16
1–33 Pea hokohoko atu ki he ngaahi vahe hoko...
1 ʻOku meia Sihova ʻae teuteu ʻoe loto ʻi he tangata,
pea mo e tali ʻoe ʻelelo.
2 ʻOku maʻa ʻae hala kotoa pē ʻoe tangata ki hono mata ʻoʻona;
ka ʻoku fakamaau ʻe Sihova ʻae ngaahi laumālie.
3 Tuku kia Sihova hoʻo ngāue kotoa pē,
pea ʻe fokotuʻumaʻu ai hoʻo ngaahi mahalo.
4 Kuo ngaohi ʻe Sihova ʻae meʻa kotoa pē maʻana:
ʻio, naʻa mo e kau angahala ki he ʻaho ʻoe kovi.
5 ʻOku fakalielia kia Sihova ʻakinautolu kotoa pē ʻoku loto fielahi:
pea kapau ʻe puke ʻae nima ki he nima, ʻe ʻikai taʻehoko hono tautea.
6 ʻOku fakamaʻa mei he angahala ʻe he ʻaloʻofa mo e moʻoni:
pea ko e meʻa ʻi he manavahē kia Sihova ʻoku tafoki ai ʻae tangata mei he kovi.
7 ʻOka lelei kia Sihova ʻae ngaahi hala ʻoe tangata,
ʻoku ne pule ki hono ngaahi fili ke nau fakalelei mo ia.
8 ʻOku lelei hake ʻae meʻa siʻi mo e māʻoniʻoni,
ʻi he maʻu ʻae koloa lahi ʻi he taʻetotonu.
9 ʻOku fili ʻe he loto ʻoe tangata ki hono hala:
ka ʻoku fakahinohino ʻe Sihova ʻa ʻene ngaahi laka.
10 ʻOku haʻu mei he loungutu ʻoe tuʻi ʻae fakamaau ʻoku totonu:
ʻoku ʻikai fai hala hono ngutu ʻi heʻene fai ʻae fakamaau.
11 Ko e meʻa fakamamafa mo e meʻa fakatatau totonu ʻoku meia Sihova ia:
ko e maka fakamamafa kotoa pē ʻoku ʻi he kato ko ʻene ngāue ia.
12 Ko e meʻa fakalielia ʻae fai angahala ʻae ngaahi tuʻi:
he ʻoku fokotuʻumaʻu ʻae nofoʻa ʻoe tuʻi ʻi he māʻoniʻoni.
13 Ko e fiefiaʻanga ʻoe ngaahi tuʻi ʻae loungutu ʻoku māʻoniʻoni;
pea ʻoku nau ʻofa kiate ia ʻoku lea totonu.
14 Ko e tuputāmaki ʻoe tuʻi ʻoku tatau ia mo e ngaahi talafekau ʻae mate:
ka ʻe lolomi ia ʻe he tangata ʻoku poto.
15 ʻI he maama ʻoe fofonga ʻoe tuʻi ʻoku ai ʻae moʻui;
pea ko ʻene ʻofa ʻoku hangē ia ko e ʻao ʻoe ʻuha mui.
16 He ʻikai ʻoku lelei hake ʻae maʻu ʻoe poto ʻi he maʻu ʻoe koula?
Pea ʻikai ʻoku lelei hake ʻae maʻu ʻae faʻa ʻilo ʻi he fili ki he siliva?
17 Ko e hala motuʻa ʻoe angatonu ko ʻenau afe mei he kovi:
ko ia ʻoku tauhi ki hono hala ʻoku fakamoʻui ʻe ia hono laumālie.
18 ʻOku muʻomuʻa ʻae fielahi ʻi he fakaʻauha,
pea mo e loto angahiki ʻi he hoko ʻae hinga.
19 ʻOku lelei lahi hake ia ke loto angavaivai mo e kakai angavaivai,
ʻi he vahevahe ha koloa kuo maʻu mo e fielahi.
20 ʻE maʻu ʻae lelei ʻe ia ʻoku tokanga fakapotopoto ki ha meʻa:
pea ʻoku monūʻia ia ʻaia ʻoku falala kia Sihova.
21 ʻE ui ʻakinautolu ʻoku loto poto ko e fakamākukanga;
pea ʻoku tupu ʻae poto mei he loungutu ʻoku melie.
22 Ko e faʻa ʻilo ko e matavai ia ʻoe moʻui kiate ia ʻoku maʻu ia:
ka ko e akonaki mei he vale ko e vale pe ia.
23 ʻOku akoʻi ʻe he loto ʻoe poto ʻa hono ngutu,
pea ʻoku ne fakalahi ʻae poto ki hono loungutu.
24 ʻOku tatau mo e ngeʻesi ʻoe hone ʻae lea mālie,
ʻi hono huʻa melie ki he laumālie, pea ko e moʻui ia ki he ngaahi hui.
25 ʻOku ai ʻae hala ʻoku matamata totonu ki he tangata,
ka ko hono ngataʻanga ʻoʻona ko e ngaahi hala ki he mate.
26 Ko ia ʻoku ngaue ʻoku ngāue maʻana:
he ʻoku tangi ai kiate ia ʻa hono ngutu.
27 ʻOku keli hake ʻae kovi ʻe he tangata angakovi:
pea ʻoku ʻi hono loungutu ʻae afi kakaha.
28 ʻOku tūtuuʻi ʻe he tangata angakovi ʻae feʻiteʻitani:
pea ʻoku fakamāvae ʻe he tangata faʻa fafana ʻae kaumeʻa feʻofoʻofani.
29 ʻOku fakahalaʻi ʻe he tangata ʻoku angamālohi ʻa hono kāinga,
ʻo ne tataki ia ki he hala ʻoku ʻikai lelei.
30 ʻOku ne fakamohe hono mata koeʻuhi ke ne fakakaukau ki he ngaahi meʻa ʻoku kovi:
ʻi he ngāue ʻa hono loungutu ʻoku hoko ai ʻae kovi.
31 Ko e ʻuluhinā ko e tatā ia ʻoe ongoongolelei,
ʻo ʻilo ia ʻi he hala ʻoe māʻoniʻoni.
32 Ko ia ʻoku fakatotoka ki he ʻita ʻoku lelei hake ia ʻi ha taha ʻoku mālohi;
pea pehē foki ia ʻoku faʻa pule ki hono loto ʻi ha taha ʻoku hamu ha kolo.
33 ʻOku lī ki he loto kofu ʻae talotalo;
ka ʻoku ʻia Sihova, ʻa hono fakamaauʻi.