19
1 Fizɔgɛ nu ɠɛ ga bala nu, è eteai ziɛ ladalai zu,
è ʋa ɠɛ ga faaɠaaɠaalala nui, nii zɛai.
2 É la vizɔni nu nɔpɛ ma, é ʋa ʋala faaɠwɛgi ma,
zɔi é ɠɔɠɔzuvilɛzu, toɠa ɗa faaɠaazagi ɠɛ.
3 Nui ná-ɠimalalai ɠa ɗa ná-pelei ɠaaʋala ba,
é ɗa yiiɠaawana Ɠɔoɠɔ GALAGI ma niina.
4 Naavoloi ɠa ɗa nui wɔɔlai mɔin gola,
kɛlɛ bala nui bɔɔlai ɠa ɗa ɠɛlɛ ba.
5 Zɛɛ zeelei zalalalai la yɛga,
doɠai la ʋoolaa naa ʋa, nii é zɛɛi vazasu.
6 Nu mɔinmɔin ka ɗa sɔɓelama nui maamusɛ gaazu,
ɛsɛ ka pɔ é ɠɛ ga naa bɔɔlai, nii é faanɛɛi ɠɛɛzu.
7 Bala nui la nɛɛni kɛɛɠɛlointi bɛ,
ɓaa mu ná-siɛpoluiti, naati ta ɗa maaɠooza ba.
Siɛgi zu é wɔinni la ga é ɓɔɛ ti ʋɔ, ti la mɔ koba.
8 È kigaiziɛi maaɠɔli, ɗa naa ɠɛɛzu ɗa ɓɔɠɔi ɗa-undaanɛɛi vaa ma,
ɗa ɠilina ɠimalai ʋa, ɗa undaanɛɛi zɔlɔɔ.
9 Zɛɛ zeelei zalalalai la yɛga,
zɔi é zɛɛi vazasu, naa ɠa ɓɔɠɔ loozu ya.
10 É la vizɔni ɠimalala nui ma, é ʋa eteai ziɛ gaanɛ zu,
sɔnaga duɔi ʋa ɠɛ ga kundiɠiiti deve nu.
11 Nui ná-ɠimalai ɠa a ɗa vɔni da ná-ziiɠulagi ma,
toɠa bɛ ga lɛbiya, é ná-faawanamaiti suvaayɛ.
12 Masagi ná-ziiɠulagi maayikiʋɛ eɠɛ zalai zikɔ wooi,
kɛlɛ ná-faanɛɛi ɠɛɛʋɛ eɠɛ nɔɗagi, nii é tufai ɠa.
13 Faaɠaaɠaalala loun zunui ɠa ga kɛɛɠɛ ná-nimizai.
Kpɔɛleʋe anzanui ɠɛɛʋɛ eɠɛ ziɛ goi, nii é ʋilɛsu peinpein maa la leʋezu.
14 Nu ɠa zoo è pɛlɛi ta anii kpein sɔlɔɔ ga pogani è-ɠɛɛni zea,
kɛlɛ Ɠɔoɠɔ GALAGI ɠila kpe nɔ ɠa a zoo, é ɠima anzanui ve nu ya.
15 Dɔɔʋɛi ɠa ɗa nui wui ɓɔɠɔ ma,
zɔi ɲakaai, pului ɠa so.
16 Nii é devei zosu, naa ɠa ɓaazu zɛnvui maazu,
zɔi é la ɠaaɓaazu siɛ ʋelei ma, naa ɠa za.
17 Zɔi a bala nui maawɔinɠa, lɔdɔ kana é feezu Ɠɔoɠɔ GALAGI ya,
naa ɠa naa ve zea, nii maanɛai ga é sɔlɔɔ.
18 È-loun zunui maaɠolo gelegele, siɛgi zu kitogi ná la dɛ,* siɛgi zu kitogi ná la dɛ: Tati pelei taɠili ɓalaa ka ga nii: mazɔlɔɔ kito ka dɛ ná.
kɛlɛ mina wɔin ga paa vaa.
19 Nui ziiɠulazu, kɛni ti ani ɠula zea.
Ni ti la ani ɠulani zea, ti zobo fea bɛ ga é tɔɔzei ʋolu.† ti zobo fea bɛ ga é tɔɔzei ʋolu: Tati pelei taɠili ɓalaa ka ga niiti: ta tɔɔzei ʋolu, ɓaa ta ta ɓɔ baa vai ʋa.
20 Woilo tɛnɛ gooiti ma, va zelilomai wu,
gaaɓelasu, ɗa ɠɛ ga ɠima nu.
21 Nui ɠa ɗa faa mɔinmɔin kɛʋele ɓɛtɛ ná-kisiɛi zu,
kɛlɛ Ɠɔoɠɔ GALAGI ná-devei ɠa daa a ɗa zeeli.
22 Nii nuɓusɛi pɔ nui ná-fai zu, naa ɠa é ga wooɠɛɠiladai,
kɛlɛ tama, bala nui vizɔgɛ wooʋalada nui ʋa.
23 Ɠɔoɠɔ GALAGI ɠaazuluabai ɠa ɗa ɓɔ nu ʋa, è zɛnvui wo,‡ Wɛlɛ ʋɛ: 10:27.
anii pɛ ge ɠɛ è ya, è kpidiiti siɛ, maanɔɠɔ la zeelia è ma.
24 Ɲaka nui ɠa ɗa yeelɔ ɓaɠa ɠokoi zu,
kɛlɛ dɔɔ vai daaʋɛ, naa ɓaa.
25 Siɛgi zu ti waso nui loɠazu la, zɔi é la dɛ faa mɔinmɔin kwɛɛni, naa ɠa ɗa ɠi sɔlɔɔ,
zelii lo keleɠele nui ma, toɠa faaɠwɛgi zɔlɔɔ.
26 Zɔi é kɛɛɠɛ zopele ɲɔuzu, é dee ɓɛ,
naa ɠa ga doun zunui é unfe fai ɠɛɛzu, ta ɓaaɠulama vai.
27 Dòun zunu, ɗa ɓena woilosu kala gooi ma,
ɗa ʋoluave faaɠwɛ kpɔɛiti ba.
28 Zeele ɲɔi ɠa ɗa tukpɔɠaaleʋe vai ɠaaʋala ba,
faa ɲɔu ɠɛ nuiti daaʋɛ ɠa ɗa telebotalai mi.
29 Tukpɔi ɠɛʋele ɓɛtɛʋɛ ga é loo ɲɛɛɠulasu nuiti ma,
doɠa ɓakɔi ɠa ga faaɠaaɠaalala nuiti polu zaamaʋɛ nɔnɔ.