21
1 Masagi yii ɠa Ɠɔoɠɔ GALAGI yeezu, eɠɛ ziɛi é yeizu,
é ɗa lii la, ʋɛ nɔpɛ ná nɛai bɛ.* Pɛtɛ ʋelei é kɛɛni la ga Neɓukadenɛzaal (Dan 4:28-29, 32) ta Siluse (Eza 45:1-3; Ɛsd 6:22). Wɛlɛ ʋɛti: 16:1, 9; 19:21; 20:24.
2 Ɛsɛ ka ɗa ɠisiɛ, ga nii kpein é kɛɛzu pagɛ,
kɛlɛ Ɠɔoɠɔ GALAGI ɠa é de ɠɛɛ vaiti ma ungi ma lukpɔi ɠaaleʋezu.
3 Nui a telebo fai ta sɔle fai ɠɛɛna,
naa ɠa fizɔgai Ɠɔoɠɔ GALAGI ɠaazu, é leʋe zalaɠaiti ba.
4 Gaazulɛɛi ta waso zɛnvui,
faa ɲɔu ɠɛ nuiti ta-eteai kpein ka ga kotoi.
5 Zɔi é ɠaaɓaazu, é faazeikpasuiti kɛ, naa zɔlɔɔgi zu ɠa wɔɔlɔ,
kɛlɛ zɔi é faiti kɛɛzu ga gaazuɓadii, naa ɠa li é lɔ pului zu.
6 Niiti ti ta-ɓɛtɛi zɔlɔɔsu zɛɛi zu,
ta ga faaɠaaɠaalala nuiti ti ɓizɛzu, ti lɔ saai zu.
7 Faa ɲɔu ɠɛ nuiti ta-zuɲɔi ɠa ɗa li ga tiye,
mazɔlɔɔ ti la vaani bu, ti ʋa ladalai ɠɛ.
8 Ɲamaba nuiti ta ɗa ʋilɛ pele ɠɔɔngugi ʋolu,
kɛlɛ lada nuiti siɛ ʋelei zɔlegɛ.
9 Fizɔgɛ nu zei fiilɛ zosuʋɛ sokogi zu pɛlɛ ɠɔmaʋɛ,
wo ʋa li ɓɔsu zeizu ma, wa kpɔɛleʋe anzanui.
10 Faa ɲɔu ɠɛ nui yiimai ɠa ga faa ɲɔu ɠɛɛ vai,
anɛɛ bɔɔlai ɓɔɠɔi, é la loga maazu.
11 Maaɠolo ɓakɔi a zeelina waso nui ma, zɔi é la dɛ faa mɔinmɔin kwɛɛ, naa ɓalaa ɠa ɗa ɠi sɔlɔɔ,
ɗa ɠima nui ɠalana, toɠa ɗa faaɠwɛgi zɔlɔɔ.
12 Telebo nui† telebo nui: Tati pelei taɠili ɓalaa ka ga nii: telebo GALAGI. ɠa ɗa ɠida naa kpein bu, nii é ɠɛɛzu faa ɲɔu ɠɛ nuiti ta-ʋɛlɛi wu,
siɛgi zu ti lɔɔzu la maanɔɠɔi zu.
13 Nui nii é la woilosu maawɔin nui ná-kpee wooi ma,
tɔ ɓɔɠɔi ɠa kpeei loo, é la gooɠaaʋote sɔlɔɔga.
14 Faanɛɛi é ɠɛɛzu dɔɔɠuzu, naa ɠa ɗa ziiɠaawanai ɠaayei.
Lobɛanii é leʋesu dɔɔɠuzu, naa ɠa ɗa ziiɠula golai ɠaayei.‡ Wɛlɛ ʋɛti: 17:8, 23.
15 Toɠa ga koozunɛ vaa telebo nui ʋɛ, sɔle fai a ɠɛna ɠɛa,
kɛlɛ naa ɠa ga nimiza vai faa ɲɔu ɠɛ nui ʋɛ.
16 Nui nii é zeɠezu ɠi pagɔi ma ʋelei ʋa,
ná-dooɠo bosuʋɛ ɠa ɠɛɛzu ga gɔvɛiti ta-maaɓɔgi zu.
17 Zɔi ɓɔɠɔyiimai nɛai bɛ, toɠa kpalai ɠwɛɛ,
zɔi é ɓɔɠɔ veai dɔɔi ya, ta etea ɠaazuɠulapɔi, é la ɓɛtɛa eyɛsu pɛ.
18 Faa ɲɔu ɠɛ nui ɠa é ga telebo nui unmɔɔ ganii,
yaava nui ɠɛ ga sɔle nuiti tɔnɔi.
19 Fizɔgɛ nu zei zooi ta zu naa vɔai,
è mina zei kpɔɛleʋe anzanui ɠoba, ziiɠaawanaai.
20 Ɠima nui zeizuʋɛ, nu ɠa ɗa ani naavolo ʋagɔiti ka ná, ta gulɔ makɛgaiti,
faaɠaaɠaalala nui ɠa ɗa naati suvaza, niiti ti zea.
21 Zɔi é ɠaaɓaazu, é ɠɛ ga telebo nu, ta wooɠɛɠilada nu, sii zu ɠa ɠooza,
toɠa zo ga telebodai ta unfemai.
22 Ɠima nui ɠa laalɛɛna taa wolai wu, nii salaʋusu ɠɛzɛɠɛzɛgiti ti maaɓɛɛzu,
é siɠigi loka, nii taai ɠitogai ba.
23 Zɔi é ɓaazu daaʋɛ maazu ta nɛgi,
naa ɠa ɓɔɠɔ ɠizo kidaaʋili faa mɔinmɔin ma.
24 Ɲɛɛɠulasu nui ɠa ga waso nui, ta gaazulɛɛ nui,
nii waso dateʋegai diizu faiti kɛɛ vai ma.
25 Ɲaka nui ɠa ɗa za, tɔɔzei ziima vaiti daa la zeelizu,
mazɔlɔɔ é la pɔ é ʋa yeeʋɛɛ fai nɔpɛ ba.
26 Yeenɔpɛ, toɠa gaazuɠulapɔi laawu,
kɛlɛ telebo nui ɠa ɗa ti pɛ kwɛɛ, é la ta makɛga ɓɔɠɔ ʋɛ.
27 Faa ɲɔu ɠɛ nuiti ta-zalaɠai ɠa ga ziimaziɛ ganii,
sɔnaga ta ʋaana kulazu ga kisiɛ ɲɔi.
28 Zɛɛ zeelei undaa ɠa ʋili,
kɛlɛ zɔi é gaamai wosu, nii é mɛnini, zobo ka naa ʋɛ siɛnɔpɛ su é ɓɔɛ.
29 Faa ɲɔu ɠɛ nui ɠa ɗa ɓɔɠɔ ɠula ga lada nu,
kɛlɛ sɔle nui ɠa ɗa ɠaaɓa siɛ ʋelei ma.
30 Nuɓusɛi ná-ɠimalai, ta ná-keleɠelegi ta ná-kisiɛi,
naati tanɔpɛ ge la zooga, é ʋa li Ɠɔoɠɔ GALAGI yiimai laalɔɠɔma.
31 Ta ɗa sooiti maaɠili kɔɔɠɔ voloi laalɔɠɔma,
kɛlɛ pilɛ sɔlɔɔ fai ɠa Ɠɔoɠɔ GALAGI yeezu.