23
1 Ni ɗa ɠɛna zeini daami wosuʋɛ taɓali ɠa,
wa unfema nui ta, dama ga ná-fai.* dama ga ná-fai: Tati pelei taɠili ɓalaa ka ga nii: dama ga nii é è-ɠakalaʋɛ.
2 Ta ɠula ɗa-ʋului la,
ni è ɠulukpugɛ.
3 Mina daamiani pagɔiti nɔ ʋɛtɛ,
tanisu ta feezu è ya kisiɛ ɲɔi maazu.
4 Mina ɓɔɠɔ ɓɔlɔ ga è ɓɛtɛ vai,
ɠɛlɛ vɔlɔ ma ɠisiɛi ʋa.† Tati pelei taɠili ɓalaa ka ga nii: ɠɛ ga keleɠele nu è kwɛpelezu.
5 È ɠɛɛzu nɔ, è ɠaazulo naavoloi ʋa, tɔun é ɓega ga ɲɛɛlɛ,
mazɔlɔɔ toɠa koʋegiti tosu ɓɔɠɔ ʋa, é ɠoʋe, é li ɠoozama, eɠɛ koɠɛi é geezuʋɛ.
6 À mina ɓɔ daamiani ma, wa nui é ga ziiʋodɔɠɔ nui,
è ɠaazu mina ɠula daamiani pagɔiti ba.
7 Mazɔlɔɔ nui ʋe kpegai na ga deve, é ɠɛ ma: «Laami, è ɓɔɔle.»
Kɛlɛ gaamai zu, é la è ʋɔ ziimaʋɛ.
8 Ɗa unpili ga ma ɓuɠai è miai,
woo nɛɛnɛgiti è ti wogai, ti la mɔ faa ʋaa.
9 Mina ɓɔɛ faaɠaaɠaalala nui ʋɔ,
toɠa è ɓɔɛ woo ʋagɔiti baaɠula.
10 Mina kwɛpelema ʋɔlɔzaɠagi maavalibo,
è ʋa wɔin ga è podointi ta-yooi zeɠe.‡ Wɛlɛ ʋɛti: 15:25; 22:28; TSV 19:14.
11 Tɔɔzei ti maalobo nu wola ɠa ná,
GALA ɓɔɠɔi ɠa ti maalobo è laalɔɠɔma.
12 Yiilɔɔ maaɠoloi wu, è sɔlɔɔsu,
è woilo faaɠwɛgi ma ɠalagi ma, é wosu ga ɗe.
13 Mina inɛinɛ ga è-loin maaɠolo vai,
anɛɛ ni ɗa doɠazu ga kpakɔ ɲɛ tiegɔ, é la zaa.
14 Naa ɠa zoo é kaka faiti kpudɛ maazu,
niiti ta la ɠɛ ga undaaʋili faa.
15 Dòun zunu, ni ɗa ɠilina ɠimalai ʋa ga è-yii pɛ,
nà koozunɛɛ wola zɔlɔɔ naa zu.
16 Siɛgi zu è ɓɔɛzu la ga gaamai,
toɠa bɛ̀ ga koozunɛɛ wola.
17 Mina ɠaazuɠula faa ɲɔu ɠɛ nuiti ba,
kɛlɛ yeenɔpɛ ɠolo Ɠɔoɠɔ GALAGI ʋɛ.
18 Mazɔlɔɔ ɗa ʋelela ʋelei zɔlɔɔ,
ɗa-ɠitogi la ɠoloɠologa.
19 Woilo gòo ma ga pagɔ, dòun zunu, è ɠɛ ga ɠima nu,
è yiiʋilɛ sɔle pelei ʋa.
20 Mina ʋilɛ dɔɔ ɓɔle nuiti polu,
ɓaa naati niiti ti ɓɔɠɔ veezu daamii nɛɛnɛgiti zea.
21 Mazɔlɔɔ dɔɔ ɓɔle nuiti, ta ɠulukpu nuiti, ta ɗa gaaɓela nimizai zu,
ɲiimɛni wo nuiti ɓalaa, ná tago ʋena, ti ɓɔɠɔ maaɠili ga seɠe zaɠaiti.
22 Woilo è-ɠɛɛ wooi ma, nii é è zɔlɔɔga,
mina è-lee ʋɛlɛʋɛlɛ, siɛgi zu é ʋɔlɔzaɠasu da.
23 Gaamai ɠaiziɛ, ta ɠimalai, ta kalagi, ta faawuuzumɔgi,
mina ti zuɠoloɠolo.
24 Telebo nui kɛɛɠɛ ɠa ɗa ɠɛ koozunɛɛi zu ɠɔ,
undaanɛɛ nu ɠa ga naa, nii é ɠima loun zunui zɔlɔɔsu.
25 È-ɠɛɛ ta è-lee ti ɠoozunɛ è ma,
naama undaanɛɛi ɠɛ ga anzanui naa nɔnɔ, nii é è zɔlɔɔga eteai zu.
26 Dòun zunu, la nɔ̀un da,
è sìɛ ʋelei wuuzumɔ.
27 Mazɔlɔɔ koloɠolo anzanui ɠa ga zeɠezaɠai suɠoozaai,
wɛɛnziɛ anzanui ɠa ga kɔlɔyeɠei sulɔiɗai.§ Wɛlɛ ʋɛ: 5:5.
28 Toɠa ɗa pele ɓɔungi wo, eɠɛ toosu nu,
toɠa ɗa zunu mɔinmɔin kɛ ga wooʋalada nu.
29 Ɓɛ ɠa é kpeei loozu ga: «Ee, dèe, màanɔɠɔa»?
Ɓɛ ɠa kpɔɛ wafuungiti ti losu ba, maa ɗa wana un ge la ba?
Ɓɛ ɠa gaazuɠɛzɛiti kpɔiɗai su?
30 Naati, niiti ti lɛbisu dɔɔ ɓɔlezuʋɛ,
tɛi ti dɔɔ zupuiti kpɔlezu.* Wɛlɛ 9:2 zu, ta suɠulazuʋɛ.
31 Mina wɛlɛ dɔɔi ʋa pelei ʋa,
é nɛsu, é ɗa volo ʋɛɛlɛi zu, é ɗa yei vaa.
32 Toɠa ɗa gaaɓela ga, é nui ɲi eɠɛ kaalii,
é nu wo eɠɛ kpokpo ganii ma wanai ba.
33 È-ɠaazuʋɛ ɠa faa ɠiligiti ka,
è-ɠigi ta è-laawooiti ta zupu.† Wɛlɛ ʋɛ: 6:10-11.
34 Toɠa ɠɛ è ɠisu, eɠɛ ɗa ɠɛ laani kpoloɗɛi zaamaʋɛ,
eɠɛ ɓato zu nui, é zɛlɛni ga ma wului, fiilɛ wolai ɗa ɲiikpi.
35 È ɗa ɠɛ ma: «Ta dòɠazu, gaa la wanazu ga ze,
ti poolɛni ga kpakɔi, gè la gaaɠaani!
Nà wuunsu yeelɛ? Kɛni gè ani zɔlɔɔ, nii nà kpɔle mɔnɔ!»