3
Zizas i mobig den Mozes
1 Ol amenpamle uda God bin singaut yumpla po go po eben, yumpla mas prapa tingbaut Zizas uda yumpla spik em i Mesizman blo God ane Bosprist blo yumpla. 2 God i bin suze em ane em i bin mata stap truwan po God, seimkain wase Mozes i bin mata stap truwan po God, ane em bin mata mekem wanem God i wandem lo dem pipol blo God.
3 Bat Zizas i da wan uda mas gede mospesil ona den Mozes, seimkain wase kapenta uda bilde aus. Da kapenta i da wan uda mas gede mo preiz den da aus. 4 Ebridem aus, i gad kapenta, bat God i da prapa bigbos, bikoz em i da wan i bin meke ebriting.
5 Mozes i bin gudwokman wea aus blo God, bat em bin mata sebant. Em bin spikbaut demting wanem i stil go kam. 6 Kraist nau em i da tru wokman blo God. Em da bos blo yumpla ebribodi. Ip yumpla i kip bilib ane mata stap strong po Kraist, den yumpla i go stap ol pamle blo God. 7 Daswai da OliSpirit i spik:
‘Tidei yupla mas lisen po wanem God i spik,
8 yupla mas no kloze at blo yupla gense em,
no kam wase dem pipol blo Izrael wen dempla i bin sluwei prom God,
de lo da dezet eria, wen dempla i bin teste da kuaiat gudat blo God.
9 God i bin spik, “Ai bin meke mirikal po poti iya po ol dem longtaim ate blo yupla,
bat stil dempla i no bin tekenotis.
10 Ai bin wail po dempla ane ai bin spik:
‘At blo dempla i bin sluwei prom mi,
Dempla no bin wande meke demting wea ai bin spik dempla po mekem.’
11 So midel lo da wail blo mi, ai bin meke strongpromis gense dempla diskain ya,
‘Dempla i nogo kam po ples blo mi, ane dempla nogo gad sans po spel.’ ” ’
12 Ol labing bala ane sisi, prapa lugaut prom no meke at blo yupla trabol so yupla nomo go gad bilib ane go tanewei prom da God uda i mata laip. 13 Yupla i mas wone wananada tidei ane ebridei so yupla nogo tan pole sin ane kloze at blo yupla gense God. 14 Ip yumpla i kip bilib ane kip trase God wea seimkain strong wen yumpla i bin bilib de pas, den yumpla i go seremaut midel lo yumplaselp, ebriting wanem i blo Kraist. 15 Bat yumpla mas no piged da woning blo God ya:
‘Tidei yupla mas lisen po wanem God i spik,
yupla mas no kloze at blo yupla gense em,
no kam wase dem pipol blo Izrael wen dempla i bin sluwei prom God.’
16 Uda demwan wea Mozes i bin lide dempla kamaut prom Izipt? I demwan uda i bin lisen bois blo God. Bat dempla i bin stil tanewei go gense God. 17 Ane uda i bin meke God wail po poti iya? I bin dem pipol uda i bin poldaun ded de lo da dezet eria prom meke sin. 18 Ane uda demwan wea God i bin meke promis dat dempla i nogo gad sans po spel? Em i bin spik po demwan uda no bin lisen po em ane dempla i bin tanewei go gense em. 19 So yumpla luk nau, dempla i no bin gad sans po spel bikoz dempla no bin lisen ane bilib.