi!
Siɛgi zu Asiili nuiti ta ʋaa la, ti lɔ gá-yooi zu,
ti lɔ gá-ʋɛlɛ ʋagɔiti bu,
gá totuɠɔiti ta kundiɠi mɔinmɔin teʋe ti laalɔɠɔma.
5 Ta-ɠɔɔɠɔ zɔɔlaiti saɓui zu,
ta-zobogi ɠa ɠɛ Asiili yooi ma, Nimelɔde yooi.
Tɔ ɓɔɠɔi toɠa gi ɠula Asiili nuiti zeezu,
siɛgi zu ta gá-you ɠwɛpelemaʋɛ maazuɓudɛna la, ti lɔ gá-yooi zu.
Izelayɛle nuɓusɛiti ti zii ɠiligiti su
6 Izelayɛle nuɓusɛi mɔtaiti ta yɛ nuɓusɛ mɔinmɔin saama,
ta ɠɛ eɠɛ nɔɗa pagɔi Ɠɔoɠɔ GALAGI teʋesu,
ɓa eɠɛ sabalagi é ʋuuzu tufai ɠa,
zee la laani nu nɔpɛ ma,
ki ge la loni nuɓusɛ ʋa.
7 Izelayɛle nuɓusɛi mɔtaiti ta yɛ ziiti saama,
nuɓusɛ mɔinmɔin saama,
ti zu ɠa ɓaa, eɠɛ zalai é dɔɓɔ zuaiti saama,
ɓaa eɠɛ zala ɓokpagi é toganiiti saama.
Siɛgi zu é leʋesu da, é ɗa ɠɔɠɔlo ti ma, é ɗa ti ʋali ga,
nu nɔpɛ ge la kulaa zea.
8 À yeeʋɛɛ wo-ɓɔɛɲɔɠɔiti ma,
ta mɔnɔ wo zili nuiti pɛ ti ɠoloɠolo!
GALA ka ná-nuɓusɛiti ɲade
9 Ɠɔoɠɔ GALAGI wooi ɠaa:
«Naama volo ná,
nà wa-ɠɔɔɠɔ zooiti pɛ kula zooi ʋa,
gè wa-ɠɔɔɠɔ wotoloiti pɛ koloɠolo.
10 Nà wa-yooi ma laa wolaiti pɛ koloɠolo,
gè ada ɓiingiti suvaza, ʋɛti wo ʋoluzeiɗai naati ba.
11 Nà zoɠo vaiti pɛ kula wo zaama,
ungaiziɛ nu nɔpɛ ge la mɔ ɠɛa wo yeema.
12 Nà kɔɔɠɔ ganigiti kula wo zaama,
gulu zaɠaaiti ta kɔtu ziɠigiti,
wo la mɔ nɔkɔga ani nɔpɛ bu, nii wo kpɛtɛai ga yeei.
13 Nà wa-zale ɠɔɔ wuluiti tɔɔɠula,
gè wa-laaiti koloɠolo.
14 Nà potokulai ɠɛ zii ɠiligiti ma, ti la ɠoloni bɛ̀,
ga ziiɠaawanai ta ziiɠulagi.»