3
Nu ɠito GALA ba
1 Dòun zunu, mina yeema nà-kala gooiti ma,
makɛ nà-deveiti ma è-yiimaʋɛ.
2 Mazɔlɔɔ ta ta ʋili ɗa-voloi liegɔiti su, ta è-zii ma ɠonagiti,
ti undaanɛɛi ve è ʋɛ.
3 Mina ʋala wooɠɛɠiladai ma, ta gaamai,
ti ɠili ɠɔbu, è ti zɛʋɛ è-yiimaʋɛ.
4 Naazu, ɗa zaalai zɔlɔɔ GALA ta nuɓusɛiti zea,
è lɔɠɔ ʋagɔi zɔlɔɔ, è leve ga ɠima nui.
5 Ɠaliva Ɠɔoɠɔ GALAGI ma ga è-yiimaʋɛ pɛ,
mina ʋoluzei è ɓɔɠɔ ɠeleɠelegi ʋa.
6 Ziimai ɠaiziɛ è-ɠɛɛvaiti kpein su,
toɠa è ziɛ ʋele ʋagɔiti dɛɛ ga ɗe.
7 Mina ɓɔɠɔ zeɠe ga ɠima nu,
lua Ɠɔoɠɔ GALAGI ʋa, è maaɠooza faa ɲɔi ʋa.* Bogɛ mɔnɔ Wɔl 12:16 zu.
8 Toɠa ɠɛ ga kɛdɛyai è-ɓusɛi ʋɛ,
ta è-ɠaeiti niinɛ vai.
9 Ɠɔoɠɔ GALAGI lɛbi, ga è zɔlɔɔ gani ʋagɔiti,
ta è zɔlɔɔ ganii ma mɔungiti kpein.
10 Naazu, ɗa-molo ɠotaiti daa ɠa ve gola,
ɗa-lɔɔ liɠiiti daa ɠa ve ga dɔɔ niinɛiti.
11 Dòun zunu, mina ɠɛlɛ Ɠɔoɠɔ GALAGI ná-maaɠoloi ʋa,
mina ná-zelilomai ʋɛlɛʋɛlɛ.† Niima wooiti bogɛ mɔnɔ Eɓu 12:5-6 zu. Wɛlɛ ɓalaa ʋɛti: Zɔɓ 5:17, 1Kɔ 11:32.
12 Mazɔlɔɔ nii Ɠɔoɠɔ GALAGI nɛai ʋɛ, naa ɠa a ɗa zelii lo ma,
eɠɛʋelei doun kɛɛɠɛi a ɗa kɛ la ná-doun zunui ʋɛ, nii nɛai bɛ.
Ɠimalai ta undaanɛɛi
13 Undaanɛɛ nu ɠa ga naama zunui, nii é ɠigi zɔlɔɔgai,
zunui nii é ga kidafaawu nui!
14 Mazɔlɔɔ kulanumai é sɔlɔɔsu, naa vizɔgɛ walii nɔnɔi ʋa,
ná-tɔnɔgi vizɔgɛ zanu kitei ʋa.
15 Fizɔgɛ é leʋe kɔtu zɔngɔ ɓaagi pɛ ba,
è yiima anii tanɔpɛ ge la vizɔga ga tɔun kɛʋele.‡ Wɛlɛ ʋɛ: 2:4.
16 Sii zuɠoozai ɠa ɠimalai yeezai ɠa,
kɔʋɛi ɠa, naavoloi ta lɛbiyai ɠa é miná.
17 Peleiti é nu ʋilɛsu ti ʋa, naati pagɛ,
ná-peleiti kpein ta ɠomisu undaanɛɛi ʋɔ bɛ.
18 Toɠa ga zɛnvu wului§ zɛnvu wului: Wɛlɛ ʋɛti: 11:30; Zen 2:9. naati bɛ, niiti ti sosu kpe,
niiti ti makɛsu ma, naati undaanɛɛʋɛ.* undaanɛɛʋɛ: Bogɛ ná tanigaa ga sii zuɠoozai. Wɛlɛ ʋɛti: 4:10, 13; 9:11; 13:14; TbN 7:12.
