8
Zizas i bosprist blo yumpla
1 Diswan ya wanem mipla i min. Yumpla i gad Bosprist uda i sidaun wea aiples blo ona lo raitansaid blo da spesil tron blo God de lo eben. 2 Bosprist blo yumpla i wok lo dat prapa Olitent blo wosip, wea man i no bin mekem, bat wea God i bin mekem.
3 Ebridem bosprist mas teke opring ane sakripais kam po God, so dat Bosprist blo yumpla mas meke seimkain tu. 4 Bikoz da Bosprist blo yumpla i no bin kam prom pamlelain blo Libai, em kan bi prist ya wea ert bikoz i gad ol prist ya uda i meke opring ane sakripais po God, wiskain lo blo Mozes i spik. 5 Da wok wea dem prist i mekem ya, i kasa piksa ane sado po da prapa wok de antap lo eben. So wen Mozes i bin redi po bilde da Olitent, God i bin wone em diskain, ‘No meke no misteik po da plan wea ai bin soe yu ya lo dis maunten.’
6 Bat da wok blo da Bosprist blo yumpla wea God i bin gibem, i prapa mina nadakain mobig den dem wok blo dem prist wea ol i mekem po pole dem oul lo. Bikoz tru dat niu strong griment wea Zizas i bin tekem prom God po ol dem pipol blo em, i prapa nadakain mobeta den dat oulwan. Dis niu strong griment i da promis baut ol mata gudting.
7 Ip i no bin gad nating rong wea pas strong griment, wel God i no bin meke da sekanwan. 8 Bat God i bin paine polt wea ol pipol blo em, ane em bin spik diskain:
‘Da taim i go kam, da AntapGod i spik,
wen ai go meke niu strong griment,
ane i gobi wea pipol blo Izrael ane pipol blo Zuda.
9 Dis strong griment, i no gobi wase da strong griment
wea ai i bin mekem po dem ate blo dempla,
wea ai bin kese an blo dempla
po teke dempla kamaut prom Izipt,
wea dempla i bin broke strong griment blo mi.
Daswai ai bin tane baik blo mi po dempla.
10 Da AntapGod i bin spik:
Diswan gobi niu strong griment wea ai go mekem
wea dem pipol blo Izrael, apta dat dei de i go kam.
Ai go pute dem tising blo mi lo sens blo dempla,
so dempla go sabe.
Ane ai go raitem lo at blo dempla
so dempla go meke demting.
Ai gobi God blo dempla
ane dempla i gobi pipol blo mi.
11 Ane dempla nogo nid po tise dem neiba
o dempla oun pamle,
ane spik diskain, “Wa. Yupla mas sabe uda da AntapGod.”
Ebriwan, prom big tu smol
ol sabe uda mi, God.
12 Ai go pogib ol sin blo dempla wea dempla i bin mekem.
Ane ai nogo sabe dem sin blo dempla nomo.’ * Zeramaia 31.31
13 God i bin spik diswan i da niu strong griment, bikoz dat pas strong griment God i bin putem wansaid, bikoz i go pinis.