19 Ɠɔoɠɔ GALAGI ná-ɠimalai ɠa é zooi ɓɛtɛni la,
ná-keleɠelegi ɠa é geeɠɔlɔgi ɓɛtɛni la.
20 Ná-ɠimalai ʋɔ, zou wu ɗɛiti kulaʋɛ, ti la zooi ma,
tonaɓiingiti ti ɗa tonai ʋu.
21 Dòun zunu, ɠili keleɠelegi ʋa, ta kidafaawui,
mina zeɠe ti ʋolu eyɛsu ɠɔ.
22 Mazɔlɔɔ ta ɠɛ ga zɛnvu ʋagɔi è ya,
ɗa ɠɛ naazu ga zaalamai.
23 Naazu, è-ɠi su ɠa ɠala, è ɗa li ga lii ʋele,
è-ɠɔɠɔi la ziɠaa.
24 Ni ɗa laana, maaɠili la ɠɛa è ma,
ɗa-ɲiimɛnii ɠaaɠaanɛ.
25 È la luaa kulafiliba vaaɓa ba,
ɓaa faa zuɠoloɠologi nii a zei nu ɲɔiti ma.
26 Mazɔlɔɔ Ɠɔoɠɔ GALAGI ɠa ɠɛ ga ɗa-ɠitogi,
toɠa balii kpein seɠe è luɠɔ.
27 Siɛnɔpɛ su zobogi è ʋɛ la,
mina ɠɛlɛ, è ʋa ɓe ɓɔsu naati ba, niiti ti ɓalaai.
28 Mina ɠɛ è-zeiɲɔɠɔi ma:
«Li è ʋa ʋolu, lina, nà fe!»
Tama anii è ya, nii ɗa fe zea.
29 Mina faa ɲɔu ɓɛtɛ ɠisu, è-zeiɲɔɠɔi laalɔɠɔma,
nii tɔun ka zeini kpɛ è ɠoba.
30 Mina nu nɔpɛ sakpe wafuun,
ni é la faa ɲɔu nɔpɛ kɛɛni ga ɗe.
31 Mina ɠaazuɠula toosu nuiti ba,
è mina ʋokɔɠɔ ti ziɛ ʋelei ma.
32 Mazɔlɔɔ yaava nuiti maayoseɠeʋɛ Ɠɔoɠɔ GALAGI ʋɛ,
kɛlɛ toɠa ɗa ɠoozu vai lɛ ga naati niiti ti zɔlegai.
33 Ɠɔoɠɔ GALAGI ɠa ɗa nu ɲɔi ná-pɛlɛyeɠei voovo,
naazu ma, toɠa ɗa tuya loo telebo nuiti seizuʋɛ ʋɛ.
34 Toɠa ɗa ɲɛɛɠula ɲɛɛɠulasu nuiti su,
kɛlɛ toɠa ɗa ɠaazu ʋagɔi lo ɓɔɠɔmaayei nuiti ba.† Bogɛ mɔnɔ, ga gɛlɛke woo zɛʋɛ ʋɔlɔmai, ʋɛti: Zak 4:6; 1Pi 5:5.
35 Lɛbiyai ɠa a ɠɛ ga ɠima nuiti tɔnɔi,
kɛlɛ faaɠaaɠaalala nuiti tɔnɔi ɠa ɠɛ ga unfegi.
*3:7 Bogɛ mɔnɔ Wɔl 12:16 zu.
†3:11 Niima wooiti bogɛ mɔnɔ Eɓu 12:5-6 zu. Wɛlɛ ɓalaa ʋɛti: Zɔɓ 5:17, 1Kɔ 11:32.
‡3:15 Wɛlɛ ʋɛ: 2:4.
§3:18 zɛnvu wului: Wɛlɛ ʋɛti: 11:30; Zen 2:9.
*3:18 undaanɛɛʋɛ: Bogɛ ná tanigaa ga sii zuɠoozai. Wɛlɛ ʋɛti: 4:10, 13; 9:11; 13:14; TbN 7:12.
†3:34 Bogɛ mɔnɔ, ga gɛlɛke woo zɛʋɛ ʋɔlɔmai, ʋɛti: Zak 4:6; 1Pi 5:5.